21–27 nō Tēnuare.

Ioane 1

’Ua ’itehia ia mātou te Mesia

’A tai’o ai ’outou i te Ioane 1, ’a pāpa’i i te mau mana’o pae vārua tā ’outou e fāri’i. E nehenehe te fa’anahora’a nō teie hepetoma i roto i te Mai, pe’e mai—Nō te ta’ata iho ’e te ’utuāfare e tauturu ia ’outou ’ia hāro’aro’a i teie pene. E nehenehe teie mau ’ohipara’a i raro nei e hōro’a mai ia ’outou i te mau mana’o nō ni’a i te huru nō te tauturura’a i te mau tamari’i ’ia ha’api’i mai i te mau parau tumu i roto i te Ioane  1. E nehenehe e fa’aau i te mau ’ohipara’a a te mau tamari’i pa’ari a’e, nō te mau tamari’i ’āpī a’e, mai te mea ē, e tītauhia.

Pāpa’i i tō ’outou mau mana’o

Ani ’ia fa’a’ite

Nō te tauturu i te mau tamari’i ’ia fa’a’ite i te mea tā rātou i ’ite nō ni’a ia Iesu, e nehenehe tā ’outou e fa’a’ite i tōna mau hōho’a e rave ra i te tahi o tāna mau ’ohipa i fa’ata’ahia i roto i te Ioane 1. I muri iho, ’a ani ia rātou ’ia fa’a’ite e aha te ’ohipa e tupu ra (mai te poietera’a i te fenua ’e ’aore rā, te ha’api’ira’a i te ’evanelia).

Ha’api’i i te ha’api’ira’a tumu

Te mau tamari’i ’āpī a’e

Ioane 1:1–2

I ora nā Iesu Mesia i pīha’i iho i te Metua i te Ao ra hou ’a fānauhia mai ai ’oia.

’Ua ha’api’i ’o Ioane ē, ’ua ora nā Iesu Mesia i pīha’i iho i te Atua hou tōna orara’a i te tāhuti nei. ’Ua ora ato’a nā tātou i pīha’i iho i te Atua hou ’a fānauhia mai ai tātou (’a hi’o « Te ’Utuāfare : E Poro’i i tō te Ao », Ensign ’e ’aore rā, Liahona, Novema 2010, 129). Nāfea ’outou i te ha’api’i i te mau tamari’i i teie parau mau ?

Te mau ’ohipara’a e ti’a ’ia rave

• ’A fa’ata’a ē, « te roto » i roto i te Ioane 1:1 ’o Iesu ïa. ’A tai’o ha’apūai i te ’īrava, ’e ’a ani i te mau tamari’i ’ia parau « Iesu » i te mau taime ato’a e tai’o ’outou « te roto ». ’A fa’a’ite i te reni o te Orara’a hou te tāhuti nei (LDS.org). ’A fa’ata’a ē, i ora nā Iesu Mesia i pīha’i iho i te Metua i te Ao ra hou a haere mai ai ’oia i te fenua nei.

• ’A ha’api’i i te mau tamari’i ē, i ora ato’a nā tātou i pīha’i iho i te Atua hou tātou ’a haere mai ai i te fenua nei. E fa’a’ohipa paha ’outou i te « ’Omuara’a : Te fa’anahora’a a tō tātou Metua i te Ao ra », Te mau ’ā’amu o te Faufa’a ’Āpī, 1–5 ; te vidéo e tano(LDS.org); ’e ’aore rā, te Arata’i pāpa’ira’a mo’a, « Orara’a hou te tāhuti nei », scriptures.lds.org.

• ’A ani i te hō’ē metua ’ia hōpoi mai i te hō’ē ’aiū i roto i te piha ha’api’ira’a, ’e ’a fa’a’ohipa i te reira ’ei rāve’a nō te ha’api’i, i ora nā tātou i te ao ra i pīha’i iho i te Metua i te Ao ra ’ei mau tamari’i vārua hou ’a fānauhia ai tātou.

Ioane 1:3

’Ua hāmani Iesu i te mau mea ato’a.

E rave rahi tamari’i ’ua ’oa’oa rātou i te rirora’a ’ei mau poietera’a nā te Fatu. E nehenehe te ’itera’a i te ’ohipa a te Mesia ’ei Rahu Nui, e tauturu i te fa’arahira’a i tō rātou fa’atura iāna.

Te mau ’ohipara’a e ti’a ’ia rave

• ’A tai’o Ioane 1:3 e te mau tamari’i, ’e ’a fa’a’ite i te hōho’a nō roto mai i te fa’anahora’a nō teie hepetoma i roto Mai, pe’e mai—Nō te ta’ata iho ’e te ’utuāfare. ’A tauturu i te mau tamari’i ’ia tāmau ’ā’au i te pereota « nā [Iesu Mesia] i hāmani i te mau mea ato’a ».

• ’A arata’i i te mau tamari’i nō te haere nā rāpae. ’A vaiiho i te mau tamari’i hō’ē hō’ē ’ia fa’ata’a mai i te hō’ē poietera’a tā rātou e ’ite ra, ’e ’a ani i te piha ha’api’ira’a ’ia ’imi e aha tā rātou e fa’ata’a ra.

• ’A ani i te mau tamari’i ’ia feruri i te mau rāve’a e nehenehe ai ia rātou ’ia aupuru i te mau poietera’a ’ati a’e ia rātou (’ei hi’ora’a, ’ia maita’i i ni’a i te mau animala).

’Ua hāmani Iesu Mesia i te ao nei ’e te mau mea ato’a i roto.

Ioane 1:35–51

E nehenehe tā’u e ani ia vetahi ’ē ’ia haere mai ia Iesu Mesia ra ’e ’ia ha’api’i nō ni’a iāna.

Tē vai ra i roto i te Ioane  1 te mau ’ā’amu o te mau pipi tei ani i te ta’ata ’ia « haere mai ’e ’ia hi’o » ē, ’o Iesu te Tamaiti a te Atua. E nehenehe ato’a te mau tamari’i na’ina’i e pe’e i teie hi’ora’a.

Te mau ’ohipara’a e ti’a ’ia rave

• ’A fa’ata’a e mea nāfea Ioane i te ha’api’ira’a ia Anederea nō ni’a ia Iesu, ’e ’a fa’ati’a, e mea nāfea Anederea i te ha’api’ira’a ia Petero i muri iho (’a hi’o Ioane 1:35–42). ’A fa’a’ite e mea nāfea tō ’outou ha’api’ira’a mai nō ni’a i te ’Ēkālesia, ’e ’aore rā, ’a ani i te hō’ē melo ’āpī ’ia fa’a’ite mai e mea nāfea tōna ha’api’ira’a mai nō ni’a i te ’Ēkālesia.

• ’A fa’a’ite i te ’ā’amu ’o Philipi i te anira’a ia Natanaela ’ia « haere mai e hi’o » (Ioane 1:43–51). ’A huna i te hō’ē hōho’a ’o Iesu i roto i te hō’ē ’āfata, ’e ’a ani i te hō’ē tamaiti ’ia « haere mai e hi’o » ’e i muri iho, ’a parau i te tahi atu mau tamari’i nō ni’a i te mea tāna i ’ite.

• ’A vaiiho i te mau tamari’i ’ia peni i te ’-api ’ohipara’a o teie hepetoma, ’e ’a fa’aitoito ia rātou ’ia fa’a’ohipa i te reira nō te ani i te hō’ē ta’ata ’ia ha’api’i mai nō ni’a ia Iesu.

• ’A ani i te hō’ē tamari’i ’ia fa’a’ite mai nō ni’a i te hō’ē taime ’a fa’a’ite ai ’oia i te hō’ē mea, mai te hō’ē tao’a ha’uti, ’e ’aore rā, te hō’ē tao’a hōro’a, i te hō’ē ta’ata. Nāfea e nehenehe ia tātou ’ia fa’a’ite i te ’evanelia ? ’A fa’ati’a i te hō’ē ’ā’amu nō te hō’ē tamari’i tei fa’a’ite i te ’evanelia i te hō’ē hoa, mai te ’ā’amu ’a Elder M. Russell Ballard nō ni’a ia Iosua(« Hi’opo’ara’a i te nu’ura’a o te ’ohipa », Ensign ’e ’aore rā, Liahona, Me 2014, 81–83).

Ha’api’i i te ha’api’ira’a tumu

Te mau tamari’i pa’ari a’e

Ioane 1:1–5

I ora nā Iesu Mesia i pīha’i iho i te Metua i te Ao ra hou ’a fānauhia mai ai ’oia.

Nā mua a’e ’oia ’a fānauhia mai ai, ’ua rave Iesu Mesia i te hō’ē ’ohipa faufa’a roa i roto i te fa’anahora’a a te Metua i te Ao ra. ’Ia tai’o ana’e ’outou i te Ioane 1:1–5, e aha te mea e fa’atupu i te māere i roto ia ’outou nō ni’a i te ’ohipa a te Mesia hou te tāhuti nei ?

Te mau ’ohipara’a e ti’a ’ia rave

• ’A ani i te mau tamari’i, ’ua ’ite ānei rātou i te hō’ē mea nō ni’a i te ’ohipa tā Iesu i rave hou ’a fānauhia mai ai ’oia. ’A ani ia rātou ’ia ’imi i te pāhonora’a i roto i te Ioane 1:1–5. E nehenehe e roa’a te tauturu ’ia hi’o i roto i te ’Īritira’a a Iosepha Semita, Ioane 1:1–5 (i roto i te fa’ahorora’a Bibilia).

• ’A fa’a’ite « ’Omuara’a : Te fa’anahora’a a tō tātou Metua i te Ao ra », Te mau ’ā’amu o te Faufa’a ’Āpī , 1–5, i te mau tamari’i ’e ’aore rā, ’a fa’a’ite i te video e tano (LDS.org). ’A ani i te mau tamari’i e aha tā rātou i ha’api’i mai nō ni’a ia Iesu Mesia.

• ’A ani i te tahi mau tamari’i ’ia haere mai i roto i te piha ha’api’ira’a ma te fa’aineine nō te fa’a’ite mai i te hō’ē mea tā rātou i hāmani. ’A fa’a’ite i te mau hōho’a nō te tahi o te mau poietera’a a te Fatu, ’e ’a fa’a’ohipa i te Ioane 1:3 nō te fa’ata’a, ’ua poiete Iesu i te mau mea ato’a.

Ioane 1:4–9

’O Iesu Mesia tō’u māramarama.

E nehenehe te fa’ahōho’ara’a o te māramarama e tauturu i te mau tamari’i ’ia hāro’aro’a i te Fa’aora ’e i tāna ’evanelia. Nāfea ’outou e nehenehe ai e fa’auru i te mau tamari’i ’ia ’imi i te māramarama o te Fa’aora i te taime ’a riro ai te ao nei ’ei ao pōiri ?

Te mau ’ohipara’a e ti’a ’ia rave

• ’A ani i te mau tamari’i ’ia tai’o Salamo 27:1 ; Ioane 1:4–9 ; Mosia16:9 ; ’e Te Parau Ha’api’ira’a e te mau Parau Fafau 39:1–2, ma te ’imi i te mau pereota i tū’ati i ni’a i teie mau pāpa’ira’a mo’a. Nāfea Iesu i riro ai ei māramarama ?

• ’A fa’a’ite i te hō’ē hōho’a ’o te Fa’aora ’e te tahi mau tao’a o te hōro’a i te māramarama, mai te mori pata. Nāfea Iesu i fa’ahōho’ahia ai i teie mau tāo’a ? Nāfea e nehenehe ai ia tātou ’ia fa’a’ite i tōna māramarama ia vetahi ’ē ? ’A hīmene ’āmui « ’O te Fatu ra tō’u māramarama », Te mau Hīmene, no. 43, ’e ’aore rā, te tahi atu hīmene nō ni’a i te māramarama.

• ’A ani i te mau tamari’i e aha tā rātou e rave ’ia vai ana’e rātou i roto i te pōiri ’e ’ia ri’ari’a rātou. ’A fa’a’ite pāpū ē, e nehenehe tā rātou e fāriu i te mau taime ato’a i ni’a i te Fa’aora ’ia ri’ari’a ana’e rātou.

Ioane 1:35–51

’Ei feiā pe’e nō Iesu Mesia, tē ani nei au ia vetahi ’ē ’ia pe’e iāna.

’A feruri e nāfea e nehenehe ai ia ’outou ’ia fa’a’ohipa i te mau hi’ora’a i roto i te Ioane 1:35–51 nō te fa’aitoito i te mau tamari’i ’ia ani ia vetahi ’ē ’ia ha’api’i mai nō ni’a i te Fa’aora.

Te mau ’ohipara’a e ti’a ’ia rave

• ’A tauturu i te mau tamari’i ’ia ’imi i roto i te Ioane 1:35–51 ’ia ’itehia mai te mau mea tā te ta’ata e parau nō te ani ia vetahi ’ē ’ia ha’api’i mai nō ni’a i te Fa’aora. ’A vaiiho ia rātou ’ia ha’api’ipi’i i te mea tā rātou e parau nō te ani i te hō’ē hoa ’ia ha’api’i mai nō ni’a i te Fa’aora.

• ’A ani i te mau tamari’i ’ia fa’a’ohipa i te ’api ’ohipara’a o teie hepetoma nō te hāmani i te hō’ē anira’a tā rātou e nehenehe e fa’a’ohipa nō te ani i te hō’ē hoa ’e ’aore rā, te hō’ē melo nō te ’utuāfare ’ia ha’api’i hau atu nō ni’a ia Iesu Mesia.

• ’A hōro’a i te mau tamari’i i te rāve’a nō te fa’a’ite i tō te piha ha’api’ira’a i te hō’ē mea tā rātou i here. ’A tauturu i te mau tamari’i ’ia hi’o, nāfea te fa’a’itera’a i te ’evanelia e nehenehe ai e riro mai te fa’a’itera’a i te tahi atu mau mea tā tātou i here. E hina’aro paha ’outou e fa’a’ite i te video « Te mau mea maita’i e fa’a’ite » (LDS.org).

Fa’aitoito i te ha’api’ira’a mai i te fare

Fa’aitoito i te mau tamari’i ’ia ani i te hō’ē ta’ata tā rātou i here ’ia ha’api’i hau atu nō ni’a ia Iesu Mesia.

Ha’amaita’i i tā tātou ha’api’ira’a

’A tauturu i te mau tamari’i ’ia hi’o i te ’ā’amu. ’A ’imi i te mau rāve’a nō te hāmani i te hō’ē hōho’a o te ’ā’amu, te mau hōho’a pāpa’i, te mau video, te mau pepe hurio, ’e ’aore rā, te mau ha’utira’a teata ta’ata ora.