ajri ro reddik rej jijet

Tōpar Aikuj ko an Ajri ro Reddikļo̧k

Ajri ro repojak im kijōrjōr in ekkatak gospel eo eļan̄n̄e ej waļo̧k ilo juon wāween eo remaron̄ meļeļe kake. Eļaptata eļan̄n̄e kwoj katakin ajri ro reddikļo̧k, ļōmņak in kōjerbal m̧akūtkūt kein ilaļ n̄an jipan̄ er ekkatak.

• Al. Al im al ko jān Children’s Songbook rej kwaļo̧k katak ko rekajoor. Kōjerbal index in unin kōnono ko ilo tulikin Children’s Songbook n̄an pukot al ko me reiokļo̧k wōt pedped in katak ko kwoj katakin. Jipan̄ ajri ro iookļo̧k ennaan ko kōn al ko n̄an mour ko aer. N̄an waanjon̄ok, kwomaron̄ kajjitōk kōn naan ko an eoon ko ilo al eo. N̄an kakkobaba n̄an al, ajri ro remaron̄ kōm̧m̧ani m̧akūtkūt ko me rej ekkeijel wōt ilo al eo ak baj ron̄jake wōt background in al ko ilo aer kōm̧m̧ane peij in m̧akūtkūt eo.

• Ron̄jake im kōm̧m̧an arin juon bwebwenato. Ajri ro reddik em̧m̧an bwebwenato ko ippāer, jim̧or ba im ron̄jake. Kwaļo̧k bwebwenato ko jān jeje ko rekwojarjar, jān mour eo am, jān bwebwenatoon Kabun̄ in, ak jān māākjiin ko an Kabun̄ in, im kōtļo̧k bwe ajri ro ren kwaļo̧k bwebwenato ko jān mour ko aer. Pukot wāween ko n̄an kobaik er ilo iien bwebwenato ko. Remaron̄ jibwe pija ak kein katakin ko, jin̄a pija ko kōn ta eo rej ron̄, im kōm̧m̧an arin bwebwenato eo, ak jipan̄ kwaļo̧k bwebwenato eo. Jipan̄ ajri ro kile m̧ool ko an gospel in ilo bwebwenato eo kwoj kwaļo̧ke.

• Riiti juon eoon. Ajri ro reddik remaron̄ jab lukkuun riit, ak kwomaron̄ kobaik er ilo ekkatak eo jān jeje ko rekwojarjar. Kwomaron̄ in mije wōt juon eoon, naan eo eaorōk, ak naan eo. Ilo am̧ riiti eoon ko ilo juon ainikien eļap, kwomaron̄ kajjitōk ippān ajri ro n̄an jutak ak kotak peier n̄e rej ron̄ naan ak eoon eo im kwoj kōņaan mije. Remaron̄ in kakilōklōk eoon ko rekadu jān jeje ko rekwojarjar eļan̄n̄e rej āliji elōn̄ kattōn. Ilo aer ron̄ naan in Anij, renaaj en̄jake Jetōb.

• Kwon emourur. Kōnke ajri ro reddikļo̧k ekkā aer ajimourmour, karōk wāween ko n̄an kōmakūtkūt er—m̧aaj, ekkeke, eeb, emajedjed, etetal, im m̧akūtkūt ko jet rej iookļo̧k pedped in katak eo ak bwebwenato eo kwoj kwaļo̧ke. Makūtkūt kein remaron̄ bar ļap tokjāer ilo ami al ippān doon.

• Lale juon pija ak alooje juon pija in alooj. N̄e kwoj kwaļo̧k n̄an ajri ro juon pija ak pija in alooj eo ej iookļo̧k pedped in gospel eo ak bwebwenato jān jeje ko rekwojarjar, kajjitōk ippāer kajjitōk ko me ejipan̄ er ekkatak jān ta ko rej loe. N̄an waanjon̄ok, kwomaron̄ kajjitōk “Ta eo ewaļo̧k ilo pija in ak pijaan alooj in?” ak “Ewi am̧ en̄jake?” Gospel Library app, medialibrary.lds.org, im children.lds.org rej jikin ko rem̧m̧an n̄an lali pijaan alooj ko.

• Kwaļo̧k en̄jake im naan in kam̧ool ko. Ajri ro reddikļo̧k remaron̄ jab lukkuun men ko rekōņaan kōm̧m̧ani jān ajri ro rerūttoļo̧k, ak eļan̄n̄e kwoj leļo̧k tōl, remaron̄ kwaļo̧k en̄jake ko aer im naan in kam̧ool ko kōn ta eo rej ekkatak.

• Ejaake. Ajri ro remaron̄ ekkal, jin̄a, ak kōļare men eo ej iookļo̧k bwebwenato eo ak pedped in katak eo rej ekkatak. Kōketak er n̄an bōk men eo raar ejaake n̄an m̧weeo im kwaļo̧ke n̄an baam̧le eo n̄an jipan̄ ajri ro keememej ta eo raar ekkatak.

• Bōk koņaam̧ ilo kein katakin ko. Juon katak eo epdidodo emaron̄ jipan̄ ajri ro meļeļe juon pedped in katak an gospel in me epen n̄an meļeļe kake. N̄e kōjerbal kein katakin ko, pukot wāween ko n̄an kōm̧m̧an bwe ajri ro ren bōk koņaer. Enaaj ļapļo̧k aer ekkatak jān en̄jake ko kwaļo̧ki jān baj lale juon kōmeļeļe.

• Kōmmālmel. N̄e ajri ro rej kōmmālmel juon jekjek renaaj ioon e ilo mour, em̧m̧anļo̧k aer meļeļe ewi wāween an juon pedped in gospel in jerbal ilo mour ko aer.

• Āliji m̧akūtkūt ko. Ajri ro reddikļo̧k remaron̄ kōņaan ron̄ katak ko elōn̄ kōttan n̄an meļeļe kaki. Jab mijak in āliji bwebwenato ak m̧akūtkūt ko, men̄e ejja ilo katak eo wōt. N̄an waanjon̄ok, kwomaron̄ kwaļo̧k juon bwebwenato jān jeje ko rekwojarjar elōn̄ alen ilo wāween ko reoktak ilo iien kōm̧m̧an katak—riit jān jeje ko rekwojarjar, kōmeļeļeiki ilo naan ko am̧ make, kwaļo̧k juon pija in alooj, kōm̧m̧an bwe ajri ro ren jipan̄ eok kwaļo̧k bwebwenato eo, kajjitōk ippāer n̄an kōm̧m̧ane bwebwenato eo, im ko jet. Eļan̄n̄e m̧akūtkūt eo kar kōm̧m̧an ilo kūlaaj eo im ej ba kōm̧m̧an ilo m̧ōko, kōm̧m̧ane elōn̄ kōttan enaaj jipan̄ ajri ro ekkatak im keememeji.

• Iiaio ippān ro jet. Ajri ro rej kōļapļo̧k kapeel iiaio ko im ekkā an itok limoier n̄an im ikkure ippān ro m̧ōttāer. Ejaake iien ko rem̧m̧an bwe ren kwaļo̧k, bōk koņaer, im kōmaanwa ilo aer ekkatak.

• Bōk Koņaad ilo elōn̄ kain m̧akūtkūt ko. Ajri ro reddikļo̧k ekadu iien aer m̧ad, im eoktak kilen aer ekkatak. Kōjerbal elōn̄ m̧akūtkūt ko, im lukkuun lale kōkaļļe ko bwe ajri eo ej aikuj okoktak in bun̄tōn ko. N̄an waanjon̄ok, kwomaron̄ kamakijkij am̧ jejānijniji m̧akūtkūt ko, ewōr iien ikōn̄ im ewōr iien kōm̧m̧ani m̧akūtkūt ko.

M̧ōttanļo̧k eddo eo am̧ āinwōt juon rūkaki n̄an ajri ro reddikļo̧k—n̄an kakkobaba ikkijeen katakin pepded in gospel eo—ej n̄an jipan̄ ajri ro ekkatak kilen bōk koņaer ilo kūlaaj ko an Kabun̄ in ilo jejjet. N̄an waanjon̄ak, remaron̄ aikuj ekkatak kilen bōk koņaer, kwaļo̧k, kautiej ro jet, im ko jet. Jet rūkaki rej ejaaki jaat ko kōn ijoko koņaan kajjojo ajri n̄an bōk koņaer ilo juon kūlaaj ilo juon wāween eo ealikkar (āinwōt jar, jibwe juon pija, ak leto-letak peba ko). Ijoko koņaer remaron̄ bar oktak kajjojo wiik. Menin ejipan̄ ajri ro bōk koņaer im dāpij wōt m̧wil ko em̧m̧an ilo kūlaajruum̧ eo.

Ajri ro—eļaptata ajri ro reddikļo̧k—ekkā aer jeraam̧m̧an ilo juon iminene in laajrak ekkā kōm̧m̧ane ak iminene in laajrak ko me rej ejānijnij. Kōnke ajri ro reddikļo̧k ekadu iien aer m̧ad im jet iien epen n̄an ron̄jake ilo aolepān kūlaaj eo, em̧m̧antata n̄e iminene in ekoba emakijkij in jejānijnij jān juon m̧akūtkūt n̄an eo juon. N̄an waanjon̄ok, kūlaaj eo am̧ emaron̄ jānij ilo iien kakkije n̄an ikkure, kōļar pija, al juon al, im ko jet.

ajri im rūkaki ro ilo kūlaaj