Jisōs ej jijōt ippān ajri ro

Kwoj juon Rūkaki an Ajri ro

Kar kūr eok jān Anij n̄an katakin ajri ro Nejin ilo wāween eo an Rilo̧mo̧o̧r. Kwar ekkapit n̄an kūr in kōn mālim in priesthood eo An ekwojarjar. Men̄e kwojjab juon rūkaki eo ejjeļo̧k an imenene jen katakin , ilo am̧ mour erreeo, jar kajjojo raan, im ekkatak jeje ko rekwojarjar, Jemedwōj Ilan̄ enaaj lewaj n̄an eok im̧we im kajoor eo an Jetōb Kwojarjar n̄an jipan̄ eok eddōkļo̧k (lale 2 Nipai 33:1).

Ro lewaj ium̧win kōjparok eo am̧ rej ro nejin Jemedwōj Ilan̄, im Ej jeļā ta aikuj ko aer im ewi ijo em̧m̧antata n̄an tōpar er. Jān Jetōb Kwojarjar eo, Anij enaaj tōl eok ilo am̧ m̧aanjabpopo im ilo am̧ katakin. Enaaj kwaļo̧k n̄an eok ta eo kwoj aikuj ba im ta eo kwoj aikuj kōm̧m̧ane (lale 2 Nipai 32:5).

Ilo aolep mour ko aer, ajri rein raorōk rej ebbōk meļeļe ko, ejaake im kōm̧anm̧an ļo̧k ļōmņak ko aer, im kōm̧m̧ani im kwaļo̧k ta ko rej loi. Menin eļaptata an m̧ool ilo gospel in, bwe ajri ro repojak im kijōrjōr in ekkatak m̧ool ko. Aer tōmak enaaj ilo men ko an jetōb rem̧ool im rekwojarjar, im rej lo aolep iien ilo aer bōk iien n̄an ekkatak. Rej m̧ōņōņō in mour kake ta eo rej ekkatak, men̄e aer meļeļe ejjab likio. En̄in ej jekjek eo jej aikuj aolep bōk gospel in. Ilo an kar Rilo̧mo̧o̧r katakin, “Eo ej jāmin bōk aelōn̄ in Anij āinwōt juon ajri edik ejāmin deļo̧n̄e ilowaan” (Luk 18:17).

Kūr eo n̄an katakin ajri ro ej juon kūr ekwojarjar, im jenij en̄jake eddodo jet iien. Ak keememej bwe Jem̧ōm̧ Ilan̄ eaar kūr eok, im Ejamin eļļo̧k jen eok. En̄in ej jerbal eo an Irooj, im ilo am̧ jerbal “kōn aolepen būruwōm̧, maron̄, ļōmņak im kajoor” (Katak im Bujen Ko 4:2), Enaaj kōļapļo̧k kapeel eo am̧, menin letok ko, im kapeel ko, im jerbal eo am̧ enaaj kōjeraam̧m̧an mour ko an ajri ro kwoj katakin.