Iesu e paraparau rā ia Petero

’A fa’a’amu i tā’u mau māmoe, nā Kamille Corry

24–30 nō Tiunu

Mataio 28 ; Mareko 16 ; Luka 24 ; Ioane 20–21

« ’Ua ti’afa’ahou a’enei ïa »

Ha’amata i tā ’outou fa’aineinera’a nā roto i te tai’ora’a i te Mataio 28 ; Mareko 16 ; Luka 24 ; ’e Ioane 20-21. E nehenehe Mai, pe’e mai—Nō te ta’ata iho ’e te ’utuāfare ’e teie fa’anahora’a e tauturu ia ’outou ’ia mā’iti i te mau parau tumu i roto i teie mau pene o te riro ’ei mea faufa’a nō te mau tamari’i i roto i tā ’outou piha ha’api’ira’a.

Pāpa’i i tō ’outou mau mana’o

tāpa’o nō te fa’a’itera’a

Ani ’ia fa’a’ite

E nehenehe te ’itera’a i te hō’ē hōho’a e tauturu i te mau tamari’i ’ia ha’amana’o i te mau mea tā rātou i ’apo mai i te fare ’e ’aore rā, i roto i te tahi atu mau fa’anahora’a. Penei a’e e nehenehe ’outou e fa’a’ite i te hōho’a i roto i te fa’anahora’a o teie hepetoma i roto Mai, pe’e mai—Nō te ta’ata ’e te ’utuāfare ’e ’a ui i te mau tamari’i ’ia fa’a’ite mai e aha tā rātou i ’ite nō ni’a i te ’ā’amu i fa’a’itehia i roto i te hōho’a.

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i ’āpī a’e

Mataio 28 ; Mareko 16 ; Luka 24 ; Ioane 20:1-23

E ora fa’ahou vau i muri a’e i tō’u pohera’a, mai tā Iesu i nā reira.

’Ua riro te tāra’ehara a Iesu Mesia e tae noa atu i tōna ti’afa’ahoura’a, ’ei ’ohipa faufa’a roa a’e i roto i te ’ā’amu, ’e o te niu ïa o te fa’aro’o keretetiano. ’A tai’o ai ’outou nō ni’a i te ti’afa’ahoura’a, ’a feruri e nāfea ’outou i te tauturu i te mau tamari’i ’ia patu i tō rātou fa’aro’o i ni’a ia Iesu Mesia.

Te mau ’ohipara’a e ti’a ’ia rave

• ’A fa’ati’a i te ’ā’amu ’o te ti’afa’ahoura’a ’o Iesu nā roto i tā ’outou iho mau parau. ’A ani i te mau tamarii tāta’ihō’ē ’ia fa’ahiti fa’ahou mai i te ’ā’amu i mua ia ’outou. E nehenehe tā ’outou e fa’a’ohipa i te « Pene 54 : ’Ua ti’afa’ahou a’enei ïa », Te mau ’ā’amu nō te faufa’a ’āpī, 139-44, ’e ’aore rā, te video tano i ni’a (LDS.org). ’A fa’ata’a ē, i te pohera’a Iesu, ’ua fa’aru’e tōna vārua i tōna tino. I tōna ti’afa’ahoura’a mai, ’ua ’āmui-fa’ahou-hia tōna vārua ’e tōna tino.

• ’A ani e rave rahi mau melo nō te paroisa ’ia riro rātou ’ei fa’ehau, ’ei melahi, ’ei Maria Magadalena, ’ei Petero, Ioane, ’ei mau pipi, ’e ’ei Toma, ’e ’a parau ē, e aha tā rātou i ’ite i muri a’e i te ti’afa’ahoura’a ’o Iesu.

• ’A fa’a’ite i te video « E aha tō muri iho ’ia pohe ana’e tātou ? » (LDS.org), ’e ’a parau nō ni’a i te hō’ē ta’ata tā ’outou i ’ite ’ua pohe. ’A fa’a’ite i tō ’outou ’itera’a pāpū ē, e ti’afa’ahou te mau ta’ata ato’a i te hō’ē mahana. ’A ani i te mau tamari’i ’ia fa’a’ite i tō rātou ’itera’a pāpū.

• ’A feruri ’ia hīmene ’āmui « ’Jésus est-il ressuscité ?” e « Quand Jésus reviendra », Chants pour les enfants, 45, 46. ’A ani i te mau tamari’i ’ia feruri e aha te huru ’ia ’ite ia Iesu tei ti’afa’ahou. ’A fa’aue ia rātou ’ia fa’a’ite mai i tō rātou mau mana’o i mua i te piha ha’api’ira’a.

Ioane 20:24–29

E roa’a iā’u te fa’aro’o i roto ia Iesu Mesia noa atu ē, ’aita vau i ’ite iāna.

’A feruri nāfea e ti’a ai ia ’outou ’ia tauturu i te mau tamari’i ’ia hāro’aro’a ē, e aha te fa’aro’o, ’e e nāfea e ti’a ai ia rātou ’ia fa’a’ite i te fa’aro’o i roto i te Fa’aora.

Te mau ’ohipara’a e ti’a ’ia rave

• ’A fa’a’ite i te hōho’a ’Ua ha’afātata te Mesia ia Toma (LDS.org) ’a fa’ati’a ai ’outou i te ’itera’a ’o Toma i roto i te Ioane 20:24–29. ’A fa’ati’a fa’ahou i te ’ā’amu i muri a’e i roto i te ha’api’ira’a, i te reira rā taime, ’a ani i te mau tamari’i ’ia hōro’a mai i te tahi mau ha’apāpūra’a.

• ’A fa’a’ite i te hō’ē ’āfata ’e te hō’ē tao’a i roto, tā te mau tamari’i e nehenehe e ’ite, ’e ’a fa’ata’a i te reira tao’a i te mau tamari’i. ’A ani ia rātou e ’ua ti’aturi ānei rātou ē, tei roto mau taua tao’a ra i te ’āfata, ’e nō te aha. I muri iho, ’a fa’a’ite ia rātou i te reira tao’a, ’e ’a fa’ata’a ia rātou ē, te fa’aro’o o te ti’aturira’a ïa i te mau mea e’ita tātou e ’ite. Te fa’aro’o faufa’a roa a’e e ti’a ia tātou ’ia fāri’i, o te fa’aro’o ïa ia Iesu Mesia.

Iesu i te fa’a’itera’a i nā rima i te mau ’āpōsetolo

Teie ho‘i tā‘u nā rima,Nā Jeff Ward.

Ioane 21:15–17

E nehenehe tā’u e fa’a’ite i tō’u here ia Iesu nā roto i te tāvinira’a ia vetahi ’ē.

Nāfea e ti’a ai ia ’outou ’ia fa’auru i te mau tamari’i ’ia here ’e ’ia tauturu i te feiā ’ati a’e ia rātou ?

Te mau ’ohipara’a e ti’a ’ia rave

• ’A tai’o Ioane 21:15–17, ’e ’aore rā, ’a fa’a’ite i te video « A fa’a’amu i tā’u mau māmoe » (LDS.org). ’Aita Iesu i hina’aro ’ia ha’amau’a Petero i tōna taime nō te tāi’a. ’Ua hina’aro rā ’oia ’ia fa’a’ite Petero i te ’evanelia ’e ’ia ani i te mau ta’ata ato’a ’ia haere mai iāna ra. ’A hōro’a i te hō’ē māmoe papie i te tamari’i tāta’itahi, ’e ’a ani ia rātou ’ia pāpa’i i ni’a iho i te reira hō’ē mea e ti’a ia rātou ’ia rave nō te tauturu i te fa’a’amura’a i te māmoe a Iesu.

• ’A ani i te mau tamari’i e rave rahi nā mua roa, ’ia fa’a’ite mai i te mau mea tā rātou e rave nei nō te here ’e nō te tāvini ia vetahi ’ē, ’e ’aore rā, i te mau rāve’a a vetahi ’ē nō te tāvinira’a mai ia rātou.

• ’A pāpa’i i te i’oa ’o te tamari’i tāta’itahi i roto i tā ’outou piha ha’api’ira’a i ni’a iho i te mau ’api parau tāpūpūhia i te hōho’a ’o te māmoe, ’e ’a ha’apūrara i te reira mau māmoe nā roto i te piha ha’api’ira’a. (’A pāpa’i ato’a i te i’oa ’o te mau tamari’i ’aita e haere tāmau mai nei.) ’A ani i te mau tamari’i ’ia ha’aputuputu i te mau māmoe nā roto i te ’imira’a i te māmoe i pāpa’ihia tō rātou i’oa i ni’a iho. E aha te ti’a ia tātou ’ia rave nō te tāvini i te mau māmoe mo’e tā tātou i ’ite ?

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i pa’ari a’e

Mataio 28 ; Mareko 16 ; Luka 24 ; Ioane 20:1-23

Nō te mea ho‘i ’ua ti‘afa’ahou ’oia, e ti‘afa’ahou ato’a ïa te mau ta’ata ato’a.

E uiui ihoa te mau tamari’i ē, e aha te tupu i muri a’e i tō tātou pohera’a. ’A feruri e nāfea ’outou ’ia ha’api’i i te parau nō te ti’afa’ahoura’a nō te patu i tō rātou fa’aro’o.

Te mau ’ōhipara’a e ti’a ’ia rave

• ’A ani i te mau tamari’i ’ia tāpiri i tō rātou mata ’e ’ia feruri ē, tē pārahi ra rātou i pīha’i iho i te mēnema ’o Iesu, ’a tai’o ai ’outou i te Ioane 20:1–17 ’e ’aore rā, ’a tātara poto noa i te ’ā’amu ’o tōna ti’afa’ahoura’a (a hi’o ato’a « Pene  54 : ’Ua ti’afa’ahou a’enei Iesu » Te mau ’ā’amu o te Faufa’a ’Āpī , 139–44, ’e ’aore rā, te video tano i ni’a LDS.org). E aha te huru ’ia ’ite i te Fa’aora tei ti’afa’ahou ?

• ’A ani i te tamari’i tāta’itahi ’ia tuatāpapa i te ’itera’a o te hō’ē ta’ata tei ’ite i te Fa’aora tei ti’afa’ahou, ’e ’ia fa’a’ite i te toe’a o te piha ha’api’ira’a i te mea tāna i ha’api’i mai.

• ’A māta’ita’i ’e te mau tamari’i hō’ē o teie mau video, ’e ’aore rā, hau atu : « ’Ua tu’uhia Iesu i roto i te hō’ē mēnema », « ’Ua ti’afa’ahou Iesu », « ’Ua fā mai Iesu i ni’a i te purumu nō Emausa », ’e « ’Ua fā mai te Fatu tei ti’afa’ahou i te mau ’āpōsetolo » (LDS.org).

Ioane 20:24–29

E roa’a iā’u te fa’aro’o i roto ia Iesu Mesia noa atu ē, ’aita vau e ’ite iāna.

E aha tā te mau tamari’i tā ’outou e ha’api’i ra, e rave nei nō te ha’apūai i tō rātou fa’aro’o ia Iesu Mesia ? Nāhea ’outoue tauturu ia rātou ?

Te mau ’ohipara’a e ti’a ’ia rave

• ’A ani i te tahi mau tamari’i ’ia tai’o tāta’ihō’ē i te mau ’īrava i roto i te Ioane 20:24–29. (’A hi’o ato’a i te video « E ao tō te feiā ’aore i ’ite iā’u ’a fa’aro’o mai ai », LDS.org.)

• ’A pāpa’i i te ta’o tāta’itahi i roto i te pereota ra « E ao tō te feiā ’aore i ’ite iā’u ’a fa’aro’o mai ai » i ni’a i te mau ’api parau tāpūpūhia. ’A ani i te mau tamari’i ’ia fa’anaho i te mau ta’o i tō rātou vāhi ti’a mau. ’A ani ia rātou ’ia fa’ati’a mai i te mau ’itera’a i reira rātou i ’ite ai i te here o te Fa’aora noa atu ē, ’aita rātou i ’ite iāna.

• ’A ani i te mau tamari’i ’ia pāpa’i i te hōho’a o te mau mea tā rātou e nehenehe e rave nō te ha’apūai i tō rātou fa’aro’o. ’A pāpa’i ai rātou i te hōho’a, ’a fa’a’ite i te ’ohipa tā ’outou i rave nō te ha’apūai i tō ’outou fa’aro’o ia Iesu Mesia.

Ioane 21:1–17

E nehenehe tā’u e fa’a’ite i tō’u here ia Iesu nā roto i te fa’a’amura’a i tāna mau māmoe.

E nehenehe te mau tamari’i e fa’auru rahi i te feiā ’ati a’e ia rātou. Nāfea e ti’a ai ia ’outou ’ia fa’aitoito ia rātou ’ia ha’apūai ia vetahi ’ē i roto i te ’evanelia ?

Te mau ’ohipara’a e ti’a ’ia rave

• Hou ’a tai’o ’āmui ai i te Ioane 21:1–17 ’a ani i te mau tamari’i, ’ua haere a’e ānei rātou e tāi’a. E aha te huru ? ’A ani i te hō’ē ta’ata, ’ua roa’a ānei iāna « e rave rahi i’a »(Ioane 21:6).

• ’A tai’o Ioane 21:15–17, terā rā, ’a mono i te i’oa ’o Simona i te i’oa o te mau tamari’i. ’O vai te mau māmoe a Iesu ? Nāfea e ti’a ai ia tātou ’ia fa’a’amu i tāna mau māmoe ?

• ’A hōro’a i te mau tamari’i i te tahi mā’a ’amu’amu. ’A ’amu’amu noa ai rātou, ’a ani ia rātou, nāfea te fa’a’itera’a i te ’evanelia i te hō’ē ta’ata ma te fa’aauhia i te fa’a’amura’a ia rātou.

Te tāpa’o nō te ’apora’a mai

Fa’aitoito i te ha’api’ira’a mai i te fare

’A ani i te mau tamari’i ’ia fa’a’ohipa i te ’api ’ohipara’a o teie hepetoma nō te ha’api’i i tō rātou ’utuāfare nō ni’a i te hepetoma hōpe’a o te orara’a o te Fa’aora.

Ha’amaita’i i tā tātou ha’api’ira’a

’Āpe’e i muri mai i te mau anira’a ia ’ohipa. Mai te mea ē, e ani ’outou i te mau tamari’i ’ia ’ohipa i ni’a i te mea tā rātou i ha’api’i mai, ’a hi’opo’a i tā ’outou anira’a i roto i te ha’api’ira’a i muri a’e. Nā te reira e fa’a’ite i te mau tamari’i ē, tē ha’apa’o nei ’outou i te huru nō te ha’amaita’ira’a te ’evanelia i tō rātou orara’a. ’A fa’a’ite ai rātou i tō rātou mau ’itera’a, e ha’apūaihia rātou, ’e e tauturu ho’i i te tahi e te tahi ’ia ora i te ’evanelia.

’api ’ohipara’a : E ti’afa’ahou te mau ta’ata ato’a