Ki he Kau Mēmipa Tangata Moʻui Taau Kotoa Pē, tā fakatātaaʻi ʻe Emma Allebes

6–12 Tīsema

Ko e Tefito ʻo e Tuí mo e Fanongonongo Fakamafaiʻi 1 mo e 2

“ʻOku Mau Tui”

ʻI hoʻo ako he uiké ni mo faʻu ha palani ke akoʻí, fakakaukau ki he founga te ke lava ai ʻo tokoni ke fakamālohia e tui ʻa e fānau ʻi hoʻo kalasí ki he ngaahi tefitoʻi moʻoni ʻo e ongoongoleleí.

Lekooti Hoʻo Ngaahi Ongó

Fakaafeʻi e Feʻinasiʻakí

Lī ha foʻi pulu ki ha kiʻi tamasiʻi/taʻahine, pea kole ki he kiʻi tamasiʻí/taʻahiné ke vahevahe ha meʻa ʻoku tui ki ai fekauʻaki mo Sīsū Kalaisi pe ko e Tamai Hēvaní. Toutou fakahoko ia kae ʻoua kuo maʻu ʻe he kiʻi tamasiʻi/taʻahine takitaha ha faingamālie ke vahevahe.

Akoʻi e Tokāteliné: Fānau Iiki Angé

Ko e Tefito ʻo e Tuí

ʻOku ou tui ki he ongoongolelei ʻo Sīsū Kalaisí.

Te ke lava ʻo fakaʻaongaʻi e Tefito ʻo e Tuí ke toe fakamanatu ki he fānaú ha niʻihi ʻo e ngaahi tefitoʻi tui tefito ʻo e Siasi ʻo Sīsū Kalaisí. Ko e hā ʻoku mahuʻinga ai ke tui e fānau ʻokú ke akoʻí ki he ngaahi moʻoni faingofua ko ʻení?

Ngaahi ʻEkitivitī ʻe Ala Fakahokó

• Fili ha ngaahi tefitoʻi tui ʻe niʻihi ʻokú ke ongoʻi ʻoku matuʻaki mahuʻinga ki he fānau ʻokú ke akoʻí. Ki he tefitoʻi tui takitaha, vahevahe ha fakatātā (vakai ki he peesi ʻekitivitī ʻo e uike ní) pe ko ha talanoa (mei he folofolá pe mei hoʻo moʻuí) ʻokú ne fakatātaaʻi pe fakamahinoʻi ha foʻi moʻoni ʻoku akoʻi ʻi he tefitoʻi tui ko iá. Talaange ki he fānaú e ʻuhinga ʻoku mahuʻinga ai kiate koe e foʻi moʻoni ko iá, pea tuku ke nau vahevahe e ʻuhinga ʻoku mahuʻinga ai kiate kinautolú.

• Kumi ha ngaahi himi pe ngaahi hiva ʻa e fānaú ʻe lava ʻo tokoni ke mahino ki he fānaú ha tefitoʻi tui ʻe taha pe lahi ange. Mahalo ʻe lava ke tokoni atu e fānaú kiate koe ʻi hono filí. Hivaʻi fakataha e ngaahi hivá, pea tokoni ki he fānaú ke nau ʻilo e founga ʻoku felāveʻi ai e hivá mo e tefitoʻi tuí.

Tefito ʻo e Tui 1:9; Fanongonongo Fakamafaiʻi 1 mo e 2

ʻOku tataki ʻe he ʻEikí Hono Siasí ʻo fakafou ʻi Heʻene palōfitá.

ʻI he fehangahangai ʻa e kau mēmipa ʻo e Siasí mo e faʻahinga kehekehe ʻo e ngaahi faingataʻá, te tau lava ʻo maʻu ha nonga ʻi heʻetau ʻilo ʻoku finangalo e Tamai Hēvaní ke foaki mai ha fakahā ke ne tataki kitautolú. Tokoni ki he fānau ʻokú ke akoʻí ke fakamālohia ʻenau tui ʻoku tataki ʻe he ʻOtuá e Siasí ʻo fakafou ʻi ha palōfita moʻui.

ʻOku tataki kitautolu ʻe he Tamai Hēvaní ʻo fakafou ʻi ha kau palōfita.

Ngaahi ʻEkitivitī ʻe Ala Fakahokó

• Fakaʻaliʻali ha seti folofola mo ha fakatātā ʻo e palōfita moʻuí (pe ko ha makasini ʻo ha konifelenisi kimuí ni mai ʻo e Ensign pe Liahona). Tokoni ki he fānaú ke nau ʻiloʻi pe ko e meʻa fē ʻoku felāveʻi mo e kupuʻi lea “ngaahi meʻa kotoa pē kuo fakahā mai ʻe he ʻOtuá” pea ko e ngaahi meʻa fē ʻoku felāveʻi mo e kupuʻi lea “ngaahi meʻa kotoa pē ʻokú Ne fakahā mai ʻi he taimi ní” (Tefito ʻo e Tui 1:9).

• Tamateʻi e ngaahi ʻuhilá, pea fokotuʻu ha fakatātā ʻo Sīsū Kalaisi ʻi he palakipoé. Huluʻi ha kasa ki he ʻīmisí ke fakatātaaʻi e founga ʻoku tokoniʻi ai kitautolu ʻe he palōfitá ʻo hangē ko ha kasá, ke tau vakai lelei ange ai ki he Fakamoʻuí.

• Kumi ha fanga kiʻi fakahinohino faingofua ke ngaohi ha meʻa, hangē ko ha meʻakai pe ko ha meʻavaʻinga. Muimui ʻi he ngaahi fakahinohino mo e fānaú, pea fakamatalaʻi ange ʻoku fakafou ʻi he palōfitá, hono ʻomi ʻe he Tamai Hēvaní ha ngaahi fakahinohino ke tokoniʻi kitautolu ke tau toe foki hake ʻo nofo fakataha mo Ia. Ko e hā ha ngaahi meʻa kuo akoʻi mai ʻe he palōfitá ke tau lava ai ʻo foki hake ki he ʻOtuá?

Akoʻi e Tokāteliné: Fānau Lalahi Angé

Ko e Tefito ʻo e Tuí

ʻOku akoʻi ʻe he Ngaahi Tefito ʻo e Tuí ha ngaahi moʻoni faingofua ʻo e ongoongoleleí.

ʻOku ʻi ai ha ngaahi taimi ʻe niʻihi ʻoku ngali fuʻu lahi mo faingataʻa ai e ongoongoleleí, tautautefito ki he fānaú. ʻE lava ke tokoni e Ngaahi Tefito ʻo e Tuí ke mahino ki he fānaú, ʻi ha founga faingofua, ha niʻihi ʻo e ngaahi tefitoʻi moʻoni ʻoku tau tui ki ai ko ha Kāingalotu ʻi he Ngaahi ʻAho Kimui Ní.

Ngaahi ʻEkitivitī ʻe Ala Fakahokó

• Fakaafeʻi e kiʻi tamasiʻi/taʻahine takitaha ke fili ha foʻi lea pe kupuʻi lea mahuʻinga mei ha taha ʻo e ngaahi tefito ʻo e tuí pea vahevahe ia mo e kalasí. Pea tuku ke mateʻi ʻe he fānau kehé (pe kumi) pe ko e tefitoʻi tui fē ʻoku maʻu ai e foʻi lea ko iá. Kole ki he fānaú ke vahevahe e ʻuhinga ʻoku mahuʻinga ai e foʻi lea pe kupuʻi lea ne nau filí.

• ʻI ha ngaahi ʻaho kimuʻa, kole ki ha niʻihi ʻo e fānaú ke nau teuteu ke vahevahe ʻi he kalasí ha pōpoaki nounou fekauʻaki mo e tefito ʻo e tui ʻoku nau manako taha aí. ʻE malava ke kau ʻi heʻenau pōpoakí ha fakatātā, foʻi hiva, talanoa pe aʻusia, pe ngaahi veesi folofola kehe. Fakaafeʻi e fānau ko ʻení ke vahevahe e ʻuhinga ʻoku nau saiʻia ai he tefito ʻo e tui ne nau filí.

• Hiki ʻi he palakipoé ha niʻihi ʻo e ngaahi fehuʻi ʻe ala maʻu ʻe he kakaí fekauʻaki mo ʻetau tui fakalotú ʻa ia ʻe lava ʻo tali ʻaki ha taha ʻo e ngaahi tefito ʻo e tuí. Kole ki he fānaú ke nau fili ha foʻi fehuʻi pea kumi ha tefito ʻo e tuí ʻokú ne tali e fehuʻi ko iá. Tuku ke nau akoako tali e fehuʻí ʻo fakaʻaongaʻi e tefito ʻo e tuí.

Fanongonongo Fakamafaiʻi 1 mo e 2

ʻOku tokoni mai e kau palōfitá ke tau ʻiloʻi e finangalo ʻo e Tamai Hēvaní.

Ko e Fanongonongo Fakamafaiʻi 1 mo e 2 ko ha sīpinga lelei ia ʻo e founga ʻoku maʻu mo ngāueʻi ai ʻe he kau palōfitá e fakahā mei he ʻOtuá. Te ke lava fēfē ʻo tokoniʻi e fānaú ke tupulaki ʻenau tui ʻoku tataki ʻe he ʻOtuá Hono Siasí ʻi he fakahā?

Ngaahi ʻEkitivitī ʻe Ala Fakahokó

• Kole ki he fānaú ke nau kumi ha tefito ʻo e tuí ʻoku akoʻi ai fekauʻaki mo e kau palōfitá pe fakahaá. Fakaafeʻi kinautolu ke vahevahe e ʻuhinga ʻoku nau houngaʻia ai ʻi heʻetau maʻu ha palōfita moʻuí. Vahevahe ha ngaahi sīpinga ʻo e founga kuo tataki ai ʻe he ʻOtuá e Siasí ʻo fakafou ʻi he fakahā, kau ai e ngaahi sīpinga ne fakamatalaʻi ʻi he Fanongonongo Fakamafaiʻi 1 mo e 2, pea tuku ke vahevahe ʻe he fānaú ha ngaahi sīpinga ʻe niʻihi ʻoku nau angamaheni mo iá (hangē ko ha faʻahinga liliu pē kimuí ni ʻi he ngaahi polokalama pe tuʻutuʻuni ʻa e Siasí).

• ʻOange ki he fānaú e ngaahi potufolofola ko ʻení: 2 Nīfai 26:33; Sēkope 2:27. Fakaafeʻi kinautolu ke nau fakapapauʻi pe ko e potufolofola fē ʻoku fekauʻaki mo e Fanongonongo Fakamafaiʻi 1 (ʻa ia ne iku ai ki hono fakangata ʻo e mali tokolahí) pea ko e potufolofola fē ʻoku felāveʻi mo e Fanongonongo Fakamafaiʻi 2 (ʻa ia naʻá ne fakaʻatā e ngaahi tāpuaki ʻo e lakanga fakataulaʻeikí mo e temipalé ki he kakai ʻo e ngaahi matakali kotoa pē). Fakahoko hoʻo fakamoʻoní ʻoku fakahā ʻe he ʻEikí Hono finangaló ki he kau palōfita ʻi he kuongamuʻá mo e onopōní.

• Hiki e kupuʻi leá ni ʻi he palakipoé mei he Fanongonongo Fakamafaiʻi 1: “Kuo pau ke mou fakamāuʻi ia ʻiate kimoutolu pē.” ʻOku ʻuhinga ki he hā ʻa e fakamāuʻi ʻiate kitautolu peé ʻi he taimi ʻoku maʻu fakahā ai e palōfitá? Ke tokoni kiate kinautolu ke tali e fehuʻi ko ʻení, te ke lava ʻo vahevahe e fakamatala ko ʻeni meia Palesiteni Lāsolo M. Nalesoni: “Te ke lava ʻo ʻiloʻi maʻau e meʻa ʻoku moʻoní mo ia ʻoku ʻikai moʻoní, ʻaki haʻo ako ke ʻiloʻi e fanafana ʻa e Laumālié” (“The Love and Laws of God” [Brigham Young University devotional, Sept. 17, 2019], 4, speeches.byu.edu).

• Tā pe fakaʻaliʻali ha fakatātā ʻo e māmaní ʻi he palakipoé. Fakaafeʻi ha taha ʻo e fānaú ke lau e palakalafi fakaʻosi ʻe ua ʻo e tohi ʻa e Kau Palesiteni ʻUluakí ʻi he ʻaho 8 ʻo Sune, 1978, ʻa ia ʻoku ʻasi ʻi he Fanongonongo Fakamafaiʻi 2 (ʻo kamata ʻi he “Kuó Ne ʻafio mai ki heʻemau lotú …”). Kole ki he fānaú ke nau lau e lahi ʻo e taimi ʻoku ʻasi ai e ongo foʻi lea “tāpuakí” mo e “ngaahi tāpuakí.” Ko e hā e ngaahi tāpuaki ʻoku maʻu mei he ongoongoleleí? Fakaafeʻi e fānaú ke lisi takai kinautolu he tā fakatātā pe laʻitā ʻo e māmaní ʻi he palakipoé. Fakamoʻoni ange ʻoku ofa e ʻOtuá ʻi he kotoa ʻEne fānau ʻi he funga ʻo e māmaní pea ʻoku finangalo ke tāpuekina kinautolu ʻaki ʻEne ongoongoleleí.

Poupouʻi e Ako ʻi ʻApí

Tokoni ki he fānaú ke nau fili ha tefito ʻe taha ʻo e tuí te nau fie ako maʻuloto, pea tokoniʻi kinautolu ke fokotuʻu ha palani ke fakahoko ia.

Fakatupulaki ʻEtau Akoʻí

ʻOku saiʻia e fānaú ke vahevahe e meʻa ʻoku nau akó. Neongo ʻoku nau kei iiki, ka ʻoku lava ʻe he fānaú ʻo fakamālohia e tui ʻa e kau mēmipa honau fāmilí. Poupouʻi kinautolu ke vahevahe mo honau fāmilí ha meʻa ne nau ako ʻi he Palaimelí. (Vakai, Ko e Faiako ʻi he Founga ʻa e Fakamoʻuí,30