Ko e mamata ʻa Siosefa ki heʻene tamaí, faʻeé, mo hono tokouá ʻi he puleʻanga fakasilesitialé (Ko e Meʻa-Hā-Mai ʻa Siosefa Sāmita ki he Puleʻanga Fakasilesitialé, Robert Barrett).

29 Nōvema–5 Tīsema

Tokāteline mo e Ngaahi Fuakava 137–138

“Meʻa-Hā-Mai ki Hono Huhuʻi ʻo e Kau Pekiá”

Kumi ha ngaahi tefitoʻi moʻoni ʻi he ngaahi fakahā ko ʻení ʻoku ngali mahuʻinga ki he fānau ʻokú ke akoʻí. Te ke tokoni fēfē ke mahino kiate kinautolu e ngaahi tefitoʻi moʻoni ko ʻení?

Lekooti Hoʻo Ngaahi Ongó

Fakaafeʻi e Feʻinasiʻakí

Fakaʻaliʻali ha fakatātā ʻo Sīsū Kalaisi ʻi he maama ʻo e ngaahi laumālié, hangē ko e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Fakaafeʻi e fānaú ke vahevahe ha meʻa ʻoku nau ʻilo fekauʻaki mo e maama ʻo e ngaahi laumālié.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 137:1–5

Kuo tofa ʻe he ʻOtuá ha founga maʻaku ke u fakataha ai mo hoku fāmilí ʻo taʻe ngata.

Naʻe mamata ʻa Siosefa ʻi ha mata meʻa-hā-mai, ki he kau mēmipa hono fāmilí ʻoku nau fakataha ʻi he puleʻanga fakasilesitialé. Te ke fakaʻaongaʻi fēfē ʻene mata meʻa-hā-maí ke akoʻi e fānaú ʻe lava ke fakataha e ngaahi fāmilí ʻo taʻengata?

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo ha taha ʻi ho fāmilí, peá ke talanoa fekauʻaki mo e lahi hoʻo fie maʻu ke fakataha mo ia ʻi he puleʻanga fakasilesitialé. Fakamatalaʻi ange naʻe mālōlō kei talavou e tokoua ʻo Siosefa Sāmita ko ʻAlaviní, pea naʻe ʻofa lahi ʻa Siosefa kiate ia. Lau e Tokāteline mo e Ngaahi Fuakava 137:1, 5, pea ʻeke ki he fānaú pe ko hai ne mamata ki ai ʻa Siosefa Sāmita ʻi heʻene mata meʻa-hā-mai ki he puleʻanga fakasilesitialé (vakai foki, Ngaahi Talanoa ʻo e Tokāteline mo e Ngaahi Fuakava, 152–53). Fakaafeʻi e fānaú ke fakamafao honau nimá ke fakahaaʻi e lahi ʻo ʻenau ʻofa ʻi honau ngaahi fāmilí, pea kole ange ke nau vahevahe e ʻuhinga ʻoku nau fie fakataha ai mo honau ngaahi fāmilí ʻi he puleʻanga fakasilesitialé.

• Fakaʻaongaʻi e Tokāteline mo e Ngaahi Fuakava 137:1–5 pea mo e peesi ʻekitivitī ʻo e uike ní ke tokoni ke ʻiloʻi ʻe he fānaú e ngaahi fakaikiiki fekauʻaki mo e mata meʻa-hā-mai ʻa Siosefa ki he puleʻanga fakasilesitialé. Fakaafeʻi kinautolu ke tā ha fakatātā ʻo kinautolu pē mo honau fāmilí ʻi he peesi ʻekitivitií ka ke tā ha foʻi hiva pe hivaʻi ha foʻi hiva fekauʻaki mo e ngaahi fāmilí, hangē ko e“Ko e Fāmilí ke Taʻengata” (Tohi Hiva ʻa e Fānaú, 98).

Tokāteline mo e Ngaahi Fuakava 138:6–11

ʻE lava ke tokoni e Laumālie Māʻoniʻoní ke mahino kiate au ʻa e folofolá.

ʻE ala faingataʻa he taimi ʻe niʻihi ke mahino e folofolá, tautautefito ki he fānaú. ʻOku akoʻi mai ʻe he Tokāteline mo e Ngaahi Fuakava 138:11 ʻe lava ke fakaava ʻe he Laumālie Māʻoniʻoní “e mata ʻo [ʻetau] ʻiló.”

ʻE lava ke tokoni e Laumālie Māʻoniʻoní ke mahino kiate kitautolue meʻa ʻoku tau lau ʻi he folofolá.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo Palesiteni Siosefa F. Sāmita (vakai, Tohi Fakatātā ʻo e Ongoongoleleí, fika 127). Fakamatalaʻi ange naʻe hoko ia ko e Palesiteni fika ono ʻo e Siasí, pea naʻá ne lau e folofolá ʻi ha ʻaho ʻe taha mo fakalaulauloto ki ai (ʻo fakakaukau ki honau ʻuhingá). ʻI hoʻo lau e Tokāteline mo e Ngaahi Fuakava 138:6, 11, fakaafeʻi e fānaú ke pehē pē ko Palesiteni Sāmita kinautolu pea nau fakatātaaʻi e ngaahi leá.

• Talanoa ki he fānaú ha taimi naʻá ke fakalaulauloto ai ki ha meʻa ʻi he folofolá pea ne tokoni atu e Laumālie Māʻoniʻoní ke mahino ia. Hivaʻi fakataha ha foʻi hiva fekauʻaki mo e ako folofolá, hangē ko e “Fekumi, Fifili pea mo Lotu” (Tohi Hiva ʻa e Fānaú, 66). Ko e hā ʻoku talamai ʻe he hivá ni ʻoku totonu ke tau fai ke mahino ʻa e folofolá?

Tokāteline mo e Ngaahi Fuakava 138:18–35

ʻE maʻu ʻe he kotoa ʻo e fānau ʻa e Tamai Hēvaní e faingamālie ke fanongo ki he ongoongoleleí.

Hili hono tutuki ʻo Sīsū Kalaisí, naʻá Ne ʻaʻahi ki Heʻene Kāingalotu māʻoniʻoni ʻi he maama ʻo e ngaahi laumālié. Naʻá Ne fakahinohinoʻi kinautolu ke akoʻi e ongoongoleleí kiate kinautolu ne teʻeki ke nau maʻu iá.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo ha fonualoto (vakai, Tohi Fakatātā ʻo e Ongoongoleleí, fika 58, 59), pe tā ʻi he palakipoé ha fakatātā ʻo ha fonualoto. Fakaʻaliʻali ha fakatātā ʻo e Fakamoʻuí ʻi he maama ʻo e ngaahi laumālié lolotonga e kei ʻi he fonualotó Hono sinó (hangē ko e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). ʻI hoʻomou fai iá, fai ha ngaahi fehuʻi ke tokoni ki he fānaú ke nau ʻiloʻi e ngaahi fakaikiiki mahuʻinga ʻi he Tokāteline mo e Ngaahi Fuakava 138:18–19, 23–24, 27–30, hangē ko e, ko hai ne ʻaʻahi ki ai ʻa Sīsuú, hā ne nau ongoʻí, pea ko e hā naʻá Ne kole ange ke nau faí.

• Fakaʻaliʻali ha fakatātā ʻo ha kau faifekau (vakai, Tohi Fakatātā ʻo e Ongoongoleleí, fika 109, 110), pea kole ki he fānaú ke vahevahe e meʻa ʻoku fai ʻe he kau faifekaú. Te ke lava foki ʻo fakaafeʻi kinautolu ke nau fakatātaaʻi ha niʻihi ʻo e ngaahi meʻa ʻoku fakahoko ʻe he kau faifekaú. Lau e Tokāteline mo e Ngaahi Fuakava 138:31–34 ki he fānaú. Fakamatalaʻi ange, hangē pē ko e ʻi ai ha kau faifekau ʻi he māmaní, ʻoku ʻi ai foki mo ha kau faifekau ʻi he maama ʻo e ngaahi laumālié ʻoku nau akoʻi e kakai ʻi aí.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 137:1–5

Kuo tofa ʻe he ʻOtuá ha founga maʻaku ke u fakataha ai mo hoku fāmilí ʻo taʻengata.

Naʻe maʻu ʻe Siosefa Sāmita ha mata meʻa-hā-mai ʻo e puleʻanga fakasilesitialé peá ne mamata ai ki heʻene ongomātuʻá mo hono tokoua ko ʻAlaviní. ʻOku akoʻi mai ʻe he meʻa-hā-mai ko ʻení kapau ʻoku tau māʻoniʻoni, ʻe malava ke hokohoko atu hotau ngaahi vā fetuʻutaki fakafāmilí ʻi he moʻui ka hokó.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau e Tokāteline mo e Ngaahi Fuakava 137:1–5 pea tā ha fakatātā ʻo e meʻa ʻoku nau laú (vakai foki ki he peesi ʻekitivitī ʻo e uike ní). Naʻe ongoʻi fēfē nai ʻa Siosefa Sāmita ʻi heʻene mamata ki he kau mēmipa hono fāmilí ʻi he puleʻanga fakasilesitialé?

• Huluʻi e foʻi vitiō “Ko e Fāmilí ke Taʻengata” (ChurchofJesusChrist.org), pe hivaʻi ha foʻi hiva fekauʻaki mo e ngaahi fāmilí, hangē ko e “Ko e Fāmilí ke Taʻengata” (Tohi Hiva ʻa e Fānaú, 98). Ko e hā ʻoku akoʻi mai ʻe he foʻi vitioó pe hivá fekauʻaki mo e meʻa te tau lava ʻo fai ke fakataʻengataʻi hotau ngaahi fāmilí?

Tokāteline mo e Ngaahi Fuakava 138:1–11

ʻI he taimi ʻoku ou fakalaulauloto ai ki he folofolá, ʻe lava ke tokoni e Laumālie Māʻoniʻoní ke mahino ia kiate au.

Ko e hā ʻe lava ke ako ʻe he fānaú mei he sīpinga ʻa Palesiteni Siosefa F. Sāmitá, te ne ala fakatupulaki ai e founga ʻoku nau ako ʻaki e folofolá?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau e Tokāteline mo e Ngaahi Fuakava 138:1–11, pea tokoni kiate kinautolu ke hiki ha fakamatala nounou sētesi ʻe taha ʻo e aʻusia ʻa Palesiteni Siosefa F. Sāmitá. Ko e hā naʻá ne fai ʻo tupu mei ai ʻene mata meʻa-hā-mai fakaofó? ‘Oku ʻuhinga ki he hā ʻa e fakalaulauloto pe fakakaukau ki he folofolá?

• ʻEke ki he fānaú pe ko e hā ʻoku nau fai ʻi he taimi ʻoku nau maʻu ai ha ngaahi fehuʻi fekauʻaki mo e ongoongoleleí. Vahevahe ha ngaahi sīpinga ʻe niʻihi mei he folofolá pe mei hoʻo moʻuí kau ki ha taimi naʻe ʻomi ai ʻe hoʻo fakalaulauloto ki he folofolá ha mahino mei he Laumālié (vakai, ki ha sīpinga ʻi he, 1 Nīfai 11:1–6; Tokāteline mo e Ngaahi Fuakava 76:19–24; Siosefa Sāmita—Hisitōlia 1:11–12).

Tokāteline mo e Ngaahi Fuakava 138:12–35

ʻE maʻu ʻe he fānau kotoa ʻa e Tamai Hēvaní e faingamālie ke fanongo ki he ongoongoleleí.

Naʻe ako ʻe Palesiteni Siosefa F. Sāmita ʻoku hokohoko atu e ngāue ʻo hono malanga ʻaki e ongoongoleleí ʻi he maama ʻo e ngaahi laumālié. ʻOku fakapapauʻi ʻe he ngāué ni ʻe maʻu ʻe he tokotaha kotoa ha faingamālie ke tali e ongoongoleleí.

Ngaahi ʻEkitivitī ʻe Ala Fakahokó

• Lisi ʻi he palakipoé ha niʻihi ʻo e ngaahi veesi mei he vahe 138. Pea lisi ʻi ha hokohoko kehe, ha ngaahi fakamatala ʻokú ne fakanounouʻi e ngaahi veesi folofola takitaha. Fakaafeʻi e fānaú ke nau fakahoa e ngaahi fakamatalá mo e ngaahi veesi totonú. ʻE lava ke kau ʻi he ngaahi vēsí ʻa e 12–16 (ʻoku fakataha e ngaahi laumālie angatonú ke tatali ki he hā mai ʻa Sīsuú), 18–19 (ʻoku hā e Fakamoʻuí ki he ngaahi laumālie angatonú, 29–30 (ʻoku fokotuʻu ʻe Sīsū ha kau talafekau ke nau malanga ʻaki e ongoongoleleí), 31–35 (ʻoku malangaʻi ʻe he ngaahi laumālie angatonú e ongoongoleleí), pea fai pehē atu ai. Hili e fakatauhoa ʻe he fānaú, kole ange ke nau vahevahe e meʻa ʻoku nau ako mei he ngaahi vēsí.

• Kole ki ha niʻihi ʻo e fānáu ke nau lau e Tokāteline mo e Ngaahi Fuakava 138:33 ke ʻiloʻi pe ko e ngaahi tefitoʻi moʻoni fē ʻo e ongoongoleleí ne akoʻi ki he ngaahi laumālie ʻo e pekiá. Kole ki he fānau kehé ke nau lau e ngaahi tefitoʻi moʻoni ʻoku akoʻi ʻi he Ngaahi Tefito ʻo e Tui 1:4. Ko e hā ʻoku faitatau ʻi he ngaahi veesi ko ʻení, pea ko e hā ʻoku kehé? Ko e hā ʻoku akoʻi mai ʻe he meʻá ni fekauʻaki mo e Tamai Hēvaní mo ʻEne palaní?

Poupouʻi e Ako ʻi ʻApí

Fakaafeʻi e fānaú ke nau palaniʻi ha taimi he uiké ni te nau fakalaulauloto ai ki he folofola ʻoku nau laú.

Fakatupulaki ʻo ʻEtau Founga Akoʻí

Poupouʻi ʻa e ʻapasiá. Tokoni ke mahino ki he fānaú ko ha konga mahuʻinga ʻo e ʻapasiá ʻa e fakakaukau ki he Tamai Hēvaní mo Sīsū Kalaisí. ʻE lava ke ke fakamanatu ki he fānaú ke nau loto-ʻapasia ʻaki ʻenau hiva leʻo siʻi pe ngūnguuʻi ha foʻi hiva pe fakaʻaliʻali ha fakatātā ʻo Sīsū.