« Me 6-12. Luka 12–17 ; Ioane 11 : « E ’oa’oa ato’a tātou ; ’ua ’itea ho’i iā’u tā’u māmoe i mo’e ra » Mai, pe’e mai—Nō te Paraimere : Faufa’a ’Āpī 2019 (2019)
« Me 6-12. Luka 12–17 ; Ioane 11 », Mai, pe’e mai—Nō te Paraimere : 2019
Te tamaiti tei haere i te fenua roa, nā Liz Lemon Swindle
6–12 nō mē.
Luka 12–17 ; Ioane 11
« E ’oa’oa ato’a tātou ; ua ’itea ho’i iā’u tā’u māmoe i mo’e ra »
Tai’o, nā roto i te pure Luka 12–17 e Ioane 11, ma te ’imi ē, nāfea e ti’a ai ia ’outou ia tauturu i te mau tamari’i tā ’outou e ha’api’i, ’ia hāro’aro’a i te mau parau mau i roto i teie mau pene, ’e ’ia fāri’i i te here ’o te Metua i te Ao ra.
Pāpa’i i tō ’outou mau mana’o
’Ani ’ia fa’a’ite
’A fa’aha’amana’o i te mau tamari’i i te tahi mau parabole e te tahi mau ’ā’amu e ’itehia i roto i te Luka 12–17 ’e Ioane 11, ’e ’a ani ia rātou ’ia mā’iti hō’ē, ’e ’ia pāpa’i i te hō’ē hōho’a nō te reira.
Ha’api’i i te ha’api’ira’a tumu
Te mau tamari’i ’āpī a’e
Tē hinaaro nei te Metua i te Ao ra ’ia ho’i pauroa tāna mau tamar’ii iāna ra.
Tē vai ra paha te tahi mau tamari’i i roto i tā ’outou piha ’aita e haere tāmau mai nei i te Paraimere. Nāfea e ti’a ai ia ’outou ’ia fa’auru i te mau tamari’i tā ’outou e ha’api’i ra, ’ia haere e fārerei ia rātou nā roto i te here ?
Te mau ’ohipara’a e ti’a ’ia rave
-
’A hōro’a i te hō’ē toata i te hō’ē tamari’i, i te tahi atu tamari’i hō’ē hōho’a o te hō’ē māmoe, e i te tahi atu tamari’i, hō’ē hōho’a o te tamaiti puhura(LDS.org). ’A fa’ati’a i nā parabole e toru e ’itehia i roto i te Luka 15 ’e ’a ani i te mau tamari’i ’ia fa’a’ite i tā rātou toata ’e ’aore rā, te hōho’a, ia fa’ahiti ana’e ’outou. E nehenehe tā ’outou e ani i te mau tamari’i ’ia fa’ati’a fa’ahou i te mau parabole i te tahi ’e te tahi ia au i tā rātou iho mau parau.
-
’A ani i te mau tamari’i ’ia fa’a’ite mai i te hō’ē taime ’a mo’e ai hō’ē mea tā rātou. ’A fa’ata’a ē, e nehenehe te ta’ata e mo’e i te pae vārua ’ia ’ore ana’e rātou e ’ite i te here o te Atua, ’e ’aore rā, ’ia fāriu ’ē ana’e rātou iāna. ’A fa’a’ite pāpū ē, tē ha’api’i nei teie nau parabole ē, tē hina’aro nei te Atua ’ia tauturu tātou i te ta’ata tei mo’e ’ia ho’i mai iāna ra.
-
’A ani i te mau tamari’i ’ia feruri i te tahi atu mau tamari’i ’o te ’ore e haere mai nei i te Paraimere. ’A tauturu ia rātou ’ia pāpa’i i te mau parau nō te ani i teie mau tamari’i ’ia haere mai i te Paraimere ’e ’aore rā i te hō’ē ’ohipara’a nā te Paraimere. Nāfea atu ā e ti’a ai ia tātou ’ia tauturu i teie mau tamari’i ’ia ’ite i te here ’o te Metua i te Ao ra nō rātou ?
E nehenehe tā’u e fa’a’ite i tō’u here i te Metua i te Ao ra nā roto i te ha’amāuruurura’a i tō’u mau ha’amaita’ira’a.
Nāfea e ti’a ai i te ’ā’amu ’o nā lepera hō’ē ’ahuru i te fa’aitoito i te mau tamari’i ’ia māuruuru ?
Te mau ’ohipara’a e ti’a ’ia rave
-
’A fa’ati’a i te ’ā’amu ’o nā lepera hō’ē ’ahuru tei fa’aorahia e Iesu. ’A fa’a’ite i te ’ā’amu e ’itehia i roto i te fa’anahora’a o teie hepetoma i roto Mai, pe’e mai—Nō te Ta’ata iho ’e te ’Utuāfare ’e ’a ani i te mau tamari’i ’ia tai’o e tae atu i te ’ahuru i ni’a i tō rātou mau manimani rima. I muri iho, ’a ani ia rātou ’ia tu’u e iva manimani i raro nō te fa’a’ite i te lepera tei ha’amāuruuru ia Iesu. I nāfea tō te mau tamari’i fa’a’itera’a i tō rātou māuruuru i te hō’ē hoa ’e ’aore rā, i te hō’ē tei herehia ?
-
’A ani i te tamari’i tāta’itahi ’ia ha’uti mai i te hō’ē mea tā rātou i māuruuru ’e ’a ani i te toe’a o te mau tamari’i ’ia ’imi ē, e aha te reira. ’A ani i te mau tamari’i ’ia fa’a’ite mai i te mau rāve’a e ti’a ai ia tātou ’ia fa’a’ite i te Metua i te Ao ra ē, te māuruuru nei tātou nō tō tātou mau ha’amaita’ira’a.
Tē ti’aturi nei tātou ē, e Tamaiti Iesu nā te Atua.
Nā ō atura Martha, te tuahine ’o Lazaro, ia Iesu : « ua fa’aro’o vau ē, ’o ’oe te Mesia te Tamaiti a te Atua »(Ioane 11:27). E nehenehe te ’ā’amu ’o Maria, Mareta, e ’o Lazaro e ha’apūai i te ’itera’a pāpū o te mau tamari’i nō ni’a ia Iesu Mesia.
Te mau ’ohipara’a e ti’a ’ia rave
-
’A fa’ati’a poto noa i te ’ā’amu ’o Iesu i te fa’ati’ara’a ia Lazaro mai te pohe mai (a hi’o ato’a « Pene 43 : ’Ua fa’aho’i fa’ahou mai Iesu ia Lazaro i te ora », Te mau ’ā’amu o te Faufa’a ’Āpī, 107–9, ’e ’aore rā, te video nō ni’a i te reiraLDS.org) ’e ’a fa’a’ite i te hō’ē āma’a pohe e hō’ē rā’au tanu ora. ’A fa’a’ite i tō ’outou ’itera’a pāpū ē, nō te mana ’o Iesu Mesia, e ti’a fa’ahou mai te feiā tei pohe, ’e e ora e a muri noa atu.
-
’A tauturu i te mau tamari’i ’ia tāmau ’ā’au i te pereota tā Iesu i parau atu ia Mareta: « ’o vau te ti’a-fa’ahou-ra’a ’e te ora » (Ioane 11:25). ’A fa’ata’a ē, nō te ti’afa’ahoura’a o te Fa’aora, e ’ite fa’ahou ai tātou i tei herehia e tātou tei pohe ra.
Ha’api’i i te ha’api’ira’a tumu
Te mau tamari’i pa’ari a’e
E nehenehe tā’u e tauturu ia Iesu ’ia ’itehia te māmoe mo’e.
’E’ita paha te mau tamari’i e ’ite ē, tē vai ra te tahi atu mau tamari’i i roto i te piha ha’api’ira’a ’aita e haere mai nei i te Paraimere. Nāfea e ti’a ai ia ’outou ’ia fa’auru ia rātou ’ia haere e fārerei i te reria mau tamari’i
Te mau ’ohipara’a e ti’a ’ia rave
-
’A fa’aue i te tamari’i tāta’itahi ’ia tai’o ma te muhu ’ore i te parabole ānei nō te māmoe mo’e, ’e ’aore rā, te parabole nō te moni mo’e, ’o te ’itehia i roto i te Luka 15:1–10, ’e ’ia fa’a’ite mai i tā rātou i ’apo mai.
-
’A pāpa’i i teie mau i’oa i ni’a i te tapura ’ere’ere : papa, tamaiti matahiapo, e tamaiti ’āpī a’e . ’A fa’a’ite i te video « Te tamaiti puhura » (LDS.org) ’e ’a fa’afa’aea i te tahi taime, ’ia ti’a i te mau tamari’i ’ia pāpa’i i ni’a i te tāpura ’ere’ere i te tahi mau mana’o ’o te mau ta’ata i tāpurahia.
-
’A ani i te hō’ē tamari’i ’ia haere i rāpae i te piha, ’a huna ai te tahi atu mau tamari’i i te hō’ē moni ’e ’aore rā i te hō’ē māmoe papie. ’A ani i te tamari’i ’ia ho’i mai ’e ’ia ’imi i te moni ’e ’aore rā i te māmoe. ’A fa’aha’amana’o i te mau tamari’i ē, e nehenehe te ta’ata e mo’e i te mau ha’amaita’ira’a ’o te ’evanelia. ’A ani ia rātou ’ia hōro’a mai i te tahi mau rāve’a e ti’a ai ia rātou ’ia haere e fārerei i te reira mau ta’ata. ’A hīmene ’āmui ’e te mau tamarii « Auê te aroha rahi ’o te tīa’i māmoe », Te mau Hīmene, no. 133, ’e ’a fa’a’ite pāpū i te ’oa’oa e roa’a mai ia ho’i ana’e te ta’ata i te Atua ra.
-
’A fa’ata’a ē, ’ua fa’a’ohipa Iesu i te māmoe mo’e, te moni mo’e, ’e te tamaiti puhura nō te fa’ahōho’a i te ta’ata tei « mo’e » nō te mea, ’aita rātou i fāri’i i te mau ha’amaita’ira’a o te ’evanelia. ’A ani i te mau tamari’i ’ia feruri i te mau ta’ata tā rātou i ’ite ’aita e haere mai nei i te purera’a. E aha te ti’a ia rātou ’ia rave nō te tauturu i teie mau ta’ata ’ia ’ite i te here ’o te Metua i te Ao ra nō rātou ?
Māmoe mo’e, nā Liz Lemon Swindle
E nehenehe tā’u e fa’a’ite i tō’u here i te Metua i te Ao ra nā roto i te māuruurura’a nō tō’u mau ha’amaita’ira’a.
E nehenehe te ’ā’amu ’o nā ’ahuru lepera e riro ’ei rāve’a maita’i nō te fa’auru i te mau tamari’i ’ia fa’a’ite i te māuruuru i te Metua i te Ao ra nō tō rātou mau ha’amaita’ira’a.
Te mau ’ohipara’a e ti’a ’ia rave
-
’A tai’o ’āmui i te ’ā’amu ’o nā ’ahuru lepera. E mea nāfea te lepera tei hōro’a i te ha’amāuruuru i te ha’amaita’ihia nō tōna ’ā’au mehara ? Nō te aha e mea faufa’a ’ia ha’amāuruuru i te Atua nō tō tātou mau ha’amaita’ira’a ?
-
’A ani i te mau tamari’i ’ia tāpura i te mau mea tā rātou i māuruuru, ’o te ha’amata nā ni’a i te reta tāta’itahi o tō rātou i’oa.
-
A ani i te mau tamari’i ’ia pāpa’i i te mau parau ha’amāuruuru i te Metua i te Ao ra nō te mau ha’amaita’ira’a tāna i hōro’a mai ia rātou. E nehenehe tā rātou e fa’atārere i te mau parau i pīha’i iho i tō rātou ro’i nō te fa’aha’amana’o ia rātou ’ia fa’a’ite i te ’ā’au mehara ’ia pure ana’e rātou.
Tē ti’aturi nei tātou ē, e Tamaiti Iesu nā te Atua.
Nāfea ’outou i te fa’a’ohipa i te ’ā’amu ’o Maria, Mareta ’e ’o Lazaro nō te tauturu i te mau tamari’i ’ia ’ite, mai ia Mareta ē, ’o Iesu « te Mesia, te Tamaiti a te atua » ? (Ioane 11:27).
Te mau ’ohipara’a e ti’a ’ia rave
-
’A pāpa’i i ni’a i te tāpura ’ere’ere i te tahi mau fa’ahitira’a parau i parauhia e te mau ta’ata i roto i te Ioane 11. ’A ani i te mau tamari’i ’ia ’imi ē, nā vai i parau i te fa’ahitira’a parau tāta’itahi, ’e ’a ani ia rātou ’ia ’imi Ioane 11 nō te hi’o i tā rātou ’imira’a. E aha tō rātou mana’o ’āhiri ē, ’o rātou ’o Iesu, ’o Mareta, ’o Maria ’e ’aore rā ’o Lazaro ? Nāfea te ti’aturira’a ia Iesu e nehenehe ai e tauturu ia tātou, ’ia ’oto ana’e ’e ’aore rā ’ia ri’ari’a ana’e tātou ?
-
’A tai’o i te ’itera’a pāpū ’o Mareta, e ’itehia i roto i te Ioane 11:20–27. ’A ani i te mau tamari’i ’ia ’imi i te mau ta’o ’e te mau parau e fa’a’ite ra ē, e fa’aro’o tō Mareta. E aha te nehenehe ia tātou ’ia rave nō te fāri’i i te fa’aro’o, ’ia teimaha ana’e ?
-
’A tauturu i te mau tamari’i ia tāmau ’ā’au Ioane 11:25. ’A fa’ata’a ē, e ti’a fa’ahou te ta’ata ato’a, te feiā parau ti’a ana’e rā te fāri’i i te ora mure e ’o te ora fa’ahou i pīha’i iho i te Metua i te Ao ra ’e ’ia Iesu Mesia.
Fa’aitoito i te ha’api’ira’a mai i te fare
’A hōro’a i te tahi ’api parau ’e ’aore rā i te hō’ē buka nota iti i te mau tamari’i ra, tā rātou e nehenehe e fa’a’ohipa nō te pāpa’i ’e ’aore rā, nō te pāpa’i i te hōho’a ’o te mau mea tā rātou i māuruuru i te roara’a o te hepetoma.
Ha’amaita’i i tā tātou ha’api’ira’a
Te ha’api’ipi’i-tāmau-ra’a, ’o te hō’ē ïa tāviri nō te ’apora’a mai. E fāna’o te mau tamari’i i te fa’aro’ora’a i te hō’ē parau tumu o te ’evanelia ’e ’ aore rā, te ravera’a i te hō’ē ’ohipa hau atu i te hō’ē taime. A tāmata i te rave i te mau fa’a’ohipara’a rau i roto i te mau ravera’a rau.