’Ei ha’amana’ora’a iā’u, nā Walter Rane

3–9 nō Tiunu

Ioane 13–17

« Ia vai herehia atu ā ’outou e au »

’A pure nō te ’ite i te mau hina’aro o te mau tamari’i tā ’outou e ha’api’i ra ’a tai’o ai ’outou Ioane 13–17. E nehenehe Mai, pe’e mai—Nō te ta’ata iho ’e te ’utuāfare ’e teie fa’anahora’a e tauturu ia ’outou ’ia māramarama i te parau ha’api’ira’a ’e ’ia hōro’a mai ia ’outou i te mau mana’o nō te ha’api’i i te mau tamari’i i roto i tā ’outou piha ha’api’ira’a.

Pāpa’i i tō ’outou mau mana’o

’Ani ’ia fa’a’ite

Nō te tauturu i te mau tamari’i ’ia fa’a’ite mai i te mea tā rātou i ha’api’i mai i te fare, ’a ’ōpere i te hō’ē māfatu papie ’e ’a ani i te tamari’i tāta’itahi ’ia fa’a’ite i te tahi mea tāna i rave nō te fa’a’ite i te here ’ia vetahi ’ē ’ia tae ana’e i tōna taime nō te tāpe’a i te māfatu.

Ha’api’i i te ha’api’ira’a tumu

Te mau tamari’i ’āpī a’e

Ioane 13:1–17

Tē hina’aro nei Iesu ’ia tāvini au ia vetahi ’ē.

’Ua riro te ’ā’amu ’o Iesu e horoi ra i te ’āvae ’o tāna mau ’āpōsetolo ’ei hi’ora’a nō te tāvinira’a ha’eha’a. Nāhea e ti’a ai ia ’outou ’ia fa’auru i te mau tamari’i ’ia pe’e i te hi’ora’a ’o Iesu ?

Te mau ’ohipara’a e ti’a ’ia rave

• ’A fa’a’ohipa i te hōho’a i roto i Te fa’anahora’a nō teie hepetoma i roto Mai, pe’e mai—Nō te ta’ata iho ’e te ’utuāfare nō te tauturu i te fa’ati’ara’a i te ’ā’amu i roto i te Ioane 13:1–17. ’A ani i te mau tamari’i ’ia fa’a’ite mai i te mau tātarara’a nō roto mai i te ’ā’amu, o te ’itehia i roto i te mau hōho’a.

• ’A fa’a’ite i te mau hōho’a ’o Iesu i te tāvinira’a ia vetahi ’ē (’a hi’o i te Gospel Art Book ’e ’aore rā, i roto i te mau ve’a a te ’Ēkālesia nō te mau mana’o). ’A vaiiho i te mau tamari’i, te tahi i muri i te tahi, ’ia tāpe’a i te mau hōho’a, ’a fa’ati’a ai ’outou i te mau ’ā’amu i fa’ahōho’ahia (’a vaiiho ’ia rātou ’ia fa’ati’a i te mau ’ā’amu mai te mea ē, e nehenehe tā rātou).

• ’A ani i te mau tamari’i e aha tō rātou huru ’ia tauturu ana’e te hō’ē ta’ata ia rātou. ’A vaiiho i te mau tamari’i ’ia pāpa’i i te hōho’a nō te huru e nehenehe ai ia rātou ’ia pe’e i te hi’ora’a ’o Iesu nā roto i te tāvinira’a i te tahi ta’ata.

Ioane13:34–35 ; 14:15

E fa’a’ite au i tō’u here ia Iesu Mesia nā roto i te ha’apa’ora’a i tāna mau fa’auera’a.

Nāfea ’outou e nehenehe ai e tauturu i te mau tamari’i ’ia hāro’aro’a ē, tō rātou ha’apa’o, e tāpa’o ïa ē, ’ua here rātou ia Iesu Mesia ?

Te mau ’ohipara’a e ti’a ’ia rave

• ’A hōro’a i te tamari’i tāta’itahi i te hō’ē māfatu papie nō te fa’anehenehe. ’A ani ia rātou ’ia fa’ateitei i tā rātou māfatu i te mau taime ato’a e hīmene rātou i te ta’o ra « here » i roto i te hīmene « Aimez chacun » ’e « ’A here ’outou mai tā’u i here », Chants pour les enfants, 39, 75.

• ’A tauturu i te mau tamari’i ’ia tāmau ’ā’au i te Ioane 14:15 nā roto i te fa’ateiteira’a i tā rātou māfatu papie ’a parau ai rātou ē, « ’ua hina’aro ’outou iā’u ra », ’e te hō’ē hōho’a nō te mau papa ’ōfa’i ’a parau ai rātou ē, « e ha’apa’o i tā’u parau ».

• ’A ani i te mau tamari’i tāta’ihō’ē ’ia ha’uti mai i te hō’ē ’ohipa maita’i tā rātou e nehenehe e rave nō te hō’ē ta’ata, nō te fa’a’ite i tō rātou here ia Iesu. ’A ani i te toe’a o te mau tamari’i ’ia ’imi e aha te mea tā rātou e rave ra.

• ’A fa’ahope i teie ’api ’ohipara’a nō teie hepetoma ’e te mau tamari’i.

Ioane 14:26–27 ; 15:26 ; 16:13–14

E tauturu te Vārua Maita’i iā’u ’ia ’ite ē, e mea fātata vau ia Iesu.

Noa atu ē, ’aita ā te mau tamari’i tā ’outou e ha’api’i ra i fāri’i i te hōro’a ’o te Vārua Maita’i, e nehenehe tā rātou e ha’api’i mai nāfea te mana o te Vārua Maita’i i te ’ohipa i roto i tō rātou orara’a.

Te mau ’ohipara’a e ti’a ’ia rave

• ’A fa’a’ite i te hōho’a Te tāmā’ara’a hōpe’a (Gospel Art Book, no. 54). ’A fa’ata’a i te mau tamari’i ē, i roto i te tāmā’ara’a hōpe’a, ’ua ha’api’i mai Iesu i tāna mau pipi nō ni’a i te Vārua Maita’i.

• ’A ani i te mau tamari’i ’ia tu’u i tō rātou rima i ni’a i tō rātou māfatu ’e i ni’a i tō rātou upo’o. ’A ’īriti i te mau pāpa’ira’a mo’a i Te Parau Ha’api’ira’a ’e te mau Parau Fafau 8:2, ’e ’a fa’ata’a ē, e nehenehe te Vārua Maita’i e paraparau mai ia tātou « i roto i tō tātou ferurira’a ’e i roto i tō tātou ’ā’au », ’e ’aore rā, nā roto i tō tātou mau mana’o.

• ’A tūpohe i te mau mori ’e ’a fa’a’ite i te hō’ē hōho’a. I muri iho, ’a tū’ama i te mori pata i ni’a i te hōho’a. ’A ani i te mau tamari’i nāfea te mori pata ’ia riro mai te Vārua Maita’i.

• ’A hīmene ’āmui ’e te mau tamari’i « Le Saint-Esprit », Buka Chants pour les enfants, 56, ma te « reo marū ». ’A ani ia rātou ’ia fa’aro’o i te mau mea tā te Vārua Maita’i e rave.

Ha’api’i i te ha’api’ira’a tumu

Te mau tamari’i pa’ari a’e

Ioane 13:34-35 ; 14:15 ; 15:10–14

E fa’a’ite au i tō’u here ia Iesu Mesia nā roto i te ha’apa’ora’a i tāna mau fa’auera’a.

’A tai’o ai ’outou i teie mau tuha’a parau i roto i tā ’outou iho tuatāpapara’a, ’a feruri i te mau tamari’i tā ’outou e ha’api’i ra. Nāfea rātou i te ha’amaita’ihia ’ia hāro’aro’a ana’e rātou ē, tō rātou ha’apa’o, e tāpa’o ïa nō tō rātou here i te Fa’aora ?

Te mau ’ohipara’a e ti’a ’ia rave

• ’A tauturu i te mau tamari’i ’ia tāmau ’ā’au Ioane 13:34-35. Hō’ē rāve’a nō te rave i te reira ’o te hīmenera’a ïa « ’A here ’outou mai tā’u i here » Chants pour les enfants, 75, ’e ’a tauturu i te mau tamari’i ’ia ha’api’i i te mau ’ohipa e ’āpiti atu i te reira.

• ’A ani i te mau tamari’i ’ia pāpa’i i ni’a i te tāpura ’ere’ere i te mau rāve’a tā Iesu i fa’a’ite mai ē, ’ua here ’oia ia tātou. E nehenehe tā ’outou e fa’a’ite i te mau hōho’a nō ni’a i te orara’a o te Fa’aora nō te tauturu ia rātou (nō te mau mana’o, ’a hi’o i te Gospel Art Book). Nāfea e ti’a ai ia tātou ’ia fa’a’ite i te here nō vetahi ’ē mai tāna i nā reira ? ’A ani i te tamari’i tāta’itahi ’ia ti’a i ni’a ’e ’ia fa’a’ite mai hō’ē rāve’a « ’uahere ’oia i te tahi e tahi » (Ioane 13:34).

• ’A ani i te hō’ē tamarii ’ia tai‘o Ioane 14:15 ’A vaiiho i te mau tamari’i tāta’ihō’ē ’ia pāpa’i i te mau hōho’a e fa’ahōho’a i te hō’ē ta’ata e ha’apa’o ra i te hō’ē fa’auera’a, e nā te toe’a ’o te mau tamari’i e ’imi e aha tāna i pāpa’i. Nō te mau hi’ora’a o te mau fa’auera’a, ’a hi’o Nō te pūai ’o te Feiā ’Āpī . Nāfea te ha’apa’ora’a i teie mau fa’auera’a e fa’a’ite rā i te Fa’aora ē, ’ua here tātou iāna ?

Ioane 14:26–27 ; 15:26 ; 16:13

E arata’i, e tāmāhanahana, ’e e fa’a’ite pāpū te Vārua Maita’i i te parau mau.

Teienei i te mea ē, e rave rahi te mau tamari’i tei fāri’i i te hōro’a o te Vārua Maita’i, nāfea e ti’a ai ia ’outou ’ia tauturu ia rātou ’ia hāro’aro’a maita’i a’e i te ti’ara’a ’o te Vārua Maita’i ?

Te mau ’ohipara’a e ti’a ’ia rave

• ’A hōro’a i te mau tamari’i i teie mau ’īrava i muri nei nō te tai’o pitipiti : Ioane 14:26 ; 15:26 ; ’e 16:13. ’A ani ia rātou ’ia ’imi i te mau ta’o o te ha’api’i ia rātou e aha tā te Vārua Maita’i e rave. ’A pāpa‘i i te mau ta’o i ni’a i te tāpura ’ere’ere:

• ’A fa’a’ite i te hō’ē ’itera’a ’a arata’i ai, ’a tāmāhanahana ai, ’a fa’aara ai, ’e ’aore rā, ’a fa’a’ite pāpū ai te Vārua Maita’i ia ’outou i te parau mau. ’A ani i te mau tamari’i ’ia fa’a’ite mai i te hō’ē ’itera’a tō rātou nō ni’a i te Vārua Maita’i. Nāfea rātou i ’ite ai i te fa’aurura’a a te Vārua Maita’i ?

• ’A ani i te tamari’i tāta’itahi ’ia pāpa’i i te hōho’a ’o tōna hōho’a mata i ni’a i te hō’ē pū’ohu parau. ’A tū’ama i te hō’ē mori pata, nō te fa’ahōho’a i te Vārua Maita’i, i roto i te pū’ohu parau. I muri iho, ’a tu’u i te tahi mau mea i roto i te pū’ohu o te pāruru i te māramarama, mai te hō’ē tā’amu ’arapo’a ’e ’aore rā, te mau peru ’ahu, nō te ha’api’i ē, e nehenehe tā tātou mau mā’itira’a hape e tā’ōti’a i te fa’aurura’a a te Vārua Maita’i i roto i tō rātou orara’a. ’A ani i te mau tamari’i ’ia tātara i te tā’amu ’arapo’a ’e ’aore rā, te mau peru ’ahu i rāpae i tā rātou pū’ohu nō te fa’ahōho’a i te tātarahapara’a.

Ioane 15:1–8 ; 17:3

Tē hina’aro nei te Metua i te Ao ra ’e ’o Iesu ’ia ’ite au ia Rāua.

E ha’amaita’i ’outou i te orara’a ’o te mau tamari’i ’e a muri noa atu nā roto i te tauturura’a ia rātou ’ia ’ite i te Metua i te Ao ra ’e ia Iesu Mesia.

Te mau ’ohipara’a e ti’a ’ia rave

• ’A fa’a’ite i te hō’ē rā’au tanu ’a tai’o tāta’ihō’ē ai te mau tamari’i i te mau ’īrava i roto i te Ioane 15:1–8. Nāfea Iesu e riro ai mai te hō’ē vine ? Nāfea tātou e riro ai e mau āma’a ? E aha tā tātou e rave nō te fa’aea piri noa i te Fa’aora ?

• 'A tai’o ha’apūai i te Ioane 17:3. 'A ani i te mau tamari’i e aha tā rātou e rave nei nō te 'ite i te Metua i te Ao ra 'e ia Iesu Mesia. 'A fa’a’ite e mea nāfea ’outou i te ’ite ia Rāua.

’Ua ha’api’i mai te Mesia,« ’a ’ati mai iā’u » (Ioane 15:4).

Fa’aitoito i te ha’api’ira’a mai i te fare

’A fa’aitoito i te mau tamari’i ’ia ani i te hō’ē melo o te ’utuāfare e aha tā rātou e nehenehe e rave nō te tāvini iāna. I roto i te ha’api’ira’a nō te hepetoma i muri nei, ’a hōro’a i te mau tamari’i i te taime nō tē fa’a’ite mai e aha tā rātou i rave.

Ha’amaita’i i tā tātou ha’api’ira’a

Fa’aau i te mau ’ohipara’a. Mai te mea ē, e ha’api’i ’outou i te tamari’i ’āpī a’e, e nehenehe e ’itehia ia ’outou te tahi atu mau mana’o tā ’outou e nehenehe e fa’aau i tā ’outou piha ha’api’ira’a i roto i teie tuha’a fa’anahora’a nō te mau tamari’i pa’ari a’e. Mai te reira ato’a nō te mau ’ohipara’a nā te mau tamari’i ’āpī a’e, e nehenehe te reira e fa’aauhia nō te ha’api’i i te mau tamari’i pa’ari a’e.