Maria ’e ’o Elizabeta

7-13 nō Tēnuare.

Mataio  1 ; Luka 1

« ’Ia nā-reira-hia mai au mai tā ’oe i parau nā »

Ha’amata nā roto i te tai’ora’a i te Mataio 1 ’e Luka 1. E nehenehe Mai, pe’e mai—Nō te ta’ata iho ’e te ’utuāfare e tauturu ia ’outou ’ia hāro’aro’a i teie mau pene, ’e e nehenehe teie fa’anahora’a e hōro’a mai ia ’outou i te mau mana’o nō te ha’api’ira’a. Mai te mea ē, e hina’aro ’outou i te tahi atu tauturu nō te ha’api’i i te mau tamari’i ’āpī a’e, ’a hi’o « Pāhonora’a i te mau hina’aro o te mau tamari’i ’āpī a’e » i te ’ōmuara’a o teie rāve’a tauturu.

Pāpa’i i tō ’outou mau mana’o

tāpa’o nō te fa’a’itera’a

’Ani ’ia fa’a’ite

’A ani i te mau tamari’i ’ia pārahi ha’amenemene, ’e ’a ani i te hō’ē tamari’i ’ia fa’a’ite mai i te hō’ē mea tāna i ’apo mai nō roto mai i te mau pāpa’ira’a mo’a i teie hepetoma ’e ’aore rā, i te tahi atu taime. E nehenehe te reira tamari’i e fa’a’ohu ’e ’aore rā, e fa’afāriu i te hō’ē pōpō i ni’a i te tahi atu tamari’i i roto i te menemenera’a, e nā te reira tamari’i te taime i teienei nō te fa’a’ite mai.

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i ’āpī a’e

Mareko 1:18–25; Luka 1:26-38

’Ua fa’aara te mau melahi i te fānaura’a o te Iesu.

’Ua fā mai te hō’ē melahi ia Maria ’e ia Iosepha nō te fa’a’ite mai i te fānaura’a ’o Iesu Mesia. E nehenehe teie mau ’itera’a e tauturu i te mau tamari’i ’ia ’ite i te faufa’a rahi o te fānaura’a o te Mesia.

Te mau ’ohipara’a e ti’a ’ia rave

• ’A ani i nā metua o te hō’ē tamari’i ’ia haere mai i roto i te piha ha’api’ira’a ma te ’ahu ia rāua mai ia Maria ’e ia Iosepha. ’A ani ’ia rāua ’ia fa’a’ite mai i tō rāua mau ’itera’a nō ni’a i te pāpa’ira’a i roto i te Mataio 1:18–25 ’e Luka 1:26–38.

• ’A fa’ati’a i te ’ā’amu o te mau melahi i te fāra’a mai ia Maria ’e ia Iosepha, mai tei pāpa’ihia i roto i teie mau ’īrava. (’A hi’o ato’a « Pene 2 : Maria ’e te Melahi » ’e « Pene 4 : Iosepha ’e te Melahi », Te mau ’ā’amu o te Faufa’a ’Āpī, 8–9, 12, ’e ’aore rā, te mau video e tano LDS.org.) E nehenehe ’outou e fa’a’ite i te hōho’a i roto i te fa’anahora’a o teie hepetoma i roto Mai, pe’e mai—Nō te ta’ata iho ’e te ’utuāfare. ’A ani i te mau tamari’i ’ia fa’ahiti fa’ahou mai i te ’ā’amu i mua ia ’outou.

• ’A ani i te mau tamari’i ’ia pāpa’i i te mau hōho’a o te mau ’ā’amu e ’itehia i roto i te Mataio 1:18–25 ’e Luka 1:26–38.

Luka 1:5–20, 57–63

Tē pāhono mai nei te Metua i te Ao ra i tā’u mau pure.

E mea pāpū ē, e rave rahi matahiti tō Zakaria ’e tō Elisabeta purera’a nō te hō’ē tamari’i. I te hōpe’a, ’ua pāhono mai te Metua i te Ao ra i tā rāua pure nā roto i te tonora’a mai i te hō’ē tamaiti nā rāua, ’o Ioane Baperizo. Nāfea e ti’a ai ia ’outou ’ia fa’a’ohipa i teie ’ā’amu nō te ha’api’i i te mau tamari’i, e pāhono mai te Metua i te Ao ra i te mau pure ?

Te mau ’ohipara’a e ti’a ’ia rave

• Nā roto i tā ’outou iho mau parau, ’a fa’a’ite i te ’ā’amu i roto i te Luka 1:5–20, 57–63. E hina’aro paha ’outou e fa’ahitihiti i te ’ā’amu nō te tahi taime. ’A fa’ata’a i te mau tamari’i nō te ha’uti i te ti’ara’a o te mau melahi, ’o Zakaria ’e ’o Elizabeta, ’e ’a fa’aha’uti i te ’ā’amu. ’A ha’apāpū ē, ’ua pāhono te Metua i te Ao ra i te mau pure ’a Elizabeta ’e ’a Zakaria, ’e ’a fa’a’ite i te hō’ē ’itera’a i reira tō te Metua i te Ao ra pāhonora’a i tā ’outou pure.

• ’A fa’a’ohipa « Le front baissé », Chants pour les enfants, 18, ’e ’aore rā, te tahi atu hīmene nō te ha’api’i i te mau tamari’i nāfea ’ia pure. E nehenehe ato’a ’outou e hīmene ’āmui « La prière d'un enfant », Buka Hīmene a te mau Tamari’i, 6–7. I te mau taime ato’a e hīmene te mau tamari’i i te ta’o ra « pure » ’a ani ia rātou ’ia taupe i tō rātou upo’o i raro ’e tufetu i tō rātou rima.

• ’A ani i te tamari’i tāta’itahi ’ia rave i te mau ’ohipa e fa’ahōho’a i te hō’ē mea e nehenehe tāna e pure nō te reira. ’A ani i te tahi atu mau tamari’i ’ia ’imi e aha te aura’a o te ha’utihia ra. E ’itehia ia rātou te mau mana’o i ni’a i te ’api ’ohipara’a nō teie hepetoma.

Luka 1:31–35

E Tamaiti ’o Iesu Mesia nā te Atua.

E Tamaiti ’o Iesu Mesia nā te Metua i te Ao ra ’e nā Maria. E aha tā ’outou e nehenehe e rave nō te tauturu i te mau tamari’i ’ia ha’api’i hau atu nō ni’a iāna ?

Te mau ’ohipara’a e ti’a ’ia rave

• ’A parau i te mau tamari’i ē, ’ua parau te melahi ia Maria, e pi’ihia tāna ’aiū te Tamaiti a te Atua (’a hi’o Luka 1:35). ’A tauturu i te mau tamari’i ’ia fa’ahiti fa’ahou i te pereota ra « e Tamaiti Iesu nā te Atua ». ’A tauturu i te mau tamari’i ’ia hāro’aro’a, o vai te metua ’o Iesu nā roto i te anira’a ia rātou ’ia pāpa’i i te hōho’a o tō rātou iho nā metua. ’Ia pāpa’i ana’e rātou, ’a parau ia rātou ē, e metua ato’a tō Iesu—o Maria ’e te Metua i te Ao ra. Ta’a ’ē atu i te reira, ’ua anihia ia Iosepha ’ia pāruru ’e ’ia aupuru ia Iesu ’a ora ai ’oia i ni’a i te fenua nei.

• ’A fa’a’ite i tō ’outou ’itera’a pāpū ē, nō te mea ho’i e Tamaiti Iesu nā te Atua, e nehenehe tāna e pohe nō tā tātou mau hara, ’e e ora fa’ahou mai. ’A fa’a’ite i te mau hōho’a nō te fa’asātaurora’a ’e te ti’afa’ahoura’a ’o Iesu (’a hi’o Gospel Art Book, nos. 57, 59).

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i pa’ari a’e

Mataio 1:18–25; Luka 1:5–37

’Aore roa ho’i e mea e ’ore e ti’a i te Atua.

Nā roto ana’e i te mana o te Atua i ti’a ai te fānaura’a ’o Iesu ’e ’o Ioane Bapetizo. E nehenehe te ’itera’a i teie mau temeio e ha’apūai i te fa’aro’o o te mau tamari’i, e mana tō te Atua nō te fa’atupu i te mau temeio i roto i tō rātou orara’a.

Te mau ohipara’a e ti’a ’ia rave

• A hi’ohi’o ai ’outou ’e te mau tamari’i i te Mataio 1:18–25 ’e Luka 1:5–37, ’a ani i te mau tamari’i i te mau uira’a mai teie « e aha tā ’outou e parau ’āhiri ē, ’o ’outou ’o Maria ? » ’e ’aore rā, « e aha tō ’outou mana’o ’āhiri ē, ’o ’outou ’o Zakaria ? »

• I roto i te mau parau ’ōhie noa, ’a fa’ati’a i te mau ’ā’amu o te fānaura’a ’o Ioane Bāpetizo ’e ’o Iesu Mesia. ’A ani i te mau tamari’i ’ia ’āfa’i i te rima i ni’a ’ia fa’aro’o ana’e rātou i te hō’ē mea e’ita e ti’a ’ia rave mai te mea ē, ’aita te mana o te Atua. E aha te tahi atu ā mau ’ā’amu e ti’a i te mau tamari’i ’ia fa’a’ite, i reira te Atua i te ravera’a i te hō’ē mea e’ita e ti’a ’ia rave ?

• ’A tauturu i te mau tamari’i ’ia tāmau ’ā’au Luka 1:37 Nō te rave i te reira, e nehenehe tā ’outou e pāpa’i i ni’a i te tāpura ’ere’ere, ’e e ani i te mau tamari’i ’ia fa’ahiti mai i te reira e rave rahi taime. I muri a’e i te taime tāta’itahi, ’a tūmā i te hō’ē ta’o .

Mataio 1:21–25; Luka 1:30–35, 46–47

E Tamaiti ’o Iesu Mesia nā te Atua.

E Tamaiti ’o Iesu Mesia nā te Metua i te Ao ra ’e nā Maria. Nāhea e ti’a ai ia ’outou ’ia tauturu i te mau tamarii ’ia ha’api’i i teie parau mau ?

Te mau ’ohipara’a e ti’a ’ia rave

• ’A ani i te mau tamari’i ’ia tai’o Luka 1:30–35, ma te ’imi i te mau pāhonora’a i teie mau uira’a : « ’O vai te metua vahine ’o Iesu ? » ’e « 'O vai te metua tāne ’o Iesu ? » 'A tauturu ia rātou 'ia hāro’aro’a, ’o Iesu Mesia ana’e te ta’ata ’o te Metua i te Ao ra tōna metua tāne i te tino nei (’a hi’o ato’a 1 Nephi 11:18–21).

• ’Ia tai’o ana’e ’outou i teie mau ’īrava, ’a ani i te mau tamari’i ’ia ’imi i te mau i’oa ’e ’aore rā, i te mau ti’ara’a ’o Iesu Mesia. E aha te aura’a o teie mau i’oa, ’e e aha tā te reira e ha’api’i mai nei ia tātou nō ni’a ia Iesu ?

• ’A fa’a’ite i tō ’outou ’itera’a pāpū nō ni’a ia Iesu Mesia, ’e a ani i te mau tamari’i ’ia fa’a’ite mai i tō rātou.

Gabiriela i te fāra’a mai ia Maria

Te fa’aarara’a, nā John Scott

Luka 1:5–25, 57–80

Te fa’aro’o ’e te pāhono nei te Metua i te Ao ra i tā’u mau pure.

E pāhono te Atua i te mau pure, ’eiaha rā mai tā tātou e hina’aro i te mau taime ato’a. Nāfea e ti’a ai ia ’outou ’ia fa’a’ohipa i te ’ā’amu ’o Zakaria ’e ’o Elizabeta nō te ha’api’i i te mau tamari’i i teie parau mau ?

Te mau ’ohipara’a e ti’a ’ia rave

• ’A ani i te mau tamari’i e aha tā rātou e parau i te hō’ē ta’ata tei pure nō te hō’ē ha’amaita’ira’a, ’aita ā rā i fāri’i atura i te reira. ’A ani ia rātou ’ia feruri i teie uira’a ’a tai’o ’āmui ai rātou i te Luka 1:5–25, 57–80. (’A hi’o ato’a « Pene 1 : Elizabeta ’e ’o Zakaria » ’e te « Pene 3 : ’Ua fānauhia ’o Ioane Bāpetizo », Te mau ’ā’amu o te Faufa’a ’Āpī, 6-7,10-11, ’e ’aore rā, te mau video e tano LDS.org.) E aha te ti’a ia Zakaria ’e ia Elizabeta ia parau i te hō’ē ta’ata tei feruri ē, ’aita tāna pure e pāhonohia ?

• ’A ani e rave rahi tamari’i nā mua roa ’ia fa’a’ite mai i te mau ’itera’a nō ni’a i te pāhonora’a te Metua i te Ao ra i tā rātou mau pure. ’A fa’a’ite i te hō’ē taime ’ua feruri ’outou ē, ’ua pāhonohia tā ’outou pure ta’a ’ē atu i tā ’outou i tīa’i ra.

• ’A ani i te mau tamari’i ’ia pāpa’i i te hō’ē hōho’a nō te hō’ē taime ’a pāhono ai te Metua i te Ao ra i te hō’ē pure—hō’ē hoa rā ’o tā rātou iho pure. ’A fa’aue ia rātou ’ia fa’a’ite mai i tā rātou mau hōho’a i mua i te piha ha’api’ira’a.

tāpa’o nō te ’apora’a mai

Fa’aitoito i te ha’api’ira’a mai i te fare

’A ani i te mau tamari’i ’ia fa’a’ite i tō rātou ’utuāfare i te hōho’a tā rātou i pāpa’i ’e ’a ani i te mau melo o tō rātou ’utuāfare ’ia fa’a’ite mai i te mau taime ’a pāhono mai ai te Atua i tā rātou mau pure.

Ha’amaita’i i tā tātou ha’api’ira’a

A tauturu i te mau tamari’i ’āpī ’ia ha’api’i mai roto mai i te mau pāpa’ira’a mo’a. Nō te tauturu i te mau tamari’i ’āpī ’ia ha’api’i mai roto mai i te mau pāpa’ira’a mo’a, ’a fa’atumu i ni’a i te hō’ē noa iho ’īrava o te pāpa’ira’a mo’a ’e ’aore rā, hō’ē noa a’e pereota tumu. E nehenehe ’outou e ani i te mau tamari’i ’ia ti’a i ni’a ’e ’aore rā, ’ia ’āfa’i i tō rātou rima i ni’a ’ia fa’aro’o ana’e rātou i te reira ta’o ’e ’aore ra, te reira pereota. (’A hi’o Ha’api’ira’a mai tā te Fa’aora, 21.)

’api ’ohipara’a : Te pāhono nei te Metua i te Ao ra i tā’u mau pure.