« 4–10 nō fepuare. Mataio 4 ; Luka 4–5 : ‘Tei ni’a iho iā’u te Vārua o te Fatu’ » Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 4–10 nō fepuare. Mataio 4 ; Luka 4–5 », Mai, pe’e mai—nō te ta’ata hō’ē ’e te ’utuāfare : 2019
Christ Triumphs over Satan, nā Robert T. Barrett
4–10 nō fepuare
Mataio 4 ; Luka 4–5
« Tei ni’a iho iā’u te Vārua o te Fatu »
Ha’amata nā ni’a i te tai’ora’a i te Mataio 4 ’e te Luka 4–5, ’e ’a ha’apa’o maita’i i te mau mea tā ’outou e ’apo mai. E tauturu te mau mana’o tuatāpapara’a i roto i teie arata’ira’a ha’api’ira’a ’ia fa’ata’a mai i te tahi mau parau tumu faufa’a roa a’e i roto i teie mau pene.
Tāpa’opa’o i te mau mana’o e tae mai ia ’outou
Mai tōna ’āpīra’a ra iho ā, e au ē ’ua ta’a ia Iesu ē e misiōni hō’ē roa ’e te mo’a tāna. Teie nei rā ’a fa’aineine ai Iesu nō te ha’amata i tāna tāvinira’a i te tāhuti nei, ’ua ’imi te ’enemi e fa’atupu i te fē’a’a i roto i te ferurira’a o te Fa’aora. « E tamaiti ’oe nā te Atua ra », tā Sātane i parau (Luka 4:3, pāpa’ira’a fa’a’opa tei tu’uhia). ’Ua auhō’ē rā te Fa’aora ’e tōna Metua i te Ra’i. ’Ua ’ite ’oia i te mau pāpa’ira’a mo’a, ’e ’ua ’ite ’oia ’o vai ’oia. Nōna, ’ua riro te mea tā Sātane i hōro’a—« E hōro’a atu vau i te hau, ’e te hinuhinu i teie nei mau fenua ia ’oe » (Luka 4:6)—’ei ’apu ’aita e mea i roto, inaha maoti te fa’aineinera’a o te Fa’aora i te roara’a o tōna orara’a tōna fāri’ira’a i te « mana o te Vārua » (Luka 4:14). Nō reira, noa atu ā te fa’ahemara’a, te mau tāmatara’a ’e te pāto’ira’a, ’aita Iesu Mesia i ’ōtohe ri’i a’e i te ’ohipa i fa’ata’ahia nōna : « E parau haere ā vau i te parau maita’i o te bāsileia o te Atua… i tonohia mai ai ho’i au » (Luka 4:43).
Mau mana’o nō tā ’oe iho tuatāpapara’a pāpa’ira’a mo’a
Nā te auhō’ēra’a vau ’e te Atua e fa’aineine iā’u ’ia tāvini iāna.
Nō te fa’aineine nō tāna misiōni, ’ua haere Iesu i roto i te medebara « ’ia vai i pīha’i iho i te Atua » (’Īritira’a a Iosepha Semita, Mataio 4:1). E feruri i te mau mea e rave ’oe nō te vai i pīha’i iho i te Atua. Nāhea te reira i te fa’aineine ia ’oe nō te ’ohipa ’ua hina’aro ’oia ’ia rave ’oe ?
’Ua ha’amau Iesu Mesia i te hi’ora’a nō’u nā roto i te pāto’ira’a i te fa’ahemara’a.
I te tahi taime e tupu te mana’o fa’ahapa i roto i te ta’ata ’ia fa’ahemahia ’oia i te hara. ’Ua fa’ahema-ato’a-hia te Fa’aora, ’e ’ua ora ’oia « ’aita roa rā e hara » (Hebera 4:15). E nehenehe te reira ’ite e riro ’ei tāmāhanahanara’a, i te mea ē, nō tōna fa’arurura’a i te mau fa’ahemara’a ’e nō tōna upo’oti’ara’a i te reira, ’ua ’ite ’oia i te mau fa’ahemara’a e fa’aruru nei tātou ’e e nehenehe tāna e tauturu ia tātou ’ia upo’oti’a i te reira (hi’o Hebera 2:18 ; Alama 7:11–12).
’A tai’o ai ’oe i te Mataio 4:1–11 ’e te Luka 4:1–13, e aha tā ’oe e ha’api’i ra ’o te nehenehe e tauturu i mua i te mau fa’ahemara’a ? E nehenehe e fa’anaho i te mau mana’o i roto i te hō’ē tāpura mai teie :
|
Iesu Mesia |
’O vau |
|---|---|
Iesu Mesia E aha tā Sātane i fa’ahema i te Mesia ’ia rave ? Fa’a’ohipa i tōna mana nō te ha’amaha i tōna po’ia. | ’O vau E aha tā Sātane e fa’ahema nei iā’u ’ia rave ? |
Iesu Mesia Nāhea te Mesia i te fa’aineinera’a ’ia pāto’i i te fa’ahemara’a ? ’Ua ha’apae ’oia i te mā’a ; ’ua haere ’oia nō te vai i pīha’i iho i te Atua ; ’ua ’ite ’oia i te mau pāpa’ira’a mo’a. | ’O vau Nāhea vau e ineine ai ’ia pāto’i i te fa’ahemara’a ? |
Iesu Mesia | ’O vau |
E aha te tahi atu mea e ’apohia nei i roto i te ’Īritira’a a Iosepha Semita nō Mataio 4 ?
Hi’o ato’a 1 Korinetia 10:13 ; Alama 13:28 ; Mose 1:10–22.
’O Iesu Mesia te Mesia a te ’āti Iuda i tohuhia.
Mai te mea e uihia ’oe ’ia fa’ata’a mai i te ’ohipa i tonohia mai Iesu Mesia e rave i ni’a i te fenua nei, e aha tā ’oe e parau ? I roto i te Luka 4:18–19, ’ua fa’ata’a te Fa’aora i te tahi tuha’a o tāna misiōni nā roto i te fa’ahitira’a i te mau parau tohu a Isaia nō ni’a i te Mesia (hi’o Isaia 61:1–2). E aha tā ’oe e ha’api’i nei nō ni’a i tāna misiōni ’ia tai’o ’oe i teie mau ’īrava ?
’Ua fa’a’ite pāpū atu Iesu Mesia ē, ’o ’oia te Mesia.
Noa atu ā tō te mau ’āti Iuda tīa’i-noa-ra’a e rave rahi tenetere ’ia tupu te parau tohu a Isaia, e rave rahi o rātou ’aita i fāri’i ’o Iesu te Mesia ’a parau ai ’oia ē : « Teie nei parau i pāpa’ihia tā ’outou i fa’aro’o iho nei, ’ua tupu ïa i teie nei mahana » (Luka 4:21). ’A tai’o ai ’oe i te Luka 4:20–30 (hi’o ato’a Mareko 6:1–6), ’a tāmata i te feruri ia ’oe ’o ’oe te mau ta’ata nō Nazareta. Tē vai ra ānei te hō’ē mea e tāpe’a ia ’oe i te fāri’i-hope-ra’a i te Mesia ’ei Fa’aora nō ’oe ?
Hi’o ato’a Mosia 3:5–12.
’Ia tu’u vau i tō’u ti’aturi i te Fatu, e ti’a iāna ’ia tauturu mai ’ia tae’a tō’u fāito pūai hanahana.
’Ua ha’api’i te peresideni Ezra Taft Benson : « Te tāne ’e te vahine ’o te fa’afāriu i tō rātou orara’a i ni’a i te Atua, e ’ite ïa rātou ē, e rahi atu tāna e fa’atupu i roto i tō rātou orara’a i tā rātou iho e nehenehe e fa’atupu » (Te Mau Ha’api’ira’a a te Mau Peresideni o te ’Ēkālesia : Ezra Taft Benson [2014], 42). ’O te mea ïa i tupu nō Petero ’e tōna mau hoa tāi’a. ’Ua tauturu Iesu ia rātou ’ia ’ite ē, e ’ohipa rahi atu ā tā rātou e nehenehe e rave i te tāi’a-noa-ra’a i te i’a—e nehenehe tā rātou ’ia reiro ’ei « rava’ai ta’ata » (Mataio 4:19 ; hi’o ato’a Luka 5:10). ’Ei tauturura’a ia rātou ’ia ’ite i te reira, ’ua fa’a’ohipa Iesu i te mau ’ohipa ’ua mātau rātou.
Ahea ’oe i te putapūra’a i te pi’ira’a a te Fa’aora e pe’e iāna ? Nāhea ’oe i te fa’a’itera’a i te Fatu ē, ’ua ti’a ia ’oe ’ia « fa’aru’e [pauroa] » (Luka 5:11) nō te pe’e iāna ? E feruri i teie mau uira’a ’a tai’o ai ’oe i te Mataio 4:18–22 ’e te Luka 5:1–11.
Hi’o ato’a « Mai pe’e mai », Te mau hīmene, n°58.
Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
Tē ha’apae ra Iesu i te mā’a ’a fa’ahemahia ai ’oia e te ’enemi. E aha te mea tā tātou e nehenehe e ’apo mai i roto i teie ’ā’amu nō ni’a i te mana o te ha’apaera’a mā’a ? E nehenehe e ui i te mau melo o te ’utuāfare ’ia fa’a’ite mai i te tahi ’ohipa i tupu nō rātou ’e te ha’apaera’a mā’a. Penei a’e e nehenehe tō ’outou ’utuāfare e fa’ata’a i te tahi fa’anahora’a nā roto i te pure nō te ha’apae ’āmui nō te hō’ē ’ōpuara’a ta’a ’ē.
I te fa’ahemara’a Sātane i te Mesia e taui i te ’ōfa’i ’ei faraoa, ’ua fa’ati’o ’oia i te hīro’a hanahana o te Mesia i te nā ’ōra’a : « E tamaiti ’oe nā te Atua ra » (Mataio 4:3, pāpa’ira’a fa’a’opa tei tu’uhia). Nō te aha Sātane e tāmata ai i te fa’afēa’a ia tātou i tō tātou hīro’a hanahana ? Nāhea ’oia i te rave i te reira ? (Hi’o ato’a Mose 1:10–23.)
I muri mai i te tāmatara’ahia Iesu i te pae tino ’e i te pae vārua, ’ua fāriu tōna mana’o i ni’a ia Ioane Bāpetizo, tei te fare ’āuri ’oia : « ’E teienei, i ’ite Iesu ē, ’ua hurihia Ioane i roto i te fare ’āuri, ’e ’ua tono ’oia i te mau melahi, ’e inaha, ’ua haere mai rātou ’e ’ua tāvini iāna [ia Ioane] » (’Īritira’a a Iosepha Semita, Mataio 4:11). Nāhea tātou i te ha’amaita’ihia ’ia pe’e ana’e tātou i te hi’ora’a o te Mesia i te ferurira’a i te tahi atu mau ta’ata hou i te feruri ia tātou iho nei ? Nāhea e ti’a ai ia tātou ’ia pe’e i tōna hi’ora’a ?
’Ua mātau ānei tātou i te hō’ē ta’ata tei māuiui te ’ā’au ’aore rā e tīa’i ra ’ia « tu’uhia » rātou ? (Luka 4:18). Nāhea tātou nō te tauturu ia vetahi ’ē ’ia fāri’i i te rapa’aura’a ’e te fa’aorara’a a te Fa’aora ? E nehenehe ato’a e paraparau nāhea te ravera’a i te mau ’ōro’a hiero e hōpoi i « te ora nō te tītī » (Luka 4:18).
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā tātou hōro’ara’a i te ha’api’ira’a
’A ora i te ’evanelia a Iesu Mesia « Te mea hau roa atu i te faufa’a ’o tā ’outou e nehenehe e rave [’ei metua ’e ’ei ’orometua] ’o te… orara’a ïa i te ’evanelia ma tō ’outou ’ā’au ato’a… ’O teie te rāve’a rahi nō te fāna’o i te hoara’a o te Vārua Maita’i. ’Aita ’outou i tītauhia ’ia riro ’ei ta’ata maita’i roa, ’ia tāmata tāmau noa rā—’e ’ia ’imi i te fa’a’orera’a hara nā roto i te Tāra’ehara a te Fa’aora i te mau taime ato’a e turori ’outou » (Ha’api’ira’a mai tā te Fa’aora, 13).
The Call, nā Jorge Cocco