ʻAloʻí ;i Kupa mo ʻUmipea, tā fakatātaaʻi ʻe J. Kirk Richards

20–26 Tīsema

Kilisimasí

Ko e Meʻaʻofa Taʻefakatataua ʻo e ʻAlo Fakalangi ʻo e ʻOtuá

Ko e kilisimasí ko ha taimi fakafiefia ia ki ha fānau tokolahi. Fakakaukau ki he founga te ke tokoni ai kiate kinautolu ke nau fakafehokotaki e fiefia ʻo e taimi Kilisimasí mo e fiefia ʻi he ongoongolelei ʻa e Fakamoʻuí.

Lekooti Hoʻo Ngaahi Ongó

Fakaafeʻi e Feʻinasiʻakí

Fakaafeʻi e fānaú ke vahevahe e meʻa ne nau fai he uike ne toki ʻosí ke fakafiefiaʻi hono aloʻi ʻo e Fakamoʻuí.

Akoʻi e Tokāteliné: Fānau Iiki Angé

Te u lava ʻo “fakahoko [ʻeku] fakamoʻoní” ke fakafiefiaʻi hono aloʻi ʻo Sīsuú.

ʻI he “Ko e Kalaisi Moʻuí” (ChurchofJesusChrist.org), naʻe fakahoko ai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻenau fakamoʻoni kia Sīsū Kalaisí ke “fakamanatua hono aloʻi ʻo Sīsū Kalaisí.” Fakakaukau ki he founga te ke poupouʻi ai e fānaú ke vahevahe ʻenau ngaahi fakamoʻoní mo e niʻihi kehé.

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha tatau ʻo e “Ko e Kalaisi Moʻuí” (vakai, fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Tuhu ki he foʻi lea Kalaisí ʻi he hingoá, pea tuku ke tuhu foki mo e fānaú ki he foʻi leá. Tuhu foki ki he ngaahi fakamoʻoni hingoa ʻi lalo he pēsí, pea talaange ki he fānaú, ʻi he 2000, naʻe tohi ʻe he Kau Palesitenisī ʻUluakí mo e Kau ʻAposetolo ʻe Toko Hongofulu Mā Uá ʻenau fakamoʻoni kia Sīsū Kalaisí, pea nau fakamoʻoni hingoa ki ai, pea vahevahe ia mo e māmaní.

• Fakaʻaliʻali ha fakatātā ʻo Sīsū Kalaisi, pea fakaafeʻi e kiʻi tamasiʻi/taʻahine takitaha ke tuʻu hake pea vahevahe ha meʻa ʻokú ne ʻilo fekauʻaki mo Ia. Kapau ʻoku nau fie maʻu tokoni, fokotuʻu ange ha ngaahi moʻoni mei he “Ko e Kalaisi Moʻuí.” Fakamanatu ki he fānaú ko e taimi ʻoku nau talanoa ai ki he niʻihi kehé fekauʻaki mo Sīsuú, ʻoku nau vahevahe ai ʻenau ngaahi fakamoʻoní.

• Talaange ki he fānaú e founga naʻá ke maʻu ai hoʻo fakamoʻoni kia Sīsū Kalaisí mo e meʻa ʻokú ke fakahoko ke tauhi hoʻo fakamoʻoní ke mālohí. Tokoni kiate kinautolu ke nau fakakaukau ki ha ngaahi founga ʻe lava ke nau fakamālohia ai ʻenau ngaahi fakamoʻoni kia Sīsū Kalaisí, pea fakaafeʻi kinautolu ke fili ha meʻa ʻe taha te nau fai.

Naʻe fekauʻi mai ʻe he Tamai Hēvaní ʻa Hono ʻAló ko ha meʻaʻofa kiate kitautolu.

Ko hono foaki mo hono maʻu ʻo e ngaahi meʻaʻofá ko ha tukufakaholo angamaheni ia ʻo e Kilisimasí ki ha kakai tokolahi. ʻOku totonu ke tokoni e tukufakaholo ko ʻení ke tau manatuʻi e “meʻaʻofa taʻefakatataua ʻo Hono ʻAlo fakalangí” (“Ko e Kalaisi Moʻuí”).

Ngaahi ʻEkitivitī ʻe Ala Fakahokó

• Kole ki he fānaú ke nau talanoa fekauʻaki mo ha ngaahi meʻaʻofa kuo foaki ange pe kuo nau maʻu. Lau kiate kinautolu e sētesi fakaʻosi ʻo e “Ko e Kalaisi Moʻuí,” pea fakaafeʻi kinautolu ke nau fakafanongo ki he meʻaʻofa kuo foaki mai ʻe he ʻOtuá maʻatautolú. (ʻO ka fie maʻu, tokoni ke mahino kiate kinautolu ʻoku ʻuhinga e “taʻefakatatauá” ki he “lelei ange ʻi ha toe meʻa.”) Ko e hā ʻoku hoko ai e ʻAlo ʻo e ʻOtuá, ʻa Sīsū Kalaisi, ko e meʻaʻofa lelei tahá?

• Hivaʻi fakataha ha foʻi hiva fekauʻaki mo Kalaisi, hangē ko e “Naʻá Ne Fekau Hono ʻAló” (Tohi Hiva ʻa e Fānaú, 20–21). Tokoni ki he fānaú ke fili ha kupuʻi lea mei he foʻi hivá te nau fie tā fakatātaaʻi (hangē ko e “ʻaló” pe “fakahā e ʻiló”). ʻI heʻenau tā fakatātaá, kole ange ke nau talaatu e ongo ʻoku nau maʻu fekauʻaki mo e meʻa kuo fakahoko ʻe Sīsū maʻanautolú. Vahevahe foki mo hoʻo ngaahi ongó.

ʻOku fakaafeʻi au ʻe Sīsū Kalaisi ke u muimui ʻi Heʻene sīpingá.

ʻOku kau ʻi he “mālohi” ʻo e Fakamoʻuí ki he māmaní ʻa ʻEne sīpinga haohaoá. Te ke ueʻi fēfē e fānaú ke nau muimui kiate Iá?

Ngaahi ʻEkitivitī ʻe Ala Fakahokó

• Lau ki he fānaú mei he palakalafi ua ʻo e “Ko e Kalaisi Moʻuí,” ha niʻihi ʻo e ngaahi meʻa naʻe fakahoko ʻe Sīsuú. Fakaʻaliʻali ha ngaahi fakatātā mei Heʻene moʻuí (vakai ki he peesi ʻekitivitī ʻo e uike ní), pea fakaafeʻi e fānaú ke nau talanoa fekauʻaki mo e meʻa ʻoku fakahoko ʻe he Fakamoʻuí ʻi he fakatātaá. Tokoni kiate kinautolu ke nau fakakaukau ki ha ngaahi founga ʻe lava ke nau muimui ai ʻi Heʻene sīpingá.

• Talanoa ange ki ha taimi naʻe tāpuekina ai koe ʻe ha ngāue tokoni faka-Kalaisi ʻa ha taha. Fakaafeʻi ha kiʻi tamasiʻi/kiʻi taʻahine ke ne fakatātaaʻi ha ngāue tokoni faingofua, pea kole ki he fānau kehé ke nau mateʻi e meʻa ʻokú ne faí. Tuku ke maʻu ʻe he kiʻi tamasiʻi/taʻahine kotoa ha faing,mālie. Tokoni ki he fānaú ke nau fakakaukau ki ha meʻa te nau lava ʻo fai ke tokoni ki ha taha ʻi honau fāmilí.

Akoʻi e Tokāteliné: Fānau Lalahi Angé

“ʻOku mau fakahoko atu ai ʻemau fakamoʻoní.”

ʻE lava ke ueʻi ʻe he ngaahi sīpinga ʻa e kau palōfita mo e kau ʻaposetolo ne nau hiki e “Ko e Kalaisi Moʻuí” ke vahevahe ʻe he fānaú ʻenau ngaahi fakamoʻoni kia Sīsū Kalaisí.

Ngaahi ʻEkitivitī ʻe Ala Fakahokó

• Hiki ʻi he palakipoé ʻa e ʻOku ou ʻilo naʻe hanga ʻe Sīsū Kalaisi … pea fakaafeʻi e fānaú ke vahevahe ha ngaahi founga te nau fakakakato ai e sētesí. Fokotuʻu ange ke nau kumi ʻi he “Ko e Kalaisi Moʻuí” ha ngaahi fakakaukau. Ko e hā te tau lava ʻo fai ke fakamālohia ʻetau ngaahi fakamoʻoni kia Sīsū Kalaisí? ʻOku tāpuekina fēfē e niʻihi kehé ʻi he taimi ʻoku tau vahevahe ai ʻetau ngaahi fakamoʻoní?

• Fakamahinoʻi ange naʻe fakamoʻoni hingoa ki he “Ko e Kalaisi Moʻuí” ʻa e Kau Palesitenisī ʻUluakí mo e Kau ʻAposetolo ʻe Toko Hongofulu Mā Uá. Lau fakataha e Tokāteline mo e Ngaahi Fuakava 107:23. Ko e hā ha meʻa ʻoku kehekehe ai e Kau ʻAposetoló “mei he kau ʻōfisa kehe ʻi he Siasí”? Ko e hā ʻoku tau houngaʻia ai ke maʻu ha kau fakamoʻoni makehe ʻo Kalaisi ʻi hotau kuongá?

“Kuo teʻeki ke ʻi ai ha taha kuo ʻi ai hano mālohi pehē.”

ʻI he “Ko e Kalaisi Moʻuí,” naʻe fakahā ʻe he kau palōfitá mo e kau ʻaposetoló ʻoku ʻikai mo ha toe taha kuó ne maʻu ha mālohi lahi ange ki he fānau ʻa e ʻOtuá ʻia Sīsū Kalaisi. Fakalaulauloto ki he founga te ke tokoni ai ki he fānaú ke nau ako fekauʻaki mo e tākiekina ʻo e Fakamoʻuí kiate kitautolu kotoá.

Ngaahi ʻEkitivitī ʻe Ala Fakahokó

• ʻOange ki he kiʻi tamasiʻi/taʻahine takitaha ha kupuʻi lea pe sētesi mei he “Ko e Kalaisi Moʻuí,” pea kole ange ke nau tā ha fakatātā ʻo e kupuʻi lea pe sētesi ko iá. ʻI hono fakaʻaliʻali ʻe he kiʻi tamasiʻi/taʻahine takitaha ʻene fakatātaá ki he kalasí, kole ange ki he fānau kehé ke nau mateʻi pe ko e hā ʻoku fakatātaaʻi mai ʻe he fakatātaá mo kumi hono sētesí ʻi he “Ko e Kalaisi Moʻuí.” ʻOku tāpuekina fēfē kitautolu koeʻuhí ko e moʻui mo e misiona ʻo Sīsū Kalaisí?

• Tokoni ki he fānaú ke nau kumi ha ngaahi hingoa pe huafa kehekehe ʻo Sīsū Kalaisi ʻi he “Ko e Kalaisi Moʻuí” pea laineʻi kinautolu ʻo kapau ʻe lava (ʻoku kau ai ʻa e Mīsaiá, ʻAlo Lahi Tahá, ko e ʻuluaki mo e ki mui, taukapo, mo e makatuliki). Talanoa fekauʻaki mo e meʻa ʻoku akoʻi mai ʻe he ngaahi huafa takitaha ko ʻení fekauʻaki mo Iá. (ʻOku fakaʻuhingaʻi ha niʻihi ʻo e ngaahi huafa ko ʻení ʻi he Fakahinohino ki he Ngaahi Folofolá.)

“Ko Ia ʻa e maama, mo e moʻui, pea mo e ʻamanaki leleiʻanga ʻo e māmaní.”

Ko e Kilisimasí ko ha faʻahitaʻu fakafiefia moʻoni ia koeʻuhí ko e ʻamanaki lelei naʻe ʻomi ʻe Sīsū Kalaisi ki he māmaní ʻo fakafou ʻi Heʻene ngaahi akonakí, sīpingá, mo e feilaulau fakaleleí.

Maama ʻo e Māmaní, tā fakatātaaʻi ʻe Howard Lyon

Ngaahi ʻEkitivitī ʻe Ala Fakahokó

• Fakaafeʻi e kiʻi tamasiʻi/taʻahine takitaha ke ne tā ha fuʻu ʻakau Kilisimasi, pe tā ha fuʻu ʻakau ʻi he palakipoé. Fakaafeʻi e fānaú ke nau teuteuʻi e fuʻu ʻakaú ʻaki ha ngaahi lea pe kupuʻi lea mei he “Ko e Kalaisi Moʻuí” ʻokú ne fakamatalaʻi ha meʻaʻofa kuo foaki mai ʻe he Fakamoʻuí (hangē ko e “māmá,” “moʻuí,” mo e “ʻamanaki leleí”). Tuku ke nau talanoa fekauʻaki mo e ʻuhinga ne nau fili ai e ngaahi lea pe kupuʻi lea ko iá.

• Tokoni ki he fānaú ke kumi ha ngaahi himi Kilisimasi ʻoku fakamatala fekauʻaki mo e maama, moʻui, mo e ʻamanaki lelei naʻe ʻomi ʻe he ʻaloʻi ʻo e Fakamoʻuí ki he māmaní—hangē ko ʻení, “Kolo ko Pētelihemá” pe “Kau ʻĀngelo ne Hiva” (Ngaahi Himi, fika 116–8). Hivaʻi fakataha e ongo himí, pea tuku ke vahevahe ʻe he fānaú e founga kuo ʻomi ai ʻe Sīsū ha maama, moʻui, mo ha ʻamanaki lelei ki heʻenau moʻuí.

• Kole ki ha niʻihi ʻo e fānaú ke nau lau fekauʻaki mo e kau tauhi sipi ʻi he Luke 2:8–20. Kole ki he niʻihi kehé ke nau lau fekauʻaki mo Simione ʻi he Luke 2:25–33. Fakaafeʻi kinautolu ke nau fevahevaheʻaki e ongo naʻe maʻu ʻe he kau tauhi sipí mo Simione ʻi heʻenau ʻilo kuo ʻaloʻi ʻa Sīsuú. Ko e hā ne nau ongoʻi pehē aí? Ko e hā ʻoku ʻomi ai ʻe Hono ʻaloʻí ha “fiefia lahi” kiate kitautolú?

Poupouʻi e Ako ʻi ʻApí

Fakaafeʻi e fānaú ke nau fakakaukau ki ha taha ʻi honau fāmilí te nau lava ʻo vahevahe ki ai ʻenau fakamoʻoni kia Sīsū Kalaisí. Tokoni kiate kinautolu ke fakakaukau ki he meʻa te nau ala lea ʻaki ke fakamālohia e tui ʻa e tokotahá kiate Iá.

Fakatupulaki ʻo ʻEtau Founga Akoʻí

Teuteu ʻaki hono ako e folofolá. “ʻOku hanga ʻe hono ako e folofola ʻa e ʻOtuá ʻi he faʻa lotú ʻo ʻai ke tau feongoongoi mo e Laumālie Māʻoniʻoní. Te Ne ueʻi leva kitautolu ke tau fakakaukau ki he meʻa kuo tau akó ʻi heʻetau akoʻi mo hiki hake e niʻihi kehé” (Ko e Faiako ʻi he Founga ʻa e Fakamoʻuí, 12).