« 21–27 nō tēnuare. Ioane 1 : ’Ua ’itehia mai ia mātou te Mesia », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 21–27 nō tēnuare. Ioane 1 », Mai, pe’e mai—nō te ta’ata hō’ē ’e te ’utuāfare : 2019
21–27 nō tēnuare
Ioane 1
’Ua ’itehia mai ia mātou te Mesia
’A tai’o ’e ’a feruri ai ’outou nō ni’a i te Ioane 1, ’a tāpa’opa’o i te mau mana’o e tae mai. E aha te mau poro’i tā ’outou i ’ite e mea faufa’a rahi nō ’outou ’e nō tō ’outou ’utuāfare ? E aha tā ’outou e nehenehe e fa’a’ite i roto i te piha ha’api’ira’a ?
Tāpa’opa’o i te mau mana’o e tae mai ia ’outou
’Ua ui a’enei tō ’outou mana’o ē, e fāri’i ānei ’outou ia Iesu nō Nazareta ’ei Tamaiti a te Atua ’āhani i ora ’outou i te tau o tāna tāvinira’a tāhuti nei ? E mau matahiti e rave rahi tō te mau ’āti ’Īserā’ela, mai ia Anederea, Petero, Philipi ’e Natanaela, tīa’ira’a ’e purera’a ’ia tae mai te Mesia i parauhia. I tō rātou fārereira’a iāna, nāhea rātou i te ’itera’a ē, ’o ’oia taua ta’ata ra tā rātou i ’imi noa na ? Mai tā tātou ato’a e ha’api’i ’ia ’ite i te Fa’aora—nā roto i te fāri’ira’a i tāna anira’a ’ia « haere mai ’e ’a hi’o » tātou iho (Ioane 1:39). E tai’o tātou nō ni’a iāna i roto i te mau pāpa’ira’a mo’a. E fa’aro’o tātou i tāna ha’api’ira’a tumu. E ha’apa’o tātou i te huru ’oia e ora. E putapū tātou i tōna Vārua. ’A haere noa ai tātou, e ’ite mai tātou, mai ia Natanaela ē, ’ua ’ite te Fa’aora ’o vai tātou ’e ’ua here ’oia ia tātou ’e ’ua hina’aro ho’i ’ia fa’aineine ia tātou nō te fāri’i i te mea « e iti tenā i tā [’outou] e ’ite atu ā » (Ioane 1:50).
Mau mana’o nō tā ’oe iho tuatāpapara’a pāpa’ira’a mo’a
Te ’Evanelia a Ioane
’O vai Ioane ?
E pipi Ioane nō Ioane Bāpetizo ē i muri mai ’ua riro mai ’oia hō’ē o te feiā ’āpe’e mātāmua a Iesu Mesia ’e hō’ē o tāna ’ahuru ma piti ’āpōsetolo. Nāna i pāpa’i te ’Evanelia a Ioane, te tahi mau rata ’e te buka Apokalupo. I roto i tāna ’Evanelia, tē parau nei ’oia iāna i te pipi « here a Iesu ra » ’e « taua pipi ato’a ra » (Ioane 13:23; 20:3). Nō te pūai rahi o tōna hina’aro ’ia poro i te ’evanelia ’ua ani ’oia ’ia fa’aea mai ’oia i ni’a i te fenua nei ē tae roa i te Tae-piti-ra’a mai o te Fa’aora, ’ia ti’a iāna ’ia hōpoi i te mau vārua i te Mesia ra (hi’o PH&PF 7:1–6).
« I te mātāmua ra, i te Atua ra ho’i » Iesu Mesia.
’Ua ha’amata Ioane i tāna ’Evanelia nā roto i te fa’ata’ara’a i te ’ohipa tā te Mesia i rave hou ’oia ’a fānau ai : « I vai na te Logo [Iesu Mesia] i te mātāmua ra, i te Atua ra ». E aha tā ’oe e ha’api’i ra i roto i te mau ’īrava 1–5 nō ni’a i te Fa’aora ’e tāna ’ohipa ? ’A ha’amata ai ’oe i te tuatāpapa i te orara’a o te Fa’aora, nō te aha e mea faufa’a ’ia ’ite nō ni’a i tāna ’ohipa hou te tāhuti nei ?
E fa’a’ite pāpū te mau pipi o Iesu Mesia nōna.
’Ua fa’auruhia Ioane ’ia ’imi i te Fa’aora maoti te ’itera’a pāpū o Ioane Bāpetizo tei parau ē « i haere mai… e fa’a’ite… i te māramarama mau » (Ioane 1:8–9, 15–18). ’Ua fa’a’ite pāpū ato’a Ioane ma te mana rahi nō te orara’a ’e te misiōni o te Fa’aora.
E mea maita’i paha ’ia hamani i te hō’ē tāpura nō te mau parau mau tā Ioane i fa’ahiti i roto i tōna ’itera’a pāpū nō te Mesia tei ’ōmua i tāna mau parau (mau ’īrava 1–18; hi’o ato’a ’Īritira’a a Iosepha Semita, Ioane 1:1–19). I tō ’oe mana’o, nō te aha Ioane i ha’amata ai i tāna ’Evanelia nā roto i te reira mau parau ? E feruri i te pāpa’i i tō ’oe ’itera’a pāpū nō Iesu Mesia—e aha tā ’oe e hina’aro i te fa’a’ite atu ? E aha te mau ’ohipa i tupu tei tauturu ia ’oe ’ia mātau ’e ’ia pe’e i te Fa’aora ? ’O vai te ha’amaita’ihia e fa’aro’o i tō ’oe ’itera’a pāpū ?
E aha te aura’a te rirora’a ’ei « tamari’i nā te Atua » ?
Noa atu ē e mau tamaiti ’e e mau tamāhine vārua tātou nā te Atua, ’ia hara tātou, e fa’aātea tātou ’aore rā e fa’ata’a ’ē tātou iāna. Tē hōro’a nei Iesu Mesia i te rāve’a ho’ira’a nō tātou. Nā roto i tāna tusia tāra’ehara ’e tō tātou ha’apa’ora’a i te mau fafaura’a o te ’evanelia, tē hōro’a fa’ahou nei ’oia ia tātou i « te mana ’ia riro ’ei mau tamāroa [’e ’ei mau tamāhine] nā te Atua ». ’Ua fānau-fa’ahou-hia tātou ’e ’ua fa’afaitehia tātou i tō tātou Mesua, ma te ti’amā nō te fāri’i i tāna tufa’a ’āi’a mure ’ore ’e nō te riro ’ei ta’ata ’āi’a nō te tā’āto’ara’a nāna (hi’o Roma 8:14–18; Iakoba 4:11).
’Ua ’ite mata a’enei te tahi i te Atua ?
’Ua pāpa’ihia i roto i te Faufa’a Tahito i te tahi mau hi’ora’a nō te mau ta’ata tei ’ite mata i te Atua (hi’o Genese 32:30; Exodo 33:11; Isaia 6:5). E aha ïa Ioane Bāpetizo i parau ai ē : « ’Aore ta’ata i ’ite i te Atua » ? Tē ha’apāpū nei te ’Īritira’a a Iosepha Semita nō teie ’īrava ē, tē fā nei te Atua te Metua i te mau ta’ata, ’e ’ia nā reira ’oia, e fa’a’ite pāpū ’oia nō tāna Tamaiti. ’Ei hi’ora’a, i tōna fāra’a ia Iosepha Semita i roto i te uru rā’au mo’a, ’ua parau ’oia ia Iosepha : « ’O ta’u Tamaiti here teie. ’A fa’aro’o iāna ! » (Iosepha Semita—’Ā’amu 1:17; hi’o ato’a PH&PF 76:23). Tē vai ato’a ra te tahi mau vāhi i pāpa’ihia nō ni’a i te mau ta’ata tei ’ite mata i te Atua te Metua ’ei ’ōrama (hi’o ’Ohipa 7:55–56; Apokalupo 4:2; 1 Nephi 1:8; PH&PF 137:1–3) ’aore rā tei fa’aro’o i tōna reo i te fa’a’ite-pāpū-ra’a nō te Tamaiti (hi’o Mataio 3:17; 17:5; 3 Nephi 11:6–7).
’O vai Elia, ’o vai « taua peropheta ra » ?
’Ua uiui te mana’o o te feiā fa’atere ’āti Iuda ē, tē fa’atupu ra ānei Ioane Bāpetizo i te parau tohu tahito ra nō ni’a i te mau peropheta e haere mai i te hō’ē mahana i rotopū i te mau ta’ata. ’Ua ui atu rātou iāna ē, ’o ’oia ānei ’o Elia, ’o te i’oa heleni nō Elijah, te i’oa o terā peropheta tei tohuhia ē, e fa’aho’i ’oia i te mau mea ato’a (hi’o Malaki 4:5–6). ’Ua ui ato’a rātou ē, ’o ’oia ānei « taua peropheta ra », e nehenehe e tū’ati i te « Peropheta » i fa’ahitihia i roto i te Deuteronomi 18:15. ’Ua parau atu Ioane ē, e ’ere ’o ’oia terā nā peropheta, ’o ’oia rā te peropheta tā Isaia i parau ē, e fa’aineine ’oia i te haere’a a te Fatu (hi’o Isaia 40:3).
Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
’A tuatāpapa noa ai tātou i te mau pāpa’ira’a mo’a, e fāri’i tātou i te fa’aurura’a i roto i tō tātou orara’a.
Nāhea ’outou i te tauturu i tō ’outou ’utuāfare ’ia hi’o mana’o i te mea e tai’ohia ra nō ni’a i te māramarama i roto i teie mau ’īrava ? E nehenehe te mau melo o te ’utuāfare e fa’a’ohu nō te fa’a’ama i te hō’ē mōrī i roto i te hō’ē piha pōiri ma te fa’a’ite i te huru te Fa’aora e riro nei ’ei Mārarama nō tō rātou orara’a. ’Ei reira, ’a tai’o ai ’outou i te Ioane 1:4–10, e ’apo mai paha te mau melo o te ’utuāfare i te tahi fa’ahou mea i roto i te ’itera’a pāpū o Ioane nō ni’a ia Iesu Mesia, te Māramarama o te ao.
E hi’o maita’i na i te ’itera’a pāpū o Ioane i roto i te ’īrava 36. E aha te mau fa’ahope’ara’a o tōna ’itera’a pāpū ? (hi’o te mau ’īrava 35–46). E aha tā tō ’outou ’utuāfare e ha’api’i nei i te mau ta’ata i parauhia i roto i teie mau ’īrava nō ni’a i te fa’a’itera’a i te ’evanelia ?
E aha tā Natanaela i rave tei tauturu iāna ’ia roa’a te hō’ē ’itera’a pāpū nō te Fa’aora ? E aha tā tātou i rave i noa’a ai tō tātou ’itera’a pāpū ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā tātou hōro’ara’a i te ha’api’ira’a
Fa’a’ohipa i te mau ha’api’ira’a tao’a E ani i te mau melo o te ’utuāfare ’ia hi’o mai i te tahi mau tao’a e fa’a’ohipa nō te māramarama i te mau parau tumu i ’itehia i roto i te mau ’īrava tā te ’utuāfare e tai’o ra. ’Ei hi’ora’a, e nehenehe e fa’a’ohipa i te hō’ē mōrī hinu ’ei fa’ahōho’ara’a i te Māramarama o te Mesia (hi’o Ioane 1:4).
Jehovah Creates the Earth, nā Walter Rane