12–18 nō ’Ātete.

Roma 7–16

« ʼIa pohe rā te ʼino ia ’oe i te maita’i »

ʼIa taiʼo anaʼe ʼoutou i te Roma 7–16, e pāpaʼi i te mau faʼaʼiteraʼa tā ʼoutou e fāriʼinō ni’a e nāhea e nehenehe ai ia ʼoutou ’ia haʼapiʼi i te mau tamariʼi i te mau parau mau i roto i teie mau pene.

E pāpa’i i tō ʼoutou mau mana’o

E ani ’ia fa’a’ite mai i te mana’o

E ani i te mau tamariʼi mai te mea ʼua faʼaʼite rātou i tō rātou mau ʼutuāfare te tahi mea tā rātou i ʼapo mai i roto i te Paraimere i te hepetoma i ma’iri aʼenei. (Penei a’e e hina’aro ’outou e hi’o poto noa i te ha’api’ira’a o te hepetoma i ma’iri a’enei. Mai te mea ’ua nā reira rātou, e aha tā rātou i faʼaʼite atu ?

Ha’api’i i te ha’api’ira’a tumu

Te mau tamari’i ’āpī a’e

Roma 8:35–39

Tē here nei tōʼu Metua i te Ao ra iāʼu.

Nāfea e nehenehe ai ia ’outou ’ia fa’a’ohipa i te mau parau a Paulo nō te ha’api’i i te mau tamari’i, ē e here noa te Metua i te Ao ra ia rātou ?

Tē here nei te Metua i te Ao ra i tāna mau tamariʼi.

Mau ’ohipara’a e nehenehe e rave

• E tauturu i te mau tamariʼi ’ia tāmau ʼāʼau i te pereota « [ʼAore roa ʼe mea ʼe nehenehe] ’ia faʼataʼa ʼē ia tātou i te aroha o te Atua » (Roma 8:39). Nō te faʼahōhoʼaraʼa i teie parau mau, e pātiti e piti ʼiri, ʼe e pāpaʼi i niʼa i te hōʼē « tātou » ʼe i niʼa i te tahi « te aroha o te Atua ». ʼIa hio te mau tamariʼi mai te mea e nehenehe ia rātou ’ia faʼataʼa ’ē i na ʼiri e piti.

• ʼĀfaʼi atu i te mau tamariʼi i rāpae au nō te ʼite i te ahu o te mahana, ʼaore rā e faʼaʼite i te hōʼē hōhoʼa o te mahana. Nāhea te mahana i riro ai mai te aroha o te Metua i te Ao ra ? E tauturu ia rātou ʼia ʼite ē noa atu e mea ātea roa te mahana, e nehenehe rā te reira e tāmahanahana ia tātou. E nehenehe tā tātou e ʼite i te aroha o te Metua i te Ao ra i te mau taime atoʼa, noa atu ʼaita ʼoia i pīha’i iho tino ia tātou. E nehenehe tā ʼoutou e hīmene ʼāmui « Mon Père Céleste m’aime » (Chants pour les enfants, 16–17).

Roma 10:17

E tae mai te fa’aro’o nā roto i te fa’aro’ora’a i te parau a te Atua.

ʼIa faʼaroʼo anaʼe te mau tamariʼi i te parau a te Atua ʼe ’ia faʼaroʼo māite anaʼe rātou i te reira, e tupu tō rātou faʼaroʼo i te rahi. Nāhea e nehenehe ai ia ’outou ’ia tauturu ia rātou ’ia hāro’aro’a i te faufa’a o te faʼaroʼoraʼa i te parau a te Atua ?

Mau ’ohipara’a e nehenehe e rave

• E taiʼo ia Roma 10:17 i te mau tamariʼi, ʼe e faʼaʼite atu ia rātou te mau hōhoʼa o te mau vāhi e nehenehe ia rātou ’ia faʼaroʼo i te parau a te Atua (mai te taiʼoraʼa a te ʼutuāfare i te pāpaʼiraʼa moʼa, te fare pureraʼa, ʼaore rā te ʼāmuiraʼa rahi ; e hiʼo i te ʼapi nō te ʼohiparaʼa nō teie hepetoma). E ani i te mau tamariʼi i nāhea tō rātou faʼaroʼoraʼa i te parau a te Atua.

• E faʼatiʼa i te ʼāʼamu o te hōʼē tamariʼi tei faʼaroo i te parau a te Atua nā roto i te mau rāveʼa huru rau. ’A faʼatiʼa ai ʼoutou i te ʼāʼamu, e pōpuhi marū noa i te hōʼē popo nō te faʼaʼite e nāhea te faʼaroʼo o te hōʼē tamariʼi e tupu ai i te rahi i te mau taime atoʼa e faʼaroʼo ʼoia i te parau a te Atua.

• Nō te tauturu i te mau tamariʼi ’ia taʼa ē e nehenehe tō rātou faʼaroʼo i te tupu, e tauturu ia rātou ’ia hīmene « La foi » (Chants pour les enfants, 50–51). E hīmene ai rātou, e ani ia rātou ’ia faʼahua e mau huero rātou ma te faʼatīpou i raro. I te mau taime atoʼa e hīmene rātou i te tāʼo faʼaroʼo e tiʼa mai rātou i niʼa mai te hōʼē tumu rā’au ʼiti e tupu ra.

• E huna i roto i te piha te tahi mau pāpaʼiraʼa moʼa, te hōʼē hōhoʼa nō te peresideni o te ʼĒkālesia, ʼe te hōʼē veʼa Friend ʼaore rā te ve’a Liahona. E ani i te mau tamariʼi ’ia ʼimi i teie mau mea ʼe ’ia faʼaʼite mai e nāhea teie mau taoʼa tātaʼitahi e faʼatiʼa ai ia tātou ’ia faʼaroʼo i te parau a te Atua.

Roma 16:1–4

E nehenehe tā’u e haʼamāuruuru i te feiā tei tauturu mai iāʼu.

ʼUa māuruuru Paulo nō te feiā tei tauturu iāna. E nehenehe tā ʼoutou e tauturu i te mau tamariʼi ʼia ʼite i te mau mea maitaʼi tā te tahi atu mau taʼata i rave nō rātou ʼe ʼia haʼamanaʼo i te haʼamāuruuru atu ia rātou.

Mau ’ohipara’a e nehenehe e rave

• E tātara atu ē ʼua māuruuru Paulo nō te tauturu tāna i fāriʼi nō ’ō mai i te hōʼē vahine ’o Phebe te iʼoa ʼe te hōʼē nā ta’ata faʼaipoipo ’o Peresila ʼe ’o Akuila te i’oa (hiʼo Roma 16:1–4). E ani i te mau tamariʼi ʼia pāpaʼi i te mau hōhoʼa nō Paulo ʼe teie na taʼata e toru ’a faʼaʼite ai ʼoutou i te mau parau ʼe te mau pereota nō roto mai i teie mau ʼīrava.

• E ani i te tamariʼi tātaʼitahi ’ia faʼaʼite mai i te tahi mea maitaʼi tā te tahi taʼata i rave nōna ʼaita i maoro aʼenei. E tauturu i te mau tamariʼi ’ia hāmani i te mau tāreta haʼamāuruururaʼa nā taua mau taʼata ra.

• E tauturu i te mau tamariʼi ’ia haʼapiʼi mai nāhea i te haʼamāuruuru nā roto i te mau reo huru rau. E nehenehe te hīmene « Partout dans le monde » (Chants pour les enfants, 4–5) e tauturu.

Ha’api’i i te ha’api’ira’a tumu

Te mau tamari’i pa’ari a’e

Roma :16–18

Tē hinaʼaro nei te Metua i te Ao ra ʼia faʼaineine iā’u ’ia fāriʼi i tāna mau mea atoʼa.

E faʼatiʼa te ʼōpuaraʼa a te Metua i te Ao ra ’ia riro tātou mai iāna ra te huru ʼe ’ia fatu i tāna mau mea atoʼa. E nehenehe teie parau mau e faʼauru i te mau tamariʼi tā ʼoutou e haʼapiʼi nei ’ia ʼora ʼitoito atu ā i te ʼevanelia.

Mau ’ohipara’a e nehenehe e rave

• E taiʼo ʼāmui i te Roma 8:16–18. E aha tā tātou e ha’api’i nei i roto i teie mau ’īrava ʼe o vai hoʼi tātou ʼe e riro hoʼi tātou mai ’ia vai ra te huru ? E tātara ē te hōʼē « taʼata ʼāia » o te tahi ïa taʼata ’o te fatu, ʼaore rā ’o te fāriʼi, i te faufaʼa a tōna ra mau metua. E pāpaʼi i niʼa i te ʼiri pāpaʼiraʼa E aha ïa te tiʼa ia tātou ’ia rave nō te fāriʼi i te mau faufaʼa atoʼa a tō tātou Metua i te Ao ra ? E hīmene ʼāmui i te hōʼē hīmene nō niʼa i te haʼapaʼoraʼa, mai « Je veux suivre le plan de Dieu » (Chants pour les enfants, 86–87), ma te ʼimiraʼa i te mau pāhonoraʼa. E aha te tahi atu mau pāhonoraʼa tā te mau tamariʼi e nehenehe e manaʼo ?

• E ani i te mau tamariʼi ’ia feruri i te hōʼē ariʼi ’o te hinaʼaro ’ia faʼatere tāna mau tamāroʼa ʼe mau tamahine i roto i tōna bāsileia i te hōʼē mahana. E tātara atu ē e au te Metua i te Ao ra mai te hōʼē ariʼi, ʼe o tātou tāna mau tamāroʼa ʼe mau tamāhine hui ariʼi. E nehenehe tā ʼoutou e faʼatiʼa i te ʼāʼamu nō te tamaiti a te ariʼi Louis XVI nō Fārani, tei ʼitehia i roto i te aʼoraʼa a te tuahine Elaine S. Dalton « E haʼamanaʼo ē ʼo vai ʼoutou ! » Ensign ’aore rā Liahona, Mē 2010, 121). Nāhea te haʼamanaʼoraʼa ē e tamariʼi tātou nā te Metua i te Ao ra ʼe tei fānauhia ʼia riro i te hōʼē mahana mai iāna e tauturu ai ia tātou ’ia ora parau-tiʼa i ’ōnei i niʼa i te fenua nei ? (Nō te tahi atu ā haʼamāramaramaraʼa, e hiʼo Mau māite i te faʼaroʼo, 74–76.)

Roma 10:17

E tae mai te fa’aro’o nā roto i te fa’aro’ora’a i te parau a te Atua

E rave rahi mau rāve’a tō te mau tamariʼi ’ia faʼaroʼo i te parau a te Atua. E tauturu ia rātou ’ia ʼite e nāhea te faʼaroʼoraʼa i te parau a te Atua e nehenehe ai e haʼapūai i tō rātou faʼaroʼo.

Mau ’ohipara’a e nehenehe e rave

• E pāpaʼi i niʼa i te ʼiri pāpaʼiraʼa teie pereota: tae mai , ʼe nā roto i te . E ani i te mau tamariʼi ’ia faʼaī i te mau vāhi ʼuoʼuo i muri aʼe i te taiʼoraʼa i te Roma 10:17. E faʼaʼite i te taime ’a haʼapiʼi ai te tahi taʼata i te hōʼē parau tumu o te ʼevanelia tei tauturu i te haʼapūai i tō ʼoutou faʼaroʼo—penei aʼe e nehenehe tā ʼoutou e faʼaʼite i te hōʼē pāpaʼiraʼa moʼa auhia ʼaore rā te hōʼē faʼahitiraʼa parau nō roto mai i te ʼāmuiraʼa rahi. E ani i te mau tamari’i ’ia fa’a’ite mai i tō rātou iho mau ’itera’a.

• E tāpaʼo atu i niʼa i te mau hāpaina pape te mau mea i reira tō tātou ʼiteraʼa i te parau a te Atua (mai te mau pāpaʼiraʼa moʼa, te mau pureraʼa a te ʼĒkālesia, ʼe te ʼāmuiraʼa rahi). E tuatāpapa e nāhea te parau a te Atua e faʼarahi ai i tō tātou faʼaroʼo ’a maniʼi ai tātou i te hāpaina pape tātaʼitahi i roto i te hōʼē fāriʼi tei tāpaʼohia « faʼaroʼo ».

• E hōroʼa atu i te hōʼē tamariʼi i te hōʼē hōhoʼa nō te Faʼaora e faʼaora ra i te tahi taʼata ma te ʼore te tahi atu mau tamariʼi e ʼite i te hōhoʼa. E ani i te tamariʼi ʼia hōroʼa i te mau faʼaʼiteraʼa nō te tauturu i te tahi atu mau tamariʼi ’ia ʼite e aha tā te hōhoʼa e faʼaʼite ra. Nāhea e nehenehe ai ia tātou ’ia faʼaʼite ia vetahi ʼē i te mea tā tātou i ʼite nō niʼa i te Faʼaora ’ia nehenehe ia rātou ’ia tiʼaturi iāna ?

Roma 14:10, 13

« E aha rā hoʼi tātou … e faʼahapa i tō taeaʼe ».

ʼIa ʼāmui anaʼe te mau tamariʼi i te tahi atu mau tamariʼi ’o te rave i te mau māʼitiraʼa ʼē atu i tā rātou, ʼe faʼahemahia rātou i te faʼahapa. E feruri e nāhea te aʼo a Paulo i tō Roma i nehenehe ai i te tauturu ia rātou ’ia haʼapae i taua huru faʼahaparaʼa ra.

Mau ’ohipara’a e nehenehe e rave

• E ani i te hō’ē tamari’i ’ia tai’o i te Roma 14:10, 13. E ani i te tahi atu mau tamariʼi ’ia taiʼo e hea rahiraʼa taime tō Paula faʼaʼohiparaʼa i te parau faʼahapa. E aha te aura’a ʼia faʼahapa i te tahi taʼata ? Nō te aha e tiʼa ai ia tātou ’ia haʼapae i te faʼahapa ia vetahi ʼē ?

• E faʼaʼite i te hōʼē hōhoʼa nō te tahi taʼata, ʼe e ani i te mau tamariʼi e aha tā rātou i ʼite nō niʼa i teie taʼata nā roto noa i te hiʼoraʼa atu i te hōhoʼa. E aha te tahi mau mea ʼaita tātou i ʼite nō niʼa iāna ? Nō te aha te Fau i riro ai ’ei taʼata maitaʼi roa aʼe nō te faʼahapa i teie taʼata ? (hiʼo 1 Samuela 16:7).

E faʼaitoito i te haʼapiʼiraʼa mai i te fare.

E ani i te mau tamariʼi ’ia rave i te hōʼē ʼohiparaʼa tā ʼoutou i rave ʼei piha haʼapiʼiraʼa ʼe ’ia rave i te reira i tō rātou ʼutuāfare. E parau atu ia rātou ē e nehenehe tā rātou e faʼaʼite mai i teie hepetoma i mua i te mea tā rātou i rave.

Haʼamaitaʼiraʼa i tā tātou haʼapiʼiraʼa

E tītau i te mau tamariʼi i roto i te mau ’āparauraʼa ʼevanelia. E hinaʼaro paha ʼoutou i te feruri i te mau rāveʼa ʼanaʼanatae nō te tītau i te mau tamariʼi ʼāpī aʼe i roto i te mau ’āparauraʼa ʼevanelia. E nehenehe tā ʼoutou i te tahi mau taime e rave i te tahi mea ʼōhie mai te aniraʼa i te mau tamariʼi ʼia pārahi i roto i te hōʼē haʼamenemeneraʼa i niʼa i te tahua ʼeiaha ra i niʼa i tō rātou mau pārahiraʼa.