15–21 nō Tiurai. Te mau ’Ohipa 10–15 : « Tupu atura ho’i te parau a te Atua, ’e ’ā’ano roa atura » Mai, pe’e mai—nō te Paraimere : Faufa’a ’Āpī 2019 (2019)
15–21 nō Tiurai Te mau ’Ohipa 10–15 Mataio », Mai, pe’e mai—nō te Paraimere : 2019
15–21 nō Tiurai
Te mau ’Ohipa 10–15
« Tupu atura ho’i te parau a te Atua, e a’ano roa atura »
E haʼamata i tā ʼoutou faʼaineineraʼa ’ia haʼapiʼi nā roto i te taiʼoraʼa i Te mau ’Ohipa 10–15. E nehenehe te Mai, pe’e mai—nō te ta’ata hō’ē ’e te ’Utuāfare e tauturu ia ’outou ’ia hāro’aro’a i teie mau pene, ’e e nehenehe teie fa’anahora’a e hōro’a mai ia ’outou i te mau mana’o nō te ha’api’ira’a.
E pāpa’i i tō ʼoutou mau mana’o
E ani ’ia fa’a’ite mai i te mana’o
Nō te tauturu i te mau tamariʼi ’ia faʼaʼite mai i te mea tā rātou i haʼapiʼi ʼe i ʼite mai, e nehenehe ʼoutou e ani ia rātou ’ia faʼaʼite mai i te mau mea tā rātou e rave nei nō te faʼaʼite ē te tiʼaturi nei rātou ia Iesu Mesia.
Ha’api’i i te ha’api’ira’a tumu
Te mau tamari’i ’āpī a’e
ʼUa here te Atua i te tāʼātoʼaraʼa o tāna mau tamariʼi.
Te hōʼē haʼapiʼiraʼa tumu e nehenehe i te mau tamariʼi ʼāpī aʼe e taʼa e tamariʼi te mau taʼata atoʼa a te Atua ʼe tē here nei ʼoia i te tāʼātoʼaraʼa o tāna mau tamariʼi.
Mau ’ohipara’a e nehenehe e rave
-
Faʼaʼite i te hōhoʼa nō Te Mesia ʼe te mau tamariʼi nō te ao atoʼa nei (Gospel Art Book, nūmera 116) ’ia taiʼo anaʼe ʼoutou i Te mau ’Ohipa 10:34–35. E haʼamāramarama ē i te tau o Petero tē tiʼaturi ra te tahi mau taʼata ʼe ʼua here noa te Atua i te tahi noa pupu taʼata, ʼua haʼapiʼi mai rā o Petero ʼe tē here nei te Atua i te tāʼātoʼaraʼa o tāna mau tamariʼi, ʼe te hinaʼaro nei ʼoia ʼe ’ia haʼapiʼi pāʼātoʼa mai rātou i te ʼevanelia.
-
E ani i te mau tamariʼi ’ia nīnoʼa i te hōʼē hōhoʼa nō rātou iho. E faʼaʼite i tō ʼoutou ʼiteraʼa pāpū ʼe tā here nei te Metua i te Ao ra ia rātou tātaʼitahi ʼe te tāʼātoʼaraʼa o tāna mau tamariʼi, noa atu tō rātou huru ʼaore rā te vāhi nō reira mai rātou.
-
E hīmene ʼe te mau tamariʼi i te hōʼē hīmene nō niʼa i te hereraʼa ’ia vetahi ʼē—ʼei hiʼoraʼa, « Je viens vers toi » (Chants pour les enfants, 78–79). E ani ia rātou ʼia faʼaʼite mai i te mau rāveʼa e nehenehe ai ia rātou ’ia faʼaʼite atu i te here i te mau taʼata atoʼa—e tae noa atu i te mau taʼata tei ta’a ’ē atu ia rātou—mai tā Iesu i rave.
-
E ani na mua roa i te mau metua o te tamariʼi tātaʼitahi ’ia faʼaʼite mai i te tahi mau tāpaʼo maitaʼi o tā rātou tamariʼi. E faʼaʼite i tā rātou mau pāhonoraʼa i te piha haʼapiʼiraʼa, ʼe ’a faʼaʼite pāpū atu ē tē here nei te Metua i te Ao ra i te tamariʼi tātaʼitahi.
-
E toro atu i te rima i te tamariʼi tātaʼitahi ma te parau ē, « Tē here nei te Metua i te Ao ra ia [iʼoa] ». E vaiiho i te tamariʼit tātaʼitahi ’ia toro atu i te rima i te tahi atu tamariʼi ma te parau i teie parau.
E ta’ata kjeresetiano vau nō te mea tē ti’aturi nei au ’e tē pe’e nei ho’i ia Iesu Mesia.
ʼUa ʼite te mau tamariʼi tā ʼoutou e haʼapiʼi nei ē ʼua piʼi-pinepine-hia te mau melo o te ʼĒkālesia ʼei mau momoni nō te mea tē tiʼaturi nei tātou i te Buka a Moromona, ʼua ʼite ānei rā rātou ē e mau taʼata keresetiano atoʼa tātou nō tō tātou tiʼaturi ia Iesu Mesia ?
Mau ’ohipara’a e nehenehe e rave
-
E taiʼo atu i Te mau ’Ohipa 11:26 i te mau tamariʼi. E haʼamāramarama ē e piʼihia te hōʼē taʼata o te tiʼaturi ʼe o te peʼe ia Iesu Mesia e taʼata keresetiano, nō reira e mau keresetiano tātou.
-
E hīmene i te « L’Eglise de Jésus-Christ » (Chants pour les enfants, 48-49) ʼe te mau tamariʼi. E aha tō tātou huru i te fare pureraʼa, i te fare haʼapiʼiraʼa, ʼe i te fare nō te mea e pipi hoʼi tātou nō Iesu Mesia ʼe e melo hoʼi tātou nō tāna ra ʼĒkālesia ?
-
E vaiiho i te mau tamariʼi ’ia faʼaʼū i te pine i niʼa i te ʼapi nō te ʼohiparaʼa nō teie hepetoma ʼe ’ia tu’u i te reira i ni’a ia ’outou i te fare.
Tē fa’aro’o ’e tē pāhono nei te Metua i te Ao ra i te mau pure.
Tē haʼapiʼi pūai mai nei te ʼāʼamu o te melahi i te faʼaoraraʼa ia Petero i te fare ʼāuri ʼe tē pāhono nei te Metua i te Ao ra i te mau pure.
Mau ’ohipara’a e nehenehe e rave
-
E ani i te mau tamariʼi ’ia haʼuti-teata-taʼata-ora mai i te ʼāʼamu nō tō Petero faʼaoraraʼahia mai i te fare ʼāuri i roto i Te mau ’Ohipa 12:1–17 ’a pūʼohu ai ʼoutou i te ʼāʼamu. Nāhea tō te Metua i te Ao ra pāhonoraʼa i te mau pure a te mau taʼata e pure ra nō Petero ?
-
E hīmene nō niʼa i te pure—ʼei hiʼoraʼa, « Le front baissé » (Chants pour les enfants, 18)—ʼe a faʼanaho i te mau ʼohiparaʼa nō te tauturu i te mau tamariʼi ’ia haʼapiʼi e nāhea ’ia pure. E ani i te mau tamariʼi ’ia faʼaʼite mai i te mau hōhoʼa o te mau mea e nehenehe ia rātou ’ia haʼamāuruuru atu i te Metua i te Ao ra ʼe ’ia ani atu iāna nā roto i te pure ;
-
E faʼaʼiteʼite i te mau hōhoʼa o te mau taʼata e pure ra (ʼa hiʼo, ʼei hiʼoraʼa i te, Gospel Art Book, nūmera 111 ʼe 112) ’a faʼaʼite ai ʼoutou i te hōʼē taime ʼua pāhono mai te Metua i te Ao ra i tā ʼoutou mau pure.
Hōho’ate vahine ʼe te tamāhine e pure raTē fa’aro’o nei ’e tē pahono nei te Metua i te ao ra i tā tātou mau pure.
Ha’api’i i te ha’api’ira’a tumu
Te mau tamari’i pa’ari a’e
Te mau ’Ohipa 10:34–35 ; 15:6–11
« Eʼita te Atua e haʼapa’o i te huru o te taʼata ».
E tiʼa i te mau tamariʼi tā ʼoutou e haʼapiʼi nei ’ia taʼa ē tē here nei te Metua i te Ao ra i te tāʼātoʼaraʼa o tāna mau tamariʼi, noa atu tō rātou huru, te vāhi nā reira mai rātou, ʼaore rā te mau māʼitiraʼa tā rātou e rave.
Mau ’ohipara’a e nehenehe e rave
-
E ani i te mau tamariʼi mai te mea e nehenehe ia rātou ’ia parau e aha ra te huru o te tahi taʼata nā roto noa i te hiʼoraʼa atu ia rātou ʼaore rā ma te tāiroiro ē nō hea mai ra rātou. ’Ia au i Te mau ’Ohipa 10:35, nāhea te Atua e faʼaoti ai ē ʼua « ʼitehia mai te hōʼē taʼata e ana » ?
-
E taiʼo i Te mau ’Ohipa 10:34–35 ; 15:6–11 ʼe te mau tamariʼi. E tātara ē i te tau o Petero, ʼua tiʼaturi te mau ʼāti Iūda ē ʼaita te Atua i fāriʼi i te mau taʼata e ʼere i te ’āti Iūda (te mau taʼata tei piʼihia e mau Edene). ʼUa haʼapiʼi rā te Atua ia Petero ē tē here nei te Atua i tāna mau tamariʼi atoʼa, te ’āti Iūda ʼe te mau Edene. E hīmene ʼāmui « E tamari’i au na te Atua ra » (Te Mau Hīmene, 185). E ani i te mau tamariʼi ’ia mono i te iʼoa o te tahi atu mau pīahi nō te mau tāʼo mai au ʼaore rā iā’u.
-
E ani i te mau tamariʼi ’ia faʼaʼite mai i te tahi mea ta’a ’ē roa nō te tahi pīahi i roto i te piha haʼapiʼiraʼa. E haʼamāramarama ē te auraʼa o te faʼahitiraʼa parau « Eʼita te Atua e haʼapa’o i te huru o te taʼata » ’oia ho’i tē here nei te Metua i te Ao ra i tāna mau tamariʼi atoʼa, ʼe nō tōna here ia rātou, tē hinaʼaro nei ’oia ’ia faʼaroʼo te tāʼātoʼaraʼa o tāna mau tamariʼi i te ʼevanelia.
Te taʼata keresetiano o te hōʼē ïa taʼata o te tiʼaturi ʼe o te peʼe ’ia Iesu Mesia.
Nāhea ’outou e nehenehe ai e tauturu i te mau tamari’i ’ia hāro’aro’a ē, e faʼaʼite mai tā rātou mau parau ʼe mau ʼohipa ē e mau keresetiano rātou ?
Mau ’ohipara’a e nehenehe e rave
-
E ani i te mau tamariʼi ’ia taiʼo i Te mau ’Ohipa 11:26 ; 3 Nephi 27:3–8 ; ʼe Te Parau Haʼapiʼiraʼa ʼe te mau Parau Fafau 115:4. E pāpaʼi keresetiano i niʼa i te ʼiri pāpaʼiraʼa ʼe e faʼaū i te tufaʼa o te parau ra « Mesia ». E ani i te mau tamariʼi ’ia faʼaʼite mai i te auraʼa i roto i tō rātou feruriraʼa ’ia riroraʼa ʼei hōʼē keresetiano.
-
E ani i te mau tamariʼi ’ia faʼaʼite mai i te iʼoa o tā rātou mau pupu, mai tō rātou mau ʼutuāfare ʼaore rā te piha haʼapiʼiraʼa a te Paraimere. E ani ia rātou ’ia faʼaʼite mai i te mau tumu e māuruuru ai rātou nō te riroraʼa ’ei hōʼē keresetiano ʼe te riroraʼa ʼei melo nō Te ʼĒkālesia e Iesu Mesia i te Feiā Moʼa i te mau Mahana Hopeʼa nei. Nāhea e nehenehe ai ia tātou ’ia faʼaʼite atu ia vetahi ʼē e mau keresetiano tātou ?
-
E faʼaʼiteʼite i te mau taoʼa ʼaore rā mau hōhoʼa ’o tē faʼahōhoʼa mai i te mau parau mau ta’a ’ē a te ʼĒkālesia a Iesu Mesia, mai te hōhoʼa nō te hōʼē haʼamaitaʼiraʼa autahuʼaraʼa. E ani i te hōʼē tamariʼi ’ia māʼiti i te hōʼē o te mau taoʼa ʼaore rā mau hōhoʼa ʼe ’ia faʼaʼite mai, nāhea te reira e riro ai ʼei hōʼē haʼamaitaʼiraʼa i roto i tā tātou ʼĒkālesia. E haʼamāramarama ē noa atu e melo te mau keresetiano nō te mau ʼēkālesia ʼē e rave rahi, e melo rā tātou nō te hōʼē ā ʼĒkālesia tā Iesu Mesia i haʼamau i niʼa i te fenua nei.
-
E faʼaʼite i te video « Te huru keresetiano mau » (LDS.org). E ani i te mau tamari’i ’ia pāpa’i hōho’a i te mau mea tā rātou e nehenehe e rave nō te riro ’ei mau keresetiano mau.
ʼIa pure anaʼe vau ma te faʼaroʼo, e pāhono mai te Metua i te Ao ra.
E feruri i te mau taime e pāhono mai ai te Metua i te Ao ra i tā ʼoutou mau pure. Nāhea e nehenehe ai ia ʼoutou ʼia faʼaʼohipa i teie mau ʼiteraʼa nō te haʼapiʼi atu i te mau tamariʼi ē e faʼaroʼo ʼe e pāhono mai te Metua i te Ao ra i tā rātou mau pure mai te au i tōna iho taime ʼe tāna iho rāveʼa.
Mau ’ohipara’a e nehenehe e rave
-
E ani i te mau tamariʼi ’ia haʼuti teata taʼata ora mai i te ʼāʼamu nō tō te melahi faʼaoraraʼa ia Petero mai te fare ʼāuri mai i roto i Te mau ’Ohipa 12:1–17 ’a faʼatiʼa noa ai ʼoutou i te ʼāʼamu nā roto i tā ʼoutou iho mau parau.
-
E ani i te mau tamariʼi e aha te auraʼa i roto i tō rātou feruriraʼa te « pure ʼaita e faʼaea » (Te mau ’Ohipa 12:5). Nāhea te mau pure a te mau taʼata e pāhonohia ai ? E ani i te mau tamariʼi ’ia faʼaʼite mai i te mau taime i pāhono mai ai te Metua i te Ao ra i tā rātou iho pure ʼaore rā te pure a te ʼutuāfare. E nehenehe atoʼa tā ʼoutou e faʼaʼite i te taime ’a pāhono ai ʼoia i tā ʼoutou pure nā roto i te hōʼē rāveʼa ta’a ’ē i te rāveʼa i tiaʼihia ʼaore rā i hinaʼarohia e ʼoutou. E faʼaʼite pāpū atu ē tē here nei te Atua ia tātou, ʼe e pāhono ’oia i tā tātou mau pure ’ia au i te huru ʼe te taime maitaʼi roa aʼe nō tātou.
E faʼaitoito i te haʼapiʼiraʼa mai i te fare
E hōroʼa i te mau tamariʼi i te hōʼē hōhoʼa ʼaore rā te hōʼē taoʼa nō te faʼaʼite i tō rātou fare ʼei tāpa’o faʼahaʼamanaʼoraʼa nō te mau melo o te ʼutuāfare ’ia pure ʼāmui.
Haʼamaitaʼiraʼa i tā tātou haʼapiʼiraʼa
E fa’a’ite pāpū nō te mau ha’amaita’ira’a i fafauhia mai. ʼIa ani anaʼe ʼoutou i te mau tamariʼi nō te Paraimere ’ia ora i te hōʼē ture, e faʼaʼite i te mau fafauraʼa tā te Atua i hōroʼa i te mau taʼata o te haʼapaʼo i taua ture ra. ʼEi hiʼoraʼa, e nehenehe tā ʼoutou e faʼaʼite pāpū nō te mau haʼamaitaʼiraʼa tei fafauhia mai tā ʼoutou hoʼi i fāriʼi ’a ʼimi ai ʼoutou i te mau pāhonoraʼa nā roto i te pure.