Iesu ’e te hō’ē tamari’i na’ina’i

E ’orometua ’outou nō te mau tamari’i

’Ua pi’ihia ’outou e te Atua nō te ha’api’i i tāna mau tamari’i mai tā te Fa’aora i ha’api’i. ’Ua fa’ata’ahia ’outou i roto i teie pi’ira’a nā roto i te mana o tāna ’autahu’ara’a mo’a. Noa atu ē, e ’ere ’outou i te ’orometua ’aravihi, mai te mea ē, e ora ’outou ma te ti’amā, e pure i te mau mahana ato’a, ’e e tuatāpapa i te mau pāpa’ira’a mo’a, e hōro’a mai te Atua ia ’outou i te fa’aurura’a ’e te mana ’o te Vārua Maita’i (’a hi’o 2 Nephi 33:1).

Te feiā tei tu’uhia mai i roto i tā ’outou ti’a’aura’a, e mau tamari’i ïa nā te Metua i te Ao ra, ’e ’ua ’ite ’oia e aha te mea tā rātou e hina’aro, e nāfea ’ia fārerei maita’i a’e ia rātou. Nā roto i te Vārua Maita’i, e arata’i te Atua ia ’outou i roto i tā ’outou fa’aineinera’a ’e i te taime ’a ha’api’i ai ’outou. E hehēu mai ’oia ia ’outou i te mea tā ’outou e parau ’e tā ’outou e rave.

I roto i te mau huru tuha’a ato’a o tō rātou orara’a, e tāmau noa teie mau tamari’i tao’a rahi i te horomi’i i te ha’amāramaramara’a, i te fa’atupu ’e i te fa’anehenehe i tō rātou mau mana’o, ’e i te ravera’a ’e i te fa’a’itera’a i te mau ’itera’a. ’Ua ti’a mau roa teie e te ’evanelia, nō te mea, ’ua ineine te mau tamari’i ’e e hina’aro ’ū’ana ’ia ’apo mai i te mau parau mau ’ōhie ’o te ’evanelia. E mea pūai ’e te vi’ivi’i ’ore tō rātou fa’aro’o i roto i te mau mea pae vārua, ’e e hi’o rātou i te mau taime ato’a ’ei taime ’apora’a mai. E fa’a’ohipa rātou ma tō rātou iho hina’aro i te mau mea tā rātou i ’apo mai, noa atu ē, ’aita i hope roa tō rātou hāro’aro’ara’a. Teie te huru nō tō tātou pā’āto’a fāri’ira’a i te ’evanelia. Mai tā te Fa’aora i ha’api’i mai, o te ’ore e fāri’i i te bāsileia ’o te Atua mai te tamaiti iti ra, e ’ore roa atu ïa e ’ō i roto » (Luka 18:17).

E ti’aturira’a mo’a te pi’ira’a ’ia ha’api’i i te mau tamari’i. O te huru mau ’ia tupu ana’e mai te mana’o tāhiti i te tahi taime. ’A ha’amana’o rā, nā tō ’outou Metua i te Ao ra i pi’i ia ’outou, ’e e ’ore roa ’oia e fa’aru’e ia ’outou. Nā te Fatu teie ’ohipa, ’e mai te mea ē, e tāvini ’outou « ma tō ’outou ’ā’au ato’a, te pūai ato’a, te mana’o ato’a, ’e te itoito ho’i » (PH&PF 4:2), e fa’a’a’ano ’oia i tō ’outou mau ’aravihi, te mau hōro’a, ’e te mau tāreni, ’e e ha’amaita’i i tā ’outou tāvinira’a i te orara’a o te mau tamari’i tā ’outou e ha’api’i ra.