31 nō tītema–6 nō tēnuare.

Tei ia tātou te hōpoi’a nō tō tātou iho ha’api’ira’a mai.

’A tai’o ai ’outou i te mau pāpa’ira’a mo’a i roto i teie fa’anahora’a, ’a pāpa’i i te mau mana’o pae vārua tā ’outou e fāri’i. E ’ite ’outou ē, i roto i te mau fa’anahora’a ato’a i roto i teie buka ha’api’ira’a, tē vai ra te mau ’ohipara’a nā te mau tamari’i ’āpī a’e ’e te mau tamari’i pa’ari a’e, terā rā, e nehenehe ’outou e fa’aau i te mau huru ’ohipara’a ato’a nō tā ’outou piha ha’api’ira’a.

Pāpa’i i tō ’outou mau mana’o

Ani ’ia fa’a’ite

I te ha’amatara’a o te piha ha’api’ira’a tāta’itahi, ’a hōro’a i te mau tamari’i i te mau rāve’a nō te fa’a’ite mai i tā rātou i ’apo mai nō ni’a i te ’evanelia. ’Ei hi’ora’a, i teie hepetoma, e nehenehe ’outou e ani ia rātou ’ia fa’a’ite mai i tā rātou mau ’ā’amu au roa nō ni’a ia Iesu Mesia.

Ha’api’i i te ha’api’ira’a tumu

Te mau tamari’i ’āpī a’e

Tē hina’aro nei Iesu Mesia ’ia pe’e au iāna.

E tai’o ’outou ’e te mau tamari’i e rave rahi ’ā’amu nō roto mai i te orara’a ’o Iesu Mesia i teie matahiti. ’A tauturu i te mau tamari’i ’ia hāro’aro’a, i te tumu tātou e ha’api’i ai i teie mau ’ā’amu, ’ia ti’a ïa ia tātou ’ia pe’e maita’i a’e i te hi’ora’a maita’i roa ’o Iesu Mesia.

Te mau ’ohipara’a e ti’a ’ia rave

• ’A tai’o i te anira’a a te Fa’aora, « mai, pe’e mai iā’u », e ’itehia i roto i te Luka 18:22. ’A ha’uti i te hō’ē ha’uti i reira te hō’ē tamari’i e fa’a’ite mai ai i te hō’ē ’ohipa, ’e i muri iho, ’a parau ai i te tahi atu mau tamari’i, « mai, pe’e mai iā’u ». ’A ani i te tahi atu mau tamarii ’ia rave fa’ahou i te ha‘uti.

• ’A fa’a’ite i te mau hōho’a o te ta’ata e pe’e ra i te Fa’aora i roto i te mau huru e rave rahi, i te ’anotau ’a tāvini ai ’oia i te tāhuti nei, ’e i tō tātou nei ’anotau. E ’itehia ia ’outou te mau hōho’a i roto i te Gospel Art Book ’e ’aore rā, te mau ve’a a te ’Ēkālesia. E nehenehe ato’a ’outou e fa’a’ite i te video « Te mārmarama o te ao ne » (LDS.org). ’A fa’aue i te mau tamari’i ’ia ’imi e mea nāfea te ta’ata i te pe’era’a i te Fa’aora.

• ’A tauturu i te mau tamari’i ’ia feruri i te mau mea tā rātou e rave nei nō te pe’e i te Fa’aora. E nehenehe te hīmenera’a « Sans tarder, je recherche mon Sauveur », Chants pour les enfants, 67, e hōro’a ia rātou i te tahi mau mana’o. 'A fa’aue ia rātou 'ia pāpa’i i te mau hōho’a nō rātou iho o te rave ra i te reira mau ’ohipa.

E parau mau te mau p-apa‘iraa mo‘a.

E noa’a te ’itera’a pāpū’o te mau tamari’i ē, e parau mau te mau pāpa’ira’a mo’a, noa atu ē, hou ’a ti’a ai ia rātou ’ia tai’o i te reira. ’A tuatāpapa ai ’outou ’e te mau tamari’i i te mau pāpa’ira’a mo’a i teie matahiti, e nehenehe tā ’outou e tauturu ia rātou ’ia ’ite nā roto ia rātou iho ē, e parau mau te mau pāpa’ira’a mo’a.

Te mau ’ohipara’a e ti’a ’ia rave

• ’A ani i te mau tamari’i ’ia fa’a’ite mai nō ni’a i te mau tao’a au-roa-hia e rātou tā rātou i fāri’i i te ’ōro’a mahana fānaura’a ’e ’aore rā, nō te tahi atu mau taime. ’A hōpoi mai i te hō’ē buka pāpa’ira’a mo’a i pū’ohuhia ’ei tao’a hōro’a, ’a fa’aue i te mau tamari’i ’ia tātara i te reira, ’e ’a fa’a’ite pāpū ē, ’ua riro te mau pāpa’ira’a mo’a ’ei tao’a hōro’a nā tātou nō ’ō mai i te Metua i te Ao rā ra.

• ’A fa’a’ite i te mau tamari’i i te tahi mau buka ’ā’amu feruri-mana’o-noa-hia, ’e ’a ani ia rātou e aha tā rātou mau ’ā’amu au roa a’e. ’A fa’a’ite ia rātou i te mau pāpa’ira’a mo’a, ’e ’a fa’a’ite pāpū ē, tei roto i te mau pāpa’ira’a mo’a te parau nā te Atua nō tātou, ’e te parau nei nō te mau ta’ata tei ora mau nā, ’e te mau ’ohipa tei tupu mau nā.

• ’A fa’a’ite i te mau poro’i e ’itehia i roto i te 2 Timoteo 3:15 ’e Moroni 10:3–5, ma te tauturu i te mau tamari’i ’ia fa’ahiti fa’ahou i te tahi mau pereota. ’A tauturu ia rātou ’ia’ ite ē, e nehenehe rātou e ’ite nā roto ia rātou iho ē, e parau mau te mau pāpa’ira’a mo’a.

• ’A huna i te hō’ē hōho’a ’o te Fa’aora, ’e ’a hōro’a i te tahi mau tāpa’o i te mau tamari’i nō te tauturu ia rātou ’ia ’ite i te reira. ’A tauturu i te mau tamari’i ’ia hāro’aro’a, e nāfea te ’imira’a i te mau pāpa’ira’a mo’a e nehenehe ai e tauturu ia rātou ’ia ’ite ia Iesu Mesia. ’A fa’aue i te tamari’i tāta’itahi ’ia huna i te hōho’a ’e ’ia hōro’a i te mau tāpa’o i te tahi atu mau tamari’i.

• ’A hīmene ’āmui « Sans tarder, je recherche mon Sauveur » ’e « Quand je lis l'écriture sainte » Chants pour les enfants, 67–66, e ’a tauturu i te mau tamari’i ’ia ha’uti mai te au i te mau parau o te hīmene. ’A fa’a’ite i te mau tamari’i hō’ē ’e ’aore rā, e piti o tā ’outou mau pāpa’ira’a mo’a au roa, ’e ’a parau ia rātou ē, e mea nāfea tō ’outou ’itera’a ē, e parau mau te mau pāpa’ira’a mo’a. Mai te mea ē, tē vai ra tā te mau tamari’i mau pāpa’ira’a mo’a ’e ’aore rā, e mau ’ā’amu pāpa’ira’a mo’a au roa, ’a ani ia rātou ’ia fa’a’ite mai.

E nehenehe te mau tamari’i e fāri’i i tō rātou iho ’itera’a pāpū nō ni’a i te mau parau mau o te pāpa’ira’a mo’a.

Ha’api’i i te ha’api’ira’a tumu

Te mau tamari’i pa’ari a’e

Tē hina’aro nei Iesu Mesia ’ia ha’api’i au nō ni’a iāna ’e ’ia pe’e iāna.

’A feruri nā e mea nāfea tō ’outou ’itera’a ia Iesu Mesia. E aha tā ’outou e nehenehe e rave nō te tauturu i te mau tamari’i ’ia ha’api’i nō ni’a iāna ’e ’ia pe’e iāna ?

Te mau ’ohipara’a e ti’a ’ia rave

• ’A ani i te mau tamari’i ’ia paraparau mai nō ni’a i te hō’ē hoa rahi tā rātou i ’ite ’e ’ia fa’ata’a mai e mea nāfea teie ta’ata i te rirora’a mai ’ei hoa. ’A tai’o ’e ’a ’āparau Ioane 5:39 ’e Ioane 14:15 nō te ’ite i te mau rāve’a e nehenehe ai tātou e ’ite ē, ’ua fātata roa tātou ia Iesu. ’A ani i te mau tamari’i ’ia fa’a’ite mai i te mau taime ’a ’ite ai rātou ē, ’ua fātata roa rātou iāna.

• ’A fa’aorihaere i tā ’outou mau tamari’i ha’api’i ’ati a’e te fare purera’a. ’A ani i te mau tamari’i ’ia ’āfa’i mai i te rima i ni’a ’ia ’ite ana’e rātou i te hō’ē mea i roto i tō rātou tere orihaerera’a, o te fa’aha’amana’o ia rātou i te hō’ē rāve’a e nehenehe ai ia rātou ’ia pe’e i te Fa’aora (mai te vāhi bāpetizora’a ’e ’aore rā, hō’ē hōho’a).

• ’A hīmene e te mau tamari’i « Mai, pe’e mai », Te mau Hīmene, no. 58. ’A ani i te mau tamari’i ’ia fa’a’ite mai i te mau taime ’a pe’e ai rātou i te hi’ora’a ’o te Fa’aora.

E nehenehe tā’u e tuatāpapa i te mau pāpa’ira’a mo’a nō’u iho.

’Ia tai’o ana’e ’outou i te mau pāpa’ira’a mo’a ’e te mau tamarii, ’e ’a ui ai ia rātou i te mau uira’a, e nehenehe tā ’outou e patu i tō rātou ti’aturira’a ē, e nehenehe tā rātou e ha’api’i mai roto mai i te mau pāpa’ira’a mo’a, ’e ’ia ’ite i te mau tao’a faufa’a rahi o te ’ite.

Te mau ’ohipara’a e ti’a ’ia rave

• ’A tai’o ha’apūai Ioane 5:39 ’e Ohipa 17:10–11, ’e ’a ani i te mau tamari’i e aha tā rātou i ha’api’i mai nō ni’a i te huru o te tuatāpapara’a i te mau pāpa’ira’a mo’a.

• ’A mā’iti i te tahi mau pāpa’ira’a mo’a ’ōhie ’e te pūai, mai roto mai i te faufa’a ’āpī, ’a pāpa’i tāta’itahi i te reira i ni’a i te hō’ē ’api parau, ’e ’a huna i te mau ’api parau. ’A hāmani i te tahi mau tāpa’o o te arata’i i te mau tamari’i i roto i te ha’uti « ’imira’a tao’a » i roto i te piha ha’api’ira’a ’e ’aore rā, nā roto i te fare purera’a nō te ’imi i teie mau pāpa’ira’a mo’a. ’Ia ’ite‑ana’e-hia ia rātou te hō’ē pāpa’ira’a mo’a, ’a ’āparau i te aura’a o te pāpa’ira’a ’e nō te aha i riro ai ’ei tao’a faufa’a.

• ’A fa’a’ite i te tahi mau pāpa’ira’a mo’a tā ’outou i fa’ariro ’ei tao’a faufa’a rahi, ’e ’a fa’ata’a ē, nō te aha te reira i riro ai ’ei mea faufa’a nō ’outou. Nō te piha ha’api’ira’a, ’a hāmani i te hō’ē tāpura o te mau pāpa’ira’a mo’a faufa’a rahi tā te mau tamari’i e ’ite i roto i te faufa’a ’āpī i teie matahiti—i te fare ānei ’e ’aore rā, i te taime nō te paraimere.

• ’A fa’atupu i te hō’ē ’āparaura’a ’e te mau tamari’i nō te ’ite ē, nō te aha e mea fifi i te tahi taime ’ia tai’o i te mau pāpa’ira’a mo’a. ’A ani i te mau tamari’i ’ia fa’a’ite i te mana’o i te tahi ’e te tahi nō ni’a i te tuatāpapara’a i te mau pāpa’ira’a mo’a. ’A ani ato’a ia rātou ’ia fa’a’ite i te tahi mau ’itera’a maita’i tei noa’a ia rātou nō ni’a i te mau pāpa’ira’a mo’a.

• ’A tauturu i te mau tamari’i ’ia hāmani i te hō’ē tārena ’ōhie o tā rātou e nehenehe e fa’a’ohipa nō te tāpa’o, e aha te pinepinera’a tō rātou tai’ora’a i te mau pāpa’ira’a mo’a. E nehenehe teie tārena e fa’aha’amana’o ia rātou ’ia tai’o i te mau pāpa’ira’a mo’a i te mau mahana ato’a.

Hina’aro vau i tō’u iho ’itera’a pāpū.

Hina’aro te mau tamari’i tā ’outou e ha’api’i ra i tō rātou iho ’itera’a pāpū, mai te mea e hina’aro rātou e tāpe’a pūai noa i tō rātou fa’aro’o i te taime a tae mai ai te ’ati. E aha tā ’outou e rave nō te fa’auru ia rātou ’ia ha’api’i mai i te parau mau nō rātou iho ?

Te mau ’ohipara’a e ti’a ’ia rave

• ’A fa’a’ite i te ’ā’amu nō nā paretenia hō’ē ’ahuru (’a hi’o Mataio 25:1–13 ; ’a hi’o ato’a « Pene  47 : Nā paretenia hō’ē ’ahuru » Te mau ’ā’amu o te Faufa’a ’Āpī , 118–20, ’e ’aore ra, te video e tano LDS.org). ’A ani i te mau tamari’i : Nāfea tō tātou ’itera’a pāpū e riro ai mai te lamepa ? Nō te aha e mea faufaa ’ia roa’a tō tātou iho ’itera’a pāpū ?

• ’A ’āparau e aha tā tātou e nehenehe e rave nō te ha’apūai i tō tātou ’itera’a pāpū ? Nō te mau mana’o, ’a ani i te mau tamari’i ’ia ’imi Ioane 7:17 ’e Moroni 10:3–5. ’A ani ia rātou ’ia fa’a’ite mai i te mau mea tā rātou i ’ite e parau mau.

• ’A ani i te mau tamari’i ’ia tauturu mai ia ’outou ’ia tu’u i te mau pereota i ni’a i te mau ’ōfa’i patu o tē fa’ata’a ra i te mau mea tā tātou e rave nō te patu i tō tātou ’itera’a pāpū, mai te purera’a. ’A fa’aue i te mau tamari’i ’ia patu i te hō’ē patu nō te fa’ahōho’a i te hō’ē ’itera’a pāpū ma te fa’a’ohipa i te mau ’ofa’i patu.

Fa’aitoito i te ha’api’ira’a mai i te fare

Nāfea e ti’a ai ia ’outou ’ia fa’aitoito i te mau tamari’i ’e tō rātou mau metua, ’ia ha’api’i mai, nā roto mai i te Faufa’a ’Āpī i te fare ? ’Ei hi’ora’a, e nehenehe tā ’outou e fa’aitoito i te mau tamari’i ’ia tāmau ’ā’au i te hō’ē o te mau pāpa’ira’a mo’a tā ’outou i ’āparau i roto i te piha ha’api’ira’a (e mea maita’i ’ia tāpūpū i te pāpa’ira’a mo’a i roto i te mau pereota potopoto) ’e ’ia fa’a’ite i te ’īrava i tō rātou ’utuāfare.

Ha’amaita’i i tā tātou ha’api’ira’a

’A tāui i te mau ’ohipara’a ’ia au i te matahiti ’o te mau tamari’i tā ’outou e ha’api’i ra. E tītau te mau tamari’i ’āpī a’e i te mau ha’amāramaramara’a pāpū ’e ’ia ’apo mai nā roto mai i te mau rāve’a ha’api’ira’a rau. ’Ia haere te tamari’i i te pa’arira’a, e nehenehe tā rātou e rave hau atu, e te maita’i a’e paha nō te fa’a’ite i tō rātou mau mana’o. ’A hōro’a ia rātou i te mau rāve’a nō te fa’a’ite, nō te fa’a’ite pāpū, ’e nō te ’āmui, ’e ’a hōro’a i te tauturu e tītauhia. (’A hi’o Ha’api’ira’a mai tā te Fa’aora, 25–26.)