e ta’ata i ni’a i te tumu rā’au ’a ha’afātata mai ai Iesu

Zakaio i ni’a i te tumu rā’au, nā James Tissot

20–26 nō Mē

Mataio 21–23 ; Mareko  11 ; Luka 19–20 ; Ioane  12

« A hi’o nā, tē haere mai ra tō Ari’i »

’A tai’o ai ’outou i te Mataio 21–23 ; Mareko 11 ; Luka 19–20 ; ’e Ioane  12, ’a ha’apa’o maita’i i te mau mana’o tā ’outou e fāri’i mai ’ō mai i te Vārua Maita’i ra. ’A hi’o i te « Te pāhonora’a i te mau hina’aro ’o te mau tamari’i ’āpī a’e » i te ’ōmuara’a o teie buka nō te mau mea e ha’amana’o ’a ha’api’i ai ’outou i teie mau parau tumu.

Pāpa’i i tō ’outou mau mana’o

tāpa’o nō te fa’a’itera’a

’Ani ’ia fa’a’ite

’A fa’a’ite i te hōho’a nō roto mai i te fa’anahora’a o teie hepetoma i roto Mai, pe’e mai—Nō te ta’ata iho ’e te ’utuāfare ’e ’a ani i te mau tamari’i ’ia fa’a’ite mai e aha tā rātou i ’ite nō ni’a i te mea tei tupu i roto i te hōho’a.

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i ’āpī a’e

Luka 5:8–10

’Ua ’ite te Metua i te Ao ra e ’o Iesu iā’u nā tō’u i’oa

’A tai’o ai ’outou i te ’āparaura’a i rotopū i te Fa’aora ’e ’o Zakaio, e aha te poro’i tā ’outou i ’ite mai ’o te ha’amaita’i i te mau tamari’i tā ’outou e ha’api’i ra ?

Te mau ’ohipara’a e ti’a ’ia rave

• ’A fa’a’ite i te hōho’a ’o Zakaio i ni’a i te tumu tāmino (LDS.org). ’A tauturu i te mau tamari’i ’ia’ ite ia Zakaio ’e ’ia parau i tōna i’oa. ’A fa’atupu i te tahi mau ’ohipa tā te mau tamari’i e rave, ’a fa’ati’a ai ’outou i te ’ā’amu ’o Zakaio e ’o Iesu—’ei hi’ora’a, te ti’ara’a i ni’a i tō rātou manimani ’āvae nō te hi’o nā ni’a a’e i te naho’a ta’ata, ’e ’aore rā, ’a rave mai te huru ē, tē ta’uma ra i ni’a i te tumu rā’au. ’A fa’ata’a ē, ’ua ’ite atu te Fa’aora ia Zakaio ’e ’ua pi’i atura iāna i tōna i’oa. ’A fa’a’ite pāpū ē, ’ua ’ite ato’a te Fa’aora i te mau tamari’i tāta’itahi ’e i tō rātou i’oa.

• ’A hōpoi mai i roto i te piha ha’api’ira’a i te hō’ē ’āua hōho’a ’aita e hōho’a tō roto, ’e ’aore rā, ’a hāmani hō’ē i te ’api parau. ’A ani i te tamari’i tāta’itahi ’ia tāpe’a tāta’ihō’ē i te ’āua hōho’a i mua i tōna mata ’a parau ai i te toe’a o te piha ha’api’ira’a ē, « ’ua ’ite te Metua i te Ao ra ’e ’o Iesu ia [te i’oa o te tamari’i] ».

• ’A ani i te mau tamari’i tāta’ihō’ē ’ia fa’ahua ta’uma i ni’a i te hō’ē tumu rā’au, mai ia Zakaio te huru. ’A fa’aue i te toe’a o te piha ha’api’ira’a ’ia parau ē, « ua ’ite te Metua i te Ao ra ’e ’o Iesu ia [te i’oa ’o te tamari’i] ».

• ’A hīmene ’āmui « E tamari’i au nā te Atua », Chants pour les enfants, 2–3, ’e ’a tauturu i te mau tamari’i ’ia fa’aro’o i te mau mea o te tauturu ia rātou ’ia ’ite ē, ’ua here te Metua i te Ao ra ia rātou.

Mataio 21:12–14

E vāhi mo’a te hiero.

E nehenehe tō ’outou ’itera’a pāpū nō ni’a i te hiero e tauturu i te mau tamari’i tā ’outou e ha’api’i ra ’ia ’ite ē, e vāhi mo’a te hiero.

Te mau ’ohipara’a e ti’a ’ia rave

• ’A fa’a’ite i te hōho’a Te tāmāra’a Iesu i te hiero (Gospel Art Book , no. 51), ’e ’a fa’ati’a i te ’ā’amu tei pāpa’ihia i roto i te Mataio 21:12–14. ’A tauturu i te mau tamari’i ’ia ’imi i te mau hōho’a o te moni ’e o te mau animala i roto i te hōho’a. I muri iho, ’a ’āparau nō te aha te Fa’aora i hina’aro ai ’ia haere te feiā aufau moni ’e te feiā ho’o animala i rāpae i te hiero.

• ’A fa’a’ite i te mau hōho’a o te hiero (’ei hi’ora’a, ’a hi’o Gospel Art Book, 117–21), ’e ’a ani i te mau tamari’i ’ia fa’a’ite mai e aha tō rātou mana’o ’ia hi’o ana’e rātou i te hō’ē hiero. ’A parau i te mau tamari’i ē, taua mau mana’o ra, o te Vārua Maita’i ïa te parau mai ra ia tātou ē, e vāhi ta’a ’ē te hiero. ’A ani i te mau tamari’i ’ia rave mai te huru ra ē tei roto rātou i te hiero. ’Ei hi’ora’a, e nehenehe tā rātou e paraparau marū noa ’e e pārahi ma te tura. ’A hīmene ’āmui « Oh, j’aime voir le temple », Chants pour les enfants, 99, ’e ’a ani i te mau tamari’i ’ia ha’amau i te hō’ē ’ōpuara’a ’ia haere i roto i te hiero i te hō’ē mahana.

Hiero nō Fort Collins Colorado

Te hiero o te fare ïa ’o te Fatu.

Mataio 21:28–32

E nehenehe au e riro ’ei ta’ata ha’apa’o.

Tē hina’aro nei te Metua i te Ao ra ’ia ha’apa’o tātou. ’Ua riro te parabole nō nā tamaiti e piti ’ei rāve’a nō te ha’api’i i te faufa’a o te ha’apa’ora’a.

Te mau ’ohipara’a e ti’a ’ia rave

• ’A pāpa’i i te hō’ē hōho’a ’o nā tamaiti e piti i ni’a i te tāpura ’ere’ere, ’e ’a fa’a’ohipa i te mau hōho’a pāpa’i ’a fa’ati’a ai ’outou i te parabole i roto i te Mataio 21:28–32. ’O vai te tamaiti tei rave i te ’ohipa maita’i i te hōpe’a ? ’A ani i te mau tamari’i ’ia fa’ahiti mai i te mau mea tā rātou e nehenehe e rave nō te riro ei tamari’i ha’apa’o i te fare. ’A fa’aue ia rātou ’ia pāpa’i hōho’a ’o rātou iho e rave ra i te hō’ē ’o te reira mau ’ohipa.

• ’A ani i te mau tamari’i ’ia fa’a’ite mai i te mau ’itera’a tā rātou i fāri’i nō te rirora’a ’ei tamari’i fa’aro’o i tō rātou mau metua ’e ’aore rā, i te tahi atu tīa’i, ’e ’aore rā,ti’a fa’atere. E mea nāhea rātou i te ha’amaita’ira’ahia nō te rirora’a ei tamari’i ha’apa’o ? Nāhea e nehenehe ai ia rātou ’ia ha’apa’o hau atu ā a muri a’e ?

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i pa’ari a’e

Luka 19:1–10

’Ia ’imi ana’e au i te Fa’aora, e ’itehia ’oia iā’u.

E nehenehe tā ’outou e fa’a’ohipa i te ’ā’amu ’o Zakaio nō te tauturu i te mau tamari’i ’ia feruri i te mau mea te ti’a ia rātou ’ia rave nō te ha’afātata i te Fa’aora.

Te mau ohipara’a e ti’a ’ia rave

• ’A tai’o i te Luka 19:1–10, ma te fa’afa’aea i ni’a i te tahi tau ’īrava nō te ’āparau e aha tā tātou i ha’api’i mai nō ni’a ia Zakaio. E aha tā Zakaio i rave ’ia ti’a iāna ’ia ’ite ia Iesu ? Nāfea ’oia i te pāhonora’a atu ’a ani mai ai Iesu iāna ’ia pou mai i raro i te tumu rā’au ? ’A ani te tamari’i tāta’itahi ’ia fa’a’ite mai hō’ē tumu e hina’aro ai rātou e hi’o ia Iesu. Mai te mea ē, e haere mai te Fa’aora i tō ’outou ’oire, e aha tā ’outou e rave nō te fa’aineine ia ’outou ?

• ’A ani i te mau tamari’i ’ia feruri i te mau ta’ata tā rātou i ’ite tē ’imi ra i te Fa’aora, mai ia Zakaio. ’A ani i te mau tamari’i e aha tā rātou e rave nō te tauturu i te hō’ē ta’ata ’ē atu ’ia ha’api’i mai nō ni’a i te Fa’aora.

• ’A ani i te mau tamari’i ’ia fa’a’ite mai i te mau ’itera’a i te taime ’a ’ite ai rātou ē, ’ua ite te Metua i te Ao ra ’e ’o Iesu Mesia ia rātou ’e ’ua here ia rātou.

Mataio 21:12–14

E vāhi mo’a te hiero tā’u e ti’a ’ia fa’atura.

Nāfea te ’ā’amu o te Fa’aora i te tāmāra’a i te hiero e nehenehe ai e tauturu ia ’outou ’ia ha’api’i i te mau tamari’i nō ni’a i te huru mo’a o te mau hiero ?

Te mau ’ohipara’a e ti’a ’ia rave

• ’A ani i te mau tamari’i ’ia tai’o i te Mataio 21:12–14. ’A fa’a’ite i te hōho’a Te tāmāra’a Iesu i te hiero (Gospel Art Book , no. 51), ’e ’a ani ia rātou e aha te ’īrava e fa’a’ite ra te hōho’a ’A ani ia rātou ’ia pāpa’i i te mau hōho’a nō ni’a i te huru o te hiero nā mua a’e ’e i muri a’e i tō Iesu tāmāra’a i te hiero.

• ’A ani i te mau tamari’i ’ia fa’a’ite mai i tō rātou mana’o ’a haere ai rātou i roto i te hiero, ’a māta’ita’i ai i te ’āua o te hiero, ’e ’aore rā ’a hi’o ai i te mau hōho’a o te mau hiero. E aha te mea i tauturu ia rātou ’ia ’ite ē, e vāhi mo’a te hiero ?

• ’A ani hō’ē feiā ’āpī ’e ’aore rā hau atu, ia haere mai i roto i te piha ha’api’ira’a ’e ’ia paraparau mai e mea nāfea rātou i te fa’aineinera’a ia rātou nō te tomo i roto i te hiero. Mai te mea ē, ’ua haere nā rātou i te hiero, ’a ani ia rātou ’ia fa’a’ite mai e aha tō rātou mana’o ’a tae ai rātou i reira.

• ’A tāpūpū i te hōho’a o te hō’ē hiero ’ei puzzle, ’e ’a hōro’a hō’ē tuha’a i te tamari’i tāta’itahi. ’A ani i te tamari’i ’ia pāpa’i i muri i tā rātou tuha’a, hō’ē ’ohipa tā rātou e nehenehe e rave nō te fa’aineine nō te tomo i roto i te hiero. ’A fa’a’ite ai te tamari’i tāta’itahi i te hō’ē mana’o, ’a tu’u i tāna tuha’a i ni’a i te puzzle.

Mataio 23:25–28

Tītauhia iā’u ’ia riro ’ei ta’ata parau ti’a i roto i tā’u mau ’ohipa ’e tō’u mau hina’aro.

’Ua ha’api’i Iesu i te mau pāpa’i ture ’e te mau Pharisea i te faufa’a o te orara’a mau i te ’evanelia—’eiaha e fa’ahua parau ti’a noa. E aha te mea e tauturu i te mau tamari’i ’ia māramarama i teie parau mau ?

Te mau ’ohipara’a e ti’a ’ia rave

• ’A tai’o ai ’outou i te Mataio 23:25–28 ’e te mau tamari’i, ’a fa’a’ite i teie tātarara’a o te ha’avarevare nō roto mai i te Fa’atoro Bibiilia : « Te ta’ata e fa’ahua ta’ata fa’aro’o, ’aita nei ho’i ». Nō te aha e mea ’ino ’ia riro ’ei ta’ata ha’avarevare ?

• ’A fa’a’ite i te mau tamari’i i te hō’ē hāpaina e mea mā te rāpaera’a, ’e e mea repo te rotora’a, nō te tauturu i te fa’ahōho’ara’a i te fa’ataipera’a i roto i te Mataio 23:25. Nāfea tātou i te ha’apāpū ē, e mea mā tātou ’e te vi’ivi’i ’ore i roto ?

tāpa’o nō te ’apora’a mai

Fa’aitoito i te ha’api’ira’a mai i te fare

’A tauturu i te mau tamari’i ’ia rave i te hō’ē parau tumu ’e ’aore rā i te hō’ē fa’a’ohipara’a i roto i te piha ha’api’ira’a nō te fa’a’ite i tō rātou ’utuāfare i te fare.

Ha’amaita’i i tā tātou ha’api’ira’a

Pāturu i te mau metua o te mau tamari’i. ’O te mau metua te mau ’orometua ha’api’i ’evanelia faufa’a rahi roa a’e nō tā rātou mau tamari’i—tei ia rātou ra te hōpoi’a tumu ’e te mana rahi roa a’e nō te fa’auru i tā rātou mau tamari’i (hi’o Deutoronomi 6:6-7 ’A ha’api’i ai ’outou i te mau tamari’i i te fare purera’a, ’a imi nā roto i te pure i te mau rāve’a nō te turu i tō rātou nau metua i roto i tō rātou ti’ara’a faufa’a rahi ».(Ha’api’ira’a mai tā te Fa’aora, 25).

’api ’ohipara’a : e mea mo’a te hiero