ajri ro rej al

Tōpar Aikuj ko an Ajri ro Ewōr Utam̧we Ippāer

Ritōl ro an Būraimere ewōr juōn aer eddo eaorōk n̄an katakin gospel eo an Jisōs Kraist n̄an aolep ajri ro, ekoba ro ewōr utam̧we ippāer. Būraimere, aolep ajri rej aikuj in ruwainene, iakwe, kōkkajiririk, im kobatok. Ilo mejatoto in epidodoļo̧k n̄an aolep ajri ro n̄an meļeļe iakwe eo an Jemedwōj Ilan̄ im Jisōs Kraist im n̄an en̄jake im kile kareel eo an Jetōb Kwojarjar. Ļōmņak kein ilaļ remaron̄ jipan̄ tōpar aikuj ko an ajri ro ewōr utam̧we ippāer.

• Jeļā kōn lukkuun aikuj eo an ajri eo. Wāween eo em̧m̧antata n̄an kōm̧m̧ane ej n̄an kōnono n̄an ro jinen im jemen ajri eo ak ribōk eddo ro. Pukot wāween eo em̧m̧antata n̄an an ajri ro ekkatak im ta jekjek ko renaaj lukkuun jipan̄. Kwomaron̄ bar kapilōk ritōl ro an Būraimere jet ro ewōr aer en̄jake ak imminene n̄an kwaļo̧ke.

• Ejaake juon mejatoto eo em̧m̧an eo me aolep ajri renaaj en̄jake jokne im iakwe. Katak etan aolep ajri ro ilo kūlaaj eo am̧, im jipan̄ er en̄jake aer ruwainene, iakwe, im kobatok. Ajri ro ewōr utam̧we ippāer ekkā aer kōnanaik er, kōn menin pukot wāween ko n̄an nōbar er kōn m̧wil ko rem̧m̧an. Jipan̄ ajri ro jet kwaļo̧k iakwe im kea.

• Kōm̧m̧an oktak ko n̄an an aolep bōk kūņaer. Oktak ko reddik remaron̄ in kōm̧m̧an n̄an m̧akūtkūt bwe aolep ajri ro ren ekkatak, ekoba ro ewōr utam̧we ippāer ak epen aer ekkatak. N̄an waanjon̄ok, eļan̄n̄e m̧akūtkūt eo ej ba kwaļo̧k pija ko, kwomaron̄ al juon al ijeļo̧kin n̄an kobaik ajri ro ewor aer m̧ōjņo ilo lo̧ļo̧kijen.

• Ejaake oktak im katakin ejjejet ilo kūlaajruum̧. Juon wāween n̄an kōm̧m̧ane menin ej n̄an kōm̧m̧ane juon peba kileplep kōn jikejuuļ in laajrak eo an kūlaaj ewi wāween an kūlaaj eo ļoore. Jikejuuļ eo am̧ emaron̄ koba jar ko, iien katakin, im iien m̧akūtkūt. Menin emaron̄ jipan̄ kadikļo̧k en̄jake ko jejjab melele kaki me remaron̄ kōļapļo̧k an ajri ro ipepata.

• Kōjerbal pija ko. Ajri ro epen aer ekkatak ak m̧wiļ ko ippāer remaron̄ in jeraam̧m̧an jān pija ko, āinwōt jekjek in pijain an juon kajutak pein m̧okta jen an uwaak.

• Meļeļe etke m̧wiļ ko reppen rej waļo̧k. Ekkatak kōn utam̧we ak jekjek ko me emaron̄ in im̧we ajri n̄an kwaļo̧k m̧wiļ eo ejjab em̧m̧an. Lukkuun lale ta eo ej waļo̧k n̄e m̧wiļ ko rejjab em̧m̧an rej waļo̧k. Lukkuun jar im ļōmņake wāween n̄an jerbale jekjek in n̄an jipan̄ ajri eo.

• Jipan̄ kajjojo ajri eddōkļo̧k im wōnm̧aanļo̧k. Joseph Smith katakin, “Aolep kōļmenļo̧kjeņ im jetōb ko me Anij ekar jilkintok n̄an laļ in raorōk im wōr tokjeer” (Katak ko an Bureejtōn eo an Kabun̄: Joseph Smith [2007], 210). Jab ļōmņak bwe ajri eo ewōr an nan̄inmej eban ekkatak ak bōk koņan. Kajjitōk ippān Irooj n̄an jipan̄ eok jeļā kilen jipan̄ ajri ro tōpar jetōb eo aer eaorōk.