Pāhonora’a i te mau hina’aro ’o te mau tamari’i ’āpī a’e

’Ua ineine ’e e hina’aro rahi tō te mau tamari’i ’ia ha’api’i mai i te ’evanelia mai te mea ē, e vauvauhia te reira ma te māramarama. Mai te mea ē, e mau tamari’i ’āpī a’e tā ’outou e ha’api’i, ’a feruri i teie mau ’ohipara’a ’o te nehenehe e tauturu ia rātou ’ia ’apo mai (e nehenehe te mau tamari’i pa’ari a’e e fāna’o ato’a i teie mau fa’a’ohipara’a) :

• ’A fa’aro’o ’e aore rā, ’a fa’aha’uti i te hō’ē ’ā’amu. E mea au nā te mau tamari’i ’āpī te mau ’ā’amu—nō roto mai i te mau pāpa’ira’a mo’a, nō roto mai i tō ’outou orara’a, nō roto mai i te ’ā’amu o te ’Ēkālesia, ’e ’aore rā nō roto mai i te mau ve’a a te ’Ēkālesia. ’A ’imi i te mau rāve’a nō te fa’aō ia rātou i roto i te fa’ati’ara’a ’ā’amu. E nehenehe tā rātou e tāpe’a i te mau hōho’a ’e ’aore rā te mau tauiha’a, e pāpa’i i te mau hōho’a o te mau mea tā rātou e fa’aro’o rā, e ha’uti i te ’ā’amu, ’e ’aore rā, e tauturu i te fa’ati’ara’a i te ’ā’amu. ’A tauturu i te mau tamari’i ’ia ’ite i te mau parau mau o te ’evanelia i roto i te mau ’ā’amu tā ’outou e fa’a’ite atu.

• Tai’o i te hō’ē pāpa’ira’a mo’a E’ita paha e ti’a i te mau tamari’i ’āpī ’ia tai’o rahi, e nehenehe rā tā ’outou e tītau ia rātou ’ia rave i te ’ohipa ha’api’ira’a i roto i te mau pāpa’ira’a mo’a. E hina’aro paha ’outou e rōtahi i ni’a iho hō’ē ’īrava, hō’ē pereota tumu, ’e ’aore rā, hō’ē ta’o. ’A tai’o pūai ai ’outou i te hō’ē pāpa’ira’a mo’a, e nehenehe tā ’outou e ani i te mau tamari’i ’ia ti’a i ni’a ’e ’aore rā, ’ia ’āfa’i i tō rātou rima i ni’a ’ia fa’aro’o ana’e rātou i te hō’ē ta’o ’e ’aore rā, hō’ē pereota ta’a ’ē tā ’outou e hina’aro e rōtahi i ni’a iho. E nehenehe ato’a tā rātou e tāmau ’ā’au i te mau pereota poto nō roto mai i te mau pāpa’ira’a mo’a mai te mea ē, e fa’ahiti rātou i te reira tau taime ri’i. ’Ia fa’aro’o ana’e rātou i te parau a te Atua, e ’ī rātou i te Vārua.

• ’Ia ’ohipa. Pinepine te mau tamari’i i te ha’uti, ’a fa’anaho i te mau rāve’a nō te fa’aha’uti ia rātou—hāhaere, ’ōu’au’a, pi’o i raro, ’e te tahi atu ā mau ’ohipa e tū’ati i ni’a i te parau tumu ’e ’aore rā, te ’ā’amu tā ’outou e ha’api’i ra. E mea maita’i ato’a teie mau ’ohipa mai te mea ē, e hīmene ’āmui ’outou.

• ’A hi’o i te hō’ē hōho’a ’e ’aore rā, ’a māta’ita’i i te hō’ē video. ’Ia fa’a’ite ana’e ’outou i te mau tamari’i i te hō’ē hōho’a ’e ’aore rā, te hō’ē vidéo nō ni’a i te hō’ē parau tumu o te ’evanelia ’e ’aore rā, nō ni’a i te hō’ē ’ā’amu nō te pāpa’ira’a mo’a, ’a ani ia rātou i te mau uira’a o te tauturu ia rātou ’ia ’apo mai i te mau mea tā rātou e hi’o rā. ’Ei hi’ora’a, e nehenehe tā ’outou e ui, « e aha tē tupu nei i roto i teie hōho’a ’e ’aore rā, teie video ? E aha te mana’o tei tae mai i roto ia ’outou ?«  Biblevideos.lds.org, medialibrary.lds.org, ’e children.lds.org e mau vāhi maita’i te reira nō te ’imi i te mau videos.

• Hīmene. Te mau hīmene ’e te mau hīmene nō roto mai i te Chants pour les enfants tē ha’api’i nei te reira i te parau ha’api’ira’a ma te pūai. ’A fa’a’ohipa i te fa’ahorora’a nō te mau tumu parau i muri i te Buka Chants pour les enfants nō te ’ite i te mau hīmene e tū’ati i ni’a i te mau parau tumu ’o te ’evanelia tā ’outou e ha’api’i ra. ’A tauturu i te mau tamari’i ’ia fa’aau i te parau poro’i ’o te mau hīmene i ni’a i tō rātou orara’a. ’Ei hi’ora’a, e nehenehe ’outou e ui i te mau uira’a nō ni’a i te mau ta’o ’e ’aore rā te mau parau i roto i te mau pāpa’ira’a. Ta’a ’ē atu i te hīmenera’a, e nehenehe tā te mau tamari’i e ha’uti i te mau hīmene, ’e ’aore rā, e fa’aro’o noa i te mau hīmene ’a rave noa ai rātou i te tahi mau ’ohipa.

• Fa’a’ite i te mau ’itera’a. ’Aita paha i rahi te mau mea tā te mau tamari’i ’āpī e fa’a’ite mai, mai tā te mau tamari’i pa’ari a’e, terā rā, mai te mea ē, e hōro’a ’outou ia rātou i te tahi arata’ira’a, e nehenehe rātou e fa’a’ite mai i tō rātou mau mana’o ’e te mau ’itera’a nō ni’a i te mea tā rātou i ’apo mai.

• Hāmani. E nehenehe tā te mau tamari’i e patu, e pāpa’i i te hōho’a, ’e ’aore rā, e peni i te hō’ē mea e tū’ati i ni’a i te ’ā’amu ’e ’aore rā, i te parau tumu tā rātou i ’apo mai. ’A fa’aitoito ia rātou ’ia āfa’i i tā rātou ’ohipa i hāmani i te fare ’e ’ia fa’a’ite i te mau melo o te ’utuāfare nō te tauturu i te mau tamari’i ’ia ha’amana’o i te mea tā rātou i ’apo mai.

• Fa’aō i roto i te mau ha’api’ira’a tao’a. E nehenehe hō’ē ha’api’ira’a tao’a ’ōhie roa e tauturu i te mau tamari’i ;ia hāro’aro’a i te hō’ē parau tumu ’o te ’evanelia e ’ere i te mea ’ōhie ’ia māramarama. ’Ia fa’a’ohipa ana’e ’outou i te ha’api’ira’a tao’a, ’a ’imi i te mau rāve’a nō te fa’a’āmui mai i te mau tamari’i. E hau atu tā rātou e ’apo mai roto mai i te ’āmuira’a i roto i te ’ohipara’a, i te māta’ita’i noa i te hō’ē fa’a’ite’itera’a.

• Ha’uti i te ti’ara’a. ’Ia ha’uti ana’e te mau tamari’i i te hō’ē ti’ara’a o tā rātou paha e fārerei i roto i te orara’a mau, e hau atu ïa te maita’i o tō rātou hāro’aro’ara’a e nāhea te hō’ē parau tumu o te ’evanelia i te fa’a’ohipahia i roto i tō rātou orara’a.

• Nā ni’a iho fa’ahou i te rave i te mau ’ohipara’a E hina’aro te mau tamari’i ’āpī ’ia fa’aro’o i te mau tumu parau e rave rahi taime nō te hāro’aro’a i te reira. ’Eiaha e fa’ataiā i te ha’apinepine i te nā ni’a iho fa’ahou i te fa’ati’a i te mau ’ā’amu ’e ’aore rā, te mau ’ohipara’a, noa atu ē, i roto i taua ā ha’api’ira’a nei. ’Ei hi’ora’a, e nehenehe ’outou e fa’a’ite i te hō’ē ’ā’amu nō te pāpa’ira’a mo’a e rave rahi taime i roto i te mau ravera’a rau, i roto i te hō’ē ha’api’ira’a—tai’ora’a i te mau pāpa’ira’a mo’a, ha’apotora’a nā roto i tā ’outou iho mau parau, fa’a’itera’a i te hō’ē vidéo, vaiihora’a i te mau tamari’i ’ia tauturu ia ’outou ’ia fa’ati’a i te ’ā’amu, te anira’a ia rātou ’ia ha’uti i te ’ā’amu, ’e tē vai atu ra. Mai te mea ē, e fa’a’ohipa-fa’ahou-hia i te fare, te hō’ē ’ohipa i ravehia i roto i te piha ha’api’ira’a, e tauturu te reira i te mau tamari’i ’ia ’apo mai ’e ’ia ha’amana’o.

• E rave ’e ’o vetahi ’ē E ha’amahora te mau tamari’i i te mau ’aravihi sōtiare, ’e e pinepine ato’a i te fāna’o i te ’apo mai ’e i te ha’uti e tō rātou mau hoa. ’A fa’atupu i te mau rāve’a nō rātou ’ia fa’a’ite, ’ia rave i tō rātou taime, ’e ’ia ’ohipa ’āmui, ’a ’apo mai ai rātou.

• Āmui mai i roto i te mau ’ohipara’a rau. Te rahira’a o te mau tamari’i ’āpī e mea poto roa tō rātou taime ’ana’anatae, ’e ’ua rau ato’a tā rātou huru ’apora’a mai. ’A fa’a’ohipa i te mau ’ohipara’a rau, ’e ’a ha’apa’o maita’i i te mau tāpa’o fa’a’itera’a ē, tē hina’aro ra te mau tamari’i ’ia taui te ’ohipara’a. ’Ei hi’ora’a, e ti’a ia ’outou ’ia taui pinepine te mau ’ohipara’a hau i te mau ’ohipara’a pe’epe’e.

Te hō’ē tuha’a ’o tō ’outou ti’ara’a ’ei ’orometua ha’api’i nō te mau tamari’i ’āpī—ta’a ’ē atu te ha’api’ira’a i te mau parau tumu ’o te ’evanelia—o te tauturura’a ïa i te mau tamari’i ’ia ha’api’i mai, nāfea ’ia ’āmui tano i roto i te ’ohipara’a a te hō’ē piha ha’api’ira’a a te ’Ēkālesia. ’Ei hi’ora’a, e hina’aro paha rātou ’ia ha’api’i nō ni’a i te ravera’a i tō rātou taime, te fa’a’itera’a, te fa’aturara’a ia vetahi ’ē, ’e tē vai atu ra. E hāmani te tahi mau ’orometua ha’api’i i te mau tāpura fa’ata’ara’a ’ohipa nā te tamari’i tāta’itahi nō te ’āmui mai i roto i te piha ha’api’ira’a ma te hō’ē ravera’a ta’a ’ē (mai te purera’a i te pure, te tāpe’ara’a i te hō’ē hōho’a, ’e ’aore rā, te ’ōperera’a i te mau ’api parau). E nehenehe te fa’ata’ara’a ’ohipa e tāui i te hepetoma tāta’itahi. E tauturu te reira i te mau tamari’i ’ia rave i tō rātou taime ’e ’ia rōtahi i ni’a i te huru peu tano nō te piha ha’api’ira’a.

Pinepine te mau tamari’i—te mau tamari’i ’āpī ihoa rā—i te fana’o i te hō’ē peu tāmau ’ite-ātea-hia. Nō te poto o te taime ’ana’anataera’a o te mau tamari’i ’āpī, ’e i te tahi taime, e iti roa tō rātou rōtahira’a nō te tā’āto’ara’a ’o te ha’api’ira’a, e mea maita’i a’e i roto i teie peu tāmau ’ia taui-pinepine-hia te huru ’ohipara’a i te tahi huru ’ohipara’a. ’Ei hi’ora’a, e nehenehe e tu’u i roto i te peu tāmau o tā ’outou piha ha’api’ira’a te tahi mau taime fa’afa’aeara’a nō te ha’uti i te hō’ē ha’uti, peni i te hō’ē hōho’a, hīmene i te hō’ē hīmene, e tē vai atu ra.