Hi’o ha’amāramarama peni i roto i te hiero nō Nāvū Illinois, nā Tom Holdman

28 nō Tēnuare–3 nō Fēpuare 

Mataio 3 ; Mareko 1 ; Luka 3

« A fa’aineine ’outou i te ’ē’a ’o te Fatu"

’A tai’o ai ’outou nō ni’a ia Ioane Bāpetizo ’e te bāpetizora’a ’o Iesu, ’a pāpa’i i te mau mana’o pae vārua tā ’outou e fāri’i. E nehenehe Mai, pe’e mai—Nō te ta’ata iho ’e te ’utuāfare e tauturu ia ’outou ’ia hāro’aro’a i teie mau pāpa’ira’a mo’a, ’e e tauturu ho’i ia ’outou ’ia pāturu i te ha’api’ira’a mai tā te mau melo o tā ’outou piha ha’api’ira’a e rave ato’a nō rātou iho.

Pāpa’i i tō ’outou mau mana’o

Ani ’ia fa’a’ite

Nō te hōro’a i te mau tamari’i i te hō’ē rāve’a nō te fa’a’ite mai i te mea tā rātou i ha’api’i a’e nā, ’a fa’a’ite i te hō’ē hōho’a nō Iesu te bāpetizohia ra, ’e ’a ani ia rātou ’ia parau mai ia ’outou, e aha te tupu nei i roto i te hōho’a, ’e e aha tō rātou ferurira’a ’ia bāpetizohia rātou.

Ha’api’i i te ha’api’ira’a tumu

Te mau tamari’i ’āpī a’e

Mataio 3:13–17

E nehenehe au e bāpetizohia mai ia Iesu.

Nāfea e ti’a ai ia ’outou ’ia fa’a’ohipa i te ’ā’amu o te bāpetizora’a ’o Iesu nō te tauturu i te mau tamari’i ’ia fa’aineine nō te bāpetizora’a ?

Te mau ’ohipara’a e ti’a ’ia rave

• ’A ha’apoto i te ’ā’amu o te bāpetizora’a ’o te Fa’aora (’a hi’o Mataio 3:13–17 ; ’a hi’o ato’a « Pene 10 : ’Ua bāpetizohia Iesu » Te mau ’ā’amu o te Faufa’a ’Āpī, 26–29, ’e ’aore rā, te video e tano, i ni’a i te LDS.org). ’A fa’ahiti i te ’ā’amu e rave rahi taime ’e ’a ani i te mau tamari’i ’ia fa’a’ite mai i te mau mea tā rātou e ha’amana’o ra. ’A fa’ata’a ē, ’ua bāpetizohia Iesu ma te utuhi e te hō’ē ta’ata tei mau i te mana ’autahu’ara’a;

• ’A fa’a’ite i te hō’ē hōho’a ’o Iesu te bāpetizohia ra, ’e te ’api ’ohipara’a nō teie hepetoma. ’A fa’aue i te mau tamari’i ’ia fa’a’ite i te mau tū’atira’a i rotopū i nā hōho’a e piti.

• E tano ’ia hi’o fa’ahou ’outou i te mau fafaura’a tā te mau tamari’i e rave ’ia bāpetizo-ana’e-hia rātou (a hi’o Mosia 18:8–10; PH&PF 20:37 ; Mau māite i te Fa’aro’o, 23). ’A ani ia rātou e aha tā rātou i rave a’e na i roto i teie mau ’ohipa.

• ’A ani i te hō’ē melo o te ’ēpisekōpora’a ’ia parau i te mau tamari’i nō ni’a i te uiuira’a o te bāpetizora’a e ravehia hou rātou ’a bāpetizohia ai.

• ’A hīmene ’e te mau tamari’i « Baptême », Chants pour les enfants, 54–55. A feruri e ani i te hō’ē tamari’i tei ’ite maita’i i te hīmene, ’ia arata’i i te tahi atu mau tamari’i ’a hīmene ai rātou.

E nehenehe tā tātou e pe’e i te hōho’a ’o Iesu nā roto i te bāpetizora’ahia.

Mataio 3:11, 16

E tauturu te Vārua Maita’i iā’u

Hau atu i te fa’aineinera’a nō te bāpetizora’a, e fa’aineine ato’a te mau tamari’i ’ia fāri’i i te hōro’a ’o te Vārua Maita’i. Nāhea e nehenehe ai ia ’outou ’ia tauturu ia rātou ?

Te mau ’ohipara’a e ti’a ’ia rave

• ’A fa’a’ohipa Mataio 3:11, 16 nō te ha’api’i i te mau tamari’i, ’ua pou mai te Vārua Maita’i i ni’a ia Iesu ’a bāpetizohia ai ’oia (’ua fā mai te hō’ē ’ū’upa ’ei tāpa’o fa’a’ite ē, ’ua tupu mau teie ’ohipa). ’A fa’a’ite i te hōho’a Te hōro’a o te Vārua Maita’i (Gospel Art Book, no. 105), ’e ’a fa’ata’a ē, e fāri’i tātou i te hōro’a o te Vārua Maita’i ’ia ha’amau-ana’e-hia tātou.

• Hōpoi mai i te hō’ē ’āfata tei roto te tahi mau mea, mai te hō’ē hōho’a ’o Iesu, hō’ē paraitete tāmāhanahana, e hō’ē ’āvei’a. ’A ani i te mau tamari’i ’ia mā’iti i te hō’ē ’ohipa ’e i muri iho, ’a fa’a’ite mai, nāhea te ’ohipa tāta’itahi i te fa’ahōho’ahia i te hō’ē rāve’a e nehenehe ai te Vārua Maita’i e tauturu ia tātou —e fa’a’ite pāpū ’oia nō Iesu, e tāmāhanahana ia tātou (’a hi’o Ioane 15:26), ’e e fa’a’ite ia tātou i te ’ē’a ti’a (’a hi’o 2 Nephi 32:5).

• ’A fa’a’ite i tō ’outou iho mau ’itera’a ma te fāri’ira’a i te tauturu nō ’ō mai i te Vārua Maita’i.

• ’A ani i te mau tamari’i ’ia fa’aro’o i te mau rāve’a e tauturu ai te Vārua Maita’i ia tātou ’a hīmene ai rātou « Le Saint-Esprit », Chants pour les enfants, 56.

Ha’api’i i te ha’api’ira’a tumu

Te mau tamari’i pa’ari a’e

Mataio  3

’Ua ha’amaita’ihia vau i te mau ’ōro’a o te autahu’ara’a a A’arona.

’Ua mau Ioane Bāpetizo i te autahu’ara’a a A’arona, nō reira, e taime tano teie nō te ha’api’i i te mau tamari’i nō ni’a i te autahu’ara’a a A’arona ’e ’a tauturu ia rātou ’ia ’ite i te mau ha’amaita’ira’a ’e te mana e tae mai i te tāne ’e i te vahine nā roto i teie autahu’ara’a.

Te mau ’ohipara’a e ti’a ’ia rave

• ’A ani i te mau tamari’i ’ia hāmani i te hō’ē tāpura nō te mau ’ohipa a te autahu’ara’a a A’arona, ma te fa’a’ohipa Te Parau Ha’api’ira’a ’e te mau Parau Fafau 20:46, 58–60 ; 84:111. ’A fa’ata’a ē, e nehenehe te mau tahu’a i roto i te autahu’ara’a a A’arona e « bāpetizo, ’e e ha’amaita’i i te ’ōro’a mo’a ». Tītauhia i te mau tahu’a, te mau ha’api’i, ’e te mau diakono ’ia « ha’api’i, ’e ’ia tītau i te mau ta’ata ato’a ’ia haere mai i te Mesia ra » (PH&PF 20:46, 59). ’A ani i te mau tamari’i ’ia hi’o i roto i te Mataio 3 i te mau hi’ora’a nō Ioane i te fa’aotira’a i teie mau ’ohipa. Nāfea e nehenehe ai ia tātou pā’āto’a ’ia ani manihini ia vetahi ’ē ’ia haere mai i te Mesia ra, mai tā Ioane i rave ?

• ’A fa’a’ite i te tahi mau hōho’a o te mau taea’e tei mau i te autahu’ara’a a A’arona e rave ra i te mau ’ōro’a bāpetizora’a ’e te ’ōro’a mo’a (’a hi’o Gospel Art Book, nos. 103, 108). ’A ’āparau e mea nāfea teie mau ’ōro’a i te fa’aineine ia tātou ’ia fāri’i ia Iesu Mesia ’e i tāna tāra’ehara.

• ’A tai’o ’āmui Te Parau Ha’api’ira’a ’e te mau Parau Fafau 13:1, ’e ’a fa’ata’a, ’ua fa’aho’i fa’ahou mai Ioane Bāpetizo i te autahu’ara’a a A’arona ia Iosepha Semita ra. ’A ani i te mau tamari’i e mea nāfea rātou i ha’amaita’ihia maoti te fa’aho’ira’ahia mai te autahu’ara’a a A’arona.

Mataio 3:13–17 ; Luka 3:2–18

E nehenehe tā’u e ha’apa’o i tā’u mau fafaura’a nō te bāpetizora’a.

E riro te ’ā’amu nō te bāpetizora’a ’o Iesu ’ei rāve’a maita’i nō te tauturu i te mau tamari’i ’ia hi’o fa’ahou i tā rātou mau fafaura’a nō te bāpetizora’a ’e ’ia fafau fa’ahou ’ia ha’apa’o i te reira.

Te mau ’ohipara’a e ti’a ’ia rave

• ’A ani e piti tamari’i ’ia tai’o i te Luka 3:7–9, 15–17, nā te hō’ē e tai’o i te mau parau ’a Ioane Bāpetizo ’e nā te tahi e tai’o i te toe’a o te mau parau. ’I muri a’e i te ’īrava tāta’itahi, fa’aea ri’i ’e ’a tauturu i te mau tamari’i ’ia hāro’aro’a i te aura’a o te ’īrava.

• ’A hi’o fa’ahou i te mau fafaura’a tā te mau tamari’i i rave i te bāpetizora’a, e ’itehia i roto i te Mosia 18:8–10 ’e Te Parau Ha’api’ira’a ’e te mau Parau Fafau 20:37. (’A hi’o ato’a Mau māite i te Fa’aro’o, 23–26.) ’A ani i te mau tamari’i ’ia pāpa’i i teie mau fa’ahorora’a i ni’a i te ’api ’ohipara’a nō teie hepetoma.

• ’A fa’aineine e rave rahi tāreta ’āpipiti ma te pāpa’i i te mau pereota tū’ati i ni’a iho, ’e ’aore rā, te mau hōho’a e fa’ahōho’a i tā tātou mau fafaura’a nō te bāpetizora’a. ’A fa’anaho i te mau tāreta ma te huri te ni’ara’a i raro. ’A ani tāta’ihō’ē i te mau tamari’i ’ia huri e piti tāreta i te taime hō’ē, nō te ’imi i nā tāreta e piti e tano. ’Ia ’itehia nā tāreta e piti, ’a ani i te mau tamari’i ’ia fa’a’ite i te mau rāve’a ’a ha’apa’o ai rātou i te reira fafaura’a.

• ’A fa’a’ite, e mea nāfea te ha’apa’ora’a i tā ’outou mau fafaura’a nō te bāpetizora’a i te ha’amaita’i ia ’outou.

Mataio 3:11, 16

E nehenehe te Vārua Maita’i e arata’i iā’u.

Tē ha’api’i nei te mau tamari’i nāfea ’ia ’ite ’e ’ia pe’e i te arata’ira’a a te Vārua Maita’i. Nāfea e nehenehe ai ia ’outou ’ia ha’api’i ia rātou, e tauturu te ha’apa’ora’a i tā rātou mau fafaura’a nō te bāpetizora’a ia rātou ’ia vai ti’amā nō te fāri’i i teie arata’ira’a ?

Te mau ’ohipara’a e ti’a ’ia rave

• ’A ani i te tamari’i tāta’itahi ’ia mā’iti hō’ē o te mau pāpa’ira’a mo’a i muri nei nō te tai’o ’e nō te fa’ata’a, nāfea te Vārua Maita’i i te paraparau mai ia tātou : Te Parau Ha’api’ira’a ’e te mau Parau Fafau 6:23 ; 8:2–3.

• ’A ani i te hō’ē tamarii ’ia tai’o Mataio 3:11. Nāhea te Vārua Maita’i e riro ai mai te auahi ? E hi’ora’a, e tāmāhanahana te auahi, ’e e hōro’a i te māramarama nō te arata’i ia tātou (’a hi’o Ioane 15:26 ; 2 Nephi 32:5).

• ’A ani i te mau tamari’i ’ia tāpiri i tō rātou mata ’e ’ia ’āfa’i i tō rātou rima i ni’a. I muri iho, ’a fa’ateretere i te huruhuru manu ’e ’aore rā, i te taura i ni’a i tō rātou rima. ’A ani ia rātou ’ia parau ia ’outou ’ia ’ite ana’e rātou i te reira. E aha tā teie ’ohipara’a e ha’api’i nei nō ni’a i te ’itera’a i te mau mana’o o te Vārua Maita’i ?

• ’A ani i te mau tamari’i ’ia fa’a’ite mai i te mau ’itera’a tei noa’a ia rātou nā roto i te Vārua Maita’i. Nō te aha te ha’apa’ora’a i tā tātou mau fafaura’a e tauturu ia tātou ’ia fāri’i i te arata’ira’a a te Vārua Maita’i ?

Fa’aitoito i te ha’api’ira’a mai i te fare

’A fa’aitoito i te mau tamari’i ’ia ani i tō rātou nā metua ’e ’aore rā, i te tahi atu mau melo o te ’utuāfare nō ni’a i tō rātou bāpetizora’a.

Ha’amaita’i i tā tātou ha’api’ira’a

’A ’imi i tā ’outou iho fa’aurura’a. ’Eiaha e hi’o i teie mau fa’anahora’a ’ei mau arata’ira’a tā ’outou e ti’a ’ia pe’e ’a ha’api’i ai ’outou. E fa’a’ohipa rā i te reira ’ei mau mana’o nō te fa’atupu i tō ’outou iho fa’aurura’a, ’a feruri hōhonu ai ’outou i te mau hina’aro o te mau tamari’i tā ’outou e ha’api’i ra. (’A hi’o Ha’api’ira’a mai tā te Fa’aora, 7.)