22-28 nō Tiurai Te mau ’Ohipa 16–21: ‘Tē parau mai ra te Fatu ia mātou e haere e parau atu i te ’evanelia » Mai, pe’e mai—nō te Paraimere : Faufa’a ’Āpī 2019 (2019)
« 22-28 nō Tiurai Te mau ’Ohipa 16–21 », Mai, pe’e mai—nō te Paraimere : 2019
22-28 nō Tiurai
Te mau ’Ohipa 16–21
« Tē parau mai ra te Fatu ia mātou e haere e parau atu i te ’evanelia»
I muri aʼe i te taiʼoraʼa i Te mau ’Ohipa 16–21, e feruri e nāhea te mau muhumuhuraʼa a te Vārua ʼe te mau manaʼo i roto i teie faʼanahoraʼa e tauturu ai ia ʼoutou i roto i tā ʼoutou faʼaineineraʼa haʼapiʼiraʼa. E taiʼo i te « Pāhonoraʼa i te mau hinaʼaro o te mau tamariʼi ʼāpī aʼe » i roto i teie buka nō te tahi atu ā tauturu.
E pāpa’i i tō ʼoutou mau mana’o
E ani ’ia fa’a’ite mai i te mana’o
E ani i te mau tamariʼi ’ia parau mai e nāhea tō Paulo riroraʼa mai te mau misiōnare i teie mahana ? E ani, « ʼua faʼaʼite aʼena ānei ʼoutou i te ʼevanelia i te tahi ʼē atu taʼata ? »
Ha’api’i i te ha’api’ira’a tumu
Te mau tamari’i ’āpī a’e
Tē haʼapiʼi nei te mau misiōnare i te mau taʼata nō niʼa ia Iesu.
ʼUa ʼite ānei te mau tamariʼi tā ʼoutou e haʼapiʼi nei ē e aha tā te mau misiōnare e rave nei ? Nāhea e nehenehe ai ia ʼoutou ’ia tauturu i te mau tamariʼi ʼia taʼa ē e nehenehe ia rātou ’ia faʼaʼite i te ʼevanelia ia vetahi ʼē ?
Mau ’ohipara’a e nehenehe e rave
-
E tauturu i te mau tamariʼi ’ia haʼuti teata taʼata ora mai i Te mau ’Ohipa 16:25–34 e haʼapoto ai ʼoutou i te ʼāʼamu nō Paulo ʼe Sila i te faʼaʼiteraʼa i te ʼevanelia i roto i te fare ’āuri (hiʼo atoʼa i te « Pene 61: Paulo ʼe Sila i roto i te fare ʼāuri », Mau ʼāʼamu o te Faufaʼa ʼĀpī, 158–60, ʼaore rā te video e tano i niʼa i te LDS.org). E haʼamāramarama ʼē tē haʼapiʼi atoʼa nei te mau misiōnare i teie mahana i te mau taʼata nō niʼa ia Iesu ʼe tē tauturu atoʼa nei ia rātou ’ia faʼaineine nō te bāpetizoraʼa.
-
E hāmani i te mau pine iʼoa misiōnare ’ia tāmau te mau tamariʼi, ʼe ’ia tauturu ia rātou ’ia pāpaʼi i tō rātou mau iʼoa i niʼa i te mau pine. E haʼapiʼi atu i te mau tamariʼi i te mau faʼahitiraʼa parau ʼōhie nō niʼa i te haʼapiʼiraʼa tumu tā rātou e nehenehe e faʼaʼite atu ’ia vetahi ʼē, mai « ʼo te Atua tō tātou Metua here i te Ao ra », « tē paraparau mai nei te Atua nā roto i te hōʼē peropheta ora », ʼaore rā « ʼo Iesu Mesia tō tātou Faʼaora ».
-
E ani i te mau tamariʼi ’ia faʼaʼite mai i te parau nō te tahi taʼata tā rātou i mātau ʼe tei roto i te misiōni. E ani i te mau tamariʼi ’ia nīnoʼa mai i te hōʼē hōhoʼa ʼaore rā ’ia pāpaʼi i te hōʼē rata nō te hāpono atu i te hōʼē misiōnare.
Tē faʼaʼite pāpū mai nei te mau pāpaʼiraʼa moʼa nō niʼa i te Metua i te ao ra ’e ia Iesu Mesia.
Noa atu eʼita ā e nehenehe i te tahi o te mau tamariʼi tā ʼoutou e haʼapiʼi nei ’ia taiʼo, e nehenehe rā tātou ʼoutou e tauturu ia rātou ’ia faʼatupu i te hōʼē here i te mau pāpaʼiraʼa moʼa ʼe ’ia ʼite e nāhea rātou e faʼaʼite atu i tō rātou ʼiteraʼa pāpū nō te Faʼaora.
Mau ’ohipara’a e nehenehe e rave
-
E tuʼu i te mau pāpaʼiraʼa moʼa i roto i te piha, ʼe ’a vaiiho i te mau tamariʼi ʼia ʼite mai i te reira. E tauturu i te hōʼē o te mau tamariʼi ’ia taiʼo i te pereota « ʼua … ʼimi rātou i te parau i pāpaʼihia ra i te mau mahana atoʼa » (Te mau ’Ohipa 17:11). E ani i te mau tamariʼi ’ia toro atu i te rima i te mau mahana atoʼa o te hepetoma i niʼa i te hōʼē tālena ’a tāpiti ai rātou i te parau i teie pereota nā muri ia ʼoutou.
-
Nō te haʼapiʼi i te mau tamariʼi ē tē faʼaʼite pāpū nei te mau pāpaʼiraʼa moʼa nō te Metua i te Ao ra ʼe nō Iesu Mesia, e tauturu ia rātou ’ia huri atu i te hōʼē pene i roto i te mau pāpaʼiraʼa moʼa, mai Te mau ’Ohipa 17 ʼaore rā 18, ʼe ’ia ʼimi i te mau parau Atua ʼaore rā Fatu. E hinaʼaro paha ʼoutou i te tāpaʼo i teie mau tāʼo ’ia nehenehe i te mau tamariʼi ʼia ʼite ʼōhie aʼe i te reira mau tāʼo. I te mau taime atoʼa e ʼite rātou i te hōʼē o teie mau tāʼo, e ani ia rātou ’ia faʼaʼite mai i te tahi mea tā rātou i ʼite nō niʼa i te Metua i te Ao ra ʼe ia Iesu Mesia.
E tamari’i au na te Atua.
I niʼa i te ʼaivi nō Māti, ʼua haʼapiʼi Paulo i te mau parau tumu nō niʼa i te natura o te Atua, mai te mau parau mau e tamariʼi tātou nāna ʼe « ʼaita ʼoia i ātea ʼē atu ia tātou atoʼa nei » (Te mau ’Ohipa 17:27). Nāhea e nehenehe ai ia ʼoutou ’ia tauturu i te mau tamariʼi ’ia ʼite ē ʼaita rātou i ātea ʼē atu i tō rātou Metua i te Ao ra.
Mau ’ohipara’a e nehenehe e rave
-
E ani i te mau tamariʼi ʼia tāpiti i te parau i te pereota « e huāʼai mātou nā te Atua » (Te mau ’Ohipa17:29), ’e e haʼamāramarama ē te auraʼa o te huāʼai e tamariʼi ïa. E faʼaʼite i tō ʼoutou ʼiteraʼa pāpū i te tamariʼi tātaʼitahi, ʼe e tamariʼi ʼoia nā te Atua. E ani ia rātou e aha tō rātou huru ’ia faʼaroʼo anaʼe rātou ē e mau tamariʼi rātou nā te Atua. E ani ia rātou ’ia faʼaʼite mai i tō rātou mau manaʼo nō niʼa i tō rātou Metua i te Ao ra.
-
E faʼaʼiteʼite atu i te mau hōhoʼa o te mau tamariʼi ʼe tō rātou mau ʼutuāfare (mai te mea ʼe nehenehe, e faʼaʼohipa i te mau hōhoʼa o te mau tamariʼi i roto i tā ʼoutou piha haʼapiʼiraʼa. E haʼamāramarama ʼē e mau tamariʼi tātou nā tō tātou mau metua vahine ʼe metua tāne, ʼe e mau tamariʼi anaʼe tātou pāʼātoʼa nō tō tātou mau Metua i te Raʼi ra.
-
E hīmene i te hōʼē hīmene nō niʼa i te Metua i te Ao ra, mai « ʼE Metua Tō’u» (Te Mau Hīmene, 188). Ma te tauturuhia ʼe te mau tamariʼi, e pāpaʼi i te mau parau ʼaore rā e nīnoʼa i te mau hōhoʼa i niʼa i te ʼiri pāpaʼiraʼa ’o tē faʼahōhoʼa nei i te mau mea tā tātou i haʼapiʼi mai nō niʼa i te Metua i te Ao ra i roto i te hīmene.
-
E taiʼo i te mau tamariʼi teie mau parau nō roto mai i Te mau ’Ohipa 17:27: « ʼAita roa ʼoia i ātea ʼē atu ia tātou atoʼa nei ». E faʼahiti na i te mau taime i ʼite ai ʼoutou ē ʼaita ʼoutou i ātea ʼē atu i te Metua i te Ao ra, ʼe e ani i te mau tamariʼi ’ia nā reira atoʼa.
E tamari’i ana‘e nā te Atua.
Ha’api’i i te ha’api’ira’a tumu
Te mau tamari’i pa’ari a’e
Te mau ’Ohipa 16:14–15, 25–34 ; 18:7–8, 24–28
E nehenehe au e riro ʼei misiōnare i teienei.
Nāhea e nehenehe ia ʼoutou ʼia tauturu i te mau tamariʼi ’ia riro mai ia Paulo ʼe ’ia faʼaʼite ia vetahi ʼē i te mea tā rātou i ʼapo mai nō niʼa i te ʼevanelia ?
Mau ’ohipara’a e nehenehe e rave
-
E ani i te mau tamariʼi ’ia taiʼo i Te mau ’Ohipa 16:14–15, 25–34 ; 18:7–8, 24–28 ʼe ’ia hāmani i te hōʼē tāpura o te mau taʼata tā Paulo ’e Apolo i faʼaʼite atu i te ʼevanelia. E ani ia rātou i muri iho ʼia hāmani i te hōʼē tāpura o te mau taʼata tā rātou e nehenehe e faʼaʼite atu i te ʼevanelia. E vaiiho i te mau tamariʼi ’ia haʼuti mai e nāhea rātou e nehenehe ai e faʼaʼite i teie mau taʼata nō niʼa ia Iesu Mesia ʼaore rā ’ia ani ia rātou ’ia haere mai i te fare pureraʼa. E nehenehe atoʼa ia ʼoutou ’ia ani i te mau tamariʼi ’ia pāpaʼi i te mau rata iti nō te faʼaʼite pāpū atu i te hōʼē tumu parau o te ʼevanelia i teie mau taʼata.
-
E ani i te mau misiōnare rave tāmau, te mau misiōnare tahito, ʼaore rā te mau misiōnare pāroita ’ia haere mai i roto i te piha haʼapiʼiraʼa nō te faʼaʼite mai i te mau mea tei tupu ia rātou ’a faʼaʼite ai rātou i te ʼevanelia. E faʼaitoito i te mau tamariʼi ’ia ui atu i te mau uiraʼa e nāhea e nehenehe ai ia rātou ’ia faʼaʼite i te ʼevanelia ia vetahi ʼē.
Te mau ’Ohipa 17:2–4, 10–12 ; 18:28
Tē faʼaʼite pāpū nei te mau pāpaʼiraʼa moʼa nō Iesu Mesia.
Tē faʼaʼite pāpū nei te mau peropheta atoʼa nō Iesu Mesia. Nāhea e nehenehe ai ia ʼoutou ’ia haʼapiʼi i te mau tamariʼi ’ia ʼimi iāna i roto i te mau pāpaʼiraʼa moʼa, noa atu ē ʼaita ʼoia i faʼahitihia tōna ra iʼoa ?
Mau ’ohipara’a e nehenehe e rave
-
ʼIa taio te mau tamariʼi i Te mau ’Ohipa 17:2–4, 10–12 ; 18:28, ʼe e ani ia rātou ’ia ʼimi e aha te parau tumu hōʼē roa e vai ra i roto i teie mau ’īrava parau. ’Ia au i teie mau ʼīrava, e aha ïa tei tauturu i te mau taʼata ʼia tiʼaturi i te ʼevanelia e Iesu Mesia ?
-
E ani i te mau tamariʼi ’ia faʼaʼite mai i tā rātou mau ʼāʼamu e au-roa-hia e rātou nō niʼa ia Iesu tā rātou hoʼi i haʼapiʼi i roto i te mau pāpaʼiraʼa moʼa i teie matahiti. E pāpaʼi i niʼa i te mau ʼāpi parau te mau pāpaʼiraʼa moʼa ’o tē haʼapiʼi nei nō niʼa i te Faʼaora, ʼe e huna atu i te reira i roto i te piha haʼapiʼiraʼa. E ani i muri iho i te mau tamariʼi ’ia ʼimi i te reira mau ʼapi parau. E tauturu i te mau tamariʼi ’ia ʼimi i te mau pāpaʼiraʼa moʼa tei ʼitehia e rātou, ʼe e ani ia rātou ’ia faʼaʼite i te tahi ʼe te tahi te mea tā te pāpaʼiraʼa moʼa tātaʼitahi e haʼapiʼi mai nei nō niʼa ia Iesu.
-
E ani i te mau tamariʼi ’ia tauturu ia ʼoutou ’ia hāmani i te hōʼē tāpura ʼōhie e nehenehe ia rātou e pāpaʼi atu ’ia taiʼo ʼaore rā ’ia ʼapo anaʼe mai i te tahi mea nō niʼa ia Iesu i roto i te mau pāpaʼiraʼa moʼa. E faʼaʼiteʼite i te reira i te mau hepetoma atoʼa nō te toeʼa o te matahiti, ʼe e tauturu i te mau tamariʼi ’ia ʼimi i te mau vāhi i roto i te mau pāpaʼiraʼa moʼa ’o tē haʼapiʼi nei nō niʼa ia Iesu.
E tamariʼi au nā te Atua.
Nāhea ʼoutou ʼia tauturu i te mau tamariʼi ’ia haʼamanaʼo ē e tamari’i rātou nā te Atua ?
Mau ’ohipara’a e nehenehe e rave
-
E faʼaʼite atu i te mau tamariʼi i te hōʼē ʼōfaʼi, ʼe ’a haʼamāramarama atu ē i te tau o Paulo, ʼua haʼamori te mau taʼata i te mau atua tā rātou i hāmani nā roto mai i te ʼōfaʼi ʼe te tahi atu mau mātēria. E ani i te mau tamari’i ’ia tai’o i Te mau ’Ohipa 17:27-29 E aha tā tātou i ’apo mai nā roto mai i teie mau ’īrava nō niʼa i te Atua ? E haʼamāramarama ē te auraʼa o te huā’ai ’o te mau tamariʼi ïa. E ani i te mau tamariʼi e aha ïa tō rātou huru ʼia ʼite ē e mau tamariʼi rātou nā te Atua.
-
E ani i te mau tamariʼi ’ia taiʼo i Te mau ’Ohipa 17:27. E ani i te mau tamari’i ’ia pāpa’i i te hōho’a o te mau mea tā rātou e nehenehe e rave nō te ʼite ʼaore rā nō te ʼimi i te Atua. I nāhea ra tō rātou ʼiteraʼa ē « ʼaita ʼoia i ātea ʼē atu ’ia [rātou] atoʼa nei » ?
E faʼaitoito i te haʼapiʼiraʼa mai i te fare
E faʼaitoito i te mau tamariʼi ’ia ʼimi i te hōʼē pāpaʼiraʼa moʼa i teie hepetoma ’o tē haʼapiʼi mai nō niʼa ia Iesu Mesia (e nehenehe te reira e tupu i roto i tā rātou iho ʼaore rā tā te ʼutuāfare tuatāpaparaʼa i te mau pāpaʼiraʼa moʼa). E ani ia rātou ’ia fa’a’ite mai e aha tā rātou i ’ite.
Haʼamaitaʼiraʼa i tā tātou haʼapiʼiraʼa
E tauturu i te mau tamariʼi ʼia riro ʼei mau pīahi maitaʼi aʼe. Tā ʼoutou fā i roto i te haʼapiʼiraʼa i te mau tamariʼi e ʼere ïa i te hōroʼa-noa-raʼa i te parau mau ia rātou. E tiʼa atoʼa rā ia ʼoutou ’ia tauturu ia rātou ’ia riro ʼei mau pīahi o te ʼimi i te parau mau nā roto i tō rātou iho pūai. ʼEi hiʼoraʼa, ʼeiaha e faʼatiʼa noa i te mau tamariʼi i te ʼāʼamu nō tō Paulo pororaʼa i niʼa i te ʼāivi nō Mati, e nehenehe tā ʼoutou e faʼanaho i te mau ʼohiparaʼa, mai tei faʼaʼitehia i roto i teie faʼanahoraʼa, ’o te tauturu ia rātou ’ia ʼite rātou iho i te mau parau mau i roto i te ʼāʼamu.