« 29 nō ’Ēperēra 29–5 nō Me. Ioane 7-10 : ‘o vau te tīa’i māmoe maita’i »’ Mai, pe’e mai—Nō te Paraimere: Faufa’a ’Āpī : 2019 (2019)
« 29 nō ’Ēperēra 29–5 nō Me. Ioane 7-10 », Mai, pe’e mai—Nō te Paraimere : 2019
Nā te ta’ata hara ’ore, nā Liz Lemon Swindle
29 nō ’Ēperēra 29–5 nō Me
Ioane 7–10
« ’O vau te tīa‘i māmoe maita’i »
'A tai’o ai ’outou i te Ioane 7–10, ’a feruri i te mau tamari’i tā ’outou e ha’api’i ra. E rave rahi ’o te mau mana’o nō te mau tamari’i pa’ari a’e i roto i teie fa’anahora’a e nehenehe ato’a e fa’aauhia nō te mau tamari’i ’āpī a’e, ’e ’aore rā, te tahi i te tahi.
Pāpa’ipa’i i tō ’outou mau mana’o
Ani ’ia fa’a’ite
A ’ani i te mau tamari’i ’ia fa’a’ite i te tahi mea tā rātou i rave i te hepetoma i ma’iri a’e nei ’ia riro mai te ta’ata Sāmāria.
Ha’api’i i te ha’api’ira’a tumu
Te mau tamari’i ’āpī a’e
E tauturu te ha’apa’ora’a i te mau fa’auera’a iā’u ia ite ē, e parau mau te reira.
’Ua ha’api’i Iesu ē, e nehenehe tātou e fāri’i i te hō’ē ’itera’a pāpū nō te mau parau mau tāna i fa’a’ite mai, mai te mea ē, e ora tātou i te reira. Nāfea ’outou i te fa’a’ohipa i teie ’ā’amu nō te ha’api’i i te mau tamari’i ē, te hau tā tātou e ’ite ’ia ha’apa’o ana’e tātou i te mau fa’auera’a, e tauturu te reira ia tātou ’ia ’ite ē, ’ua ti’a ïa te reira mau fa’auera’a ?
Te mau ’ohipara’a e ti’a ’ia rave
-
’A ha’apoto i te Ioane 7:17 i roto i te mau parau e hāro’aro’a te mau tamari’i. ’A tauturu ia rātou ’ia ’ite ē, te ha’apa’ora’a i te mau fa’auera’a, e tauturu te reira ia tātou ’ia ’ite ē, ’ua fātata atu ā tātou ia Iesu Mesia, penei a’e nā roto i te hīmene ’āmuira’a « Auraro te ture » ’e ’aore rā, « Choisir le bien », Chants pour les enfants, 68-69, 160–61. ’A ani i te mau tamari’i ’ia fa’aro’o ē, nāfea tātou i te ha’amaita’ihia ’ia ha’apa’o ana’e tātou i te mau fa’auera’a.
-
’A fa’a’ite i te hō’ē ’itera’a i tō ’outou ha’api’ira’a mai i te hō’e fa’auera’a nō ’ō mai i te Atua ra, nō te mea ’ua ora ’outou i te reira, mai te aufaura’a i te tuha’a ’ahuru ’e ’aore rā, te faʼaʼoreraʼa i te hara a te hō’ē ta’ata tei riro ’ei ta’ata ’ino. ’A ani i te mau tamari’i ’ia feruri i te hō’ē ’itera’a i fāri’ihia e rātou ’a ha’apa’o ai rātou i te hō’ē fa’auera’a. ’A ani, « e aha tō ’outou huru i muri a’e i tō ’outou ha’apa’ora’a ? »
-
’A mā’iti i te tahi o te mau fa’auera’a ’e ’a pāpa’i e piti tāpura hōho’a ’ōhie ’ei fa’ahōho’ara’a i nā fa’auera’a tāta’itahi. ’A ’āpapa i te mau hōho’a ato’a i ni’a i te tahua ma te huri te ni’ara’a i raro, ’e ’a ani tāta’ihō’ē i te mau tamari’i ’ia fa’atū’ati ’āmui i te mau fa’auera’a. ’A fa’a’ite pāpū i te faufa’a o te mau fa’auera’a, ’e e mea nāfea tō ’outou ha’apa’ora’a i te reira i ha’apūai ai i tō ’outou ’itera’a pāpū.
’Ua ha’apa‘o Iesu Mesia i te parau a tōna Metua
’Ua rave tāmau noa Iesu Mesia i te mau mea tei fa’a’oa’oa i tōna Metua i te Ao ra. Nāhea e ti’a ai ia ’outou ’ia tauturu i te mau tamari’i ’ia pe’e i tōna hi’ora’a maita’i ?
Te mau ’ohipara’a e ti’a ’ia rave
-
’A tauturu i te mau tamari’i ’ia fa’ahiti fa’ahou i te mea tā Iesu i parau nō ni’a i te Metua i te Ao ra i roto i te Ioane 8:29 : « ’Aore ho’i au i fa’aea i te rave i te mea e māuruuru ai ’oia ra ». ’A ani ia rātou ’ia fa’a’ite mai i te mau mea tā Iesu i rave i māuruuru ai te Metua i te Ao ra. ’A fa’a’ite ia rātou i te tahi mau hōho’a nō roto mai i te Gospel Art Book nō te hōro’a ia rātou i te mau mana’o.
-
’A ani i te mau tamari’i e aha te mau mea e ’oa’oa ai rātou I muri iho, ’a ui ē, e aha te ti’a ia rātou ’ia rave i teie hepetoma nō te fa’a’oa’oa i te hō’ē melo o te ’utuāfare ’e ’aore rā, i te hō’ē hoa. ’A ani i te mau tamari’i ’ia pāpa’i i tō rātou iho hōho’a e rave ra i te reira mau ’ohipa, ’ia ’āfa’i i te reira i te fare nō te fa’aha’amana’o ia rātou.
-
’A ani i te hō’ē metua o te hō’ē o te mau tamari’i ’ia fa’a’ite mai i te hō’ē ’itera’a ’a rave ai te hō’ē tamari’i i te hō’ē mea tei fa’a’oa’oa i te metua. ’A fa’aue i te tamari’i ’ia fa’a’ite mai e aha tōna mana’o.
’Ua ’ite Iesu iā’u ’e ’ua here ’oia iā’u.
E nehenehe te parabole ’o te tīa’i māmoe maita’i e tauturu i te mau tamari’i ’ia hāro’aro’a ē, ’ua here Iesu ia rātou ’e ’ua ’ite ē, ’o vai rātou.
Te mau ’ohipara’a e ti’a ’ia rave
-
’A ani i te mau tamari’i ’ia pāpa’i i te hō’ē hōho’a ’ei fa’ahōho’ara’a i te hō’ē mea i roto i te parabole ’o te tīa’i māmoe maita’i, mai te māmoe, te ta’ata eiā, ’e ’aore rā, hō’ē luto. ’A tai’o Ioane 10:1–18 i te mau tamari’i, ’e ’a ani ia rātou ’ia ’āfa’i i tā rātou hōho’a i ni’a ’ia fa’aro’o ana’e rātou ia ’outou ’ia tāi’o i te mea tā rātou i pāpa’i te hōho’a. ’A fa’ata’a ē, mai te « tīa’i māmoe maita’i » e arata’i ’e e here i tāna nana, ’ua here Iesu ia tātou ’e ’ua arata’i ia tātou pā’āto’a iāna ra. ’A fa’a’ahu i te hō’ē ’o te mau tamari’i mai te hō’ē tīa’i māmoe, ’e ’a fa’aue i te mau tamari’i ’ia fa’a’ite ē, nāfea Iesu i te riro ’ei tīa’i māmoe maita’i nō tātou.
-
’A fa’a’ite i te hōho’a ’o Iesu ’e te mau māmoe i roto i te fa’anahora’a ’o teie hepetoma i roto Mai, pe’e mai—Nō te ta’ata iho ’e nō te ’utuāfare. Nāfea tātou e ’ite ai ē, ’ua here Iesu i te mau māmoe ? Nāfea e ti’a ai ia tātou ’ia parau ē, ’ua here te māmoe ia Iesu ?
-
’A tauturu i te mau tamari’i ’ia fa’a’ī i te ’api ’ohipara’a ’o teie hepetoma.
Ha’api’i i te ha’api’ira’a tumu
Te mau tamari’i pa’ari a’e
E tauturu te ha’apa’ora’a i te mau fa’auera’a iā’u ’ia ’ite ē, e parau mau te reira.
Penei a’e ’ua fāri’i nā ’outou ’e te mau tamari’i tā ’outou e ha’api’i ra, i te mau ’itera’a nō ni’a i te orara’a i te ’evanelia ’e te ’itera’a ē, e parau mau te reira. Nāfea e ti’a ai ia ’outou ’ia patu i ni’a iho i te reira mau ’itera’a ’a ha’api’i ai ’outou ?
Te mau ’ohipara’a e ti’a ’ia rave
-
’A pāpa’i i te ’īrava tāta’itahi o te Ioane 7:14–17 i ni’a iho i te mau tuha’a ’api parau ta’a ’ē, ’e ’a hōhora i te reira ma te fa’anaho ’ore. ’A ani i te mau tamari’i ’ia fa’anaho māite i te reira mau tuha’a ’api parau, ’e ’a hi’o Ioane 7:14–17 nō te ’ite ē, ’ua tano ānei rātou. ’A ani i te mau tamari’i ’ia tāpūpū ’āpipiti ia rātou, ’e ’ia fa’a’ite i tā rātou hāro’aro’ara’a i te ’īrava tāta’itahi i tō rātou ’āpiti . Nāfea te ha’apa’ora’a i te mau fa’auera’a a te Atua i tauturu ai ia rātou ’ia ’ite ē, ’ua ti’a mau te mau fa’auera’a ?
-
’A fa’a’ite i te mau hi’ora’a nō roto mai i te mau pāpa’ira’a mo’a, ’o te fa’a’ite ra ē, e mea nāfea te ta’ata i te ha’amaita’ira’ahia nō tō rātou orara’a i te mau parau mau o te ’evanelia, mai ia Daniela (’a hi’o Daniela 6) ’e ’aore rā, Nephi (a hi’o 1 Nephi 3–4).
-
Tau mahana hou te ha’api’ira’a, ’a ani i te hō’ē o te mau tamari’i ’ia pāpa’i nō ni’a i te hō’ē taime ’a fāri’i ai ’oia i te hō’ē ’itera’a pāpū nō te hō’ē fa’auera’a nā roto i te orara’a i te reira. I roto i te ha’api’ira’a, ’a ani i te tamari’i ’ia fa’a’ite mai i te mea tāna i pāpa’i.
E nehenehe te parau mau e fa’ati’amā ia tātou.
’A tupu ai te mau tamari’i i te pa’arira’a, e fārerei rātou i te mau ta’ata ’o te ti’aturi ē, e fa’ahepora’a te orara’a i te ’evanelia. Nāfea e ti’a ai ia ’outou ia fa’a’ohipa i te Ioane 8:31–36 nō te pāto’i i te reira huru parau ?
Te mau ’ohipara’a e ti’a ’ia rave
-
’A ani i te mau tamari’i ’ia tai’o Ioane 8:31–36 ’e ’a fa’a’ite mai ē, e aha tō rātou mana’o, ’e e aha te aura’a ’ia riro ’ei tāvini nō te hara. Nāfea te mau ha’api’ira’a a Iesu i te tauturu ia tātou ’ia ti’amā ?
-
’A ani i te hō’ē tamari’i ’ia tauturu ia ’outou ’ia tā’amu māmā noa i te hō’ē taura, hō’ē tāhei, ’e ’aore rā, hō’ē tā’amu ’arapo’a i ni’a i tō ’outou fatira’a rima nō te fa’a’ite i te huru ’a tā’amuhia ai tātou i te hara, ’ia rave ana’e tātou i te reira nā ni’a iho noa, ma te tātarahapa ’ore.
-
’A fa’a’ite i te hō’ē ponao ’ei fa’ahōho’ara’a i te hara, e hō’ē tāviri ei fa’ahōho’ara’a i te huru e fa’ati’amā ai te mau parau mau o te ’evanelia ia tātou. ’Ei hi’ora’a, e nehenehe te ’itera’a i te parau nō te tāra’ehara o te Fa’aora e tauturu ia tātou ’ia ti’amā nō te tātarahapa ’e ’ia fa’a’orehia tā tātou mau hara. ’E ’aore rā, e nehenehe te ’itera’a i te parau nō te ture pa’ari e hōro’a mai ia tātou i te ti’amāra’a nō te ha’apae i te hina’aro fa’atītī.
’Ua ha’api’i mai Iesu ē, « nā te parau mau ’outou e fa’ati’amā »(Ioane 8:32).
E au Iesu mai te hō’ē tīa’i māmoe nō tātou.
’A tuatāpapa ai ’outou i te parabole ’o te tīa’i māmoe maita’i, ’a ’imi i te mau parau mau tā te reira e ha’api’i ra nō ni’a i te autā’atira’a ’e te Fa’aora. Nāfea te ’itera’a i teie mau parau maue ha’amaita’i i te mau tamari’i ?
Te mau ’ohipara’a e ti’a ’ia rave
-
’A pāpa’i tīa’i māmoe maita’i ’e tārahuhia i ni’a i te tāpura ’ere’ere. ’A fa’ata’a ē, te ta’ata tārahuhia, o te hō’ē ïa ta’ata tei tihepuhia nō te rave i te hō’ē ’ohipa tāmoni. ’A ani i te mau tamari’i ’ia tāpura i te mau ta’a-’ē-ra’a tā rātou e ’ite i roto i te Ioane 10:1–18 i rotopū i te hō’ē tīa’i māmoe maita’i ’e te hō’ē ta’ata tārahuhia. Nō te aha ’outou e hina’aro ai e pe’e i te tīa’i māmoe maita’i ’eiaha rā i te ta’ata tārahuhia ?
-
’A pāpa‘i ’e ’aore rā ’a fa’a’ite i te hōho’a o te hō’ē ’ōpani. ’A tai’o ’āmui i te Ioane 10:7–9, ’e ’a ui i te mau tamari’i ē, nāfea Iesu i te riro mai te hō’ē ’ōpani. ’Ia au i te ’īrava 9, e aha te mau ha’amaita’ira’a e tae mai i ni’a i te feiā o te « tomo » nā te ūputa ? Nāfea tātou ia tomo nā te ’ūputa tā Iesu Mesia i fa’anaho nō tātou?
Fa’aitoito i te ha’api’ira’a mai i te fare
’A tauturu i te mau tamari’i ’ia feruri i te hō’ē fa’auera’a e nehenehe tā rātou e ha’apa’o maita’i roa atu. ’A ani ia rātou ’ia tāmata i te ha’apa’o i te reira fa’auera’a i te hepetoma i muri mai.
Ha’amaita’i i tā tātou ha’api’ira’a
’A ani i te mau uira’a fa’auruhia. ’A ui i te mau uira’a o te ani i te mau tamari’i tā ’outou e ha’api’i ra ’ia haere i ’ō atu i te mau mea i fa’a’itehia. ’A fa’aitoito ia rātou ’ia fa’a’ite mai i tō rātou ’itera’a pāpū nō te mau parau mau o te ’evanelia. ’Ei hi’ora’a, mai te mea ē, tē ’āparau ra ’outou i te mau fa’auera’a, e nehenehe tā ’outou e ani i te mau tamari’i ’ia fa’a’ite mai ē, nāfea te ha’apa’ora’a i te mau fa’auera’a i te ha’amaita’ira’a ia rātou.