“Nobembwa 8–14. Reirei ao Berita aika Tabu 129–132: ‘Ngkana Ti Karekea te Kakabwaia mairoun te Atua, Bon man te Ongotaeka,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Nobembwa 8–14. Reirei ao Berita aika Tabu 129–132,” Nakomai, Iriirai—Ibukiia Aomata n Tatabemaniia ao Utu: 2021
Iotebwa Timiti i Nauvoo, 1840, iroun Theodore Gorka
Nobembwa 8–14
Reirei ao Berita aika Tabu 129–132
“Ngkana Ti Karekea te Kakabwaia mairoun te Atua, Bon man te Ongotaeka”
Mwakoro 129–32 e anga reirei aika kakaawaki, tii tabeua aika katuruaki n te kabwarabwara aei. Tera riki koaua aika ko kunei?
Korea Am Namakin
Bringham Young e taekina Iotebwa Timiti n te taina, “E kona n kabwaranakoi bwain karawa nakon mataatan ane memeere” (n Aia Reirei Burabetin te Ekaretia: Iotebwa Timiti, 499–500). Aio e rang koaua ibukin ana reirei te Burabeti i Nauvoo n 1840 tabun, tabeua ake a koreaki n Reirei ao Berita aika Tabu 129–32. Aekakira tein te Tia Kamaiu? “Bon te aomata n ai arora.” Aekakira karawa? “Aron te reitaki are ti mena inanona ikai e na iai naba ikekei” (Reirei ao Berita aika Tabu 130:1–2), ao ara reitaki n te utu are ti babane nanora iai n te aonaba aei, ngkana e kabaeaki n te kariaia ae eti, “e na bon bwanin” n te aonaba are imwina (Reirei ao Berita aika Tabu 132:19). Koaua n aron aikai a kona n karika karawa bwa e na kaan—mimitong, ma e kona n roko te aba iai.
Ma ngkanne, n tabetai te Atua e na tuangira bwa ti na karaoi bwaai aika a rang kamwengabuaka n te aro are a taraa n kangaanga. Irouia Aika Itiaki n taai akekei, te mare ma ae mwaiti bon teuana te tua ae katooton aei. Te tua n mare ma buuaine riki tabeman bon te kakatai ae abwabwaki n te onimaki nakon Iotebwa Timiti, kainnabana Emma, ao e kuri ni kabane ake a karekea. N tokanikai iaon te kakatai aei, a kainnanoa ae riaon te namakin ae raoiroi ibukin te euangkerio ae kaokaki; a kainnanoa te onimaki iroun te Atua ae na nano riki nakon oin nanoia ma tabeiteraia. Akea te tua anne n boong aikai, ma bannaia ake a kakaonimaki ake a maiuakinna e teimatoa. Ao te banna anne e kaungaira n taai ake ti tuangaki bwa ti na karaoi oin ara “karea n te ongotaeka” (Reirei ao Berita aika Tabu 132:50).
Iango ibukin te Kamatebwai i bon Iroum ni Koroboki aika Tabu
Reirei ao Berita aika Tabu 130–31
Iotebwa Timiti e kaoti koaua ibukin te Utu n Atua ao “te aonaba ae na roko.”
Ko kona n noria bwa mwakoro 130–31 e okoro teutana aron teina n kabotauaki ma mwakoro ake tabeua n Reirei ao Berita aika Tabu. Bukin aei bwa mwakoro 130–31 e boboto iaon koroboki ake William Clayton, temanna ana tia koroboki Iotebwa Timiti, kawakin bwaai ake e ongo bwa e reirei te Burabeti. N tokina, mwakoro aikai kanga bwariko n koaua ao tiaki kaotioti aika a koreaki n bwanin. E ngae n anne, iai botoniango aika bwainaki n taian koaua aikai. Te katooto, ko kona n wareka mwakoro 130–131 ma titiraki n aron aikai n am iango: Tera ae na reiakinna ibukin te Atua? Tera ae I reiakinna ibukin te maiu ibukin te maiu ae mamate? E kanga te atatai aei n roota maiu?
Tara naba “Our Hearts Rejoiced to Hear Him Speak,” Revelations in Context, 277–80.
Reirei ao Berita aika Tabu 131:1–4; 132:7, 13–25
Tamara are i Karawa e angania te kona bwa a na akea tokiia.
Teuana mai buakon koaua aika karaunano ake a kaotaki rinanon te Burabeti Iotebwa Timiti bwa te mare ao te reitaki n te utu e kona n akea tokina. Rinanon Iotebwa Timiti, te Uea e kaokii otenanti ao kariaia ake a kainnanoaki n kariki reitaki aikai bwa a na akea tokiia (tara Reirei ao Berita aika Tabu 132:7, 18–19). Iangoa te reitaki n te utu are iai iroum ke ko kataningaia ae imwaim ngkai ko wareka Reirei ao Berita aika Tabu 131:1–4; 132:7, 13–15. A kanga kiibu aikai n roota aron am taratara n reitaki aikai?
Ma, n tabetai, reirein utu aika akea tokiia e aki karaunano—e kona n uota te raraoma, ao te nanokawaki, ngkana aron ara utu ngkai e aki booraoi ma aron te tiretio. Ngke Beretitenti Henry B. Eyring e raraoma ibukin te kangaanga n oin ana utu, e karekea te reirei ae tamaroa mairoun kaain te Kooram n Abotoro n te Tengaun ma Uoman: “Ko tii maiuakina te raoiraoi are tau ibukin abanuean te tiretio, ao barongaan te utu e na tamaroa iaon are ko kona n iangoia” (in “A Home Where the Spirit of the Lord Dwells,” Ensign ke Riaona, Meei 2019, 25). E na kanga iran te reirei aei n kakabwaiako n tein am utu ae ngkai?
Tara naba Kristen M. Oaks, “To the Singles of the Church” (Church Educational System bwabwaro ibukiia kairake n ikawai, Tebetembwa. 11, 2011), broadcasts.ChurchofJesusChrist.org.
Reitaki n te utu a kona n akea tokiia rinanon otenanti n te tembora.
Reirei ao Berita aika Tabu 132:1–2, 29–40
Te Mare ma ae mwaiti e butimwaeaki iroun te Atua ngkana E bon tua.
Temanna are e a tia ni wareka te O Tetemanti e bae n titiraki aron Aberaam, Itaaka, Iakobwa, Mote, ao tabeman ake a mare ma buuia aika mwaiti. Mwaane aika raoiroi aikai a urua tuan te itiaki? Ke bon te Atua ae kariaia aia mwakuri? Kakaei reeke n Reirei ao Berita aika Tabu 132:1–2, 29–40.
Te mare imarenan temanna te mwaane ao temanna te aine bon katein ana mare te Atua (tara te kabwarabwara nakon te mwakoro Katanoata ae Bwainaki 1; tara naba Iakobwa 2:27, 30). Ma, bon iai taai n rongorongon te aonaba are te Atua e tua nakoia Natina bwa a na karaoa te mare ma ae mwaiti.
Moan ririkin te Ekaretia ae kaokaki bon teuana mai buakon taai akanne. Imwin karekean te tua aei, Iotebwa Timiti ao tabeman Aika Itiaki n Bong aika Kaitira a karaoa te mare ma ae mwaiti. Ngkana ko kan reiakina ae bati riki n te mare ma ae mwaiti irouia Aika Itiaki ni Bong Aika Kaitira, tara “Mercy Thompson and the Revelation on Marriage” (Revelations in Context, 281–93); Aika Itiaki, 1:290–92, 432–35, 482–92, 502–4; “Plural Marriage in The Church of Jesus Christ of Latter-day Saints” (Gospel Topics, topics.ChurchofJesusChrist.org); “Bukin tera e Riai ibukin Iotebwa Timiti aoTabeman bwa a na karaoa te mare ma ae mwaiti?” (video, ChurchofJesusChrist.org).
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 130:2, 18–19; 132:13, 19.Ko na kanga ni kabonganai kiibu aikai n buoka am utu n moanibwai baika akea tokiia? Tao ko kona n baekina te tutikeiti ke te baekibaeki ma bwaai aika tei ibukin bwaai are, n kaineti ma Reirei ao Berita aika Tabu 130:2, 18–19; 132:19, ti kona n uotia ma ngaira nakon te maiu ae na roko n aron tamnein te utu ke koroboki aika tabu. Tera ae reireinira Reirei ao Berita aika Tabu 132:13 ibukin bwain te aonaba? Aio are e kona ni kaira te marooro ibukin moanibwaian bwaai aika akea tokin kakaawakia.
-
Reirei ao Berita aika Tabu 130:20–21.Kam kona n anaa te anene ibukin te kakaitau, n aron “Wareki am Bwai” (Hymns, nambwa 241), ao korei kakabwaia ake e a tia ni karekea am utu ibukin te ongeaba nakon ana tua te Atua. Tera kakabwaia ae ti kantaningaia bwa ti na karekei? Ti na kanga n karekei kakabwaia akanne?
-
Reirei ao Berita aika Tabu 131:1–4; 132:15–19.Te witeo ae “E Tabu Te Mare” (ChurchofJesusChrist.org) e kona n buoka am utu n maroroakini koaua n kiibu aikai. Tera ana namakin te Uea ibukin te mare? Ti na kanga n—bwa ti a tia ni mare ke ti tuai—katauraoi n karekea te mare ae akea tokina?
Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Te anene ae tamaroa: “Families Can Be Together Forever,” Children’s Songbook, 188.
Kanakoraoan Am Kamatebwai
Tarai koauan te euangkerio. N tabetai koauan te euangkerio a kaineti taekinaia; n taai tabetai a kaotaki rinanon te katooto ke te karaki. Ngkai ko wareware, titirakiniko, “Tera te koaua ae akea tokina ae taekinaki n kiibu aikai?”
Te ruu n kabaeaki n te Paris France Tembora.