E ha’amori ana’e tātou iāna, nā Dana Mario Wood

14–20 nō Tēnuare.

Luka 2 ; Mataio 2

I haere mai ho’i mātou e tāhopu iāna

Ha’amata nā roto i te tai’ora’a i te Mataio  2 ’e Luka 2. E nehenehe te fa’anahora’a nō teie hepetoma nō roto mai i te Mai, pe’e mai—Nō te ta’ata iho ’e te ’utuāfare e tauturu ia ’outou ’ia hāro’aro’a i teie mau pene, ’e e nehenehe teie fa’anahora’a e hōro’a ia ’outou i te mau mana’o nō te ha’api’ira’a.

Pāpa’i i tō ’outou mau mana’o

Ani ’ia fa’a’ite

’A ani i te mau tamari’i ’ia fa’a’ite mai ia ’outou e aha tā rātou e ha’amana’o ra nō ni’a i te fānaura’a o te Mesia. E aha tā rātou mau vāhi au roa a’e o te ’ā’amu ?

Ha’api’i i te ha’api’ira’a tumu

Te mau tamari’i ’āpī a’e

Luka 2:1–14

’Ua fānauhia Iesu.

’Ua fa’aru’e Iesu i tōna fare i pīha’i iho i te Metua i te Ao ra, ’ia fānauhia mai ’oia i te fenua nei, ’ia riro ho’i ’oia ’ei Fa’aora nō tātou. Nāhea e ti’a ai ia ’outou ’ia tauturu i te mau tamari’i ’ia ha’amana’o i te ’ā’amu o te fānaura’a ’o te Mesia ?

Te mau ’ohipara’a e ti’a ’ia rave

• ’A tai’o ai ’outou i te ’ā’amu o te fānaura’a o te Mesia, ’a ani i te mau tamari’i ’ia ha’uti rātou iho i te ’ā’amu ’e ’aore rā, ’ia fa’a’ohipa i te ’api ’ohipara’a o teie hepetoma. ’A hi’o ato’a « Pene 5 : ’Ua fānauhia Iesu Mesia », Te mau ’ā’amu o te Faufa’a ’Āpī , 13–15, ’e ’aore rā, te video e tano (LDS.org).

• Mai te mea ē, tē vai ra tā ’outou fātene, ’a ’āfa’i mai i te reira, ’e ’a ani i te mau tamari’i ’ia tu’u i te mau tuha’a i tō rātou vāhi mau ’a fa’ati’a noa ai ’outou ia rātou i te ’ā’amu o te fānaura’a ’o Iesu Mesia. E nehenehe ato’a ’outou e fa’a’ite i te hō’ē hōho’a o te fānaura’a (’a hi’o te fa’anahora’a o teie hepetoma i roto Mai, pe’e mai—Nō te ta’ata iho ’e te ’utuāfare. ’A fa’atoro i ni’a i terā e terā ta’ata i roto i te fātene ’e ’a ani i te mau tamari’i ’ia fa’a’ite mai i te mea tā rātou i ’ite nō ni’a i te ta’ata tāta’itahi.

• ’A hīmene ’āmui i te hīmene au roa a’e a te mau tamari’i nō ni’a i te fānaura’a ’o Iesu. ’A nā reira ai ’outou, ’a ’imi i te mau rāve’a nō te fa’a’ite i tō ’outou ’itera’a pāpū nō te Fa’aora ’e ’a ani i te mau tamari’i ’ia fa’a’ite mai, nō te aha rātou i here ai ia Iesu.

Mataio 2:1–12

E nehenehe tā’u e hōro’a i te mau ō maita’i nā Iesu.

’Ua hōro’a te feiā pa’ari i te auro, te tāpau libano ’e te mura nā Iesu. Nāfea e ti’a ai ia ’outou ’ia fa’a’ohipa i teie ’ā’amu nō te ha’api’i i te mau tamari’i ē, e nehenehe ato’a rātou e hōro’a i te mau ō nā Iesu—mai te here, te tāvinira’a ’e te ha’apa’ora’a ?

Te mau ’ohipara’a e ti’a ’ia rave

• ’A fa’a’ite i te hō’ē hōho’a o te feiā pa’ari ’a hi’o fa’ahou ai ’outou e te mau tamari’i, i tō rātou ’ā’amu, o te ’itehia i roto i te Mataio 2:1–12. E nehenehe ’outou e fa’a’ite i te hōho’a Te pūpūra’a te feiā pa’ari i te mau ō (LDS.org).

• ’A pū’ohu i te hō’ē hōho’a ’e ’aore rā, i te tahi mau tao’a mai te au i te hō’ē ō nō te fa’ahōho’a i te mau ō tā tātou e nehenehe e hōro’a nā Iesu. ’A ani i te mau tamari’i ’ia tauturu ia ’outou ’ia ’īriti i te mau ō ’e ’ia ’āparau, e nāfea tātou i te hōro’a i teie mau tao’a nā te Fa’aora.

• ’A taututu i te tamari’i tāta’itahi ’ia pāpa’i i te hōho’a ’e ’aore rā, ’ia pāpa’i i te hō’ē tāpura o te mau ō tā rātou e nehenehe e hōro’a nā Iesu, mai « te rirora’a ’ei hoa maita’i » ’e ’aore rā, « te purera’a ». ’A ani i te mau tamari’i ’ia fa’a’ite mai i tā rātou mau tāpura i tō te piha ha’api’ira’a ’e ’ia mā’iti hō’ē nō te fa’a’ohipa i teie hepetoma.

Luka 2:40–52

’Ua riro Iesu ’ei tamarii nā mua mai iā’u.

E nehenehe te ha’api’ira’a nō ni’a i te tamari’iri’ira’a o te Fa’aora e tauturu i te mau tamari’i tā ’outou e ha’api’i ra e ’ati atu iāna. ’A ani i te mau tamari’i e aha tā rātou e nehenehe e ha’api’i mai, mai roto mai i teie mau ’īrava, e nāfea rātou e nehenehe ai e riro mai ia Iesu i teie nei.

Te mau ’ohipara’a e ti’a ’ia rave

• ’A ani i te hō’ē o te feiā ’āpī i roto i te paroisa ’ia haere mai i roto i te piha ha’api’ira’a ’e ’ia fa’a’ite mai i te ’ā’amu ’o Iesu i te ha’api’ira’a i roto i te hiero i te tau e taure’are’a noa ā ’oia.

• ’A ani e rave rahi tamari’i nā mua roa ’ia hōpoi mai i tō rātou mau hōho’a i tō rātou tau ’aiūra’a nō te fa’a’ite mai. ’A ani ia rātou, e mea nāfea tō rātou tupura’a i te rahi. ’A fa’a’ite i te tahi mau huru ’o tō Iesu tupura’a i te rahi (’a hi’o Luka 2:40, 52). ’A hīmene ’e te mau tamari’i « Jésus enfant », Chants pour les enfants, 34, ’e ’aore rā, i te tahi atu hīmene nō ni’a i te Fa’aora.

• ’A tai’o Luka 2:52 ’e ’a fa’ata’a, e aha te aura’a nō te parau ra, « pa’ari » ’e « tino ». E nehenehe ’outou e ani i te mau tamari’i ’ia rave i te mau ’ohipa o te fa’a’ite, e aha te aura’a ’ia rahi te pa’ari ’e ’ia auhia mai e te Atua ’e te tahi atu mau ta’ata. ’Ei hi’ora’a, e nehenehe rātou e ha’uti ma te tai’o i te hō’ē buka ’e ’aore rā, te tauturura’a i te hō’ē ta’ata e fifi tōna.

Ha’api’i i te ha’api’ira’a tumu

Te mau tamari’i pa’ari a’e

Luka 2:1–21; Mataio 2:1–2

’Ua tohu te mau peropheta i tahito ra i te fānaura’a o te Fa’aora.

’Ua tīa’i te mau peropheta ’e te mau pipi e rave rahi tēnētere i te fānaura’a o te Fa’aora. E nehenehe te hāro’aro’ara’a i teie parau mau e tauturu i te mau tamari’i ’ia noa’a te hō’ē here hōhonu atu nō te orara’a ’e te misiōni ’a te Fa’aora.

Te mau ’ohipara’a e ti’a ’ia rave

• ’A ani i te mau tamari’i ’ia parau mai nō ni’a i te mau mea tā rātou e tīa’i nei, mai te mahana fānaura’a, ’e ’aore rā, te pu’e tau fa’afa’aeara’a. ’A ani i te mau tamari’i ’ia tai’o Helamana 14:2–5 nō te ’imi i te hō’ē mea tā te mau peropheta e tīa’i ra.

• ’A tai’o ’āmui i te tahi mau tohura’a nō ni’a i te fānaura’a o te Fa’aora (’a hi’o Isaia 7:14 ; 9:6 ; 1 Nephi 11:18 ; Helamana 14:5). ’A tauturu i te mau tamari’i ’ia tāpura i te mau mea e vai ra i roto i teie mau tohura’a, ’e ’a ’imi i tō rātou tupura’a i roto i te Luka 2:1–21 ’e Mataio 2:1–2.

• ’A ani i te mau tamari’i ’ia pāpa’i i te hō’ē hōho’a o te fātene ’e ’ia fa’a’ite mai, nō te aha rātou e māuruuru ai, e ’ua fānauhia Iesu.

Simona e tāhopu nei i te Mesia tamari’i, nā Greg K. Olsen

Luka 2:40, 52

’Ua riro Iesu ’ei tamari’i na mua mai iā’u.

Mai ia Iesu, e misiōni faufa’a rahi tā te mau tamari’i tā ’outou e ha’api’i ra e fa’aineine. E aha te mea tā rātou e nehenehe e ha’api’i mai, mai roto mai i te hi’ora’a o Iesu ?

Te mau ’ohipara’a e ti’a ’ia rave

• ’A tai’o ai ’outou Luka 2:40, 52, ’a parau i te mau tamari’i ’ia fa’aro’o i te mau mea tā Iesu i rave. ’A ani i te mau tamari’i ’ia fa’a’ite mai i te mau rāve’a ’a tupu ai rātou i te rahi mai tō rātou na’ina’ira’a. ’A fa’a’ite i tō ’outou iho ’itera’a nō ni’a i te ha’api’ira’a mai i te ’evanelia te tahi vāhi iti ’e te tahi vāhi iti ; i muri iho ’a fa’a’ite i tō ’outou ’itera’a pāpū.

• ’A fa’a’ī i te mau ’ohipara’a e fa’ahōho’a nei i te mau pereota i roto i te Luka 2:40, 52. ’Ei hi’ora’a, e nehenehe ’outou e fāito i te roa o te tamari’i tāta’itahi (« Tupu atura Iesu i te ... rahi ») ’e ’aore rā, ’a fa’aue ia rātou ’ia fa’a’ite mai i tā rātou pāpa’ira’a mo’a au roa a’e (« e itoito atura ho’i te ’ā’au »). ’A tauturu i te mau tamari’i ’ia hāmani i te hō’ē pāpa’ira’a o tō rātou huru tupura’a ’e ’ia fa’a’ite i te reira i tō rātou ’utuāfare.

• I muri a’e i te hi’ora’a i te Luka 2:40, 52, ’a ani i te mau tamari’i ’ia fa’a’ite mai, i tō rātou mana’o, e aha te huru ’o Iesu i tō rātou fāito matahiti. E aha tōna huru i ni’a i tōna metua vahine ? Tōna mau taea’e ’e te mau tuahine ?

Luka 2:41–52

E nehenehe tā‘u e pe’e i te hi‘ora’a maita’i ’o Iesu.

I tōna tau taure’are’ara’a, ’ua ha’api’i Iesu i te feiā pa’ari i roto i te hiero. ’Oia ato’a te mau tamari’i i roto i tā ’outou piha ha’api’ira’a, e rave rahi tā rātou e ha’api’i i te feiā ’ati a’e ia rātou.

Te mau ’ohipara’a e ti’a ’ia rave

• ’A ani i te hō’ē tamari’i ’ia haere mai ma te ineine nō te ha’apoto mai i te ’ā’amu i roto i te Luka 2:41-52. Nō te tauturu i te mau tamari’i ’ia hāro’aro’a i te ’ā’amu, ’a ha’api’i e aha te aura’a nō te parau ra « ia ha’apa’o vau i tā tā’u Metua e ti’a ai ». ’Ei hi’ora’a, e nehenehe ’outou e parau i te mau tamari’i, e aha tā ’outou ’e ’aore rā, tā tō ’outou nā metua e rave nō te hō’ē ’ohipa. E aha te tōro’a ’e ’aore rā, te « ’ohipa » a Iosepha, te metua tāne ’o Iesu i te tino nei ? (’a hi’o Mataio 13:55). E aha te ’ohipa a tōna Metua i te Ao ra ? (’a hi’o Luka 2:46–49 ; ’a hi’o ato’a Mose 1:39).

• ’A tai’o ’e te mau tamari’i Luka 2:46–49 ’e a ui, « nāhea Iesu i te ravera’a i te tā « tōna Metua ? » 'A tauturu i te mau tamari’i 'ia tāpura ’e 'aore r-a, 'ia pāpa’i i ni’a i te tāpura ’ere’ere i te mau rāve’a e nehenehe ai ia rātou 'ia tauturu i te ravera’a ato’a i te ’ohipa a te Metua i te Ao ra.

• Nō te tauturu i te mau tamari’i ’ia patu i tō rātou ti’aturira’a, e nehenehe rātou, mai te tamaiti Iesu, e ha’api’i i te ’evanelia, ’a tauturu ia rātou ’ia tamatamata i te ha’api’i te tahi ’e te tahi i te hō’ē parau tumu mai roto mai i te Nō te Pūai o te Feiā ’āpī

Fa’aitoito i te ha’api’ira’a mai i te fare

’A ani i te mau tamari’i ’ia ha’api’i i tō rātou ’utuāfare i te hō’ē mea tā rātou i ’apo mai nō ni’a i te fānaura’a o te Mesia.

Ha’amaita’i i tā tātou ha’api’ira’a

E mea hi’opo’a te mau tamari’i ’e e rave rahi rāve’a tā rātou nō te ha’api’i mai. E ’oa’oa te mau tamari’i ’ia ha’api’i mai nā roto i te mau ’itera’a ’āpī ’e te rau. ’A fa’a’ohipa i te mau ’ohipara’a o te tauturu ia rātou ’ia haere i mua, ’ia fa’a’ohipa i to rātou mau hōro’a ato’a, ’ia tuatāpapa ’e ’ia tāmata i te mau mea ’āpī. (’A hi’o Ha’api’ira’a mai tā te Fa’aora, 25–26.)