8–14 nō Tiurai. Te mau ’Ohipa 6-9: E aha vau, e aha tō ’oe hina’aro ?’» Mai, pe’e mai—nō te Paraimere : Faufa’a ’Āpī 2019 (2019)
8–14 nō Tiurai. Te mau ’Ohipa 6-9 », Mai, pe’e mai—nō te Paraimere : 2019
E ti’a ia tātou ’ia ora, nā Sam Lawlor
8–14 nō Tiurai
Te mau Ohipa 6-9
« E aha tā ’oe e hina’aro ’ia rave au ? »
E haʼamata i te taiʼo i Te mau ’Ohipa 6–9. E nehenehe te fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare e tauturu ia ’outou ’ia hāro’aro’a i teie mau pene. E nehenehe te mau ʼohiparaʼa nō te mau tamari’i ’āpī a’e i roto i teie fa’anahora’a e fa’aauhia nō te mau tamari’i paʼari aʼe , ’e ’aore rā, te tahi i te tahi.
E pāpa’i i tō ʼoutou mau mana’o
E ani ’ia fa’a’ite mai i te mana’o
E pāpaʼi i te tahi o te mau iʼoa o te mau taʼata i roto i Te mau ’Ohipa 6–9 i niʼa i te ʼiri pāpaʼiraʼa—penei aʼe Saulo ʼaore rā Setephano. E ani i te mau tamari’i ’ia fa’a’ite mai i te mau mea tā rātou i ’ite nō ni’a i teie mau ’ohipa i tupu.
Ha’api’i i te ha’api’ira’a tumu
Te mau tamari’i ’āpī a’e
E nehenehe tāʼu e peʼe ia Iesu Mesia nā roto i te tiʼaraʼa atu nō te mea tiʼa.
E aha ïa tā te mau tamariʼi e nehenehe e haʼapiʼi mai nā roto mai ia Setephano nō niʼa i te riroraʼa ʼei pipi na Iesu Mesia ?
Mau ’ohipara’a e nehenehe e rave
-
E tauturu i te mau tamariʼi ’ia faʼatupu i te mau ʼohiparaʼa e tano i te hōʼē hīmene nō niʼa i te māʼitiraʼa i te mea tiʼa, mai « Défends le bien » (Chants pour les enfants, 159). E faʼaʼohipa i Te mau ’Ohipa 7:51–60 nō te faʼatiʼa atu i te mau tamariʼi e nāhea tō Setephano haʼapiʼiraʼa nō niʼa ia Iesu Mesia, noa atu e faʼariri rahi te reira i te feiā faʼatere ’āti Iūda (hiʼo atoʼa i te « Pene 57: ʼUa tāparahi pohe te feiā ʼino ia Setephano », Mau ʼāʼamu o te Faufaʼa ʼĀpī, 150–51, ʼaore rā te video e tano i ni’a i te LDS.org). Nāhea tō Setephano tiʼaraʼa atu nō te mea tiʼa ?
-
E hōroʼa atu i te mau tamariʼi te mau ʼāʼamu o te mau tamariʼi tei māʼiti i rotopū i te tiʼa ʼe te hape. E ani i te mau tamariʼi e aha tā rātou e rave nō te tiʼa atu nō te mea tiʼa.
Tē faʼauru nei te Vārua Maitaʼi iāʼu ’ia faʼa’ite i te ʼevanelia ia vetahi ʼē.
ʼUa peʼe Philipi i te mau muhumuhu a te Vārua ʼe ʼua tauturu i te hōʼē taʼata nō Etiopia ’o tē fifi ra i te taʼa i te mau pāpaʼiraʼa moʼa. E aha ïa te mau haʼapiʼiraʼa tā teie ʼāʼamu e hōroʼa atu i te mau tamariʼi tā ʼoutou e haʼapiʼi nei ?
Philip Teaching the Ethiopian. nā Robert T. Barrett
Mau ’ohipara’a e nehenehe e rave
-
E huti mai e piti pārahiraʼa nō te hāmani i te hōʼē pere’oʼo huti. E ani e piti tamariʼi ’ia pārahi i roto i te pere’oʼo huti, hōʼē nō te tiʼa atu nō Philipi ʼe te tahi nō te tiʼa atu nō te taʼata nō Etiopia. I muri iho e faʼatiʼa i te ʼāʼamu e nāhea tō Philipi haʼapiʼiraʼa i te ʼevanelia i te taʼata nō Etiopia mai.
-
ʼUa ʼite aʼena ānei ʼoutou i te Vārua Maitaʼi i te parauraʼa ia ʼoutou ’ia faʼaʼite atu i te ʼevanelia i te tahi taʼata, mai tei tupu ia Philipi i roto i Te mau ’Ohipa 8:29 ? E fa’a’ite i te ʼohipa tā ʼoutou i rave i te mau tamari’i.
’Ia rave au i te hō’ē ’ohipa hape, tē ani nei te Metua i te Ao ra iā’u ’ia tātarahapa ’e ’ia taui.
I te taime e parau ai Iesu ia Saulo ’ia faʼaea i te hāmani ’ino i te ʼĒkālesia a te Fatu, ʼua tātarahapa Saulo i te reira ihoa taime ʼe ʼua taui. Nāhea teie ʼāʼamu e tauturu ai i te mau tamariʼi tā ʼoutou e haʼapiʼi nei ’ia hinaʼaro i te taui vitiviti ’ia rave anaʼe rātou i te hōʼē ʼohipa hape ?
Mau ’ohipara’a e nehenehe e rave
-
E haʼapoto i te ʼāʼamu nō te faʼafāriuraʼa o Saulo, tei ʼitehi i roto i Te mau ’Ohipa 9:1–20 (hiʼo atoʼa i te « Pene 59: Tē haʼapiʼi nei Saulo nō niʼa ia Iesu », Mau ʼāʼamu o te Faufaʼa ʼĀpī, 154–55, ʼaore rā te video e tano i niʼa i te LDS.org).
-
E tāpura ʼaore rā e ’āfaʼi mai i te mau hōhoʼa nō te mau mea e nehenehe e taui, mai te hōʼē rana iti o te riro mai ʼei hōʼē rana, ʼaore rā te mau tumu rāʼau i roto i te mau tau huru rau. Nāhea tō Paulo tauiraʼa i te taime ’a fārerei ai Iesu Mesia iāna ?
-
E nīnoʼa i te hōʼē haʼamaraʼa porōmu i niʼa i te ʼiri pāpaʼiraʼa. E ani i te mau tamariʼi ’ia topa i te iʼoa i te mau vāhi tā rātou e hinaʼaro i te tere mātaʼitaʼi atu, ʼe ’ia pāpaʼi i te reira i niʼa i te upoʼo o te hōʼē porōmu. E aha te tupu mai ’ia tipuʼu anaʼe tātou i te porōmu hape ? Nāhea te tātarahapa e riro ai mai te hoʼiraʼa atu i niʼa i te porōmu tano ?
-
E ani i te mau tamariʼi ’ia tāpiti i te parau e Saulo i te Fatu ; « E aha tā ’oe e hina’aro ’ia rave au ? » E aha tā te Fatu e hinaʼaro ia tātou ’ia rave ?
Ha’api’i i te ha’api’ira’a tumu
Te mau tamari’i pa’ari a’e
E riro ïa vau ʼei ’ite ta’a ’ē nō Iesu Mesia.
Nāhea e nehenehe ai ia ʼoutou ’ia tauturu i te mau tamariʼi tā ʼoutou e haʼapiʼi nei ’ia haʼapiʼi mai nā roto mai i te hi’ora’a o Setephano i te tiʼaraʼa ʼei ʼite nō Iesu Mesia ?
Mau ’ohipara’a e nehenehe e rave
-
E taiʼo i Te mau ’Ohipa 6:5–15 ʼe 7:51–60 ʼe te mau tamariʼi. Nāhea Setephano i riro ai ʼei ’ite ta’a ’ē nō Iesu Mesia ? E ani i te hōʼē ʼaore rā hau atu mau tamariʼi ’ia faʼahua nō te riro mai maiia Setephano ʼe ’ia faʼaʼite mai i te mea tā rātou e tiʼaturi nei ʼe te tumu nō te reira tiʼaturiraʼa.
-
E ani i te mau tamariʼi e taiʼo ’ia tae i tō rātou taime i Te mau ’Ohipa 6:3–10, ma te ʼimi i te mau tāpaʼo maitaʼi o Setephano tei tauturu iāna ’ia tāvini.
-
E ani i te mau tamariʼi ’ia tauturu ia ʼoutou ’ia feruri i te mau taime e nehenehe ai rātou e tiʼa atu ʼei mau ʼite ta’a ’ē nō Iesu Mesia ʼe nō tāna ra ʼevanelia. E tauturu ia rātou ’ia haʼuti teata taʼata ora mai i te tahi o teie mau hiʼoraʼa. E ani i te mau tamariʼi ’ia taiʼo ia Mosia 18:9. E faʼaʼite ē tei roto te riroraʼa ʼei ʼite nō Iesu Mesia i te mau fafauraʼa tā tātou i rave i te taime bāpetizoraʼa.
-
E pāpaʼi i te mau iʼoa o Setephano ʼe o Philipi i niʼa i te ʼiri pāpaʼiraʼa. I raro aʼe i te iʼoa o Setephano, e pāpaʼi i te mau rāveʼa e nehenehe ai ia tātou ’ia riro ʼei mau hiʼoraʼa nō vetahi ʼē. I raro aʼe i te iʼoa o Philipi, e pāpaʼi i te mau rāveʼa e nehenehe ai ia tātou ’ia faʼaʼite i te ʼevanelia ia vetahi ’ē. Nāhea te riroraʼa ’ei hiʼoraʼa maitaʼi nō te hōʼē pipi a Iesu Mesia e tauturu ai ia tātou ’ia faʼaʼite i te ʼevanelia ?
Te autahuʼaraʼa, e hōro’araʼa faufaʼa rahi ïa nō ’ō mai i te Atua ra.
Tē faʼatiani nei Sātane i te pōroʼi ē e ’āfaʼi mai te mau mea mātēria i te ʼoaʼoa ia tātou. Nāhea e nehenehe ai ia ʼoutou ’ia faʼaʼohipa i te ʼāʼamu o Simona nō te tauturu i te mau tamariʼi ’ia haʼafaufaʼa i te mau mea vārua mai te autahuʼaraʼa ʼe tāna mau haʼamaitaʼiraʼa ?
Mau ’ohipara’a e nehenehe e rave
-
E haʼapoto i te ʼāʼamu o Simona, tei ʼitehia i roto i Te mau ’Ohipa 8:5–24 (hiʼo atoʼa i te « Pene 58 : Simona ʼe te autahuʼaraʼa », Mau ʼāʼamu o te Faufaʼa ʼĀpī, 152–53, ʼaore rā te video e tano i niʼa i te LDS.org). Nō te aha e ʼore ai e nehenehe ia tātou ’ia fāriʼi i te autahuʼaraʼa nā roto i te hoʼoraʼa mai i te reira ? Nāhea e nehenehe ai i te tahi taʼata ’ia fāriʼi mau i te autahuʼaraʼa ? (hiʼo i Te mau hīro’a fa’aro’o 1:5).
-
E hōroʼa i te mau tamariʼi i te moni haʼavare, ʼe ’a faʼaʼiteʼite i te mau hōhoʼa o te mau mea e nehenehe e hoʼohia mai e te moni. E ani i te mau tamariʼi e hea rahiraʼa o tā rātou moni haʼavare tā rātou e hōroʼa nō teie mau mea. E faʼaʼite i muri iho i te mau hōhoʼa nō te ʼōroʼa nō te pāne ʼe te pape, te hōʼē hiero (faʼahōhoʼaraʼa i te mau haʼamaitaʼiraʼa hiero), te hōʼē bāpetizoraʼa, ʼe te tahi atu mau haʼamaitaʼiraʼa tā tātou e fāriʼi nā roto i te autahuʼaraʼa. E haʼamāramarama ē teie mau hōroʼaraʼa nō ’ō mai i te Atua, ʼe e mea faufaʼa rahi ïa ʼe e eʼita e hoʼohia mai ʼe te moni.
’Ia rave au i te hō’ē ’ohipa hape, tē ani nei te Metua i te Ao ra iā’u ’ia tātarahapa ’e ’ia taui.
I te taime i parau ai Iesu ia Saulo ’ia faʼaea i te hāmani ’ino i te ʼĒkālesia a te Fatu, ʼua tātarahapa Saulo i te reira ihoa taime ʼe ʼua taui. Nāhea teie ʼāʼamu e tauturu ai i te mau tamariʼi tā ʼoutou e haʼapiʼi nei ’ia hinaʼaro i te taui vitiviti ’ia rave anaʼe rātou i te hōʼē ʼohipa hape ?
Mau ’ohipara’a e nehenehe e rave
-
E ani i te mau tamariʼi ’ia tūfetu i te hōʼē ʼapi parau nā te ʼāfaraʼa. E ani ia rātou ’ia pāpaʼi Nā mua i niʼa i te hōʼē ʼāfaraʼa ʼe I muri mai i niʼa i te tahi atu ʼāfaraʼa. E taiʼo ʼe te mau tamariʼi i Te mau ’Ohipa 8:1–3 ; 9:1–2 ; ʼe 9:17–22, ma te hiʼo i te mau tāʼo ’aore rā te mau pereota ’o tē faʼaʼite mai i te huru o Saulo nā mua ’e i muri mai i tōna ʼite-mata-raʼa i te Fatu.
-
E ani i te hōʼē melo nō te pāroita ’ia faʼaʼite mai i te ʼāʼamu nō tōna faʼafāriuraʼahia e nāhea te riroraʼa ʼei melo nō te ʼĒkālesia i taui tōna oraraʼa, mai te oraraʼa o Saulo tei taui.
-
ʼA nīnoʼa i te hōʼē « porōmu nō Damaseko » i niʼa i te ʼiri pāpaʼiraʼa. E ani i te mau tamariʼi ’ia taiʼo i Te mau ’Ohipa 9:6, 11, 18, 20–22, ma te ʼimi i te mea tā Saulo i rave nō te tātarahapa ʼe nō te fāriʼuraʼa atu i te Mesia ra, ʼe ’ia pāpaʼi i teie mau mea nā niʼa i te porōmu. E aha tā tātou i ʼapo mai nā roto mai ia Saulo nō niʼa i te huru e nehenehe ai ia tātou ’ia riro hau atu mai te Mesia ra ?
-
E ani i te mau tamariʼi ’ia nīnoʼa i te tufaʼa au-roa-hia e rātou nō te ʼāʼamu o te faʼafāriruraʼa o Saulo ʼe ’ia faʼaʼite atu i tā rātou nīnoʼaraʼa i te piha haʼapiʼiraʼa.
E faʼaitoito i te haʼapiʼiraʼa mai i te fare.
E faʼaitoito i te mau tamariʼi ’ia parau atu i tō rātou ʼutuāfare te ʼohiparaʼa au-roa-hia e rātou i roto i te piha haʼapiʼiraʼa i teie mahana ʼe te mea tā rātou i ʼapo mai.
Haʼamaitaʼiraʼa i tā tātou haʼapiʼiraʼa
Tauturu i te mau tamari’i ’ia ha’api’i mai nā roto mai i te mau pāpa’ira’a mo’a. E’ita paha te mau tamari’i ʼāpī e ’ite i te tai’o rahi, e nehenehe rā ia ʼoutou ’ia faʼaʼohipa ia rātou ’ia ’apo mai i te ha’api’ira’a i roto i te mau pāpa’ira’a mo’a. ʼEi hiʼoraʼa, e nehenehe tā ʼoutou e taiʼo i te hōʼē ʼīrava ʼe ’ia ani ia rātou ’ia tiʼa mai ʼaore rā ’ia faʼateitei mai i tō rātou rima ’ia faʼaroʼo anaʼe rātou i te hōʼē tāʼo ta’a ’ē ʼaore rā pereota tā ʼoutou e hinaʼaro i te faʼatumu atu (hiʼo Haʼapiʼiraʼa mai tā te Faʼaora, 20).