Piha paraimere

Fa’a’ohipa Mai, pe’e mai—Nō te Paraimere

Fa’aineinera’a nō te ha’api’i i roto i te Paraimere

E ti’a te fare ’ia riro ’ei pū nō tē ha’api’ira’a mai i te ’evanelia; E parau mau te reira nō ’outou ’e nō te mau tamari’i tā ’outou e ha’api’i rā. ’A fa’aineine ai ’outou nō te ha’api’i, ’a ha’amata nā roto i te fāri’ira’a i tō ’outou iho ’itera’a i roto i te mau pāpa’ira’a mo’a. E tupu tā ’outou fa’aineinera’a faufa’a roa a’e ’a ’imi ai ’outou i te fa’aurura’a a te Vārua Maita’i.

’Ua riro ato’a te Mai, pe’e mai—Nō te ta’ata iho ’e te ’utuāfare ’ei tuha’a faufa’a roa nō tā ’outou fa’aineinera’a. E tauturu te reira ia ’outou ’ia noa’a te hō’ē hāro’aro’ara’a hōhonu a’e i te mau ha’api’ira’a tumu e ’itehia i roto i te mau pāpa’ira’a mo’a.

I roto i tā ’outou fa’aineinera’a, e tae mai te mau mana’o ’e te mau ferurira’a nō ni’a i te mau tamari’i tā ’outou e ha’api’i atu. E fāri’i ’outou i te mau ’itera’a nō ni’a e nāhea te mau parau tumu i roto i te mau pāpa’ira’a mo’a e ha’amaita’i ai i tō rātou orara’a. E arata’ihia ’outou nō te fa’auru ia rātou ’ia ’ite mai i taua mau parau tumu ra, ’a ha’api’i mai ai rātou nā roto mai i te mau pāpa’ira’a mo’a, nō rātou iho, ’e nō tō rātou ’utuāfare. ’A ha’amana’o ’ia putapū ’outou nō te mau tamari’i e ’ere tō rātou orara’a ’utuāfare i te mea maita’i roa nō te tuatāpapa i te pāpa’ira’a mo’a.

Te mau mana’o nō te ha’api’ira’a

’A fa’aineine ai ’outou ia ’outou nō te ha’api’i, e nehenehe ’outou e fāri’i i te tahi atu fa’aurura’a nā roto i te hi’ohi’ora’a i te mau fa’anahora’a i roto i teie rāve’a tauturu. ’Eiaha e fa’ariro i teie mau mana’o ’ei mau arata’ira’a mai te tahi ta’ahira’a e te tahi ta’ahira’a, e mau mana’o tauturu rā nō te fa’a’ara’ara i tō ’outou fa’aurura’a. ’Ua ’ite ’outou i teie mau tamari’i, ’e ’ua ’ite ato’a te Fatu ia rātou—e tae noa atu i te mau mea tā rātou e hina’aro, e te mau mea tā rātou e nehenehe e hāro’aro’a. E fa’auru ’oia ia ’outou i te fa’aurura’a maita’i roa a’e nō te ha’api’i ’e nō te ha’amaita’i i te mau tamari’i.

E rave rahi atu ā mau rāve’a tauturu nā ’outou, ’a fa’aineine ai ’outou ia ’outou, mai te mau mana’o i roto i te Mai, pe’e mai—Nō te ta’ata iho ’e te ’utuāfare ’e te mau ve’a a te ’Ēkālesia. Nō te mau ha’amāramaramara’a hau atu nō ni’a i teie mau rāve’a tauturu ’e te tahi atu, ’a hi’o « Te tahi atu mau rāve’a tauturu nō te ha’api’i i te mau tamari’i ».

Te tahi mau mea e ha’amana’o

• Te hōpoi‘a mātāmua a te mau metua o te ha’api’ira’a ïa i tā rātou mau tamari’i i te ’evanelia. ’Ei ’orometua ha’api’i, e hōpoi’a faufa’a roa tā ’outou nō te pāturu, nō te fa’aitoito ’e nō te patu i ni’a iho i te ha’api’ira’a mai i te ’evanelia i roto i te fare. ’Ia putapū ’outou nō te mau tamari’i ’aita te mau metua e ha’api’i ra i te ’evanelia i roto i tō rātou fare. ’A fa’aō pauroa i te mau tamari’i i roto i te mau ’āparaura’a ’evanelia ma te hi’o ’ore i te huru o tō rātou orara’a ’utuāfare.

• E mea maita’i ’ia nā ni’a iho noa te parau E hau atu i te maita’i tō te mau tamari’i ’apora’a mai i te mau parau mau, mai te mea ē, e ha’api’ihia teie mau parau mau nā ni’a iho noa, nā roto i te mau fa’a’ohipara’a rau. ’Ia ’ite ana’e ’outou ē, e mea maita’i nō te mau tamari’i te hō’ē fa’a’ohipara’a ha’api’ira’a, ’a feruri ’ia nā ni’a iho fa’ahou i te rave i te reira, mai te mea ihoa rā ē, tē ha’api’i ra ’outou i te mau tamari’i ’āpī a’e. E nehenehe ato’a tā ’outou e hi’o fa’ahou i te hō’ē fa’a’ohipara’a i roto i te hō’ē ha’api’ira’a tahito.

• Tē hina’aro nei te Metua i te Ao ra ’ia manuia ’outou ’ei ’orometua ha’api’i. ’Ua hōro’a mai ’oia e rave rahi mau rāve’a tauturu nō te tauturu ia ’outou ’ia manuia, e tae noa atu i te mau ’āpo’ora’a ’orometua. I roto i te reira mau ’āpo’ora’a, e nehenehe ’outou e tāu’aparau ’e te tahi atu mau ’orometua nō ni’a i te mau huru tītaura’a ato’a tā ’outou e fārerei. E nehenehe ato’a ’outou e tāu’aparau ’e e fa’a’ohipa i te mau parau tumu o te ha’api’ira’a mai tā te Mesia.

• Mai te mea ē, tē ha’api’i ra ’outou i te mau tamari’i ’āpī a’e, ’e tē hina’aro ra ’outou i te tauturu hau atu, ’a hi’o « Pāhonora’a i te mau hina’aro o te mau tamari’i ’āpī a’e » i roto i teie rāve’a tauturu.

• Tē vai ra i roto i teie rāve’a tauturu te mau fa’anahora’a nō te mau hepetoma ato’a o te matahiti, ’eiaha rā nō nā sābati e piti e tupu ai te ’āmuira’a rahi. I te sābati ’aita e fa’atupuhia te paraimere, nō te ’āmuira’a titi ānei, ’e ’aore rā, nō te tahi atu tumu, e nehenehe te mau ’utuāfare e tāmau noa i te tai’o i te Faufa’a ’Āpī i te fare ’ia au i te tārena i fa’anahohia. Nō te tāpe’a noa i tā ’outou piha ha’api’ira’a Paraimere i ni’a i te tārena, e nehenehe tā ’outou e ’ōu’a i te hō’ē ha’api’ira’a, ’e ’aore rā, e ’āmui e piti ha’api’ira’a. Nō te pāruru i te ’āhuehue, e hina’aro paha te mau peresideni Paraimere e fa’aara i te mau ’orometua ha’api’i nā mua roa, i teie mau fa’atanotanora’a.

metua vahine e tauturu rā i te mau tamari’i