Hō’ē hōho’a nō te ha’api’ira’a

I roto i teie rāve’a tauturu, e ’ite ’outou i teie hōho’a i muri nei i fa’ahiti-fa’ahou-hia i roto i te fa’anahora’a tāta’itahi : ’A ani ’ia fa’a’ite mai, ’ia ha’api’i i te ha’api’ira’a tumu, ’e ’ia fa’aitoito i te ha’api’ira’a mai i te fare. I roto i te mau huru e rave rahi, ’ia ha’api’i ana’e ’outou, e nehenehe te mau tuha’a o teie hōho’a e nā ni’a iho te tahi i te tahi, ’e ’aore rā, e tupu mai i roto i te tahi āna’ira’a ta’a ’ē. ’Ei hi’ora’a, ’a feruri nā, e riro te fa’a’itera’a ’ei rāve’a nō te ha’api’i i te ha’api’ira’a tumu, ’e e ti’a i te ha’api’ira’a tumu o te ha’api’ira’a ’ia ani manihini ’ia fa’a’itehia mai. ’Oia ato’a, te fa’aitoitora’a i te ha’api’ira’a i te fare, e nehenehe te reira e tupu i roto i te roara’a o te hō’ē ’āparaura’a i roto i te piha ha’api’ira’a. ’A vaiiho i teie nā ni’a ihora’a te tahi i te tahi ’ia tupu noa mai, mai te au i te mau muhumuhura’a a te Vārua nō te pāhono i te mau hina’aro ’o te mau tamari’i tā ’outou e ha’api’i ra.

Ani ’ia fa’a’ite mai

’Ei tuha’a nō te ha’api’ira’a tāta’itahi, ’a ani i te mau tamari’i ’ia fa’a’ite mai i tō rātou mau mana’o, mau hi’ora’a, ’e mau ’itera’a nō ni’a i te mau parau tumu i roto i te fa’anahora’a. I roto i tā rātou mau ’āparaura’a, e fa’a’ite mai rātou i tō rātou mau ’itera’a nō ni’a i te ha’api’ira’a i te fare. E ti’a ato’a ia ’outou ’ia hi’o fa’ahou i te mau mea tā rātou i ’apo mai i te hepetoma i ma’iri a’e nei, ’e ’a ui, e mea nāfea te reira i te fa’aurura’a i tō rātou orara’a.

Ha’api’i i te ha’api’ira’a tumu

E nehenehe Mai, pe’e mai—Nō te ta’ata iho ’e te ’utuāfare e tauturu ia ’outou ’ia hāro’aro’a i te ha’api’ira’a tumu tā ’outou e ha’api’i i te mau tamari’i. ’A feruri e aha te mau ’īrava pāpa’ira’a mo’a, te mau fa’ahitira’a parau, te mau ’itera’a, te mau uira’a ’e te tahi atu mau rāve’a taururu, e ti’a ia ’outou ’ia fa’a’ite, nō te tauturu i te mau tamari’i ’ia ha’api’i mai, ’e ’ia ha’a i ni’a i te mau parau tumu ’o te ’evanelia. ’A ’imi i te mau rāve’a ’āpī nō te tauturu ia rātou ’ia ’ana’anatae i te mau mea tā rātou i ’apo mai.

Fa’aitoito i te ha’api’ira’a i te fare

Nō te mea ho’i ē, ’ua riro te fare ’ei pū nō te ha’api’ira’a mai i te ’evanelia, hō’ē o tā ’outou ’ōpuara’a ’ei ’orometua ha’api’i nō te Paraimere o te fa’aitoitora’a ïa i te ha’api’ira’a mai i te fare. Nāfea e nehenehe ai ia ’outou ’ia tauturu i te mau tamari’i ’ia fa’a’ite i tō rātou ’utuāfare i te mau mea tā rātou i ha’api’i mai i roto i te piha ha’api’ira’a ? Nāfea e ti’a ai ia ’outou ’ia fa’aitoito i te mau tamari’i ’e tō rātou mau metua, ’ia tāmau noa i te ha’api’i mai, nā roto mai i te Faufa’a ’Āpī i te fare ?