14. Ruanimate n te Nne n Aroka

E katautauaki bwa nnen ana ruanimate n te nne n aroka Iotebwa te I-Arimatea. Tabeman burabeti ni boong aikai a tia n namakinna bwa e kaweneaki rabwatan te Tia Kamaiu n te ruanimate ae kaotaki tamneina ikai.

Bwaai aika Riki aika Kakawaki: I mwin maten te Tia Kamaiu i aon te kaibangaki, rabwatana e katukaki i nanon te ruanimate ae koreaki n te bwa (Mat. 27:57–60). N te katenibong, a bati aine ake a nakon te ruanimate ao a kunea bwa akea rabwatan te Tia Kamaiu ikekei (Mat. 28:1; Ioane 20:1–2). Abotoro aika Betero ao Ioane a nako naba nakon te ruanimate ao a nooria bwa akea rabwatan te Tia Kamaiu (Ioane 20:2–9). Te Tia Kamaiu ae tia ni mangauti e kaoti nakon Maria te I-Maketara (Ioane 20:11–18).