Te tae-piti-ra’a mai,nā Harry Anderson

27 nō Mē–2 nō Tiunu 

Iosepha Semita—Mataio  1 ; Mataio 25 ; Mareko 12–13 ; Luka 21

« E tae mai ho’i te Tamaiti a te Ta’ata »

A feruri e aha te ti’a i te mau tamari’i tā ’outou e ha’api’i ra ’ia ha’api’i mai nō ni’a Iosepha Semita—Mataio 1 ; Mataio 25 ; Mareko 12–13 ; ’e Luka 21. Tei ia ’outou noa te fa’atanora’a i te mau mana’o nō te mau tamari’i pa’ari a’e i roto i teie fa’anahora’a nō te mau tamari’i ’āpī a’e, e mai te reira ato’a i te tahi pae.

Pāpa’i i tō ’outou mau mana’o

’Ani ’ia fa’a’ite

’A fa’a’ite i te hō’ē hōho’a e tū’ati i ni’a i te hō’ē ’o te mau ’ā’amu i roto i te tai’ora’a nō teie hepetoma (mai te hōho’a ’o nā paratenia hō’ē ’ahuru i roto i te fa’anahora’a nō teie hepetoma i roto Mai, pe’e mai—Nō te ta’ata iho ’e te ’utuāfare). ’A ani i te mau tamari’i ’ia fa’a’ite mai e aha tā rātou i ’ite nō ni‘a i te ’ā’amu.

Ha’api’i i te ha’api’ira’a tumu

Te mau tamari’i ’āpī a’e

Iosepha Semita—Mataio 1:31

Hou ’a ho’i fa’ahou mai ai Iesu, e ha’api’ihia te ’evanelia ’ati a’e te ao nei.

’Ua parau Iesu ē, hou ’oia ’a ho’i fa’ahou mai ai, e ha’api’ihia te ’evanelia ’ati a’e te ao nei. E nehenehe te mau tamari’i e tauturu i te fa’atupura’a i teie parau tohu nā roto i te fa’a’itera’a i te ’evanelia.

Te mau ’ohipara’a e ti’a ’ia rave

• ’A fa’a’ite i te hō’ē hōho’a fenua, te hō’ē paraneta, ’e ’aore rā, hō’ē hōho’a o te fenua nei (’a hi’o Gospel Art Book, no. 3) ’e ’a tauturu i te mau tamari’i ’ia parau ē, « E porohia teie ’evanelia … nā te ao ato’a nei » (Iosepha Semita—Mataio 1:31). Nō te aha te Atua e hina’aro ai i tāna mau tamari’i pā’āto’a ’ia fa’aro’o i te ’evanelia ?

• ’A ani i te mau tamari’i ’ia haere i ni’a noa i te vāhi hō’ē ’a hīmene ’āmui ai ’outou « Je voudrais déjà partir en mission » ’e « Appelés à servir », Chants pour les enfants, 90, 94. ’A ani i te mau misiōnare rave tāmau ’e ’aore rā, tei ho’i noa mai nei nā te misiōni, ’ia fa’a’ite mai i tō rātou ’itera’a nō ni’a i te fa’a’itera’a i te ’evanelia, ’e ’a tauturu i te mau tamari’i ’ia feruri i te mau rāve’a e ti’a ai ia rātou ’ia fa’a’ite i te ’evanelia.

Hōho’a i hōro’ahia mai e te NASA Johnson Space Center

Mataio 25:14–30

E nehenehe tā’u e fa’a’ohipa i te mau hōro’a tā te Atua i hōro’a mai iā’u.

’Ua ’ite te mau tamari’i ’āpī i tō rātou mau hōro’a ’e te mau ’aravihi. ’A tauturu ia rātou ’ia hāro’aro’a ē, nō ’ō mai teie mau hōro’a ’e mau ’aravihi i te Metua i te Ao rā.

Te mau ’ohipara’a e ti’a ’ia rave

• ’A hōpoi mai e rave rahi moni pa’ari nō te fa’a’ohipa i te taime ’a fa’ati’a ai ’outou i te parabole nō te mau tāreni, e ’itehia i roto i te Mataio 25:14–30. E nehenehe ’outou e ani e toru tamari’i ’ia fa’ahōho’a i nā tāvini e toru. ’A fa’ata’a ē, i te ’anotau ’o Iesu, tāreni o te moni ïa, i teie rā mahana, tāreni e nehenehe e fa’aauhia i tō tātou mau hōro’a ’e mau ’aravihi.

• ’A ani i te mau tamari’i ’ia fa’a’ite mai nāfea tō rātou mau metua, mau taea’e tuahine, te mau ’orometua, ’e ’aore rā, te mau hoa, i te tauturura’a ia rātou. E aha te mau ’aravihi ’o teie mau ta’ata tei tauturu ia rātou ’ia tāvini ia vetahi ’ē ?

• ’A pāpa’i i te hō’ē fa’ata’ara’a iti i te mau tamari’i nō te parau ia rātou tāta’itahi i te mau hōro’a ’e ’aore rā, te mau ’aravihi tā ’outou i ’ite i’ō rātou. ’A pū’ohu i te fa’ata’ara’a tāta’itahi mai te tāo’a hōro’a, ’e ’a ani i te mau tamari’i ’ia ’īriti i tā rātou « tāo’a horoa ». ’A fa’aitoito ia rātou ’ia ha’amaita’i i tō rātou mau hōro’a, ’e ’a fa’a’ohipa i te reira nō te tāvini ia vetahi ’ē.

Mataio 25:31–46

Tē hina’aro nei Iesu ’ia tāvini au ia vetahi ’ē.

E tāvini tātou i te Metua i te Ao ra ’e ia Iesu Mesia nā roto i te tāvinira’a i te ta’ata ’ati a’e ia tātou. E nehenehe ato’a te mau tamari’i ’āpī e tāvini ia vetahi ’ē.

Te mau ’ohipara’a e ti’a ’ia rave

• ’A ha’apoto i te parabole i roto i te Mataio 25:34–46. ’A tauturu i te mau tamari’i ’ia māramarama ē, ’ia tāvini ana‘e tātou ia vetahi ’ē, tē tāvini ra ïa tātou ia Iesu.

• ’A tāpe’a i te hō’ē hōho’a o te hō’ē tamari’i i roto i tā ’outou piha ha’api’ira’a, ’e te hō’ē hōho’a ’o Iesu i hunahia i muri mai. E aha tā tātou e nehenehe e rave nō te tāvini i teie tamari’i ? ’A tātara i te hōho’a ’o te tamari’i ’e ’a fa’ata’a ē, ’ia tāvini ana’e tātou te tahi e te tahi, tē tāvini ra ïa tātou ia Iesu.

• ’A ani i te mau tamari’i ’ia pāpa’i i tō rātou iho hōho’a tē tāvini ra ia vetahi ’ē mai tā te Fa’aora i fa’a’ite mai i roto i te Mataio 25:35–36. ’A ani i te tahi atu mau tamari’i ’ia ’imi e aha tā rātou e pāpa’i ra.

• ’A ani i te mau tamari’i ’ia fa’a’ite mai i tō rātou mau ’itera’a, ’a fa’a’ite ai te hō’ē ta’ata i te tāvinira’a mai tā te Mesia te huru ia rātou ’e ’aore rā, i tō rātou ’utuāfare .

Ha’api’i i te ha’api’ira’a tumu

Te mau tamari’i pa’ari a’e

Iosepha Semita—Mataio 1:31

Hou Iesu ’a ho’i fa’ahou mai ai, e ha’api’ihia te ’evanelia ’ati a’e te ao nei.

E nehenehe te mau tamari’i tā ’outou e ha’api’i ra e tauturu i te porora’a i te ’evanelia ’ati a’e te ao nei hou te tae-piti-ra’a mai ’o te Fa’aora.

Te mau ’ohipara’a e ti’a ’ia rave

• ’A ani i te mau tamari’i ’ia fa’a’ite i te mau ha’amaita’ira’a tā rātou i fāri’i ’e ’aore rā, e fāri’i nō te mea e melo rātou nō te ’Ēkālesia a te Mesia. ’A tai’o ’āmui i te Iosepha Semita— Mataio 1:31, ’e ’a ani i te mau tamari’i nāfea te ’evanelia i te ha’amaita’i i te mau tamari’i a te Atua ’ati a’e te ao nei.

• ’A fa’a’ite i te mau tamari’i i te hō’ē hōho’a fenua o te ao nei ’e ’aore rā, o tō ’outou fenua, ’e ’a tauturu ia rātou ’ia ’imi i te tahi mau vāhi i reira te hō’ē melo o te ’utuāfare ’e ’aore rā, hō’ē hoa, i te porora’a i te ’evanelia i roto i te misiōni.

• ’A ani i te tahi mau tamari’i ’ia haere mai ma te ineine nō te fa’a’ite mai, e mea nāfea tō rātou mau melo o te ’utuāfare ’e ’aore rā, tō rātou mau tupuna fa’a’itera’ahia i te ’evanelia. Mai te mea e nehenehe, ’a ani i te tahi ta’ata i roto i te pāroita tei tāvini i te hō’ē misiōni rave tāmau ’ia fa’a’ite mai i te hō’ē ’itera’a nō ni’a i te fa’a’itera’a i te ’evanelia.

• ’A ani i te tamari’i tāta’itahi ’ia pāpa’i i te i’oa o te hō’ē ta’ata tāna e nehenehe e paraparau nō ni’a i te ’evanelia ’e ’aore rā, e ani manihini ’ia haere mai i te purera’a. ’A ani ato’a i te tamari’i ’ia tāpura i te mau mea e nehenehe tā rātou e rave ’ia riro ’ei misiōnare i teie nei.

Mataio 25:1–13

Tei iā’u te hōpoi’a nō tō’u iho fa’afāriura’a i te ’evanelia.

Tē ha’api’i mai nei te parabole ’o nā paratenia hō’ē ’ahuru ē, e’ita tā tātou e nehenehe e tīpe’e i tō tātou fa’afāriura’a i te ’evanelia nō te tahi. Nāfea e ti’a ai ia ’outou ’ia tauturu i te mau tamari’i ’ia rave i te hōpoi’a nō tō rātou iho fa’afāriura’a ?

Te mau ’ohipara’a e ti’a ’ia rave

• ’A ani i te hō’ē tamari’i ’e i te hō’ē ’o tōna nā metua ’ia haere mai ma te ineine nō tē fa’a’ite mai ē, e mea nāfea tō rātou ha’api’ira’a mai nō ni’a i te parabole ’o nā paratenia hō’ē ’ahuru i te fare i teie hepetoma.

• ’A pāpa’i i te hōho’a o te hō’ē lamepa hinu i ni’a i te tāpura ’ere’ere, ’e ’a tāpa’o i te reira ’itera’a pāpū. ’A hōro’a i te tamari’i tāta’itahi i te hō’ē ’api parau tāpūpūhia i te hōho’a o te hō’ē tōpata hinu, ’e ’a ani i te tamari’i tāta’itahi ’ia pāpa’i i ni’a iho i te hō’ē mea tāna e rave ia hau atu tōna fa’afāriura’a i te ’evanelia. ’A tā’amu i tā rātou mau tōpata i ni’a i te tāpura ’ere’ere ’ati a’e te lamepa.

• ’A ani i te mau tamari’i ’ia tauturu ia ’outou ’ia hāmani i te hō’ē tāpura nō te mau ’ohipa e rave nō te fa’aineine nō te hō’ē rātere ta’a ’ē. E aha te ’aifāitora’a ’e ’aore rā, te ta’a-’ē-ra’a o te mau rāve’a e nehenehe ia tātou ’ia fa’aineine i te pae vārua nō te tae-piti-ra’a mai ’o te Fa’aora ?

• I ni’a e pae ’api parau tāpūpūhia, ’a pāpa’i i te mau mea e ’ore e ti’a ’ia tīpe’ehia. I ni’a e pae atu ’api parau tāpūpūhia, ’a pāpa’i i te mau mea e nehenehe e tīpe’ehia. ’A ’āno’ino’i i te mau ’api parau tāpūpūhia, ’e ’a ani i te mau tamari’i ’ia fa’ata’a i te reira i roto e piti pupu. ’A tai’o ’āmui i te Mataio 25:1–13. Nō te aha e mea faufa’a ’eiaha e turu’i i ni’a ia vetahi ’ē nō tō tātou fa’afāriura’a i te ’evanelia ?

Mataio 25:14–46

I te taime nō te ha’avāra’a hōpe’a, e hōro’a tātou i te Fatu i te hō’ē ’ā’amu ’o tō tātou orara’a.

I muri a’e i te ti’afa’ahoura’a, e ha’avā te Atua ia tātou ’ia au i tō tātou ha’apa’o i tāna mau fa’auera’a, ’e tō tātou fāri’ira’a i te tusia tāra’ehara ’o te Fa’aora. Tē ha’api’i mai nei te parabole o te mau tāreni ’e te parabole o te mamoe ’e te mau pua’aniho ia tātou nō ni’a i teie ha’avāra’a hōpe’a.

Te mau ’ohipara’a e ti’a ’ia rave

• ’A fa’aue i te ’āfara’a o te piha ha’api’ira’a ’ia tai’o Mataio 25:14–30 ’e i te tahi ’āfara’a ’ia tai’o i te Mataio 25:31–46. ’A ani i te pupu ’ia ha’uti mai i teie nā parabole i mua i te piha ha’api’ira’a.

• ’A ani i te mau tamari’i ’ia tai’o āpipiti i te Mataio 25:35–36 ’e ’ia hāmani i te hō’ē tāpura o te mau mea tā rātou e nehenehe e rave nō te fa’a’ite i tō rātou here ia Iesu Mesia.

Fa’aitoito i te ha’api’ira’a mai i te fare

’A ani i te mau tamari’i ’ia fa’a’ite i tō rātou ’utuāfare i te mau rāve’a e ti’a ai ia rātou ’ia riro ’ei mau misiōnare maita’i a’e ’e ’ia paraparau i tō rātou ’utuāfare nō ni’a i te mau ta’ata e nehenehe rātou e paraparau i te ’evanelia.

Ha’amaita’i i tā tātou ha’api’ira’a

’A fa’aro’o ’e ’aore rā, ’a fa’aha’uti i te hō’ē ’ā’amu. Nō te mea ho’i ē, e mea au nā te mau tamari’i te mau ’ā’amu, ’a ’imi i te mau rāve’a nō te fa’aō ia rātou i roto i te mau ’ā’amu o te pāpa’ira’a mo’a tā ’outou e fa’a’ite atu. E nehenehe tā rātou e tāpe’a i te mau hōho’a ’e ’aore rā te mau tauiha’a, e pāpa’i i te hōho’a o te ’ā’amu, e ha’uti i te ’ā’amu, ’e ’aore rā, e tauturu i te fa’ati’ara’a i te ’ā’amu. ’A fa’ahiti fa’ahou i te mau ’ā’amu nō te tauturu ia rātou ’ia ’ite i te mau tuha’a faufa’a ’e i te mau ha’api’ira’a o te ’evanelia.