Pòl k ap ekri yon epit

5–11 Out.

Women 1–6

‘Pouvwa Bondye pou sali’

Ki enspirasyon ou resevwa pandan w ap li Women 1–6 la? Enspirasyon sa yo ta ka ede w chwazi pami ide ansèyman sa yo.

Ekri enpresyon ou

senbòl pataj

Envite pataj

Envite timoun yo pou yo pataje sa yo te fè an repons a envitasyon w te ba yo nan leson dènye semèn nan. Paregzanp, èske yo te pale avèk fanmi yo de nofraj yo dekri nan Travay 27 la ak nesesite pou yo suiv pwofèt la?

senbòl pataj

Anseye doktrin nan

Timoun ki pi piti yo

Women 1:16–17

M ka montre lafwa m nan Jezikri nan suiv li.

Pòl te anseye ke levanjil la gen pouvwa pou pote sali pou tout moun ki viv pa lafwa nan Jezikri. Kijan w ka ede timoun yo montre lafwa yo nan Jezikri nan suiv li?

Aktivite posib

• Ede timoun yo jwenn Wòm sou yon kat. Eksplike yo ke liv Women an gen yon lèt Pòl te ekri Sen nan Wòm yo pou l te ede yo konprann prensip levanjil tankou lafwa.

• Li Women 1:17 pou timoun yo, epi ede yo memorize fraz “Jis la va viv pa lafwa.” Ou ka bay chak timoun yon mo nan yon fraz epi mande yo pou yo repete mo sa a lè w montre yo li. Eksplike ke fras sa a vledi nou dwe viv chak jou ak lafwa nan Jezikri. Èske timoun yo konn kisa lafwa ye? Montre yon foto Jezikri epi eksplike ke nou kwè li reyèl menmsi nou pa wè li. Sa se lafwa—kwè nan yon bagay menmsi nou pa wè l.

• Eksplike yo ke nou montre lafwa nou nan Jezikri nan obeyi li. Nan tout sal la, kache foto moun k ap fè sa Jezi mande nou pou nou fè. Fè timoun yo chak pran tou pou yo jwenn foto yo ak dekri yo. Kisa nou ka fè pou nou suiv Jezi?

• Bande je youn nan timoun yo, epi gide l atravè sal la jiska foto Jezi a. Fè chak timoun pran tou pa yo. Ede yo konprann ke yo ta dwe suiv ansèyman Jezi yo jan yo te suiv gidans ou a.

Women 6:1–11

Lè nou batize se tankou nou vin yon nouvo moun.

Timoun w ap anseye yo ap prepare yo pou batèm. Kisa yo ka aprann osijè batèm nan enstriksyon Pòl la pou “mache nan yon nouvo lavi” a?

Aktivite posib

• Envite timoun yo pou yo repete fraz “Mache nan yon nouvo lavi” a (Women 6:4).). Eksplike ke lè nou batize, peche nou padone. Nou gen chans pou nou avanse annavan nan fè bon chwa, repanti lè nou fè erè, ak efòse nou pou n vin plis menmjan ak Jezi. Itilize paj aktivite semèn sa a pou anseye timoun yo apwopo batèm ap ede nou vin yon moun nouvo.

• Di timoun yo kijan w te santi w lè w te batize, epi envite yo pou yo pataje eksperyans kote yo te asiste nan yon batèm. Envite yo pou yo desine tèt yo nan jou fiti batèm yo epi pataje sa yo ka fè pou yo prepare yo pou batèm yo.

• Chante avèk timoun yo yon kantik sou batèm, tankou “Le jour de mon baptême” (Chants pour les enfants, 103). Kisa kantik sa a aprann nou osijè batèm?

yon tigason k ap batize

Batèm senbolize kòmansman yon nouvo lavi antanke yon disip Kris la.

senbòl pataj

Anseye doktrin nan

Timoun ki pi gran yo

Women 1:16–17

M ka montre lafwa m nan Jezikri nan suiv li.

Pòl te anseye ke levanjil la gen pouvwa pou pote sali bay tout moun k ap viv pa lafwa nan Jezikri. Lafwa se premye prensip levanjil la. Li motive nou pou n obeyi kòmandman yo. Kijan w ka ede timoun yo pi byen konprann lafwa?

Aktivite posib

• Mande yon timoun pou l chèche Wòm sou yon kat. Ede yo konprann ke nan pwochen semèn yo, yo pral aprann lèt Pòl te ekri manm Legliz yo nan diferan andwa, kòmanse avèk lèt pou Women yo.

• Ekri tèks ki nan Women 1:16 la sou tablo a, kote w ap ranplase l kèk mo an blan. Mande timoun yo pou yo chèche ekriti yo epi konplete espas blanch yo. Montre fraz “M pa wont levanjil Kris la,” epi envite timoun yo pou yo di kisa fraz sa a vledi pou yo.

• Envite yon timoun pou l li Women 1:17 la fò epi mande lòt yo pou yo koute pou wè si yo tande yon mo repete. Kisa sele vle di “viv pa lafwa”? Ede timoun yo jwenn yon definisyon sou lafwa nan yon resous tankou Gid Ekriti yo, “Lafwa,” scriptures.lds.org. Nan kisa lavi nou t ap diferan si nou pa t gen lafwa nan Jezikri?

• Montre timoun yo yon plant ak yon semans, epi mande kijan nou ka ede yon semans vin tounen yon plant. Eksplike yo ke lè nou plante yon semans epi nou wouze li, nou montre nou gen lafwa ke l ap grandi. Kijan nou montre nou gen lafwa nan Jezikri? Panse pou chante yon kantik sou lafwa, tankou “Lafwa” (Chants pour les enfants, 96), kòm pati aktivite sa a.

Women 3:23–24

Nou tout bezwen Jezikri pou n ka jwenn padon pou peche nou.

Pòl te vle Women yo konprann ke sali vini sèlman atravè Jezikri ak gras li. Medite sou fason w ka anseye timoun yo verite sa a.

Aktivite posib

• Envite youn nan timoun yo pou yo li Women 3:23–24. Kisa yo panse vèsè sa yo anseye nou? Eksplike ke “lagras” nan vèsè 24 la vledi don lanmou Sovè a ak mizèrikòd li, ki rann posib pou nou resevwa padon pou peche nou.

• Mete yon sirèt oubyen yon foto sou yon mi oubyen nan yon lòt kote timoun yo pa ka atenn yo. Fè yo eseye atenn ni, epi konpare sa avèk sa Pòl anseye nan Women 3:23 a. Apresa ede yo atenn ni. Kisa Sovè te fè pou nou ke nou pa ka fè pou tèt nou? Envite timoun yo pou yo di kijan yo santi yo osijè Sovè a lè yo panse ak sa l te fè pou yo.

Women 6:1–11

Lè nou batize se tankou nou vin yon nouvo moun.

Pòl te anseye ke batèm senbolize lanmò ak Rezirèksyon Kris la. Li senbolize “lanmò” pechè ki andedan nou an ak rezirèksyon nou nan “mache nan yon nouvo lavi” (Women 6:4). Nou renouvle angajman nou pou n mache nan yon nouvo lavi chak fwa nou pran sentsèn.

Aktivite posib

• Envite yon timoun pou l li Women 6:3–6. A kisa Pòl te di batèm nan “sanble“?

• Eksplike yo poukisa batèm senbolize lanmò ak rezirèksyon. Panse pou w pase videyo “Batèm Jezi a” (LDS.org). Poukisa lanmò ak rezirèksyon se bon senbòl sou sa k rive lè nou batize?

• Li priyè sentsèn yo ansanm (gade DA 20:77, 79). Raple timoun yo ke lè nou pran sentsèn, nou renouvle angajman nou fè pou n suiv Jezikri a lè nou batize a. Kijan sentsèn nan ede nou “mache nan yon nouvo lavi”?

• Envite timoun yo pou yo fè afich ki montre kisa sa vledi pou yo “mache nan yon nouvo lavi.” Yo ka mete afich sa yo nan chanm yo pou ede yo sonje pou yo fè bon chwa.

senbòl aprantisaj

Ankouraje aprantisaj lakay

Ankouraje yo pou yo mande manm fanmi yo pou fè yo konnen kilè yo wè timoun fè yon bagay ki montre lafwa.

Amelyore ansèyman nou

Bati konfyans timoun yo. Pou ede timoun yo bati konfyans ke yo ka aprann levanjil la poukont yo, fè lwanj yo lè yo patisipe nan klas la.

paj aktivite: batize