13–19 ni Tiseba

Na Matavuvale: iVakaro iVuravura Raraba

Ni Suitu tiko ni Nona Yavu ni Bula Oqo na Dauniveibuli na Tiko Vakamatavuvale

Na ivakavuvuli cava soti o raica ena “Na Matavuvale: iVakaro iVuravura Raraba” o sa vakauqeti kina mo wasea vei ira na gone? Ena nomu vakavakarau mo veivakavulica, vola na veivakauqeti o ciqoma mai vua na Yalotabu.

Vola na Veika o Vakauqeti Kina

Sureta na Veiwasei

Sureti ira na gone me ra kauta mai se droinitaka na iyaloyalo ni nodra matavuvale me ra wasea ki na kalasi. Kerei ira na gone me ra wasea e dua na ka era dau taleitaka me baleta na nodra matavuvale se na veika era sa vulica me baleta na matavuvale ena macawa oqo.

Vakavulica na iVunau: Gone Sobu

Na matavuvale era sa tiki bibi ni ituvatuva nei Tamada Vakalomalagi

O na vakayagataka vakacava na ivakaro ni matavuvale me vukei ira na gone mera kila vakavinaka na bibi ni matavuvale ena ituvatuva ni Kalou?

iTaviqaravi e Rawa ni Caka

• Vukea na gone me ra vakasamataka na veika e rui bibi kina me ra na via tukuna vei ira taucoko me baleti ira. Vakaraitaka vei ira na gone e dua na ilavelave ni “Na Matavuvale: iVakaro ki Vuravura Raraba,” ka vakamacalataka ni o ira na parofita kei na iApositolo era vola me tukuni vei ira kece na bibi ni matavuvale vua na Tamada Vakalomalagi. Tarogi ira na gone na cava era nanuma e vuna na kena sa rui bibi vua na Tamada Vakalomalagi na matavuvale. Wasea e dua na ka mai na ivakaro o nanuma ni gadreva na tamata kece me ra kila.

• Vakaraitaka vei ira na gone e dua na iyaloyalo ni dua na valetabu kei dua na iyaloyalo ni matavuvale. Me ra taura na gone na iyaloyalo ni o wilika na iotioti ni yatuvosa e na ikatolu ni parakaravu ni ivakaro ni matavuvale. Kerei ira me ra dusia yadua na iyaloyalo dodonu ni ko wilika na vosa “valetabau” kei na “matavuvale.” Vakadinadinataka ni ena vuku ni cakacaka vakalotu ni valetabu, na matavuvale e rawa ni vakaduavatataki me sega ni mudu. Lagata vata e dua na sere me baleta na matavuvale tawamudu, me vaka na “I Love to See the Temple” (Children’s Songbook, 95), ka vukei ira na gone me ra vakarogoca na vosa me vaka na “valetabu” kei na “vuvale.”

• Taroga vei ira na gone na cava e rawa ni da cakava me vakaukauwataka na veika eso— me vaka na batida, yagoda se dua na vale. Na cava e rawa ni da cakava me da vakaukauwataka kina na noda matavuvale? Vukei ira na gone me ra kila na ivakavuvuli e veimuataki ki na bula marau ena bula vakamatavuvale, ka kunei ena ikavitu ni parakaravu ni ivakaro ni matavuvale (raica talega na tabana ni itaviqaravi ena macawa oqo). Vukei ira na gone me ra tuvanaka na sala eso era na vaqaqacotaka na nodra matavuvale.

  

  Me ra susuga cake na itubutubu na luvedra ena loloma kei na buladodonu.

O au na “luvena tagane se yalewa lomani vakayalo na noda itubutubu vakalomalagi.”

E vakavulicana ivakaro ni matavuvale ni da luvena kece na iTubutubu Vakalomalagi ka vuni noda tiko oqo e vuravura me yaco me vakataki (Rau)Ira.

iTaviqaravi e Rawa ni Caka

• Lagata vata na “Au Luve ni Kalou” (iVolanisere ni Gonelalai, 2). Qai viritaka e dua na polo se na iyaya malumalumu vua e dua na gone ni o tukuna, “Au kila e dua na luve ni Kalou ka yacana o [yaca ni gone].” Kerei ira na gone me viritaka na ka oya vua e dua tale na gone, ka kaya kina na vosa vata ga ka vakayagataka na yaca ni gone oya. Me vakayacori na itaviqaravi me yacova ni sa cakava kece na tamata yadudua. Vakadinadinataka ni gone yadudua e “luvena tagane se yalewa lomani vakayalo na noda itubutubu vakalomalagi.”

• Navuca na sala e rawa ni o vakaraitaka ni baleta ni da luvedrau na iTubutubu Vakalomalagi, eda na rawa ni vakai RauIra. Me kena ivakaraitaki, vakaraitaka na iyaloyalo ni manumanu kei na nodra isolisoli, se vei iko kei na nomu itubutubu se (luvemu)o ira na gone, ka vukei ira na gone me ra raica na veika e tautauvata. Vakadinadinataka ni vaka ga ni na tubu cake na gone dramidrami me lakii vakataki ira na nodra itubutubu, ena rawa ni dua na siga me da na vakataki rau na noda iTubutubu Vakalomalagi.

Vakavulica na iVunau: Gone Qase Cake

Na matavuvale sa usutu ni nona ituvatuva na Tamada Vakalomalagi.

Na ivakaro ni matavuvale e a soli me vakadeitaka na dina tawamudu me baleta na matavuvale. Vakasamataka na sala o na vukei ira kina na gone me ra vakatitobutaka na nodra ivakadinadina me baleta na veidina oqo.

iTaviqaravi e Rawa ni Caka

• Tarogi ira na gone kevaka era kila o cei e vola na ivakaro ni matavuvale. (Ena nona itukutuku “Na Yavu kei na iVakaro” [Ensign se Liaona, Nove. 2017, 28–31], Peresitedi Dallin H. Oaks e vakamacalataka na kena a volai vakacava.) Vukei ira na gone mera kila vakavinaka na cava na ibalebale ni vosa “keitou vunautaka” ena kena idola ni parakaravu. Kerei ira mera wasea na nodra nanuma me baleta na cava na parofita kei na iApositolo vinakata kina me “keitou vunautaka” na dina me baleta na matavuvale ena noda gauna oqo.

• Wasea e vica na iyatuvosa mai na ivakaro ni matavuvale ka ra vakaibalebale vakalevu vei iko. Sureti ira na gone mera wasea na nodra nanuma me baleta na dina oya. Ena duatani vakacava na noda bula kevaka eda sega ni kila na veika oqo? Lagata vata e dua na sere e sema tiko ki na veika dina e kunei ena ivakaro, me vaka na “Meu Muria na Nona Lewa” se “Matavuvale me Tawamudu Tu” (iVolanisere ni Lalai, 86, 98).

• Vakaraitaka na iyaloyalo vei ira na gone (se sureti ira me ra droinitaka eso) e vakatakarakarataki ni dina e kune ena ivakaro ni matavuvale. Oqo sa rawa me iyaloyalo ni dua na valetabu, masumasu se era qito voli e dua na matavuvale, se dua na veiwatini vakamau. Sureti ira na gone me ra raica na iyatuvosa ena ivakaro ni matavuvale ka semati ki na iyaloyalo. Na cava era vakavulica na veiyatuvosa oqo vei keda?

• Vakarautaka eso na taro ena rawa ni saumi ena ivakaro ni matavuvale, me vaka na “Na cava e vakila na Kalou me baleta na vakamau?” kei na “Na cava e vakamarautaka e dua na matavuvale?” Me ra digia yadudua na gone e dua na taro, ka vukei ira mera kunea na kena isau ena ivakaro.

• Sureta e dua na tina kei na tama ni dua vei ira na gone me ra wasea ki na kalasi era “veivukei vakatautauvata” vakacava ena nodra “itavi tabu” ena nodra matavuvale. Sureti ira na gone me ra veivosakitaka na veika e rawa ni ra cakava ena gauna oqo me ra vakavakarau me ra yalewa kei na tagane vakawati, na tina kei na tama yalododonu.

Na matavuvale e dau mamarau vakalevu duadua ena gauna era sa muri Jisu Karisito.

E lomani ira yadua na luvena na Tamada Vakalomalagi, ia e vinakata o koya me da bula marau. E rawa vakacava mo vukei ira na gone o vakavulica me ra kila kina ni marau dina ena yaco mai na nodra muria na nodra ivakavuvuli kei na ivakaraitaki ni noda iVakabula o Jisu Karisito?

iTaviqaravi e Rawa ni Caka

• Droinitaka e dua na uto levu ena vava ni volavola, ka sureti ira na gone me wilika na parakaravu vitu ni ivakaro. Kerei ira mera vakaraica na veika e rawa ni ra cakava me ra vukea na nodra matavuvale me bula marau, ka vola na nodra isau ni taro e loma ni uto. Sureti ira na gone me ra digia e dua na ka era rawa ni cakava me vakamarautaki ira vakalevu nodra dui vale.

• Sureti ira na gone me ra wasea na veika era sotava ni ra sa lomani mai vei dua na nodra lewe ni matavuvale. Vukei ira na gone me raica na ivakavuvuli mai na ikavitu ni parakaravu ni ivakaro ka rawa ni vukea na lewe ni matavuvale me vakila ni lomani. Na noda kila na kosipeli i Jisu Karisito ena tatara vakacava ki na sala eda qarava kina na noda matavuvale?

• Tarogi ira na gone na veika era na tukuna kevaka e dua na itokani e tarogi ira na vuna na vakamau se na vaka gone e ka bibi. E rawa vakacava ni da vukea na itokani oqo me ra kila na bibi ni matavuvale vua na Tamada Vakalomalagi? Vukei ira na gone me ra raica na itukutuku ena ivakaro ni matavuvale e rawa ni veivukei; raica talega na vidio “What Is the Purpose of Family?” (ChurchofJesusChrist.org

Vakauqeta na Vuli e Vale

Vakayaloqaqataki ira na gone me ra cakava e dua na ituvatuva ni dua na ka me vakaukauwataka na nodra matavuvale. Vakayaloqaqataki ira me ra wasea na veivakasama oqo vata kei nodra matavuvale ena nodra itikotiko.

Vakatorocaketaki Noda Veivakavulici

Mo dau qarauna. Ni ko vakavulica na dina e vakavulici ena ivakaro ni matavuvale, yalovinaka mo kila tiko ni vuqa na gone e susugi ena matavuvale e sega ni veidonui kei na inaki e tukuni tiko ena ivakaro. Qarauna me kakua ni cavuta e dua na ka e rawa me ra yalolailai se lolovira.