Ngaira ma Ngaiia ao Ngaiia ma Ngaira, iroun Caitlin Connolly

Nobembwa 1–7

Reirei ao Berita aika Tabu 125–128

“Bwanaan te Kukurei ibukiia ake a Maiu ao ake a Mate”

Ngkana ko reireiniia ataei aika a uarereke ao ko kainnanoa riki te ibuobuoki, taraa “Tobwaan Kainnanoia Ataei aika a Uarereke” mai moa n te boki aei.

Korei Am Namakin

Kaungaa te Tibwatibwa

Buokiia ataei bwa a na iangoi bwaai ake a tia n reiakin n te wiiki aei ni mweengaia ke n te Moanrinan. Anganiia tabeua te miniti bwa a na korea tamnein te bwai are a iangoia ao n tibwauaia ma kaain te kiraati.

Reirei te Reirei: Ataei aika a Uarereke

Reirei ao Berita aika Tabu 126:3

I tangira au utu.

N okin Brigham Young nakon mweengana imwiin taetaekinan te euangkerio, e tuangaki iroun te Uea bwa e na tii kabanea ana tai n tararuaa aroia ana utu.

Waaki ni Kakukurei aika a Kona ni Karaoaki

• Tibwauia ma ataei rongorongon Brigham Young ni “Mwakoro 50: Aika Itiaki i Nauvoo” (Karaki man Reirei ao Berita aika Tabu, 184), ke kakimototoa n taekina Reirei ao Berita aika Tabu 126 n oin am taeka. Ngkanne wareka Reirei ao Berita aika Tabu 126:3 nakoia ataei, ni kamataata te kibuntaeka “n tararuaa raoi am utu.” Tera nanon ae ti na tararuaia ara utu? Buokiia ataei n iangoi kawai ake a kona ni kaota iai aia tangira nakoia kaain aia utu.

• Imwaain te kiraati, kaoiia ataei bwa a na uota tamneia aia utu (ke tuangiia bwa a na koro tamnei). Ngkanne tuangiia bwa a na tibwauaia bwa tera te bwai ae a tangira iai aia utu. Tibwaua tamnein am utu, ao karaoa naba anne. Kabwarabwara bwa bukin tera ngkai e tangiriira Tamara are i Karawa bwa ti na tararuaia raoi ara utu. Anenea te kuna are e reireia te koaua aei, n aron “When We’re Helping” (Aia Boki n Anene Ataei,198).

Reirei ao Berita aika Tabu 128:5, 12

Natin te Atua ni kabane a kainnanoa aia tai ni bwabetitoaki.

N reitaki ma buokakiia ataei ni katauraoiia ni karaoi oin aia berita aika tabu n te bwabetito, reireiniia bwa ti kona ni buokiia naake a tia ni mate n aki bwabetioaki ni karekei aekan naba kakabwaia akanne.

Waaki ni Kakukurei aika a Kona ni Karaoaki

• Kaota tamnein Iesu Kristo ae bwabetitoaki (taraa Bokin Tamnein te Euangkerio, nambwa 35), ke kaota te witeo “The Baptism of Jesus” (ChurchofJesusChrist.org). Titirakiniia ataei ngkana arona bwa a tia n noora temanna ae e a tia ni bwabetitoaki. Tera aia ururing iai? Kabongana te tamnei ke te witeo ni kaotia nakoia ataei bwa ngkana ti bwabetitoaki, ti bane ni kateboaki nako aan te ran ao ni manga otirake imwiina, n aron naba are e karaoia Iesu. Kaukia nakon Reirei ao Berita aika Tabu 128:12, ao kabwarabwara ae e taekinna Iotebwa Timiti bwa ngkana ti bwabetitoaki e kauringiira taekan te Mangauti.

• Karakina rongorongon temanna are ko kinaa nakoia ataei (n aron am bakatibu) are e mate ao e tuai ni bwabetitoaki. Wareka Reirei ao Berita aika Tabu 128:5, ao anganiia bwa a na ikaruoruo n taua tamnein te tabo ni bwabetito n te tembora (taraa te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu). Kaotia ae Tamara are i Karawa e anganiira te kariaia bwa ti na bwabetitoaki iaon te aba ibukiia aomata ake a tia ni mate. N te kawai aei ao natin te Atua ni kabane a kona ni bwabetitoaki ao ni karaoi berita aika a tabu ma Ngaia.

Reirei ao Berita aika Tabu 128:18

Tamara are i Karawa e tangirai bwa N na reiakina taekaia au bakatibu.

Iai kawai aika bebete are a na kona ataei aika a uarereke n ira waakin te mwakuri ibukin rongorongon te utu. Buokiia n namakina ae iai aia tangira ibukiia aomata ake n aia riki.

Waaki ni Kakukurei aika a Kona ni Karaoaki

• Karaoa te beeba te tien ma araia aomata inanon am utu (taraa te iteraniba ni kakukurei n te wiiki aei), ao uotia kaotia nakoia kaain te kiraati. Karakini tabeua bwaai ibukiia aomata ake iaon am tiein. Wareware nakoia ataei man Reirei ao Berita aika Tabu 128:18, ao kabwarabwara bwa e taekinna Iotebwa Timiti bwa “iai te aekaki n reitaki … imarenaia taama ma naati.” Buokiia ataei ni karaoi oin aia tiein ibukiia aia utu, ao kaoiia bwa a na uotii tiein nakon mweengaia ao n tuangiia aia karo bwa a na buokiia ni karini araia aia bakatibu.

• Tuangiia ataei bwa a na tibwaua rongorongon tibuia temanna. Karakina nakoia teuana te karaki ae mamate nanom iai ibukiia am karo ke tibum. Kaota tamneia ngkana iai. Kaungaia ataei bwa a na reiakina riki rongorongoia tibuia ao tabeman aia bakatibu.

Reirei te Reirei: Ataei aika a Ikawai Riki

Reirei ao Berita aika Tabu 126

I kona n tararuaia au utu.

Ko na kanga ni buokiia ataei ake ko reireiniia ni buokiia aia utu ni kawai aika uaana?

Waaki ni Kakukurei aika a Kona ni Karaoaki

• Bootaki ni wareka Reirei ao Berita aika Tabu 126:3. Bukin tera ngkai Tamara are i Karawa e tuanga Brigham Young bwa e na “tararuaa raoi [ana] utu”? Ti na kanga ni karaoa aekakin naba anne ibukiia ara utu? Korei rinanin bwaai ake ti kona ni karaoi ngkai ni beku ibukiia ara utu. E kanga karaoan bwaai aikai ni buokiira bwa ti na riki n ai aron Tamara are i Karawa?

• Tibwaia ma ataei ana karaki Titita Carole M. Stephens ibukin tibuna te mwaane ae Porter (taraa “We Have Great Reason to Rejoice,” Ensign ke Riaona, Nobembwa. 2013, 115). Tera ae e karaoia Porter n tararuaia ana utu? Ti na kanga ni irii ana banna ni katooto?

Reirei ao Berita aika Tabu 128:1, 15–18

Te bwabetito ibukiia maate e karika “te aekaki n reitaki ae matoa” imarenau ma au bakatibu.

E reirei Iotebwa Timiti bwa te bwabetito ibukiia maate e kabaeira ma ara bakatibu n aron te reitaki inanon te tiein. Ko kanga ni buokiia ataei n namakina te kimwareirei are e roko man reiakianan rongorongoia ara bakatibu ao ni kakoaua raoi bwa e karaoaki te mwakuri ibukiia n te tembora?

Waaki ni Kakukurei aika a Kona ni Karaoaki

• Bwenaua te kiraati inanon uoua te kurubu, ao tuangiia kaain te moan kurubu bwa a na wareka Reirei ao Berita aika Tabu 128:1 ni kakaea bwa tera te bwai are e katabeaki iai ana iango Iotebwa Timiti. Tuanga te kurubu are teuana bwa e na wareka te kibu 17 ao kakaea bwa tera are e aranna bwa “te kabanea ni mimitong.” Anganiia bwa a na tibwauai baike a kunei, ao maroroakinna bwa bukin tera ngkai e rangi ni kakawaki te bwai aei. Ngkana e kona, kaoa te kairake are e a tia ni karaoi mwakuri ni bwabetito ibukiia maate bwa e na tibwaua te bwai are e a tia n rinanona teuanne ke neienne ao ni kabwarabwara bukin tera ti karaoa te mwakuri aei.

• Iangoia ni kabongana te reirei ao te bwai ni kakakiri ni kaotia bwa ti riai ni buokiia ara bakatibu ake a tuai ni bwabetitoaki. N aron te katooto, kaota te bwaintangira ke am anganano, ma katikua n te tabo are e na aki kona n reke iai irouia ataei. Tuanga te ataei bwa teuanne ke neienne e kona ni karekea te bwai ni kakairi anne ma e aki kona ni mwaing man ana kaintekateka. Tuangiia ataei ake tabeman tera ae a kona ni karaoia ni buoka te ataei bwa e na kona ni karekea. Baane wareka Reirei ao Berita aika Tabu 128:15, ao maroroakinna bwa e kanga n irekereke ma te reirei ma ana bwai ni kakairi.

• Kaoiia ataei bwa a na karaoa te beeba te tiein ma araia aia karo, tibuia, ke tibutoruia, ao a mwaiti riki (taraa te iteraniba ni waaki ni kakukurei n te reirei aei). Ngkana ataei aki atai araia aia bakatibu, kaungaia bwa a na kakaei aara ao ni korei iaon te tiein ni mweengaia. Baane wareka Reiei ao Berita aika Tabu 128:18 ni kakaea bwa tera te “aekaki n reitaki ae matoa” are e karika rongorongoia ara utu “ni bwanin ao ni bobonga.” Karakina rongorongon am bakatibu are e buoka namakinan te reitaki ma teuanne ke neienne. Ke kaota te witeo “Courage: I Think I Get It from Him” (ChurchofJesusChrist.org).

• Kaotia nakoia ataei te beeba ni kariaia nakon te tembora, ao tuangiia bwa ko kanga ni karekea teuana. Buokiia bwa a na ingainga nanoia ni kan karekei oin aia beeba ni kariaia nakon te tembora bwa aonga ni kona n nakon te tembora ao ni bwabetitoaki ibukiia aia bakatibu.

  

  Ti kona ni kunei araia ara bakatibu ao ni karaoi otenanti n te tembora n tei ibukiia.

Kaungaa te Kamatebwai n te Mweenga

Kaoiia ataei bwa n titirakina temanna ni mweengaia bwa e na buokiia n reiakiniia riki rongorongoia aia utu. A kona n tuatua bwa a na ongora karakinaia aia bakatibu ke kabongana FamilySearch.org ni kakaei araia aia bakatibu ake a tuai ni bwabetitoaki.

Kanakoraoan Ara Anga reirei

Buokiia ataei bwa a na kaoti bwaai ake a karaoi man aia kakauiango. Ngkana a kateitei ataei, korotamnei, ke ni karana te bwai teuana are e irekereke ma te karaki ke te reirei are a reiakinna, a na ururingnga riki n angin te tai. A kona ni kabonganai naba baike a karaoi n aia kario iango n reireiniia iai tabeman. (Taraa Reirei n ana Kawai te Tia Kamaiu, 25.)