29 nō Tiurai–4 nō ’Ātete Te mau ’Ohipa 22–28: ‘Ei tahu’a ʼe ʼei ʼite » Mai, pe’e mai—nō te Paraimere : Faufa’a ’Āpī 2019 (2019)
29 nō Tiurai–4 nō ’Ātete Te mau ’Ohipa 22–28 », Mai, pe’e mai—nō te Paraime: 2019
29 nō Tiurai–4 nōʼ Ātete
Te mau ’Ohipa 22-28
« Ei tahu’a ʼe ʼei ʼite »
ʼIa taiʼo anaʼe ʼoutou i te mau ʼāʼamu nō niʼa i te tāviniraʼa a te ʼāpōsetolo Paulo i roto i Te mau ’Ohipa 22-28, e ʼimi i te mau parau tumu ’o te riro ʼei mea faufaʼa rahi nō te mau tamariʼi tā ʼoutou e haʼapiʼi nei.
E pāpa’i i tō ʼoutou mau mana’o
E ani ’ia fa’a’ite mai i te mana’o
E faʼaʼiteʼite i te mau hōhoʼa nō te hōʼē piha i roto i te fare tāpeʼaraʼa, te hōʼē poti, ʼe te hōʼē ʼōfī. E ani i te mau tamariʼi ’ia faʼaʼite mai i te mau ʼāʼamu tā rātou i ʼite nō niʼa ia Paulo ’o te tūʼati atu i teie mau hōhoʼa.
Ha’api’i i te ha’api’ira’a tumu
Te mau tamari’i ’āpī a’e
Tē haʼapeʼapeʼa nei te Metua i te Ao ra ʼe Iesu nōʼu ʼe e tauturu rāua iāʼu i roto i te mau tau fifi.
E nehenehe te ʼiteraʼa e nāhea tō te Faʼaora tautururaʼa ia Paulo e tauturu i te mau tamariʼi ’ia ʼite ē tē haʼapeʼapeʼa nei te Metua i te Ao ra ʼe Iesu nō rātou.
Mau ’ohipara’a e nehenehe e rave
-
E faʼaʼite i te ʼāʼamu i roto i Te mau ’Ohipa 23:10–11 nō tō te Faʼaora haereraʼa e fārerei ia Paulo i roto i te fare tāpeʼaraʼa. ʼAore rā e faʼaʼite atu i te video « E faʼaitoito » (LDS.org), o te faʼahōhoʼa i teie ʼāʼamu. E faʼaʼite atu i te hōʼē taime ʼua fāriʼi ʼoutou i te hōʼē tāmataraʼa ʼe ʼua fāriʼi ʼoutou i te arataʼiraʼa ʼe te tāmahanahana nō ’ō mai i te Atua ra. E ani i te mau tamari’i ’ia fa’a’ite mai i te mau taime ’a ’ite ai rātou ē ʼua tāmahanahanahia rātou e te Atua.
-
E tauturu i te mau tamariʼi ’ia tāmau ʼāʼau i te mea tā Iesu i te parau atu ’ia Paulo : « E faʼaitoito ». E ani i te mau tamariʼi ’ia feruri i te tahi taʼata tā rātou e nehenehe e ani ʼia faʼaitoito—penei aʼe te tahi taʼata tei ʼoto ʼaore rā tei peʼapeʼa.
E nehenehe tāʼu ʼe faʼaʼite i tōʼu ʼiteraʼa pāpū ia vetahi ʼē.
E nehenehe te taiʼo-faʼahou-raʼa i te ʼiteraʼa pāpū o Paulo i mua i te ariʼi Ageripa e tauturu i te mau tamariʼi ’ia ʼite e nāhea ’ia faʼaʼite i te mea tā rātou i ʼite e parau mau.
Mau ’ohipara’a e nehenehe e rave
-
E hōpoi mai i te piha haʼapiʼiraʼa te hōʼē torōna ʼe ’a vaiiho i te hōʼē tamariʼi ’ia ʼōʼomo i te reira ʼe ’ia faʼahua ʼe o ʼoia te ariʼi Ageripa. E ani i te tahi atu tamariʼi ’ia tiʼa atu i mua i te ariʼi nō te tiʼa atu nō Paulo ’a pūʼohu ai ʼoutou i te ʼiteraʼa pāpū o Paulo ʼe te huru o te ariʼi Ageripa, tei ʼitehia i roto i Te mau ’Ohipa 26:1–29 (hiʼo i te « Pene 63 : Te faʼaoti ra Paulo i tāna misiōni », Mau ʼāʼamu o te Faufaʼa ʼĀpī, 162–66, ʼaore rā te video e tano i niʼa i te LDS.org). E haʼamāramarama atu ē e nehenehe tā tātou e faʼaʼite i tō tātou ʼiteraʼa pāpū ia vetahi ʼē mai tā Paulo i rave.
-
E ani i te mau tamariʼi ’ia faʼaroʼo ’a hīmene ʼaore rā ’a taiʼo ai ʼoutou i te hōʼē hīmene nō niʼa i te ʼiteraʼa pāpū, mai te ʼīrava 2 o te « ʼIteraʼa Pāpū » (Te mau Hīmene, nūmera 70) ʼaore rā « ʼJe sais que mon Dieu vit » (Chants pour les enfants, 8). E ani i te mau tamari’i ’ia ’āfa’i i tō rātou rima i ni’a ’ia faʼaroʼo anaʼe rātou i te tahi mea e nehenehe tā rātou e faʼaʼite i tō rātou ʼitera’a pāpū nō niʼa i te reira mea. E hinaʼaro paha ʼoutou i te hīmene i te hīmene e rave rahi taime ; e ani i te mau tamariʼi ’ia ʼāmui atu ia ʼoutou ’ia mātau anaʼe rātou i te mau parau. E ani ia rātou ’ia faʼaʼite mai i te tahi mau mea nō niʼa i te ʼevanelia tā rātou i ʼite e parau mau.
-
E faʼaʼohipa i te ʼapi ʼohiparaʼa nō teie hepetoma nō te tauturu i te mau tamariʼi ’ia feruri i te tahi mea e nehenehe rātou ’ia parau ’ia faʼaʼite anaʼe rātou i tō rātou ʼiteraʼa pāpū. E ani ia rātou ’ia faʼaʼite i tō rātou ʼiteraʼa pāpū i te tahi taʼata i roto i tō rātou ra ʼutuāfare.
E faʼaara mai te mau peropheta iāʼu i te ʼati.
E feruri e nāhea te ʼāʼamu nō te tomoraʼa tō Paulo pahī e nehenehe e haʼapiʼi i te mau tamariʼi ē e ʼite te mau peropheta i te ʼati eʼita e noaʼa ia tātou ’ia ʼite.
Mau ’ohipara’a e nehenehe e rave
-
E ani i te mau tamariʼi ʼia faʼahua ē tei niʼa rātou i te hōʼē pahī ’o te tomora i roto i te hōʼē vero. E taiʼo i te faʼaararaʼa a Paulo i te mau taʼata, te ʼitehia i roto i Te mau ’Ohipa 27:9–10, ʼe ’a faʼaʼite i te ʼāʼamu nō te tomoraʼa o te pahī tei tupu nō te mea ʼaita rātou i faʼaroʼo i tāna ra faʼaararaʼa (hiʼo i te mau ʼīrava 11, 39–44). E faʼaʼite i te hōʼē hōho’a nō te peresideni o te ʼĒkālesia. E aha te mau huru faʼaararaʼa tāna e hōroʼa mai ia tātou ?
-
E tuʼu i te mau hōhoʼa ʼaore rā mau tao’a nā roto haere i te piha ’o te faʼahōhoʼa i te mau mea tā te mau peropheta i haʼapiʼi ia tātou ʼia rave, mai te haereraʼa i te pureraʼa ʼaore rā ʼia bāpetizohia. ʼEi piha haʼapiʼiraʼa, ’a haere nā roto i te piha, ma te tāpeʼa atu i mua i te hōhoʼa tātaʼitahi ʼaore rā taoʼa nō te paraparau e nāhea te peʼeraʼa i te mau haʼapiʼiraʼa a te peropheta e tauturu ai ia tātou ’ia pāruruhia.
E tauturu te peʼeraʼa i te mau haʼapiʼiraʼa a te peropheta ’ia vai pāruruhia tātou.
Ha’api’i i te ha’api’ira’a tumu
Te mau tamari’i pa’ari a’e
Te mau ’Ohipa 23:10–11 ; 27:18–26 ; 28:1–6
’Ia faʼaruru anaʼe au i te tāmataraʼa, eʼita te Atua e faʼaruʼe iāʼu.
Nā roto i te mau tāmataraʼa tei faʼaruruhia e Paulo, tei pīha’i iho noa te Fatu iāna. Nāhea e nehenehe ai ia ʼoutou ’ia tauturu i te mau tamariʼi ’ia faʼaau i te mau mea tā Paulo i faʼaruru i tō rātou iho oraraʼa ?
Mau ’ohipara’a e nehenehe e rave
-
Ma te faʼaohiparaʼa i Te mau ’Ohipa 23:10, ’a haʼamāramarama ē ʼua tuʼuhia Paulo i roto i te fare tāpeʼaraʼa nō te mea ʼua haʼapiʼi ʼoia i te mau taʼata nō niʼa ia Iesu. E taiʼo i muri iho i Te mau ’Ohipa 23:11 ʼe te mau tamariʼi. ʼAore rā e faʼaʼite atu i te video « E faʼaitoito » (LDS.org), o te faʼahōhoʼa i teie ʼāʼamu. Nō te aha i nehenehe ai ia Paulo « ia faʼaitoito » noa atu ē tei roto ʼoia i te fare tāpe’ara’a ?
-
E pāpaʼi i niʼa i te ʼiri pāpaʼiraʼa Te mau ’Ohipa 23:10–11 ; Te mau ’Ohipa 27:18–26 ; ʼe Te mau ’Ohipa 28:1–6. E faʼaʼite i te mau hōhoʼa nō te hōʼe fare tāpe’ara’a, te hōʼē pahī ʼe te hōʼē ʼōfi, ʼe ’a ani i te mau tamariʼi ’ia taiʼo faʼahou i teie mau ʼīrava ’e ’ia faʼatano atu i te reira i te mau hōhoʼa. I roto i teie mau ʼāʼamu tātaʼitahi, nāhea tō te Fatu faʼaʼiteraʼa ia Paulo ē tei pīha’i iho ʼoia iāna ?
-
E ani i te tahi taʼata nō te pāroita ’ia faʼaʼite mai i te hōʼē taime tei pīha’i iho te Fatu iāna i roto i te hōʼē taime fifi. Penei aʼe e nehenehe tā ʼoutou ʼaore rā te mau tamariʼi e faʼaʼite atoʼa mai i te mau mea i tupu ia ʼoutou ʼe ia rātou.
E ti’a iā’u ’ia fa’aitoito i te fa’a’ite i tō’u ’itera’a pāpū nō Iesu Mesia
E nehenehe te itoito o Paulo i te faʼaʼiteraʼa i tōna ʼiteraʼa pāpū e tauturu i te mau tamariʼi ’ia itoito ’ia faʼaʼite anaʼe rātou i tō rātou ʼiteraʼa pāpū.
Mau ’ohipara’a e nehenehe e rave
-
E ani i te mau tamariʼi ’ia taiʼo i Te mau ’Ohipa 26:1–29 ʼe ’ia ʼimi i te mau tumu parau o te ʼevanelia tā Paulo i haʼapiʼi atu i te ariʼi Ageripa. Nō te aha e mea huru riʼariʼa nō Paulo ʼia faʼaʼite atu i teie mau mea i mua i te ariʼi ? E ani i te mau tamariʼi ʼia tāpura mai i te tahi mau tumu parau o te ʼevanelia tā rātou i ʼite e parau mau. E ani ia rātou ’ia feruri i te tahi taʼata tā rātou i mātau ’o te tiʼa ’ia faʼaroʼo i tō rātou ʼiteraʼa pāpū nō niʼa i teie mau parau mau.
-
E ani i te mau tamariʼi ʼia faʼaʼohipa i te ʼapi ʼohiparaʼa nō teie hepetoma nō te pāpaʼi i te tahi mea e nehenehe ia rātou ’ia parau i roto i tō rātou ʼiteraʼa pāpū.
E faʼaara mai te mau peropheta iāʼu i te ʼati.
E nehenehe tā te mau tamariʼi e faʼaroʼo i te mau poroʼi a te mau peropheta nō teie tau ʼe ’ia ʼite i tā rātou mau faʼaararaʼa. Nāhea e nehenehe ai ia ’outou ’ia tauturu i te mau tamari’i ’ia faʼaroʼo i taua mau faʼaararaʼa ra ?
Mau ’ohipara’a e nehenehe e rave
-
E tāpupu i te hōʼē ʼapi parau mai te hōhoʼa o te hōʼē pahī ʼei mau huʼahuʼa nō te hōʼē piri. E ani i te mau tamariʼi ’ia pāpaʼi i te mau faʼaararaʼa a Paulo i roto i Te mau ’Ohipa 27:9–11 i niʼa i te mau huʼahuʼa parau ʼe e haʼaputuputu ʼāmui i te piri. Nō te aha ’aita te ta’ata i fa’aro’o ’ia Paulo ? » (hiʼo te ʼīrava 11). E ani i te mau tamariʼi ’ia taiʼo i te mau ʼīrava 18–20 ʼe 40–44 nō te ʼimi ʼe aha tei tupu mai i te hopeʼaraʼa. (E haʼamāramarama atu ē nō te mea ʼua peʼe te mau taʼata i te aʼo a Paulo i muri iho ’ia faʼaea noa i niʼa i te pahī, ʼaita roa e taʼata i pohe i roto i te tomoraʼa te pahī ; e hiʼo i te mau ʼīrava 30–32.) E aha tā tātou i ha’api’i mai i roto i teie ʼohipa i tupu nō ni’a i te pe’era’a i te peropheta ?
-
E ’āfaʼi mai i te hōʼē poroʼi i roto i te hōʼē ʼāmuiraʼa tei tupu iho nei a te peresideni o te ʼĒkālesia ʼe ’a faʼaʼite i te mau tamariʼi te mau faʼaararaʼa ʼaore rā aʼo tāna i hōroʼa mai. E ani i te mau tamariʼi ’ia feruri mai i te tahi mau rāve‘a e nehenehe ai ia rātou ’ia peʼe i te peropheta .
-
E faʼaʼiteʼite i te video « E maita’i ’e e ʼoaʼoa te feiā e haʼapa’o i te mau faʼaueraʼa a te Atua » (LDS.org). Nāhea te mau peropheta e riro ai mai te taʼata ʼe te titiʼa mata hiʼo ātea ?
-
E pāpaʼi i te tahi mau ʼohiparaʼa e nehenehe tā te mau tamariʼi e rave nō te tauturu ia rātou ’ia haʼapiʼi mai i te ʼohipa a te hōʼē peropheta—ʼei hiʼoraʼa, « Taiʼo i Te Parau Haʼapiʼiraʼa ʼe te mau Parau Fafau 21:4–7 » ʼaore rā « Hīmene ‘Suis les prophètes’ » (Chants pour les enfants, 58–59, ʼaore rā e faʼaʼohipa i te tahi atu hīmene nō niʼa i te mau peropheta). E faʼatautau i te tāpura o te mau ʼohiparaʼa i rāpae au i te piha haʼapiʼiraʼa, ʼe e ani i te tamariʼi tātaʼitahi ’ia tiʼa atu i te ʼōpani ʼe ʼia taiʼo atu i te hōʼē ʼohiparaʼa i te toeʼa o te mau tamariʼi, ma te faʼatiʼa ia rātou ’ia faʼaʼoti i te ʼohiparaʼa hou ’a taiʼo ai i te tahi atu ʼohiparaʼa. E haʼamāramarama ē mai te hōʼē anaʼe tamariʼi o te hōroʼa ra i te arataʼiraʼa i te tahi atu mau tamariʼi, te haʼapiʼi mai nei te hōʼē peropheta ia tātou i te mea tā te Atua e hinaʼaro ia tātou ʼia rave. E ani i te mau tamari’i ’ia fa’a’ite mai e aha tā rātou i haʼapiʼi mai nō ni’a i te ’ā’amu nā roto i te mau ʼohiparaʼa.
E faʼaitoito i te haʼapiʼiraʼa mai i te fare.
E ani i te mau tamariʼi ’ia faʼaʼohipa i te mea tā rātou i ʼapo mai nō ni’a ia Paulo nō te faʼaitoito i tō rātou mau ʼutuāfare ’ia tuatāpapa i te poroʼi tā te peropheta i parau iho nei ʼe ’ia tauaparau e nāhea e nehenehe ai ia rātou ’ia peʼe i tāna aʼo.
Haʼamaitaʼiraʼa i tā tātou haʼapiʼiraʼa
Faʼaʼohiparaʼa i te mau rāveʼa atoʼa nō te ʼitetino. « E ha’api’i maita’i a’e te rahira’a o te mau tamari’i (’e te feiā pa’ari ) ’ia fa’a’ohipa-ana’e-hia te tahi mau ’itetino i te hō’ē ā taime. E ’imi i te mau rāve’a nō te tauturu i te mau tamari’i ’ia fa’a’ohipa i tō rātou mau ’itetino : te mata, te tari’a ’e te fāfāra’a ’a ha’api’i mai ai rātou. I roto i te tahi mau hi’ora’a, e ’ite paha ’outou i te mau rāve’a ’ia fa’a’ohipa i tō rātou ihu ’e te arero! » Ha’api’ira’a mai tā te Fa’aora, 25