’O Ioane Bāpetizo e bāpetizo nei ia Iesu

Hi’o pēni i roto i te hiero nō Nauvoo (Illinois), nā Tom Holdman

28 nō tēnuare–3 nō fepuare

Mataio 3 ; Mareko 1 ; Luka 3

« ’A ha’amaita’i i te ’ē’a o te Fatu »

Ha’amata nā ni’a i te tai’ora’a i te Mataio 3 ; te Mareko 1 ; te Luka 3. ’Ia pure ’outou nō te Vārua Maita’i ’ia tauturu mai ia māramarama i teie mau pene, e hōro’a mai ’oia i te mau mea ta’a ’ē nō ’outou e ’apo mai. ’A tāpa’opa’o i te reira mau mana’o e tae mai ’e ’a fa’ata’a i te fa’anahora’a nō te rave i te reira.

Tāpa’opa’o i te mau mana’o e tae mai ia ’outou

E ti’a ia Iesu Mesia ’e i tāna ’evanelia e taui ia ’outou. ’Ua fa’ahiti Luka i te hō’ē parau tohu tahito e parau ra nō te misiōni a Ioane Bāpetizo ’e te mau ’ohipa e tupu nō te taera’a mai te Fa’aora : « ’Ia hope te peho i te fa’a’īhia, ’ia hope te mou’a ’e te mau ’aivi i te ha’apāpūhia ; ’ia fa’atītī’aifarohia te ’ē’a pi’o ’e ’ia ha’amāninahia te ’ē’a pu’upu’u » (Luka 3:5 ; hi’o ato’a Isaia 40:4). E poro’i teie nō tātou pā’āto’a, ’e tae noa atu rātou e mana’o ra e’ita e haere ’ia taui ’aore rā ’aita e faufa’a ’ia taui rātou. Mai te peu pa’i e nehenehe e ha’apāpū i te hō’ē mea ha’uti ’ore mai te mou’a, e mea pāpū ïa e nehenehe tā te Fatu e tauturu ia tātou ’ia fa’a’tītī’aifaro i tō tātou mau ’ē’a pi’o (hi’o Luka 3:4–5). ’Ia fāri’i tātou i te anira’a a Ioane Bāpetizo e tātarahapa ’e e taui, tē fa’aineine ra ïa tātou i tō tātou ferurira’a ’e tō tātou ’ā’au nō te fāri’i ia Iesu Mesia ’ei reira e ’ite ato’a tātou i « te ora a te Atua » (Luka 3:6).

tāpa’o tuatāpapara’a a te ta’ata hō’ē

Mau mana’o nō tā ’oe iho tuatāpapara’a pāpa’ira’a mo’a

Te ’Evanelia a Mareko

’O vai Mareko ?

I roto i te mau ta’ata pāpa’i ’Evanelia, ’o Mareko ’aita i ’ite-rahi-hia nō ni’a iāna. ’Ua ’ite tātou ē, e hoa misiōnare ’oia nō Paulo, Petero ’e te tahi ato’a mau misiōnare. E rave rahi ’aivāna’a nō te Bibilia e ti’aturi nei ē, nā Petero i fa’aue ia Mareko e pāpa’i i te mau ’ohipa i tupu i roto i te orara’a o te Fa’aora. Penei a’e ’ua pāpa’ihia te ’Evanelia a Mareko nā mua atu i te tahi e toru.

Mataio 3:1–12 ; Mareko 1:1–8 ; Luka 3:2–18

’Ua riro te tātarahapara’a ’ei tauira’a rahi roa nō te ferurira’a ’e te ’ā’au.

’Ua riro te misiōni a Ioane Bāpetizo te fa’aineinera’a i te ’ā’au o te ta’ata ’ia fāri’i i te Fa’aora ’e ’ia riro rahi atu ā mai iāna ra te huru. Nāhea ’oia i te ravera’a i te reira ? ’Ua pi’i ’oia : « E tātarahapa ’outou » (Mataio 3:2). ’Ua fa’a’ohipa ’oia i te mau hōho’a mai te mā’a hotu ’e te sītona nō te tūra’i i te faufa’a rahi o te tātarahapara’a nō te fāri’i i te Mesia (hi’o Luka 3:9, 17).

E aha te tahi atu ā mau hōho’a tā ’oe e ’ite ra i roto i te mau ’ā’amu nō te tāvinira’a a Ioane Bāpetizo ? E ’ōpua i te fa’a’ū i te reira i roto i tā ’oe pāpa’ira’a mo’a ’aore rā e pāpa’i i te hōho’a nō te reira i roto i te hō’ē buka tuatāpapara’a. E aha te ha’api’ira’a a teie mau hōho’a nō ni’a i te ha’api’ira’a tumu ’e te tītaura’a ’ia tātarahapa ?

Te tātarahapara’a mau, e « tauira’a ferurira’a ïa, e hi’ora’a ’ana’anaea nō ni’a i te Atua, nō ni’a i te ta’ata iho ’e nō ni’a i te ao… [Te aura’a ra], e fāriura’a i te ’ā’au ’e te hina’aro i ni’a i te Atua » (Bible Dictionary, « Repentance »). I roto i te Luka 3:7–14, e aha te mau tauira’a tā Ioane e tītau manihini ra i te ta’ata ’ia rave ’ei fa’aineinera’a nō te fāri’i i te Mesia ? Nāhea teie parau a’o e tano ai i ni’a ia ’oe ? Nāhea ’oe i te fa’a’ite ē, ’ua tātarahapa mau ’oe ? (Hi’o Luka 3:8).

Hi’o ato’a ’Īritira’a a Iosepha Semita, Luka 3:4–11 ; D. Todd Christofferson, « Te hōro’a hanahana o te tātarahapara’a », Ensign ’aore rā Liahona, Nov. 2011, 38–41.

Mataio 3:7 ; Luka 3:7

’O vai te mau pharisea ’e te mau sadukea ?

E mau melo te mau pharisea nō te hō’ē pupu pae fa’aro’o ’āti Iuda tei fa’ate’ote’o ia rātou i te ha’apa’o-ti’a-ra’a i te ture a Mose. Mai te huru ē, ’ua ha’apoto rātou i te ha’apa’ora’a fa’aro’o ’ei ha’apa’ora’a i te mau ’ōro’a rau. E pupu ’āti Iuda moni rahi te mau sadukea, ma te mana rahi i te pae fa’aro’o ’e i te pae poritita. ’Aita rātou i ti’aturi i te ha’api’ira’a tumu nō te ti’a-fa’ahou-ra’a. Nā pupu e piti ato’a tei hahi ’ē i te ’ōpuara’a mātāmua i roto i te mau ture a te Atua, e rave rahi ho’i i roto i tā rātou mau melo tei ’ore i fāri’i i te poro’i a te peropheta a te Atua, ’o Ioane Bāpetizo

Hi’o ato’a Mataio 23:27 ; Ioane 1:19–24.

Mataio 3:13–17 ; Mareko 1:9–11 ; Luka 3:15–16, 21–22

’Ua bāpetizohia Iesu Mesia ’ei « fa’atupura’a i te parau ti’a ato’a ».

I te bāpetizora’ahia ’oe, ’ua pe’e ’oe i te hi’ora’a o te Fa’aora. E fa’aau i tā ’oe i ha’api’i i roto i teie mau ’ā’amu nō te bāpetizora’a o te Fa’aora i te mea i tupu nō tō ’oe iho bāpetizora’a.

’O vai tei bāpetizo ia Iesu ’e e aha te mana tāna i mau ?	’O vai tei bāpetizo ia ’oe ’e e aha te mana tāna i mau ?
I hea Iesu i te bāpetizora’ahia ?	I hea ’oe i te bāpetizora’ahia ?
Nāhea Iesu i te bāpetizora’ahia ?	Nāhea ’oe i te bāpetizora’ahia ?
Nō te aha Iesu i bāpetizohia ai ?	Nō te aha ’oe i bāpetizohia ai ?
Nāhea te Metua i te Ao ra i te fa’a’itera’a ē, ’ua māuruuru ’oia ia Iesu ?	Nāhea te Metua i te Ao ra i te fa’a’itera’a ē, ’ua māuruuru ’oia i te bāpetizora’ahia ’oe ? Mai te aha ’oia i te fa’a’itera’a i tōna mana’o fāri’i mai te reira ā mahana ?

’Ua tāpa’opa’o Nephi i te tahi mau ha’api’ira’a faufa’a rahi nō ni’a i te bāpetizora’a o te Fa’aora ? E aha tā tāna mau parau i roto i te 2 Nephi 31 e ha’api’i ra ia ’oe ? E ’ōpua i te tāpa’opa’o i te ’ohipa i tupu i tō ’oe bāpetizora’a i roto i te hō’ē buka tāmahana.

Hi’o ato’a Ioane 1:32–33 ; Mosia 18:8–11 ; Te Parau Ha’api’ira’a ’e te mau Parau Fafau 13:1 ; 20:37, 68–74 ; « Te bāpetizora’a o Iesu » (video, LDS.org).

Mataio 3:16–17 ; Mareko 1:9–11 ; Luka 3:21–22

Tē ha’api’i ra ānei te Bibilia ē, te Atuara’a e toru ïa tino ta’a ’ē ?

Tē vai ra e rave rahi fa’a’itera’a i roto i te Bibilia ē, e toru tino ta’a ’ē te Atuara’a. ’Ei hi’ora’a, tē turu nei te ’ā’amu nō te bāpetizora’a o te Fa’aora i te ha’api’ira’a tumu ē, e mea ta’a ’ē maita’i te Atua te Metua, Iesu Mesia ’e te Vārua Maita’i. ’Ua paraparau te Atua te Metua mai te ra’i mai, ’e ’ua pou mai te Vārua Maita’i (fa’ahōho’ahia i te ū’upa) i ni’a i te Fa’aora ’a bāpetizohia ai ’oia. Teie te tahi atu ā mau ’īrava e ha’api’i ra i teie ā parau mau : Genese 1:26–27 ; Mataio 17:1–5 ; Ioane 17:20–23 ; ’Ohipa 7:55–56 ; ’e Te Parau Ha’api’ira’a ’e te mau Parau Fafau 130:22.

tāpa’o tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :

Mataio 3

’Ua mau Ioane Bāpetizo i te autahu’ara’a a Aarona. E aha tā tātou e nehenehe e ha’api’i nō ni’a i te autahu’ara’a a Aarona ’ia tuatāpapa tātou nō ni’a iāna ? Nāhea te hi’ora’a o Ioane e nehenehe ai e tauturu i te feiā e mau ra i te autahu’ara’a a Aarona ’ia rave i tā rātou mau hōpoi’a ? (Hi’o ato’a PH&PF 13:1 ; 20:46–60.)

Mataio 3:11–17 ; Mareko 1:9–11 ; Luka 3:21–22

Nō te ha’api’i te mau melo o te ’utuāfare nō ni’a i te bāpetizora’a ’e te hōro’ara’a i te Vārua Maita’i, e ’ōpua i te fa’a’ite i te hō’ē tao’a repo ’e e vaiiho nā te mau melo o te ’utuāfare e hōro’i i te reira i te pape. Nāhea teie ’ohipa e fa’ahōho’a nei i te bāpetizora’a ? ’Āria, e ani i te mau melo o te ’utuāfare ’ia paraparau nō ni’a i te mauhuru tāmā o te auahi. Nō te aha te hōro’ara’a i te Vārua Maita’i i parauhia ai ’ei bāpetizora’a i te auahi ?

e taure’are’a e bāpetizo ra i te tahi taure’are’a

I te taime ’ua bāpetizohia tātou, ’ua hōroihia tā tātou mau hara.

Mataio 3:17 ; Mareko 1:11 ; Luka 3:22

Ahea tātou i te putapūra’a ē ’ua māuruuru te Atua ia tātou ? E aha tā tātou te ’utuāfare e nehenehe e rave ’ia māuruuru mai te Atua ?

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.

Ha’amaita’i i tā ’oe iho tuatāpapara’a pāpa’ira’a mo’a

’A ani i te Fatu i te tauturu. ’Ua hōro’ahia mai te mau pāpa’ira’a mo’a nā roto i te heheura’a, ’e nō te māramarama mau i te reira, tītauhia te heheura’a nō tātou iho. ’Ua parau fafau te Fatu : « E ani, e noa’a ïa ia ’outou ; e ’imi, e ’ite ïa ’outou ; e pātōtō, e ’īithia ïa te ’ōpani ia ’outou » (Mataio 7:7).

Tē bāpetizo ra Ioane ia Iesu.

Tē bāpetizo ra Ioane Bapetizo ia Iesu, nā Greg K. Olsen