« 1–7 nō Tiurai. Te mau ’Ohipa 1-5 : ʼE ’ei ʼite ho’i ʼoutou nō’u » Mai, pe’e mai—nō te Paraimere : Faufa’a ’Āpī 2019 (2019)
1–7 nō Tiurai. Te mau ’Ohipa 1–5 », Mai, pe’e mai—nō te Paraimere : 2019
Te mahana nō te Penetetōte, nā Sidney King.
1–7 nō Tiurai
Te mau ’Ohipa 1-5
« ʼE ’ei ʼite ho’i ’outou nō’u »
E haʼamata i tā ʼoutou faʼaineineraʼa nā roto i te taiʼoraʼa i Te mau ’Ohipa 1–5. E ’imi nā roto i te pure ’ia ’ite i te mau hina’aro o te mau tamari’i tā ʼoutou e haʼapiʼi nei.. Mai, pe’e mai—nō te ta’ata hō’ē ’e te ’utuāfare e nehenehe atoʼa i teie faʼanahoraʼa e tauturu ia ʼoutou.
E pāpa’i i tō ʼoutou mau mana’o
E ani ’ia fa’a’ite mai i te mana’o
E pāpaʼi ’O vai au ? i niʼa i te ʼiri pāpaʼiraʼa. E hōroʼa i te mau faʼahitiraʼa parau nō niʼa ia Petero ʼe e ani i te mau tamariʼi ē, nō vai teie mau faʼahitiraʼa parau. E aha atu ā tā rātou i ʼite nō niʼa ia Petero ?
Ha’api’i i te ha’api’ira’a tumu
Te mau tamari’i ’āpī a’e
Tē arataʼi nei Iesu Mesia i tāna ’Ēkālesia nā roto i te mau peropheta ’e te mau ’āpōsetolo.
Nā roto i te haʼapiʼiraʼa mai e nāhea tō te Faʼaora arataʼiraʼa i tāna ʼĒkālesia i mutaʼa ihora nā roto atu i te mau ʼāpōsetolo, e nehenehe ai te mau tamariʼi ’ia noaʼa i te ʼiteraʼa pāpū nō niʼa i te mau peropheta ʼe te mau ʼāpōsetolo i tō tātou nei ’anotau.
Mau ’ohipara’a e nehenehe e rave
-
E fa’a’ite i te hōho’a i roto i te fa’anahora’a nō teie hepetoma i roto Mai, pe’e mai—nō te ta’ata hō’ē ’e te ’utuāfare. E ani i te mau tamariʼi nō te aha te mau taʼata e hiʼo ai i niʼa i te raʼi. E haʼapoto ai te ʼāʼamu i roto i Te mau ’Ohipa 1:1–11. E hi’o ato’a « Pene 55 : Te arataʼi nei te mau ʼāpōsetolo i te ʼĒkālesia », Te mau ’ā’amu o te Faufa’a ’Āpī, 145–47).
-
’A hi’o noa ai te mau pīahi i te hōho’a nō roto mai i te fa’anahora’a nō teie hepetoma i roto i Mai, pe’e mai—nō te ta’ata hō’ē ’e te ’utuāfare, e ani i te hō’ē tamari’i ’ia tāpe’a i te hōho’a o taua ’āpōsetolo ra. ʼO vai te arataʼi i te ʼĒkālesia ’ia ʼore anaʼe te Mesia i niʼa i te fenua nei ? Nāhea rātou e arataʼi ai i te ʼĒkālesia ?
-
E haʼuti i te hōʼē hauti faʼatano e piti nā faʼanahoraraʼa hōhoʼa o te Peresideniraʼa Mātāmua ʼe o te tino ʼAhuru ma Piti ʼāpōsetolo e ora nei. ʼIa ʼite-anaʼe-hia te hōʼē faʼatanoraʼa, ’a faʼaʼite i te iʼoa o te ʼāpōsetolo ʼaore rā peresideni ʼe e parau i te tahi mea nō niʼa iāna.
-
I muri mai i te hōʼē hōhoʼa nō Iesu, e tāpiri atu i te tahi mau hōhoʼa iti ’o te mau mea tā te hōʼē peropheta e nehenehe e haʼapiʼi mai, mai te bāpetizoraʼa ʼaore rā te hōʼē hiero. ’Ia rave te tamariʼi tātaʼitahi i te taime nō te hiʼo i te hōʼē o te mau hōhoʼa ʼe ’ia parau atu i te toeʼa o te mau pīahi, « Tē haʼapiʼi mai nei te peropheta ia tātou nō niʼa i [te tumu parau i niʼa i te hōhoʼa] ».
E nehenehe tā te Metua i te Ao ra e haʼamaitaʼi ia vetahi ʼē nā roto atu iāʼu.
E aha tā ʼoutou e rave nō tauturu i te mau tamariʼi ’ia ʼite i te mau rāveʼa e nehenehe ai ia rātou ’ia haʼamaitaʼi i te mau taʼata na pīha’i iho ia rātou ? E tauturu ia rātou ’ia haʼapiʼi mai nā roto mai i te hiʼoraʼa o Petero ʼe o Ioane i te faʼaoraraʼa i te taʼata hāpepa.
Mau ’ohipara’a e nehenehe e rave
-
E ani i te mau tamariʼi ’ia rave i te mau ʼohipa ’o te tūʼati atu i te ʼāʼamu i roto i Te mau ’Ohipa 3:1–10, mai te tororaʼa atu i tō rātou mau rima ʼe te ʼōuʼaraʼa ma te ʼoaʼoa. Nāhea tō te Metua i te Ao ra haʼamaitaʼiraʼa i te taʼata tei ʼore e maraʼa i te haere ?
-
E hōpoi mai i te hōʼē pute ʼe te mau hōhoʼa o te faʼaʼite mai i te mau rāveʼa e nehenehe ai ia tātou ’ia haʼamaitaʼi ʼe ’ia tāvini ia vetahi ʼē. E vaiiho i te mau tamariʼi ’ia rave i tō rātou taime nō te māʼiti i te mau hōhoʼa i roto i te pute ʼe ’ia faʼaʼite mai e nāhea e nehenehe ai ia rātou ’ia haʼamaitaʼi ia vetahi ʼē nā roto i te reira rāveʼa.
-
E ani i te mau tamari’i ’ia fa’a’ite mai i te hō’ē taime i tauturu ai rātou i te tahi taʼata.
E nehenehe iāʼu e riro ’ei ta’ata parau-tiʼa.
ʼUa faʼaʼohipa te mau keresetiano mātāmua i te hōʼē huru o te ture nō te haʼamoʼaraʼa nō te tauturu i te utuutu i te feiā vēvē. ʼUa hoʼo te feiā tei fatu i te fenua ʼe ʼua hōroʼa i te moni i te mau ʼāpōsetolo ’ia ʼoperehia na niʼa i te feiā moʼa ’ia au i tō rātou mau hinaʼaro. ʼUa haʼavare Anania ʼe o Saphira nō niʼa i tā rāua hōroʼaraʼa, ma te manaʼo ē e nehenehe rāua e haʼavare i te mau tāvini a te Fatu.
Mau ’ohipara’a e nehenehe e rave
-
E tauturu i te mau tamariʼi ’ia haʼuti-teata-taʼata ora mai i te ʼāʼamu o Anania ʼe o Saphira. E haʼamāramarama atu ē noa atu eʼita tātou e pohe ’ia haʼavare anaʼe tātou, te faʼaʼite mai nei rā teie ʼāʼamu i te faufaʼa rahi nō te Metua i te Ao ra ’ia parau i te parau mau.
-
E hīmene ʼāmui i te hōʼē hīmene nō niʼa i te parau-tiʼa, mai « I Believe in Being Honest » (Children’s Songbook, 149). E tauturu i te mau tamariʼi ’ia ʼite ē te auraʼa o te vai parau-tiʼa-raʼa o te parauraʼa ïa i te mau taime atoʼa i te parau mau ʼe te rave-ʼore-raʼa i te mau mea a te tahi atu taʼata.
-
E faʼaʼohipa i te mau pepe hurio ʼapi parau nō te faʼaʼiteʼite i te mau taime ʼōhie ʼe haʼavare ʼore ai ʼaore rā e haʼavare ai te tahi taʼata. E ani i te mau tamariʼi ’ia tiʼa mai i niʼa ’ia haʼavare ʼore anaʼe te taʼata ʼaore rā ’ia pārahi i raro ’ia haʼavare anaʼe te taʼata.
Ha’api’i i te ha’api’ira’a tumu
Te mau tamari’i pa’ari a’e
Tē arataʼi nei Iesu Mesia i tāna ’Ēkālesia nā roto atu i te mau peropheta ’e te mau ’āpōsetolo.
E nehenehe tā ʼoutou mau pīahi ’ia taʼa ē tē arataʼihia nei te ʼĒkālesia a te Faʼaora i teie mahana e te mau peropheta ʼe te mau ʼāpōsetolo, mai i mutaʼa ihora.
Mau ’ohipara’a e nehenehe e rave
-
E pāpaʼi i niʼa i te ʼiri pāpaʼiraʼa Nāhea ïa Iesu Mesia e arataʼi ai i te ʼĒkālesia ’ia ’ore anaʼe ʼoia i niʼa i te fenua nei ? E ani i te mau tamariʼi ’ia ʼimi i te mau pāhonoraʼa i te uiraʼa ’a taiʼo ai ʼoutou i te mau parau a te Faʼaora i te mau ʼāpōsetolo i roto i Te mau ’Ohipa 1:8.
-
E taiʼo ʼāmui i Te mau ’Ohipa 1:22–26. ʼEi piha haʼapiʼiraʼa, e faʼaʼite atu e nāhea te mau ʼāpōsetolo e piʼi ai i te hōʼē ʼāpōsetolo ʼāpī.
-
Nā mua roa, e ani i te hōʼē tamariʼi ʼaore rā i tōna mau metua ’ia taiʼo i te parau nō te ʼāpōsetolo tei piʼihia iho nei (penei aʼe i niʼa i te LDS.org). E ani i te tamariʼi ’ia faʼaʼite mai i te piha haʼapiʼiraʼa e aha tāna i haʼapiʼi mai ʼe mai te mea e nehenehe, te mea tā te ʼāpōsetolo i parau nō niʼa i tōna piʼiraʼa i roto i tāna pōroʼi mātāmua i roto i te ʼāmuiraʼa rahi.
ʼUa arataʼi te mau ʼāpōsetolo i te ʼĒkālesia i muri aʼe i tō te Mesia haereraʼa atu i te raʼi.
Tē haʼamaitaʼi nei te Metua i te Ao ra ia vetahi ʼē nā roto atu iāʼu, noa atu ē e ʼere au i te taʼata ʼona.
Nāhea e nehenehe aiia ʼoutou e haʼapiʼi i te mau tamariʼi ē e nehenehe tā rātou e haʼamaitaʼi ia vetahi ʼē, noa atu ʼaita tā rātou e « ario ʼe te auro » ? (Te mau ’Ohipa 3:6). Nāhea e nehenehe ai ia ʼoutou ’ia tauturu ia rātou ’ia hiʼo i te mau rāveʼa nō te tāvini i te Atua nā roto i te tāviniraʼa ia vetahi ʼē ?
Mau ’ohipara’a e nehenehe e rave
-
E ani i te hōʼē tamariʼi ’ia taiʼo i Te mau ’Ohipa 3:1–10 ’a haʼuti teata taʼata ora ai te tahi atu mau tamariʼi i te ʼāʼamu. (ʼEi tautururaʼa, e hi’o ato’a « Pene 56 : Tē faʼaora ra Petero i te hōʼē taʼata », Te mau ’ā’amu o te Faufa’a ’Āpī, 148–49). E nehenehe atoʼa tā ʼoutou e faʼaʼiteʼite i te video « ʼUa faʼaora Petero ʼe ’o Ionae i te hōʼē taʼata hāpepa mai tōna fānauraʼahia » (LDS.org). Nāhea te haʼamaitaʼiraʼa tei fāri’ihia e teie taʼatai i rahi aʼe i te moni tāna i ani atu ?
-
E faʼahaere atu i te hōʼē pute moni huʼahuʼa. ’Ia tāpeʼate mau tamariʼi i te pute, e ani atu ia rātou e aha tā rātou e nehenehe e hoʼo mai i taua moni ra. E rave i muri iho i te pute moni ʼe e ani i te mau tamariʼi e aha ïa te mau haʼamaitaʼiraʼa e ʼore e nehenehe ia rātou ’ia hoʼo mai. E ani ia rātou ’ia faʼaʼite mai e nāhea e nehenehe ai ia rātou ’ia tāvini i te tahi taʼata ma te ʼore e faʼaʼohipa i te moni (Te mau ’Ohipa 3:6).
Tē faʼaʼite pāpū nei te Vārua Maitaʼi i tōʼu nei ʼāʼau i te mau parau mau o te ʼevanelia.
’Ia haʼapiʼi anaʼe te mau tamariʼi ’ia ʼite e nāhea te Vārua Maitaʼi e paraparau ia rātou, ʼe faʼauruhia rātou ’ia faʼaroʼo ʼe ’ia rave i te ʼohipa ’ia au i te faʼaururaʼa tā rātou i fāriʼi ;
Mau ’ohipara’a e nehenehe e rave
-
E taiʼo ʼāmui i Te mau ’Ohipa 2:36–37. E aha ïa tō tātou huru ’ia parau anaʼe mai te Vārua Maitaʼi ia tātou i te tahi mea i roto i tō tātou ʼāʼau ?
-
ʼEi piha haʼapiʼiraʼa, e hāmani i te hōʼē hōhoʼa pia ma teie mau parau E aha ïa tā tātou e rave ? i niʼa roa. E faʼaʼiteʼite i te hōhoʼa pia i te mau hepetoma atoʼa, ʼe ’a tuʼu mai i te mau rāveʼa e nehenehe ai i te mau tamariʼi ’ia rave i te mea tā rātou i haʼapiʼi mai i roto i te haʼapiʼiraʼa nō te hepetoma tātaʼitahi.
-
E ani i te mau tamariʼi ’ia ʼimi i te mau mea maitaʼi tā te mau taʼata e rave i muri aʼe i tō rātou bāpetizoraʼahia i roto i Te mau ’Ohipa 2:41–47. E aha ïa te mau mea maitaʼi tā tātou e nehenehe e rave nō te faʼaʼite i tō tātou māuruuru nō te hōroʼaraʼa a te Vārua Maitaʼi tā tātou i fāriʼi i te taime ’a bāpetizohia ai tātou ?
E faʼaitoito i te haʼapiʼiraʼa mai i te fare
E faʼaitoito i te mau tamariʼi ’ia faʼanaho i te hōʼē rāveʼa e nehenehe ai ia rātou ’ia tāvini i te Metua i te Ao ra nā roto i te tautururaʼa i te hōʼē melo o tō rātou ʼutuāfare i teiehepetoma.
Ha’amaita’iraʼa i tā tātou ha’api’ira’a
Tāmau ’ā’au i te hō’ē ’īrava. E māʼiti i te hōʼē pāpaʼiraʼa moʼa tā ʼoutou e manaʼo e nehenehe e tauturu i te mau tamariʼi i roto i tā ʼoutou piha haʼapiʼiraʼa, mai Te mau ’Ohipa 2:38 ʼaore rā Te mau ’Ohipa 3:19, ʼe e tauturu ia rātou ’ia tāmau ʼāʼau i te hōʼē pereota i roto i te pāpaʼiraʼa moʼa. E nehenehe atoʼa tā te mau hōhoʼa, te mau faʼahaʼutiraʼa i te rima, ʼaore rā te mau haʼutiraʼa e tauturu i te mau tamariʼi ’ia tāmau ʼāʼau i te mau pāpaʼiraʼa moʼa.