Ritembwa 13–19

Te Utu: Te Katanoata nakon te Aonaaba

“Te Utu Bon Te Bwai ae Kakaawaki nakon ana Babaire te Tia Karikibwai”

Tera reirei ake ko kunei inanon “Te Utu: Te Katanoata nakon te Aonaaba” are ko namakinna bwa ko na tibwauai ma ataei? Ngkai ko katauraoi n anga reirei, korei mwiin wirikiriki ake ko karekei mairoun te Tamnei.

Korei Am Namakin

Kaungaa te Tibwatibwa

Kaoiia ataei bwa a na uota ke ni korea tamnein aia utu n tibwauaia nakon te kiraati. Tuangiia ataei bwa a na tibwaua te bwai are a tangira iai aia utu ke ake a reiakin ibukin aia utu n te wiiki aei.

Reirei te Reirei: Ataei aika a Uarereke

Utu a kakaawaki n ana babaire Tamara are i Karawa.

Ko na kanga ni kabongana te katanoata ibukin te utu ni buokiia ataei ni kamataataia n aron kakaawakin te utu n ana babaire te Atua?

Waaki ni Kakukurei aika a kona ni Karaoaki

• Buokiia ataei bwa a na iangoi bwaai aika rangi ni kakawaki are a na kan karakina rongorongona nakoia aomata. Kaota nakoia ataei katotoon “Te Utu: Te Katanoata nakon te Aonaaba,” ao kabwarabwara bwa burabeti ao abotoro a koreia bwa a na tuangiia aomata aron kakawakiia utu iroun Tamara are i Karawa. Tuangiia ataei bukin tera ngkai a taku n aia iango bwa utu a rangi ni kakawaki iroun Tamara are i Karawa. Tibwa te bwai man te katanoata are ko namakinna bwa a riai aomata n ataa taekana.

• Kaota tamnein te tembora ao tamnein te utu nakoia ataei. Anganiia ataei bwa a na taui taian tamnei ngkai ko wareka kabanean taekan te kateniua ni barakaraba man te katanoata nakon te utu. Tuangiia bwa a na kotei tamnei aika eti ngke ko wareki taeka aika “tembora” ao “utu.” Kakoaua bwa ibukin otenanti n te tembora, a kona n ikotaki ara utu n aki toki. Baane anenea te kuna ibukiia utu ae akea tokina, n aron “I Love to See the Temple” (Aia Boki n Anene Ataei, 95), ao buokii ataei n ongora n taian taeka n aron “tembora” ao “utu.”

• Tuangiia ataei bwa tera ae ti na karaoia bwa ti aonga ni kona ni karaoi bwaai aika kakaokoro ni kakorakorai—n aron wiira, rabwatara, ke te kateitei. Tera ae ti kona ni karaoia ni kakorakoraia ara utu? Buokiia ataei ni kamataataia n reirei ake a na kairiia nakon te kukurei ni maiuia inanon te utu, e kuneaki n te kaitiua ni barakaraba man te katanoata nakon te utu (taraa naba te iteraniba ni waaki ni kakukurei n te wiiki aei). Buokiia ataei ni bairei kawai are a na kakorakoraia iai aia utu.

  

  Kaaro a riai ni kaikawaiarake natiia inanon te tangira ao te kororaoi.

Ngai bon te “nati te mwaane ao te nati te aine ae tangiraki irouia ara karo ake i karawa.”

Te katanoata ibukin te utu e reireiniira bwa ngaira ni kabane naati irouia ara Karo ake i Karawa ao ti mena ikai iaon te aba bwa ti na riki n Ai aroia.

Waaki ni Kakukurei aika a kona ni Karaoaki

• Anene ni kabane “Ngai Natin te Atua” (Aia Boki n Anene Ataei, 2–3). Ngkanne kakibaa te booro ke te bwai ae maraurau nakon te ataei ngkai ko atonga, “I ataa natin te Atua ae arana [aran te ataei].” Tuanga te ataei bwa e na kakibaa te bwai nakon temanna te ataei, n atonga naba taeka akanne ao ni karina aran te ataei. Kaokioka te waaki ni kakukurei ni karokoa are a bane n tia ataei. Kaotia bwa ataei n tatabemaniia nako “bon naati mwaane ao naati aine n tamnei irouia ara karo ake i karawa.”

• Iangoi kawai ake ko kona ni kamataatai ibukina bwa ngaira naati irouia ara Karo ake i Karawa, ti kona n riki n Ai aroia. N aron te katooto, kaota tamneia maan ao natiia, ke bon tamneim ao am karo ke natim, ao buokiia ataei n noori baika ti te arona. Kaotia bwa ngkai a ikawairake ataei aika uarereke n riki n ai aroia aia karo, n te bong teuana ti kona n riki n ai aroia ara Karo ake i Karawa.

Reirei te Reirei: Ataei aika a Ikawai Riki

Utu a bon kakaawaki n ana baire Tamara are i Karawa.

Te katanoata ibukin te utu e karaoaki bwa kamatoaan koaua aika akea tokina ibukin te utu. Iangoia bwa ko na kanga ni buokiia ataei ni kakorakorai aia koaua ibukin koaua aikai.

Waaki ni Kakukurei aika a kona ni Karaoaki

• Titirakiniia ataei ngkana arona bwa a ataia bwa antai ae e korea te katanoata ibukin te utu. (Inanon ana rongorongo “Te Babaire ao te Katanoata” [Ensign ke Riaona, Nobembwa. 2017, 28–31], Beretitenti Dallin H. Oaks e kabwarabwara bwa e kanga ni koreaki.) Buokiia ataei ni kamataataia tera ae nanonaki n “solemnly proclaim” n te moan barakaraba. Tuangiia bwa a na tibwaua aia iango bwa ibukin tera ngkai burabeti ao abotoro a tangiria n “katanoata ma te kantaninga” koaua ibukin taekan te utu inanon ara bong.

• Tibwauai tabeua kibuntaeka man te katanoata ibukin te utu are a rangi ni uaana nakoim. Kaoiia ataei bwa a na tibwauai aia namakin ibukin koaua akanne. A na kanga ni kaokoro maiura ngke arona bwa tiaki atai bwaai aikai? Baane anenea te kuna are irekereke ma koaua ake a kuneaki inanon te katanoata, n aron “I Will Follow God’s Plan” ke “Families Can Be Together Forever” (Aia Boki n Anene Ataei, 164–65, 188).

• Kaotii tamnei nakoia ataei (ke kaoiia bwa a na korei tabeua) tamnein koaua ake a kuneaki inanon te katanoata ibukin te utu. E kona n ae tamnein te tembora, te utu ae a tataro ke ni kaai n takakaro, ke taanga ae a mare. Kaoiia ataei bwa a kakaei tiententi inanon te katanoata ibukin te utu are a irekereke ma taian tamnei. Tera ae ti reireinaki n tiententi aikai?

• Katauraoi tabeua titiraki ake a kona ni kaekaaki inanon te katanoata ibukin te utu, n aron “Tera ana namakin te Atua ibukin te mare?” ao “Tera ae na karika kukurein te utu?” Anganiia ataei n tatabemaniia bwa a rinea aia titiraki, ao buokiia ni kunei kaeka inanon te katanoata.

• Kaoa tinan ao taman temanna te ataei bwa a na tibwatibwauaia nakoia kaain te kiraati bwa a kanga n “ibuobuoki imarenaia bwa rao aika ti te arona ngaia” inanon “mwiokoaia ae tabu” inanon aia utu. Kaoiia ataei bwa a na maroroakinna tera ae a kona ni karaoia ngkai ni katauraoia bwa a na riki bwa ainenumwa ao mwaanenumwa aika raoiroi, tiina ao kaaro.

Utu a kukurei ngkana a iriira Iesu Kristo.

Tamara are i Karawa e tangiriia natina n tatabemaniia nako, ao E tangiria bwa a na kukurei. Ko na kanga ni buokiia ataei ake ko reireiniia ni kamataataia bwa te kukurei ae koaua e roko man iriiran ana reirei ao ana banna ni katooto te Tia Kamaiu Iesu Kristo?

Waaki ni Kakukurei aika a kona ni Karaoaki

• Korea te kamataata ae bubura ae tamnein te aati iaon te burakibooti, ao kaoiia ataei bwa a na wareka barakaraba itiua n te katanoata. Tuangiia bwa a na kakaei bwaai ake a na kona ni karaoi ni buokiia aia utu bwa a na kukurei, ao korei aia reke inanon te aati. Kaoiia ataei bwa a na rinea te bwai teuana are a na kona ni mwakuri iaona ni kakukureia iai mweengaia.

• Kaoiia ataei bwa a na tibwauai bwaai ake a tia n rinanona ngke a namakina tangiraia irouia kaain aia utu. Buokiia ataei ni kinai reirei man barakaraba itiua n te katanoata are e na kona ni buoka kaain te utu n namakina tangiraia. E kanga ara atatai ibukin ana euangkerio Iesu Kristo n roota aron are ti karaoia nakoia ara utu?

• Tuangiia ataei bwa tera are a na kona n taekinna ngkana a titirakinaki iroun raoraoia bukin tera ngkai te mare ke karekeaia ataei e kakaawaki. Ti na kanga ni buoka te rao aei ni kamataata aron kakawakin te utu iroun Tamara are i Karawa? Buokiia ataei ni kakaei kibuntakea inanon te katanoata ibukin te utu are e na kona n ibuobuoki; taraa naba te tamnei “Tera te Kantannga ibukin te Utu?” (ChurchofJesusChrist.org).

Kaungaa te Kamatebwai n te Mweenga

Kaoiia ataei ni bairea karaoan te bwai ae na kakorakoraia iai aia utu. Kaungaia n tibwaua aia babaire ma kaain aia utu ni mweengaia.

Kanakoraoan Ara Anga reirei

Bwaina te kai namakin. Ngkai ko reirei koaua ake a reiakinaki inanon te katanoata ibukin te utu, taiaoka ko na ataia raoi bwa angiina ataei a ikawai inanon utu ae aki booraoi ma te bwai ae moan te kororaoi are e kabwarabwaraaki inanon te katanoata. Taratara raoi bwa ko na aki taekini bwaai ake a na bwarananoia iai ke ni kamwinibaeaki.