5–11 nō ’Ātete. Roma 1–6: ‘Te Mana o te Atua ’ia ora te feiā ato’a’ » Mai, pe’e mai—nō te Paraimere : Faufa’a ’Āpī 2019 (2019)
5–11 nō ’Ātete. Roma 1–6 », Mai, pe’e mai—nō te Paraimere : 2019
5–11 nō ’Ātete
Roma 1–6
« Te mana o te Atua ’ia ora te feiā ato’a »
E aha te mau muhumuhuraʼa tā ʼoutou i fāriʼi ’a taiʼo ai ʼoutou i te Roma 1–6 ? E nehenehe teie mau muhumuhuraʼa e tauturu ia ʼoutou ʼia māʼiti i teie mau manaʼo nō te haʼapiʼiraʼa.
E pāpa’i i tō ʼoutou mau mana’o
E ani ’ia fa’a’ite mai i te mana’o
E ani i te mau tamariʼi ’ia faʼaʼite mai e aha tā rātou i rave ʼei pāhonoraʼa i te mau aniraʼa tā ʼoutou i hōroʼa atu ia rātou i roto i te haʼapiʼiraʼa nō te hepetoma i ma’iri aʼenei. ʼEi hiʼoraʼa, ʼua paraparau ānei rātou i tō rātou ʼutuāfare nō niʼa i te tomoraʼa o te pahī tei faʼaʼitehia i roto i Te mau ’Ohipa 27 ʼe nō niʼa i te peʼeraʼa atu i te peropheta ?
Ha’api’i i te ha’api’ira’a tumu
Te mau tamari’i ’āpī a’e
E nehenehe tāʼu e faʼaʼite i tōʼu faʼaroʼo ia Iesu Mesia nā roto i te peʼeraʼa atu iāna.
ʼUa haʼapiʼi Paulo ē e mana tō te ʼevanelia ’ia ’āfa’i mai i te faʼaoraraʼa i te mau taʼata atoʼa ’o tē ora nei ma te faʼaroʼo ia Iesu Mesia. Nāhea e nehenehe ai ia ʼoutou ’ia tauturu i te mau tamariʼi ’ia faʼaʼite i tō rātou faʼaroʼo ia Iesu Mesia nā roto i te peʼeraʼa atu iāna ?
Mau ’ohipara’a e nehenehe e rave
-
E tauturu i te mau tamariʼi ’ia ʼimi ia Roma i niʼa i te hōʼē hōhoʼa fenua. E tātara atu ē tei roto i te buka a Roma te hōʼē rata tā Paulo i pāpaʼi atu i te feiā moʼa i Roma nō te tauturu ia rātou ’ia taʼa i te mau ture nō te ʼevanelia mai te faʼaroʼo.
-
E taiʼo i te Roma 1:17 i te mau tamariʼi, ʼe e tauturu ia rātou ’ia tāmau ʼāʼau i te pereota « te feiā parau-tiʼa i te faʼaroʼo ra, e ora ïa ». E nehenehe tā ʼoutou e faʼataʼa i te tamariʼi tātaʼitahi te hōʼē tāʼo i roto i te pereota ʼe ʼia ani ia rātou ’ia parau i taua tāʼo ra ’ia toro anaʼe ʼoutou i te rima i niʼa i taua tāʼo ra. E haʼamāramarama ē te auraʼa o teie pereota e tiʼa ia tātou ’ia ora i te mau mahana atoʼa ma te faʼaroʼo ia Iesu Mesia. ’Ua ’ite ānei te mau tamari’i e aha te faʼaroʼo ? E faʼaʼite i te hōʼē hōhoʼa nō Iesu Mesia ʼe e haʼamāramarama atu ē tē tiʼaturi nei tātou e mea mau ʼoia noa atu ʼaita tātou i ʼite mata atu iāna. Teie te faʼaroʼo—te tiʼaturiraʼa i te tahi mea noa atu ē ʼaita tātou i ʼite mata atu i te reira.
-
E haʼamāramarama atu ē e faʼaʼite tātou i tō tātou faʼaroʼo ia Iesu Mesia nā roto i te faʼaroʼoraʼa atu iāna. E huna nā roto haere i te piha i te mau hōhoʼa o te mau taʼata e rave ra i te mea tā Iesu i ani ia tātou ʼia rave. E vaiiho i te mau tamariʼi ’ia ʼimi ʼe ’ia faʼaʼite mai i te mau hōhoʼa ’ia tae i tō rātou taime. E aha te nehenehe ia tātou ’ia rave nō te pe’e atu ia Iesu ?
-
E faʼatapo i te mata o te hōʼē tamariʼi, ʼe e arataʼi iāna nā roto i te piha e tae atu i mua i te hōʼē hōhoʼa o Iesu. ʼIa rave te tamariʼi tātaʼitahi i tōna taime nō te raveraʼa i te reira. E tauturu i te mau tamariʼi ’ia taʼa ē e tiʼa ia rātou ’ia peʼe i te mau haʼapiʼiraʼa a Iesu mai tā rātou i peʼe i tā ʼoutou arataʼiraʼa.
’Ia bāpetizo-ana’e-hia, mai te rirora’a ïa ’ei hō’ē ta’ata ’āpī.
Tē faʼaineine nei te mau tamariʼi tā ʼoutou e haʼapiʼi ra nō te bāpetizoraʼa. E aha tā rātou e nehenehe e haʼapiʼi mai nō niʼa i te bāpetizoraʼa i roto i te arataʼiraʼa a Paulo « ʼia haere e au i te ora ʼāpī » ?
Mau ’ohipara’a e nehenehe e rave
-
E ani i te mau tamariʼi ’ia tāpiti i te parau i te pereota « ʼia haere e au i te ora ʼāpī » (Roma 6:4). E faʼaite atu ē ’ia bāpetizohia tātou, ʼua faʼaʼorehia ïa tā tātou mau hara. E rāveʼa tō tātou i te haere i mua nā roto i te raveraʼa i te mau māʼitiraʼa maitaʼi, te tātarahaparaʼa ’ia rave tātou i te mau hape, ʼe ʼia tūtava i te riro mai ia Iesu te huru. E faʼaʼohipa i te ʼapi ʼohiparaʼa nō teie hepetoma nō te haʼapiʼi i te mau tamariʼi ē e tauturu te bāpetizoraʼa ia tātou ʼia riro ʼei taʼata ʼāpī.
-
E faʼaʼite atu i te mau tamariʼi tō ʼoutou huru ’a bāpetizohia ai ʼoutou, ʼe e ani atu ia rātou ’ia faʼaʼite mai i te mau taime i haere atu ai rātou i te hōʼē bāpetizoraʼa. E ani ia rātou ’ia nīnoʼa mai i te mau hōhoʼa nō rātou i te mahana e bāpetizohia ai rātou ʼe ʼia faʼaʼite mai ʼe aha tā rātou e rave nō te faʼaineine nō tō rātou ra bāpetizoraʼa.
-
E hīmene ʼe te mau tamariʼi i te hōʼē hīmene nō niʼa i te bāpetizoraʼa, mai « Le jour de mon baptême » (Chants pour les enfants, 53). E aha tā tātou e ha’api’i mai nei nō ni’a i te bāpetizoraʼa nā roto mai i teie hīmene ?
E taipe te bāpetizora’a nō te ha’amatara’a i te hō’ē orara’a ’āpī ʼei hō’ē pipi nā te Mesia.
Ha’api’i i te ha’api’ira’a tumu
Te mau tamari’i pa’ari a’e
E nehenehe tāʼu e faʼaʼite i tōʼu faʼaroʼo ia Iesu Mesia nā roto i te peʼeraʼa atu iāna.
ʼUa haʼapiʼi Paulo ē e mana tō te ’evanelia ’ia ’āfa’i mai i te faʼaoraraʼa i te mau taʼata atoʼa ’o tē ora nei ma te faʼaroʼo ia Iesu Mesia. Te faʼaroʼo o te parau tumu mātāmua ïa o te ʼevanelia E tura’i te reira ia tātou ’ia haʼapaʼo i te mau faʼaueraʼa. Nāhea e ti’a ai ia ’outou ’ia tauturu i te mau tamari’i ’ia taʼa maitaʼi aʼe i te faʼaroʼo ?
Mau ’ohipara’a e nehenehe e rave
-
E ani i te mau tamariʼi ’ia ʼimi ia Roma i niʼa i te hōʼē hōhoʼa fenua. E tauturu i te mau tamariʼi ’ia taʼa ē i te mau hepetoma i mua nei, e haʼapiʼi mai rātou nā roto mai i te mau rata tā Paulo i pāpa’i i te mau melo o te ʼĒkālesia i te mau vāhi rau, ma te haʼamata i tāna rata i tō Roma.
-
E pāpaʼi i te parau nō roto mai i te Roma 1:16 i niʼa i te ʼiri pāpaʼiraʼa, ma te mono i te tahi mau tāʼo ʼe te mau area pāpaʼi-ʼore-hia. E ani i te mau tamariʼi ’ia ʼimi i te pāpa’iraʼa mo’a ʼe ’ia faʼaʼī te mau vāhi ʼuoʼuo. E faʼaʼite i te pereota « ʼaore hoʼi au i haʼamā i te ʼevanelia a te Mesia ra », e e ani i te mau tamariʼi ’ia faʼaʼite mai te auraʼa nō teie parau nō rātou.
-
E ani i te hōʼē tamariʼi ’ia taiʼo pūai mai i te Roma 1:17, ’e e ani i te tahi atu mau tamariʼi ’ia faʼaroʼo i te hōʼē tāʼo o tei tāpitihia i te parau. E aha te aura’a « ’ia ora ma te faʼaroʼo » ? E tauturu i te mau tamariʼi ʼia ʼimi i te hōʼē auraʼa nō te faʼaroʼo i roto i te hōʼē rāveʼa tauturu mai te Arataʼi i te mau Pāpaʼiraʼa Moʼa, « Faʼaroʼo », scriptures.lds.org. Nāhea tō tātou orara’a e huru ’ē ai mai te mea ’aita tō tātou faʼaroʼo ia Iesu Mesia ?
-
E faʼaʼite i te mau tamariʼi i te hōʼē tumu rā’au iti ʼe te hōʼē huero, ʼe e ani e nāhea tātou e tauturu ai i te hōʼē huero ’ia riro mai ʼei hōʼē tumu rā’au iti. E haʼamāramarama ē ’ia tanu ʼe ’ia pipi anaʼe tātou i te hōʼē huero, tē faʼaʼite ra ïa tātou ē ʼe faʼaroʼo tō tātou ē e tupu te reira. Nāhea tātou e faʼaʼite ai ē e faʼaroʼo tā tātou ia Iesu Mesia ? E feruri i te hīmene i te hōʼē hīmene nō niʼa i te faʼaroʼo mai « La foi » (Chants pour les enfants, 50-51), ʼei tufaʼa nō teie ʼohiparaʼa.
ʼUa hinaʼaro pāʼātoʼa tātou ia Iesu Mesia ’ia faʼaʼorehia tā tātou ra mau hara.
ʼUa hinaʼaro Paulo ’ia taʼa tō Roma ē tae mai te faʼaoraraʼa nā roto mai anaʼe ia Iesu Mesia ʼe tōna aroha rahi. E feruri e nāhea e nehenehe ia tātou ’ia haʼapiʼi i teie parau mau i te mau tamariʼi.
Mau ’ohipara’a e nehenehe e rave
-
E ani i te hōʼē o te mau tamariʼi ’ia taiʼo i te Roma 3:23–24. E aha tā teie mau ʼīrava e haʼapiʼi mai nei ia tātou i te feruriraʼa o te mau tamariʼi ? E haʼamāramarama ē te « aroha mau » i roto i te ʼīrava 24 o te hōroʼaraʼa ïa ’o te here ʼe te aroha a te Faʼaora, ’o te fa’ati’a ia tātou ’ia fāriʼi i te faʼa’oreraʼa i tā tātou mau hara.
-
E faʼatautau i te hōʼē monamona ʼaore rā te hōʼē hōhoʼa i niʼa i te hōʼē patu ʼaore rā i te tahi atu vāhi e ʼore e noaʼa i te mau tamariʼi ’ia tiʼi atu. E vaiiho ia rātou ’ia tāmata i te tiʼi atu, ʼe e faʼaau i te reira i te mea tā Paulo i haʼapiʼi i roto i te Roma 3:23. I muri iho e tauturu atu ia rātou ’ia tiʼi atu i te reira. E aha tā te Faʼaora i rave nō tātou ʼe ʼore hoʼi e nehenehe ia tātou ’ia rave nō tātou iho ? E ani i te mau tamariʼi ’ia faʼaʼite mai i tō rātou manaʼo nō niʼa i te Faʼaora ’ia manaʼo anaʼe rātou i te mea tāna i rave nō rātou.
’Ia bāpetizo-ana’e-hia, mai te rirora’a ’ei ta’ata ’āpī.
ʼUa haʼapiʼi Paulo ē e taipe te bāpetizoraʼa nō te poheraʼa ʼe te tiʼafaʼahouraʼa o te Mesia. E taipe atoʼa te reira nō te « poheraʼa » o tō tātou iho huru hara ʼe ’ia tiʼafaʼahou mai « i te haereʼa e au i te ora ʼāpī » (Roma 6:4). Tē faʼa’āpī nei tātou i tā tātou fafauraʼa ’a haere ai nā roto i te ora ʼāpī i te mau taime atoʼa e ʼāmu tātou i te ʼōroʼa.
Mau ’ohipara’a e nehenehe e rave
-
E ani i te hōʼē tamariʼi ’ia tai’o i te Roma 6:3-6. E aha tā Paulo i parau ē ʼua riro te bāpetizoraʼa « mai te huru ʼo » ?
-
E tauʼa parau e nāhea te bāpetizoraʼa e riro ai ʼei taipe nō te poheraʼa ʼe te tiʼafaʼahouraʼa ? E feruri i te faʼaʼitei i te video « Te bāpetizoraʼa o Iesu » (LDS.org). Nō te aha te poheraʼa ʼe te tiʼafaʼahouraʼa i riro ai ʼei mau tāpaʼo maitaʼi nō te mea o te tupu mai ’ia bāpetizohia tātou ?
-
E tai’o ʼāmui i te mau pure o te ʼōro’a mo’a (hiʼo PH&PF 20:77, 79). E faʼahaʼamanaʼo i te mau tamariʼi ē ʼia rave anaʼe rātou i te ʼōroʼa, tē faʼaʼāpī ra tātou i te fafauraʼa tā tātou i rave ’a bāpetizohia ai tātou nō te peʼe atu ia Iesu Mesia. Nāhea te ʼōroʼa e tauturu ai ia tātou ’ia « haere e au i te ora ʼāpī » ?
-
E ani i te mau tamariʼi ’ia hāmani i te mau hōhoʼa pia nō te faʼaʼite e aha te auraʼa nō rātou « ia haere e au i te ora ʼāpī ». E nehenehe tā te mau tamariʼi e faʼatautau i teie mau mea i roto i tā rātou mau piha nō te tauturu ia rātou ’ia haʼamanaʼo i te rave i te mau māʼitiraʼa maitaʼi.
E faʼaitoito i te haʼapiʼiraʼa mai i te fare
E faʼaitoito i te mau tamariʼi ’ia ani i te mau melo o te ʼutuāfare ’ia faʼaʼite mai ia rātou ’ia ʼite anaʼe rātou i te mau tamariʼi i te raveraʼa i te tahi mea o te faʼaʼite mai i te faʼaroʼo.
Haʼamaitaʼiraʼa i tā tātou haʼapiʼiraʼa
E haʼamau i te tiʼaturiraʼa o te mau tamariʼi. Nō te tauturu i te mau tamariʼi ’ia haʼamau i te tiʼaturiraʼa ē e nehenehe rātou e haʼapiʼi mai i te ʼevanelia nā roto ia rātou iho, e haʼapoupou ia rātou ’ia rave anaʼe rātou i te ʼohipa i roto i te piha.