te ruu ma kaintekateka ao tabo n tekateka

Aokati 9–15

Reirei ao Berita aika Tabu 88

“Katea … ana Auti te Atua”

Reirei ao Berita aika Tabu 88:118 e reirei, “Reirei imarenami taekan te wanawana.” Tera “taekan te wanawana” n Reirei ao Berita aika Tabu 88 ae tara n irekereke riki nakoia ataei ake ko reireiniia?

Korei Am Namakin

te aikaon ibukin te tibwatibwa

Kaungaa te Tibwatibwa

Tuangiia ataei bwa Tamara are i Karawa ao Iesu Kristo a tangiriira bwa tina reitinako n reiakinaki inanon maiura. Ngkanne tuangiia bwa a na tibwa te bwai teuana are e a reiakinna ni mweengaia, n te reirei, ke n te ekaretia.

te aikaon ibukin te anga reirei

Reirei te Reirei: Ataei aika a Uarereke

Reirei ao Berita aika Tabu 88:63

Te Atua e tangiria bwa N na kaan ma Ngaia.

Tera ae ko kona ni karaoia ni buokiia ataei ake ko reireiniia bwa a na namakina raonakiia inanon maiuia iroun te Atua?

Waaki ni Kakukurei aika a Kona ni Karaoaki

• Ngkai ko wareka Reirei ao Berita aika Tabu 88:63, kaoiia ataei bwa a na karaoa te mwakuri iaon tabeua taeka ake a ongo. Te katooto, a kona ni bakaea ae a kakaea te bwai teuana ke a karebwerebwe.

• Tuanga te ataei bwa e na taua tamnein Iesu i moan te ruu ngkai ataei a tei i buki n te ruu. Kaoiia ataei bwa a na keerake teuana te rangata ni katoa te tai are ko taekina iai te bwai ae ko kona ni karaoia ni kaan riki nakon te Tia Kamaiu ao ni keerikaaki teuana te rangata ni katoa te tai are ko taekina iai te bwai ae kararoaira iai mairoun te Tia Kamaiu. Kaota am koaua bwa ngkana ti kataia ni kaan riki nakon te Uea, E na kaniia riki nakoira.

Reirei ao Berita aika Tabu 88:118

Tamara are i Karawa e tangirai bwa N na reireiaki.

“Te reirei bon mwakoron ana babaire Tamara are i Karawa ae e kakaawaki ibukin buokam ni kona n riki n ai Arona. … Te reirei are ko karekea e bon kakaawaki nakoim n am tai ni maiu ao n te maiu ae e na roko” (Ibukin Kakorakoraia te Roronrikirake, 9).

Waaki ni Kakukurei aika a Kona ni Karaoaki

• Kaota tamnein te reirei, ke korea tamnein teuana iaon te burakibooti, ao kaoiia ataei bwa a na kabwarabwara bwa tera te reirei ao tera ae e karaoaki ikekei. Karakina taekan te reirei are e waakinna Iotebwa Timiti (taraa “Mwakoro 31: Taeka ni Wanawana,” Karaki man Reirei ao Berita aika Tabu, 119–22). Kaotia nakoia ataei tamnein te mweenga, te ekaretia, ao te tembora, ao tuangiia bwa a kanga tabo aikai n riki naba n ai aron te reirei.

• Anenea tekorana te kuna iaon te reirei, n aron “Search, Ponder, and Pray” (Children’s Songbook, 109). Tuangiia ataei tera ae a tatangiria n reiakiinna.

• Wareka Reirei ao Berita aika Tabu 88:118, ao kamatata te kibu “reirei imarenami.” Tibwai tabeua wanawana ake ko a tia n reiakin mai irouia ataei n tatabemaniia n am kiraati, ao kaoia bwa a na tibwai wanawana ake a tia n reiakinii.

  ataei a kamatebwai ni koroboki aika a tabu

  Ti riai n ukoukora te wanawana ao te kamatebwai.

Reirei ao Berita aika Tabu 88:119

Te Tembora Bon ana Auti te Atua.

Iangoia bwa kona kanga ni buokiia ataei n namakina tangiran te tembora ao te nano ni kan neboa te Uea ikekei ngkana a tauraoi.

Waaki ni Kakukurei aika a Kona ni Karaoaki

• Kaotia nakoia ataei aron karaoan te “taua” man katean baia ao ni kabooi tabonibaia ni kabane. Wareka Reirei ao Berita aika Tabu 88:119, ao tuangiia bwa a na karaoa te taua ni katoa te tai are koa taekina iai te taeka “auti.” Kabwarabwara bwa Tamara are i Karawa e tangira Iotebwa Timiti ao aika Itiaki bwa a na katea te tembora, ke ana “auti te Atua.” Kaota tamnein te tembora ae uakaan ngkai ko taetae iaon te kakokoro imarenan te tembora ao ana autinibootaki te Ekaretia.

• Tibwa am koaua iaon te tembora, ao ikotaki anenea te anene iaon te tembora, n aron ae “I Love to See the Temple” (Children’s Songbook, 95). Kaoia ataei bwa a na korea tamneia ngke a nako n te tembora.

te aikaon ibukin te anga reirei

Reirei te Reirei: Ataei aika a Ikawai Riki

Reirei ao Berita aika Tabu 88:68, 74

Iesu Kristo e kona ni kaitiakai man te bure.

Ni kaitiakaki nanona ni kaitiakaki ao n itiaki. Kona kanga ni buokiia ataei ake ko reireiniia bwa a na ota bwa a kona ni kaitiakaki ngkana a iriira Iesu Kristo?

Waaki ni Kakukurei aika a Kona ni Karaoaki

• Kaoa temanna te ataei bwa e na wareka Reirei ao Berita aika Tabu 88:68 ni kabaibati ao temanna bwa e na wareka kibu 74. Tuangiia ataei bwa a na kakauongo nakon kibu aika uoua aikai. Tina kanga ni “katabua” rabwatara? (Ngkana e kainnanoaki, buokiia ataei bwa a na kakaea “Sanctification” n Bwai ni Kairi nakon Koroboki aika Tabu.) Korea tamnein te buro, te bai, ao te wae iaon te burakibooti. Buokiia ataei n iangoa te bwai are e kona n nanonaki bwa e na “itiaki” ao “kaitiaki” nanora, baira, ao waera. E kanga te Tia Kamaiu ni buokiira ni karaoa aei? Tina kanga ni kabonganai nanora, baira, ao waera n riki riki n ai aron Iesu?

• Kabwarabwara bwa te Uea e tangiriia Ana aomata bwa a na katabuaki imwain ae a kona n rin inanon te tembora. Iangoa kaoan te ataeinimwane ke te ataeinnaine are iai ana rekomente n rin n te tembora bwa e na nakon te kiraati. Kaoa teuanne ke neienne bwa e na kaotia bwa aekakira taraan te rekomente, maroroakinna bwa tera ae karaoia ni maiuakinna bwa a na tau, ao n tibwaia bwa bukin tera e kakaawaki karekean te rekomente n rin n te tembora e ngae ngke aki maeka ni uakaan ma te tembora.

Reirei ao Berita aika Tabu 88:77–80, 118

Tamara are i Karawa e tangirai bwa N na reireiaki.

Ko kona ni buokiia ataei n ataia bwa reiakinan bwain te maiu n tamnei ao n rabwata e kona ni buokiia ni katauraoia ni beku ibukin te Uea.

Waaki ni Kakukurei aika a Kona ni Karaoaki

• Koreia iaon te burakibooti Tera, Bukin tera, ao E Kanga. Kaoiia ataei bwa a na wareka Reirei ao Berita aika Tabu 88:77–79 ni kaka uoman ao korei rinanin bwaai ake e tangiria te Uea bwa tina reiakinii. Imwiina tuangiia bwa a na kakaea n kibu 80 ni kunea bwa bukin tera E tangiriira bwa tina reiakini. A kona ngkanne ni kakaai kibu 118 ni karekea bwa e kanga arora n reiakin. Tera ae ti reiakinna man kibu aikai n aron ana taratara te Uea iaon te reirei ao te reiakinaki?

• Kaota mwaben te aonaaba, ao ikotaki wareka Reirei ao Berita aika Tabu 88:79. Bukin tera e kakawaki ibukira bwa ti na atai aba ake tabeua ao aia katei? Ngkana ngkoe ke ataei ake ko reireiniia a tia n roko ke ni maeka n te aba teuana, kaoti bwaai ake a tei ibukin te katei anne, ao tibwai bwaai ake ko a tia n reiakini.

Reirei ao Berita aika Tabu 88:119–26

“Katea … ana Auti te Atua.”

Ana kaetieti te Uea ni kaeineti ma “ana auti te Atua” e kona n riki bwa te kairi ae ibuobuoki ibukira ngkai ti katei maiura ao mweengara.

Waaki ni Kakukurei aika a Kona ni Karaoaki

• Kaoiia ataei bwa a na rinei itiua taeka ake a kabwarabwara mweengaia ke mweengan temanna ae a tia ni kawaria. Ngkanne tuangiia bwa a na wareka Reirei ao Berita aika Tabu 88:119 ao kakaai itiua taeka ake e kabongana te Uea ni kabwarabwara iai Ana auti. Buokiia ataei n iangoi kawai ake a kona iai ni karaoa mweengaia bwa “ana auti te Atua.”

• Katoaia ataei n anganiia te kibu man Reirei ao Berita aika Tabu 88:119–26 bwa a na korea tamneina. Ngkana a kaota aia tamnei nakoia imarenaia, anganiia ataei bwa a na kakaai kibu ni keetinna bwa kibu raa ake a tei ibukin tamnei akanne.

• Koreia iaon te burakibooti Karaoi ao Tai Karaoi. Kaoia ataei bwa a na wareka Reirei ao Berita aika Tabu 88:119–26 ao korei rinanin bwaai ake e tangiria te Uea bwa a na karaoi aika Itiaki ke a na aki karaoi ni katauraoi n reiakinna inanon te tembora. A kona ni kakai taeka aika aki atai n te rikitinari. Kaoia ataei bwa a na rinea te bwai are a na waaki ni karaoia ke te bwai ae a na katoka karaoana.

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na korei taekan ke tamnein te bwai teuana are a reiakinna are a tangiria ni kan tibwaia ma aia utu.

Kanakoraoan Ara Anga Reirei

Buokiia ataei aika uarereke bwa a na ira maroroakinan te euangkerio. Kona bae n iangoi kawai ni kareke iango ibukin maroroakinan te euangkerio ma ataei aika uarereke. Te katooto, ko kona ni uotia nakon te kiraati te bwai are a kona ataei n taua ngkana e boo aia tai n taetae.

iteraniba ibukin te waaki ni kakukurei: te tembora bon ana auti te Uea