« Me 13-19. Mataio 19–20 ; Mareko 10 ; Luka 18 : ‘E aha iho ā tei toe iā’u ?’ » Mai, pe’e mai—Nō te Paraimere : Faufa’a ’Āpī 2019 (2019)
« Me 13-19. Mataio 19-20 ; Mareko 10 ; Luka 18 », Mai, pe’e mai—Nō te Paraimere : 2019
13–19 nō mē.
Mataio 19–20 ; Mareko 10 ; Luka 18
« E aha iho ā tei toe iā’u ? »
’A tai’o Mataio 19–20 ; Mareko 10 ; e Luka 18, ma te ha’amana’o noa i te mau tamari’i tā ’outou e ha’api’i ra. ’A pāpa’i i te mau huru muhumuhu ato’a tā ’outou e fāri’i. E tauturu tō ’outou ineinera’a ia ’outou ’ia ha’api’i i te mau tamari’i i te mea tā rātou e hina’aro e ’ite mai roto mai i teie mau pene.
Pāpa’i i tō ’outou mau mana’o
Ani ’ia fa’a’ite
’A ani i te mau tamari’i ’ia parau i mua i te piha ha’api’ira’a i te hō’ē mea tā rātou i here nō ni’a i tō rātou ’utuāfare. E nehenehe ato’a ’outou e ani i te mau metua o te mau tamari’i ’ia hōro’a mai i te hōho’a ’o tō rātou ’utuāfare i tā rātou mau tamari’i nō te fa’a’ite i te piha ha’api’ira’a.
Ha’api’i i te ha’api’ira’a tumu
Te mau tamari’i ’āpī a’e
’Ua hina’aro te Metua i te Ao ra ’ia fa’aipoipo tātou i roro i te hiero ’e ’ia fāri’i i te hō’ē ’utuāfare mure ’ore.
Nāfea e nehenehe ai i te mau tamari’i tā ’outou e ha’api’i ra ’ia fāna’o i te ha’api’ira’a tumu o te fa’aipoipora’a mure ’ore ? E mea maita’i ’ia fa’ahoro i roto « Te ’Utuāfare : E Poro’i i tō te Ao Nei » (Ensign ’e ’aore rā, Liahona, Novema 2010, 129).
Te mau ’ohipara’a e ti’a ’ia rave
-
’A tai’o Mareko 10:6–8 i te mau tamari’i, ’e ’a fa’a’ite i te hō’ē hōho’a nō te hō’ē nā ta’ata fa’aipoipohia. ’A ani i te mau tamari’i ’ia fa’atoro i ni’a i te tāne ’e te vahine ’ia fa’aro’o ana’e rātou ia ’outou ’ia tai’o i te mau ta’o tāne ’e vahine. ’A fa’ata’a ē, ’ua ’ōpua te Metua i te Ao ra ’ia fa’aipoipo te hō’ē tāne ’e te hō’ē vahine te tahi ’e te tahi (’a hi’o Genese 1:27–28).
-
’A fa’a’ite i te hōho’a nō te hō’ē ’utuāfare ’e te hō’ē hiero. ’A fa’ata’a ē, ’ua hina’aro te Metua i te Ao ra ’ia tā’atihia tātou i tō tātou ’utuāfare i roto i te hiero ’ia vai noa ho’i tātou i pīha’i iho ia rātou e a muri noa atu. Ha’apa’o maita’i i te mau tamari’i ’aita tō rātou nā metua i tā’atihia.
-
’A hīmene « ’Un heureux foyer », Chants pour les enfants, 104. ’A ani i te mau tamari’i ’ia fa’atoro i ni’a ia rātou iho ’ia hīmene ana’e rātou ē, « vau », « au »,« mātou », ’e « tātou ». E nehenehe teie ’ohipara’a e ravehia e rave rahi taime. ’A ani i te mau tamari’i ’ia fa’a’ite mai i te mau ’ohipa ’ārearea tā rātou i rave ’e tō rātou ’utuāfare. Nō te aha rātou e māuruuru ai nō tō rātou ’utuāfare ?
-
’A hīmene i te hō’ē hīmene nō ni’a i te hiero ’e ’aore rā, nō ni’a i te ’utuāfare, mai te « Oh, j’aime voir le temple » ’e ’aore rā, « E ti’a i te ’utuāfare ’ia ora tāhō’ē », Chants pour les enfanta, 99, 98. ’A fa’aue i te mau tamari’i ’ia tāpe’a i te mau hōho’a o te hiero ’e ’aore rā, te ’utuāfare, ’e ’a ani ia rātou’ ia ’āfa’i i tā rātou mau hōho’a i ni’a ’ia hīmene ana’e rātou « hiero » ’e ’aore rā, « ’utuāfare ». Nō te aha e mea faufa’a ’ia fa’aipoipo i roto i te hiero ?
E tuha’a te fa’aipoipora’a mure ’ore nō te fa’anahonahora’a a te Atua.
’Ua hina’aro Iesu i te mau tamari’i ri’i ’ia haere mai Iāna ra, ’ia ti’a iāna ’ia ha’amaita’i ia rātou.
E hōro’a mai teie ’ā’amu i te hō’ē rāve’a nō te tauturu i te mau tamari’i ’ia ’ite i te here rahi ’o Iesu ia rātou.
Te mau ’ohipara’a e ti’a ’ia rave
-
Nā roto i tā ’outou iho mau parau, ’a fa’a’ite i te ’ā’amu i roto i te Mareko 10:13–16. E nehenehe ato’a ’outou e fa’a’ite i te video « E mata na ’ia haere mai te mau tamari’i ri’i iā’u nei » (LDS.org). E aha te taime i ’ite ai te mau tamari’i i te here ’o Iesu nō tātou ? ’A fa’a’ite i te mau tamari’i i tō ’outou ’itera’a pāpū ē, ’ua here Iesu ia rātou ’e tē hina’aro nei ’oia e ha’amaita’i ia rātou.
-
’A fa’a’ite i te hōho’a Te Mesia ’e te mau Tamāri’i (Gospel Art Book, no. 47). ’A fa’ata’a ē, mai te mea ē, e hina’aro tātou ’ia riro mai te mau tamari’i e pārahi ra i pīha’i iho ia Iesu, e nehenehe ïa tātou e ha’apa’o i tāna mau fa’auera’a ’e ’ia here iāna ’e i te tahi atu mau ta’ata. E aha tā te mau tamari’i e nehenehe e rave ’ia riro ato’a rātou mai te mau tamari’i e pārahi ra i pīha’i iho ia Iesu ?
-
’A fa’aue i te mau tamari’i ’ia pāpa’i i tō rātou iho hōho’a te ha’amaita’ihia ra rātou e Iesu (a hi’o Mareko 10:16).
Mai te mea ē, e ha’apa’o tātou i te mau fa’auera’a, e nehenehe tātou e fāri’i i te ora mure ’ore.
’Ua ha’api’i Iesu i te taure’are’a tāo’a rahi ē, nō te noa’a te ora mure ’ore– hō’ē orara’a mai tō te Metua i te Ao ra — tītauhia iāna ’ia ha’apa’o i te mau fa’auera’a.
Te mau ’ohipara’a e ti’a ’ia rave
-
’A tai’o i te ’ā’amu o te taure’are’a tāo’a rahi i roto i te Mareko 10:17–22 ’e te mau tamari’i. (’A hi’o ato’a « Pene 42 : Te taure’are’a tāo’a rahi », Te mau ’ā’amu o te Faufa’a ’Āpī, 105-6, ’e ’aore rā, te video nō ni’a i te reira, i ni’a LDS.org.) ’A ani ia rātou ’ia fa’aro’o i te mea tā Iesu i parau atu i te taure’are’a ’ia rave, ’e e mea nāfea tō te taure’are’a pāhonora’a.
-
’A fa’ati’a hō’ē ’ā’amu ’e ’aore rā, hau atu nō ni’a i te mau tamari’i e ani nei i te a’ora’a ’e ’aore rā, te arata’ira’a a tō rātou mau metua, ’aita rā rātou i pe’e ’e ’aore rā, i ha’apa’o. E aha te tahi mau mea tā te Metua i te Ao ra i ani mai ia tātou ’ia rave ? E aha tō tātou huru ’ia ha’apa’o ana’e tātou i tāna mau fa’auera’a ?
-
’A fa’a’ite i te mau ’itera’a ’a fāri’i ai ’outou i te mau muhumuhura’a ’ia rave i te hō’ē mea ’ia maita’i a’e ’outou.
Ha’api’i i te ha’api’ira’a tumu
Te mau tamari’i pa’ari a’e
’Ua hina’aro te Metua i te Ao ra ’ia fa’aipoipo tātou i roro i te hiero ’e ’ia fāri’i i te ’utuāfare mure ’ore.
E nehenehe te mau mea tā Iesu i ha’api’i nō ni’a i te fa’aipoipora’a e tauturu i te mau tamari’i ’ia fārerei ana’e rātou i te mau poro’i ta’a ’ē atu i roto i te ao nei.
Te mau ’ohipara’a e ti’a ’ia rave
-
’A ani i te hō’ē o te mau tamari’i ’ia tai’o pūai i te Mareko 10:6–8. ’A fa’ata’a ē, te aura’a nō te parau ra e ’ati atu ’oia ho’i, e « tāpe’a » ’e ’aore rā, e « tāpe’a pāpū » i te hō’ē mea. Nō te aha e mea faufa’a ’ia ’āmui hō’ē te tāne ’e te vahine, ’ia here te tahi ’e te tahi, ’e’ ia ’ohipa ’ei mau ’āpiti ?
-
’A fa’a’ite i teie fa’ahitira’a parau nō roto mai i « Te ’Utuāfare : E Poro’i i tō te Ao nei », ’e ’a tauturu i te mau tamari’i ’ia hāro’aro’a e aha te aura’a : « E tuha’a faufa’a rahi te rirora’a ’ei tāne ’e ’ei vahine nō te ihota’ata ’e nō te tumu ’o te ta’ata tāta’itahi i te ao na mua a’e, i te tāhuti nei, ’e i te ao a muri atu ».
-
’A ani i te mau tamari’i ’ia tauturu ia ’outou ’ia feruri i te mau pāhonora’a i te mau uira’a mai teie « nō te aha e mea faufa’a te ’utuāfare i roto i te ’Ēkālesia ? » ’e ’aore rā, « nō te aha e mea faufa’a nō ’outou ia fa’aipoipohia i roto i te hiero ? » ’A hīmene ’āmui « E ti’a i te ’utuāfare ’ia ora tāhō’ē », Chants pour les enfants, 98. ’A fa’a’ite i tō ’outou ’itera’a pāpū nō te fa’aipoipora’a mure ’ore ’e nō te ’utuāfare ’e te mau tamari’i. ’A ani ia rātou ’ia fa’a’ite ato’a mai i tō rātou ’itera’a pāpū.
-
’A ani i te tamari’i tāta’itahi ’ia tai’o i te hō’ē pāpa’ira’a mo’a i roto i teie tapura : Mareko 10:6–8 ; 1 Korinetia 11:11 ; PH&PF 42:22 ; 131:1–4 ; ’e Mose 3:18, 21–24. E aha tā teie mau pāpa’ira’a mo’a e ha’api’i nei nō ni’a i te fa’aipoipora’a ?
E nehenehe Iesu e tauturu mai iā’u ’ia ’ite ē, e aha tā’u e hina’aro e rave nō te haere i mua.
’Ua ’imi te taure’are’a tao’a rahi ia Iesu ’e ’ua fāri’i i te arata’ira’a pāpū tei au ta’a ’ē nōna. Nāfea e ti’a ai ia ’outou ’ia fa’auru i te mau tamari’i ’ia ’imi ato’a i te reira huru arata’ira’a i roto i tō rātou iho orara’a ?
Te mau ’ohipara’a e ti’a ’ia rave
-
’A ani i te mau tamari’i ’ia ’imi i te hō’ē ’īrava i roto i te Mareko10:17–22 ’o te fa’ata’a ra i te hōho’a i roto i te fa’anahora’a nō teie hepetoma i roto Mai, pe’e mai—Nō te ta’ata iho ’e te ’utuāfare. ’A fa’ata’a ē, te a’ora’a tā Iesu i hōro’a i te taure’are’a ra, e au ïa nōna iho, ’e e nehenehe tātou pā’āto’a e fāri’i i te arata’ira’a nō tātou iho nō ’ō mai i te Fatu ra nā roto i te Vārua.
-
’A tai’o ’āmui Mareko 10:17–22. ’A ani i te mau tamari’i ’ia pāpa’i i ni’a i te tāpura ’ere’ere i te mau fa’auera’a tā te Fa’aora i parau atu i te taure’are’a tao’a rahi ra ’ia ha’apa’o (’a hi’o ’īrava 19). E aha atu ā tei tītauhia iāna ’ia rave ? (’a hi’o ’īrava 21). ’A fa’aitoito i te mau tamari’i ’ia feruri i te mau mea e ti’a ia rātou ’ia ha’amata i te rave ’e ’aore rā, e fa’aea i te rave nō te pe’e maita’i a’e ia Iesu. E aha te tahi mau rāve’a e nehenehe tātou e ’ite e aha tā Iesu e hina’aro ’ia rave tātou ?
Fa’aitoito i te ha’api’ira’a mai i te fare
’A ani i te mau tamari’i ’ia parau i tō rātou ’utuāfare ē, nō te aha rātou i māuruuru ai ’ia rātou, nā roto ānei i te pāpa’ira’a i te hō’ē parau fa’ata’ara’a nō te hōro’a i tō rātou nā metua ’e ’aore rā, nā roto ānei i te fa’a’itera’a i tō rātou ’itera’a pāpū nō ni’a i te ’utuāfare i roto i te pō ’utuāfare.
Ha’amaita’i i tā tātou ha’api’ira’a
Ha’apa’o maita’i i te mau tamari’i. E aha te huru o te mau tamari’i i roto i tā ’outou piha ha’api’ira’a i te pāhonora’a i te mau ’ohipara’a nō te ha’api’ira’a mai ? Mai te mea ē, e ’ere rātou i te mea ’ana’anatae roa, e taime paha ïa nō te tāmata i te tahi atu ’ohipara’a ’e ’aore rā, nō te haere e orihaere ri’i marū noa. Terā rā, mai te mea ē, tē ’ite ra ’outou ē, e mea ’ana’anatae te tamari’i, e tē ’apo mai rātou i te tahi mau tuha’a o te ha’api’ira’a, ’eiaha e rū i te haere i mua nō te fa’aoti i te ha’api’ira’a tā’āto’a.