« 13–19 nō mē. Mataio 19–20 ; Mareko 10 ; Luka 18 : ‘E aha iho ā tei toe iā’u ?’», Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 13–19 nō mē. Mataio 19–20 ; Mareko 10 ; Luka 18 », Mai, pe’e mai—nō te ta’ata hō’ē ’e te ’utuāfare : 2019
13–19 nō mē
Mataio 19–20 ; Mareko 10 ; Luka 18
« E aha iho ā tei toe iā’u ? »
E tai’o ’e e feruri i te Mataio 19-20 ; te Mareko 10 ; ’e te Luka 18 ;11, ma te ha’apa’o maita’i i te muhumuhu tā ’outou e fāri’i. E tāpa’o i te mau muhumuhu ’e e fa’aoti nāhea ’outou i te fa’a’ohipa i te reira.
Tāpa’opa’o i te mau mana’o e tae mai ia ’outou
’Āhani ’ua fāna’o ’outou i te ui i te hō’ē uira’a i te Fa’aora, e aha tā ’outou uira’a ? I te fārereira’a te hō’ē taure’are’a tao’a rahi i te Fa’aora nō te taime mātāmua, ’ua ui atu ’oia : « E aha tā’u ’ohipa maita’i e rave e noa’a ai te ora mure ’ore iā’u ? » (Mataio 19:16). ’Ua fa’a’ite atu te pāhonora’a a te Fa’aora i tōna māuruuru nō te mau ’ohipa maitata’i tā teie taure’are’a i rave a’ena, nā reira ato’a te here ’e te fa’aitoitora’a ’ia rave rahi atu ā. ’Ia feruri tātou i te noa’ara’a te ora mure ’ore, e nehenehe ato’a tātou e ui ia tātou iho e aha atu ā tā tātou e ti’a ’ia rave. ’Ia ui tātou i tā tātou iho « E aha iho ā tei toe iā’u ? » (Mataio 19:20), e nehenehe te Fatu e hōro’a mai i te pāhonora’a e tano ta’a ’ē ia tātou mai tāna i rave nō te taure’are’a tao’a rahi. Ta’a ’ē noa atu te mea e ani mai te Fatu ia tātou ’ia rave, e tītau te ravera’a mai te au i tāna pāhonora’a ’ia tu’u tātou i te ti’aturi i ni’a iāna, hau atu i te tu’ura’a i te ti’aturi i ni’a i tō tātou iho parau ti’a (hi’o Luka 18:9–14) ’e ’ia« fāri’i [tātou] i te bāsileia o te Atua mai te tamaiti iti ra » (Luka 18:17 ; hi’o ato’a 3 Nephi 9:22).
Mau mana’o nō tā ’oe iho tuatāpapara’a pāpa’ira’a mo’a
Mataio 19:1–9 ; Mareko 10:1–12
Te fa’aipoipora’a te hō’ē tāne i te hō’ē vahine, e mea fa’auehia ïa e te Atua.
’Ua riro teie ’āparaura’a i roto i te Fa’aora ’e te mau pharisea hō’ē o te tahi noa mau pāpa’a parau ’ua ha’api’i ta’a ’ē te Fa’aora nō ni’a i te fa’aipoipora’a. I muri iho i te tai’ora’a i te Mataio 19:1–9 ’e te Mareko 10:1–12, e ha’amau i te hō’ē tāpura nō te mau fa’ahitira’a tā ’oe e mana’o ra ’o te hi’ora’a a te Fatu nō te fa’aipoipora’a. Nāhea tō ’oe ’ite i te fa’anahora’a nō te fa’aorara’a a te Metua i te tauturu ia ’oe ’ia māramarama nō te aha te fa’aipoipora’a i roto i te tāne ’e te vahine i fa’auehia ai e te Atua ?
’Ua riro te fa’aipoipora’a mure ’ore ’ei tuha’a nō te fa’anahora’a a te Atua.
’Ua mātau paha ’oe i te tahi mau ta’ata tei ’ore e fāri’i ’aore rā tei pāto’i i te mau fa’aturera’a a te Fatu nō ni’a i te fa’aipoipora’a.
Mataio 19:3–9 ; Mareko 10:2–12
’Ua ha’api’i ānei Iesu ē e’ita e nehenehe te tāne ’e te vahine ’ia ta’a ’aore rā ’eiaha te tāne i ta’a i tāna vahine ’aore rā te vahine i ta’a i tāna tāne ’ia fa’aipoipo fa’ahou ā ?
I roto i te hō’ē a’ora’a nō ni’a i te ta’ara’a te tāne ’e te vahine, ’ua ha’api’i Elder Dallin H. Oaks ē, ’ua ’ōpua te Metua i te Ao ra ’ia vai mure ’ore te aura’a fa’aipoipora’a. Terā rā, ’ua ta’a ato’a i te Atua ē, « nō te marū ’ore o tō ’outou ’ā’au » (Mataio 19:8), ’e tae noa atu i te mau mā’itira’a hape ’e te peu pipiri o te hō’ē o nā ta’ata fa’aipoipo, ’aore rā o te piti o rāua, e tītauhia ai ’ia ta’a rāua i te tahi taime.
’Ua ha’api’i Elder Oaks ē, ’ua fa’ati’a te Fatu i « te mau ta’ata fa’ata’ahia ’ia fa’aipoipo fa’ahou ma te hapa ’ore i te pae mōrare i fa’a’ite-pāpū-hia i roto i te ture tiretiera. Mai te mea ē, ’aita te hō’ē melo ta’a i rave i te hara teimaha, e nehenehe tāna e fāri’i i te parau fa’ati’a nō te hiero ’ia au i te mau ture nō te ti’amāra’a i tītauhia i te tahi atu mau melo » (« te fa’ata’ara’a te tāne ’e te vahine », Ensign ’aore rā Liahona, Mē 2007, 70).
Mataio 19:16–22 ; Mareko 10:17–22 ; Luka 18:18–23
Mai te peu e ui au i te Fatu, e ha’api’i mai ’oia iā’u i tei tītauhia iā’u ’ia rave nō te fāri’i i te ora mure ’ore.
E nehenehe te fa’ati’ara’a nō ni’a i te taure’are’a tao’a rahi e fa’atupu i te ha’ape’ape’ara’a i roto i te ta’ata, ’e tae noa atu i te pipi tei ha’apa’o maita’i i tōna orara’a tā’āto’a. ’Ia tai’o ’oe i te Mareko 10:17–22, e aha te mau tāpa’o nō te ha’apa’o maita’i ’e te mana’o ateate o te taure’are’a ?
Mai te taure’are’a tao’a rahi te huru, ’aita ā tātou i maita’i roa ’e i hope i te ha’amaita’i, nō reira e ti’a ia tātou te mau pipi ’ia ui : « E aha iho ā tei toe iā’u ? »—’e e ti’a roa ho’i ’ia ui tātou i te reira i te roara’a o tō tātou orara’a. E hi’o maita’i na i te pāhonora’a tei hōro’ahia ma te here, mai Te ta’ata e hi’o nei ia tātou i tō tātou iho huru mau (hi’o Mareko 10:21). E aha tā ’oe e nehenehe e rave nō te fa’aineine nō te ui i te Fatu e aha iho ā tei toe ia ’oe—’e nō te fāri’i i tāna pāhonora’a ?
Hi’o ato’a Larry R. Lawrence, « E aha iho ā tei toe iā’u ? » Ensign ’aore rā Liahona, Nov. 2015, 33–35 ; S. Mareko Palmer, ’Ua hi’o atura Iesu iāna ’e ’ua aroha atura iāna, Ensign ’aore rā Liahona, Mē 2017, 114–16.
Pauroa te ta’ata te nehenehe e fāri’i i te ha’amaita’ira’a nō te ora mure ’ore, noa atu ā te taime e fāri’i ’oia i te ’evanelia.
E nehenehe ānei tā ’oe e fa’aau ia ’oe i ni’a i te ’ohipa i tupu nō te feiā rave ’ohipa i roto i te ’ō vine ? E aha te mau ha’api’ira’a tā ’oe e ’ite ra nō ’oe iho i roto i teie mau ’īrava ? E nehenehe te a’ora’a a Elder Jeffrey R. Holland, « Te feiā rave ’ohipa i roto i te ’ō vine » (Ensign ’aore rā Liahona, Mē 2012, 31–33) e tauturu ia ’oe ’ia ’ite mai i te mau rāve’a ’āpī nō te fa’a’ohipa i teie parabole. E aha atu ā te mau muhumuhu a te Vārua ia ’oe ?
Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
E ’āpī ānei tō ’outou ’utuāfare i te paraparaura’a nō ni’a i te mau ha’api’ira’a a te Atua nō ni’a i te fa’aipoipora’a ’e te ’utuāfare ? Mai te peu e ’ē, e nehenehe tā ’outou e tai’o i « Te ’utuāfare : E Poro’i i tō te Ao nei » (Ensign ’aore rā Liahona, Nov. 2010, 129). Nāhea te mau ha’api’ira’a i roto i te poro’i e tauturu nei ’ia fa’a’ore i te ta’a ’ore ’e te hape e vai nei i roto i te mau poro’i a te ao nō ni’a i te fa’aipoipora’a ’e te ’utuāfare ?
E aha te ta’a-’ē-ra’a i roto i te noa’ara’a te mau tao’a ’e te tu’ura’a i te ti’aturi i ni’a i te mau tao’a ? (hi’o Mareko 10:23–24). ’Ia tai’o ’outou i te ’īrava 27, e hi’o ato’a i te ’Īritira’a a Iosepha Semita : « E ’ore roa ïa e ti’a i te ta’ata e tu’u i tōna ti’aturi i roto i te mau tao’a, ; e’ita rā e ’ore e ti’a i te ta’ata e tu’u i tōna ti’aturi i ni’a i te Atua ’e ’o te fa’aru’e i te mau mea ato’a nō’u nei, e ti’a ho’i ia rātou i teie mau mea ato’a nei ».
Nō te fa’ahōho’a i te mau parau tumu i roto i te Mataio 20:1–16, e fa’anaho ’outou i te tahi tata’ura’a ’ōhie, mai te tahi horora’a, ’e e parau atu ’outou ē, e rē te noa’a i te ta’ata e upo’oti’a i te tata’ura’a. ’Ia oti te tata’ura’a, e ’ōpere i te ta’ata tāta’itahi i te hō’ē ā rē, ha’amata nā ni’a i te ta’ata hope’a ē tae roa i terā ta’ata i upo’oti’a i te tata’ura’a. E aha tā te reira e ha’api’i nei nō ni’a i te ta’ata e fāri’i i te mau ha’amaita’ira’a o te ora mure ’ore i roto i te fa’anahora’a a te Metua i te Ao ra ?
E aha te aura’a o te parau « ’o te hina’aro ’ia hau ’oia i roto ia ’outou na, ’ei tāvini ha’aha’a ’oia nō ’outou » ? (Mataio 20:27). Nāhea Iesu Mesia i te fa’ahi’ora’a i teie parau tumu ? Nāhea tā tātou e nehenehe ai e pe’e i tōna hi’ora’a i roto i tō tātou ’utuāfare, tō tātou pāroita ’aore rā ’āma’a, ’e i tō tātou vāhi fa’aeara’a ?
E aha tā tātou e ha’api’i nei nō ni’a i te pure i roto i te nā parabole e piti i roto i teie mau ’īrava ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
’Ite mai i te taime maita’i nō ’outou. Pinepine te ha’api’ira’a i te ’ōhie ’ia nehenehe tā ’outou e tuatāpapa i te mau pāpa’ira’a mo’a ma te ha’ataupupū ’ore. E ’imi i te hō’ē taime maita’i nō ’outou ’e e rave i tō ’outou maita’i roa a’e nō te tuatāpapa tāmau i terā taime i te mahana tāta’itahi.
Christ and the Rich Young Ruler, nā Heinrich Hofmann