« 14–20 nō tēnuare. « Luka 2 ; Mataio 2 : I haere mai ho’i mātou e tāhopu iāna » Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 14–20 nō tēnuare. Luka 2; Mataio 2 », Mai, pe’e mai—nō te ta’ata hō’ē ’e te ’utuāfare : 2019
Let Us Adore Him, nā Dana Mario Wood
14–20 nō tēnuare
Luka 2; Mataio 2
I haere mai ho’i mātou e tāhopu iāna
Ha’amata nā ni’a i te tai’ora’a i te Luka 2 ’e te Mataio 2, ’e ’a ha’apa’o maita’i i te mau mea pae vārua tā ’outou e ’apo mai. E tauturu te mau mana’o tuatāpapara’a i roto i teie arata’ira’a ha’api’ira’a ’ia fa’ata’a mai ’outou i te tahi mau parau tumu faufa’a roa a’e i roto i teie mau pene.
Tāpa’opa’o i te mau mana’o e tae mai ia ’outou
Mai tōna fānaura’a mai ā, ’ua pāpū i te ta’ata ē, e ’ere Iesu i te tamari’i mai te reira noa. E ’ere nō te fēti’a ’āpī noa i roto i te ra’i ’aore rā te fa’a’itera’a ’oa’oa a te mau melahi i ta’a ’ē ai te na’ina’ira’a o Iesu. ’O te mea ato’a rā ē, ’ua rau te ta’ata ha’apa’o maita’i—nō te mau nūna’a ’e’ē, te tōro’a ’e’ē ’e te vāhi ’e’ē—tei putapū ’oi’oi e ha’afātata mai iāna. Hou roa ’oia i te fa’ahitira’a i teie anira’a « ’a haere mai ’a pe’e mai iā’u », ’ua haere a’ena mai rātou (Luka 18:22). ’Oia, e ’ere te tā’āto’ara’a tei haere mai iāna—e rave rahi tei ’ore i tāu’a iāna, ’e ’ua ’imi ato’a ho’i te tahi fa’atere e rave i tōna ora. ’Ua ’ite rā te ta’ata ha’eha’a ’e te ’ā’au mā ’e te paieti ’e te ’imi parau ti’a i te mea tā rātou i ’imi iāna. Tē fa’auru nei tā rātou pūpūra’a ia rātou i tā tātou iho nei, inaha te « parau maita’i… ’o te riro ïa ’ei ’oa’oara’a » tei fa’ataehia i te mau tīa’i māmoe, nō te « ta’ata ato’a », ’e ’ua fānauhia te « Mesia ra ’o te Fatu » i terā ra mahana nō tātou pā’āto’a nei (hi’o Luka 2:10–11).
Mau mana’o nō tā ’oe iho tuatāpapara’a pāpa’ira’a mo’a
’Ua fānauhia Iesu Mesia i roto i te ha’eha’a.
Noa atu ā e hanahana tō Iesu Mesia, i te Atua te Metua ra, « hou teie nei ao ra » (Ioane 17:5), ’ua fāri’i ’oia ’ia fānauhia ’oia i roto i te ha’eha’a ’e ’ia ora i rotopū ia tātou i ni’a i te fenua nei. ’Ia tai’o ’oe i te Luka 2:1–7, e aha tā ’oe e ’ite ra nō ni’a i te ha’eha’a o tōna fānaura’a ? E tāmata i te hi’o i te hō’ē mea i roto i te ’ā’amu tā ’oe i ’ore i tāu’a i nā mua ra. E aha tā ’oe e ha’api’i ra nō ni’a i te Fa’aora i roto i te huru o tōna fānaura’a ? Nāhea teie mau mea i ’apohia mai e ha’uti i ni’a i tō ’oe mau mana’o nō ni’a iāna ?
Hi’o ato’a i te video « The Nativity » (LDS.org).
E rave rahi ’ite nō te fānaura’a o te Mesia.
’Ua ’itehia te mau ’ite ’e te feiā ha’amori huru rau nō te fānaura’a ’e te na’ina’ira’a o te Mesia—e mau tīa’i māmoe ha’eha’a tei haere i te fare animara, e mau ta’ata pa’ari ’e te moni tei hōpoi mai i te mau tao’a i tōna fare, e vahine ’ivi tei tāvini i roto i te hiero ’e e pipi ha’apa’o maita’i tei tīa’i maoro i te taera’a mai te Mesia. ’Ia hi’o haere ’oe i tō rātou ’ā’amu, e aha tā ’oe e ’apo nei nō ni’a i te mau rāve’a e ha’amori ’e e fa’a’ite pāpū nō te Mesia ?
|
’Ite nō te Mesia |
E aha tā’u e ha’api’i nei nō ni’a i te ha’amorira’a ’e te fa’a’ite-pāpū-ra’a ? |
|---|---|
’Ite nō te Mesia Te mau tīa’i māmoe (Luka 2:8–20) | E aha tā’u e ha’api’i nei nō ni’a i te ha’amorira’a ’e te fa’a’ite-pāpū-ra’a ? |
’Ite nō te Mesia Simeona (Luka 2:25–35) | E aha tā’u e ha’api’i nei nō ni’a i te ha’amorira’a ’e te fa’a’ite-pāpū-ra’a ? |
’Ite nō te Mesia Ana (Luka 2:36–38) | E aha tā’u e ha’api’i nei nō ni’a i te ha’amorira’a ’e te fa’a’ite-pāpū-ra’a ? |
’Ite nō te Mesia Te mau ta’ata pa’ari (Mataio 2:1–12) | E aha tā’u e ha’api’i nei nō ni’a i te ha’amorira’a ’e te fa’a’ite-pāpū-ra’a ? |
Hi’o ato’a 1 Nephi 11:13–23; 3 Nephi 1:5–21.
E ti’a i te mau metua ’ia fāri’i i te heheura’a nō te pāruru i tō rātou ’utuāfare.
E’ita tā Iosepha e nehenehe e rave i tei anihia iāna ’ia rave—’oia ho’i, pāruru ia Iesu i tōna tamari’ira’a—’āhani ’aita te tauturu a te ra’i. Mai te mau ta’ata pa’ari, ’ua fāri’i ’oia i te hō’ē heheura’a tei fa’aara iāna i te atātara’a. ’Ia tai’o ’oe nō ni’a i te ’ohipa i tupu nō Iosepha, ’a feruri i te mau atātara’a i mua i te mau ’utuāfare i teie nei mahana. ’A feruri i te mau taime ’ua putapū ’oe i te arata’ira’a a te Atua nō te pārurura’a ia ’oe ’e tō ’oe ’utuāfare ’aore rā tei herehia. ’A ’ōpua i te fa’a’ite i te reira i te tahi mau pu’era’a. E aha tā ’oe e nehenehe e rave nō te fāri’i i te reira arata’ira’a i te mau mahana i muri nei ?
I tōna taure’are’ara’a, ’ua rōtahi Iesu i ni’a i te ravera’a i te hina’aro o tōna Metua.
I tōna ’āpīra’a, ’ua ha’api’i te Fa’aora i te ’evanelia ma te mana rahi ’e ’ua hitimahuta roa te mau ’orometua i roto i te hiero i « tōna ’ite ’e tāna parau » (Luka 2:47). E aha tā ’oe e ha’api’i ra i roto i teie mau ’īrava nō ni’a i te Fa’aora i tōna taure’are’ara’a ? Nāhea te feiā ’āpī tā ’oe i mātau e tāmata nei i te « ha’apa’o i te ’ohipa a [tō rātou] Metua » ? (Luka 2:49). Nāhea te feiā ’āpī ’e te mau tamari’i i te tauturu ia ’oe ’ia noa’a te māramarama rahi atu nō ni’a i te ’evanelia ? E aha atu ā tā ’oe e ha’api’i nei i roto i te hi’ora’a o Iesu i tōna tamari’ira’a, i roto i te Luka 2:40–52 ?
« ’Aita ’ōrua i ’ite ē ’ia ha’apa’o vau i tā ta’u Metua e ti’a ai ? » (Luka 2:49).
E aha te ’Īritira’a a Iosepha Semita ?
Nō te mea ’ua mo’e « te mau mea pāpū ’e te faufa’a ho’i » i roto i te Bibilia i roto i te mau tenetere (1 Nephi 13:28; hi’o ato’a Mose 1:41), ’ua fa’aue te Fatu ia Iosepha Semita ’ia hāmani i te hō’ē nene’ira’a fa’auru o te Bibilia, tei parauhia te ’Īritira’a a Iosepha Semita. E rave rahi fa’atanora’a tā te Peropheta i rave, tei tu’uhia i roto i te parau hi’u o te nene’ira’a pāpa’ira’a mo’a a te Feiā Mo’a i te Mau Mahana Hope’a Nei. Tē vai ato’a ra i roto i te nene’ira’a a te Feiā Mo’a nō te Bibilia a te ari’i Iakobo i te mau fa’ata’ara’a raro ’e te mau tauira’a a te Peropheta. E ’itehia te ’īritira’a a Iosepha Semita nō te Mataio 24, tei mātauhia i te parau te Iosepha Semita—Mataio, i roto i te Poe Tao’a Rahi.
Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
E ani i te mau melo o te ’utuāfare ’ia mā’iti i te hō’ē ta’ata i parauhia i roto i te Luka 2, e tai’o i te tahi mau ’īrava nō ni’a i te ’ohipara’a terā ta’ata ’e te Fa’aora ’e e fa’a’ite mai i te hō’ē mea tā rātou i ha’api’i mai tei fa’arahi i tō rātou fa’aro’o ia Iesu Mesia. Hīmene ’āmui i te hīmene « Berceuse de Marie à l’enfant Jésus » ’aore rā « C’est l’heureux temps », Buka hīmene nā te mau tamari’i, 28–29, 32–33. E aha tā ’outou e ha’api’i i roto i teie mau hīmene nō ni’a i te fānaura’a o te Fa’aora ?
E aha « te ’ohipa a [te] Metua » ? (hi’o Mose 1:39). E aha tā tātou e ha’api’i nei nō ni’a i terā ’ohipa i roto i teie ’ā’amu ’e i roto i te tahi atu mau mea tā Iesu i rave ’e i ha’api’i i roto i tōna orara’a ? ’A ’ōpua i te pāpa’i i te tahi mau rāve’a e ’āmui atu tō ’outou ’utuāfare i roto i te ’ohipa a te Metua ’e e tu’u i te reira i roto i te hō’ē ’āu’a. I roto i te hepetoma i muri mai, ’ia hi’o tō ’outou ’utuāfare i te tahi rāve’a nō te rave i te ’ohipa a te Metua i te Ao ra, e nehenehe tā rātou e mā’iti i te tahi mana’o i roto i terā ’āu’a. E fa’anaho i te hō’ē taime e fa’a’ite i te ’ohipa i tupu nō ’outou.
E aha tā tātou e nehenehe e ha’api’i i roto i te Luka 2:52 nō ni’a i te huru Iesu i te pa’arira’a i roto i tōna orara’a ? E aha te mau rāve’a e nehenehe ai te mau melo o te ’utuāfare e tupu rahi i « te pa’ari, ’e te herehia mai e te Atua ’e te ta’ata ato’a » ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
Fa’a’ohipa i te mau mātēria tauturu nō te tuatāpapara’a pāpa’ira’a mo’a Nō te ’apo mai i te tahi atu ā mea i roto i te tuatāpapara’a pāpa’ira’a mo’a, ’a fa’a’ohipa i te mau fa’ata’ara’a raro ’e te tahi atu mau mātēria tauturu mai te LDS.org.
’Ua haere mai te Fa’aora o te ao i te fenua nei nā roto i te ha’eha’a.