« 11–17 nō fepuare. Ioane 2–4: ‘’Ia fānau fa’ahou ’outou e ti’a ai’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 11–17 nō fepuare. Ioane 2–4 », Mai, pe’e mai—nō te ta’ata hō’ē ’e te ’utuāfare : 2019
11-17 nō fepuare
Ioane 2–4
« ’Ia fānau fa’ahou ’outou e ti’a ai »
’A tai’o ai ’outou i te Ioane 2–4, e ha’api’i mai te Vārua ia ’outou i te mau mea nō ni’a tō ’outou iho fa’afāriura’a. Tāpa’o i tāna e muhumuhu mai. E ’ite ’outou i te tahi atu ā ’ohipa pae vārua e ’apo mai i roto i te mau mana’o tuatāpapara’a o teie arata’ira’a ha’api’ira’a.
Tāpa’opa’o i te mau mana’o e tae mai ia ’outou
I te hō’ē fa’aipoipora’a i Kana, ’ua taui te Mesia i te pape ’ei uaina—e semeio tā Ioane i parau ’o te « semeio mātāmua » (Ioane 2:11). E parau mau te reira, ’ua rau ho’i te tumu : ’a riro ai te reira te semeio mātāmua tā Iesu i rave i mua i te ta’ata, e nehenehe ato’a e fa’ahōho’a i te tahi ato’a ha’amatara’a semeio—te ’ohipa tau maoro nō te tauira’a tō tātou ’ā’au ’a riro roa ai tātou mai tō tātou Fa’aora te huru. E ha’amata teie semeio o te orara’a tā’āto’a nā roto i te fa’aotira’a e pe’e ia Iesu Mesia, e taui ’e e ora i te hō’ē orara’a maita’i a’e nā roto iāna. I te pae hope’a, e nehenehe teie tauira’a e hope roa ho’i ’e e ti’a roa ïa ’ia parau i te reira e « fānau fa’ahou » (Ioane 3:7). Teie rā, te fānau-fa’ahou-ra’a, ’o te ha’amatara’a noa ïa nō te ’ē’a o te ti’ara’a pipi. Tē fa’aha’amana’o nei te mau parau a te Mesia i te vahine samaria i te ’āpo’o pape ra ē, ’ia tāmau ā tātou i ni’a i terā ’ē’a, i te hope’a e riro mai te ’evanelia ’ei « pape piha’a » i roto ia tātou, « i te piha’ara’a ē tae noa atu i te ora mure ’ore ra » (Ioane 4:14).
Mau mana’o nō tā ’oe iho tuatāpapara’a pāpa’ira’a mo’a
E ti’a i te mana o Iesu Mesia e taui iā’u.
’A tai’o ai ’oe nō ni’a i te Fa’aora e taui ra i te pape ’ei uaina i roto i te Ioane 2:1–11, e aha te mau ’ohipa tā ’oe e ’apo nei nō ni’a i te mana o te Mesia e taui ia ’oe ?
E mau mea fa’ahou ā tā ’oe e ’apo mai nā roto i te ferurira’a i te hi’ora’a ta’a ’ē a te mau ta’ata ’ē’ē i ti’a i reira, mai ia Maria, te mau pipi ’e tē vai atu ra. E aha ra ïa tā teie mau ta’ata hi’ora’a i teie semeio ? E nehenehe tā ’oe e fa’aau i tā ’oe e ha’api’i ra nō ni’a i te mau semeio i roto i teie mau ’īrava i te mea tā Iesu Mesia i ha’api’i ia Nikodemo (hi’o Ioane 3:1–8) ’e i te vahine i te ’āpo’o pape ra (hi’o Ioane 4:3–26).
E ti’a iā’u ’ia fānau-fa’ahou-hia nō te tomo i roto i te bāsileia o te Atua.
I te taime ’a haere ’ōmo’e mai ai Nikodemo ia Iesu ra, e ta’ata hi’ohi’o ri’i noa. I muri mai rā, ’ua turu pāpū ’oia ia Iesu (hi’o Ioane 7:45–52) ’e ’ua ’āmui roa i te feiā ti’aturi i te hunara’ahia o te Fa’aora (hi’o Ioane 19:38–40). E aha te mau ha’api’ira’a tā ’oe e ’ite nei i roto i te Ioane 3:1–21 tei fa’auru ia Nikodemo ’ia pe’e ia Iesu ’e ’ia fānau-fa’ahou-hia ’oia ?
’Ua ha’api’i mai te peropheta Iosepha Semita ē : « Nā te Vārua o te Atua e fa’atupu i te fānau-fa’ahou-ra’a nā roto i te mau ’ōro’a » (Te Mau Ha’api’ira’a a te Mau Peresideni o te ’Ēkālesia : Iosepha Semita [2007], 109). E aha te ’ohipa a te bāpetizora’a (te « fānau i te pape » [Ioane 3:5]) ’e te ha’amaura’a (te fānau i « te Vārua » [Ioane 3:5]) i roto i te fānau-fa’ahou-ra’a ? E aha tā ’oe e rave nei nō te tāmau ā te reira ’ohipa tau maoro nō te tauira’a ? (hi’o Alama 5:11–14).
Hi’o ato’a Mosia 5:7 ; 27:25–26 ; David A. Bednar, « ’Ia fānau fa’ahou ’outou e ti’a ai », Ensign ’aore rā Liahona, Mē 2007, 19–22.
Tē fa’a’ite nei te Metua i te Ao ra i tōna here iā’u nā roto ia Iesu Mesia.
’Ua ha’api’i Elder Jeffrey R. Holland : « Te parau mau rahi mātāmua o te tau mure ’ore, ’o te herera’a ïa te Atua ia tātou ma tōna ’ā’au ato’a ’e te pūai ’e te mana’o ’e te itoito » (« Ananahi ho’i Iehova e rave ai i te mea ta’a ’ē i roto ia ’outou na », Ensign ’aore rā Liahona, Mē 2016, 127). Nāhea ’oe i te ’itera’a i te here o te Atua nā roto i te hōro’ara’a i tāna Tamaiti ?
Tē hōro’a nei te ’ōro’a mo’a i te taime nō te feruri i ni’a i te here o te Atua ’e i ni’a i te hōro’a o tāna Tamaiti ? E aha te mau hīmene e tauturu ia ’oe ’ia putapū i tōna here ? ’A feruri i te māta’ita’i i te video nō te pupu hīmene o te Fare menemene e hīmene ra « I stand All Amazed [Tē māere nei au] » (LDS.org). E aha tā ’oe e nehenehe e rave nō te fa’ariro i te ’ōro’a ’ei ’ohipa faufa’a a’e ?
E Vārua ānei te Atua ?
Tē vai ra paha te ta’ata e ta’a ’ore ra i te fa’ahitira’a a Iesu ē, e vārua te Atua. E ha’apāpūra’a faufa’a rahi e vai ra i roto i te ’Īritira’a a Iosepha Semita nō teie ’īrava : « Nō teie nei ho’i ta’ata te Atua i parau fafau ai i tōna Vārua ». Tē ha’api’i ato’a nei te heheura’a i tō tātou nei anotau ē, e tino ’ī’o ’e te ivi tō te Atua (hi’o PH&PF 130:22–23 ; hi’o ato’a Genese 5:1–3 ; Hebera 1:1–3).
Tē pūpū nei te Mesia i tāna pape ora iā’u.
E aha te aura’a te parau a Iesu i tōna paraura’a i te vahine samaria ē, te ta’ata e inu i te pape tāna e pupu atu, e’ita roa atu ’oia e po’iha fa’ahou ? Nāhea te ’evanelia e riro ai ’ei pape ora ?
’O te ’evanelia a te Mesia te pape ora e fa’ainu i tō tātou vārua.
Hō’ē o te mau parau a te Fa’aora i te vahine samaria ’oia ho’i, e mea faufa’a a’e te huru tātou e ha’amori i te vāhi tātou e ha’amori (hi’o Ioane 4:21–24). E aha tā ’oe e rave nei nō te « ha’amori i te Metua… ma te vārua ’e te parau mau » ? (Ioane 4:23).
Hi’o ato’a Dean M. Davies, « Te mau ha’amaitaira’a nō te ha’amorira’a », Ensign ’aore rā Liahona, Novema 2016, 93–95.
Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
’A tai’o ai tō ’outou ’utuāfare i teie mau pene i teie hepetoma, ’a hi’o ta’a ’ē nāhea te Fa’aora i te fa’a’ohipara’a i te mau mea mātauhia—te fānaura’a, te mata’i, te pape ’e te mā’a—nō te ha’api’i i te mau parau mau pae vārua. E aha te mau tauiha’a i tō ’outou fare e nehenehe e fa’a’ohipa nō te ha’api’i i te mau parau mau pae vārua ?
’Ia ’ape ’outou i te mau mea e fa’ariro i tō ’outou fare ’ei fare vi’ivi’i i te pae tino ’e i te pae vārua, e nehenehe e riro mai ’ei vāhi mo’a—mai te hiero te huru. E aha te mau mea tītauhia ’ia vaiiho i rāpae i tō ’outou fare ’ia riro te reira ’ei vāhi mo’a ? E aha tā ’outou e rave ’ia vai noa te reira mau mea i rāpae ?
’A ui i te mau melo o te ’utuāfare ’ia feruri nō ni’a i te semeio nō te hapūra’a ’e te fānaura’a—te ’ohipa nō te hāmanira’a i te hō’ē mea ora ’e te hāhaere ’e te feruri. ’Ua ha’api’i te Mesia ē, e ti’a ia tātou ’ia fānau-fa’ahou-hia hou ’a tomo ai i roto i te bāsileia o te Atua. Nō te aha ’ua riro te fānau-fa’ahou-ra’a ’ei hōho’a tano roa nō te tauira’a tītauhia nō tātou hou tātou ’a tomo atu ai i roto i te bāsileia o te Atua ? E aha te mau ’ohipa i tupu nō tātou i roto i te ’ohipa nō te fānau-fa’ahou-ra’a pae vārua ?
E ani i te mau melo o te ’utuāfare ’ia fa’ahiti fa’ahou ā i teie ’īrava nā roto i tā rātou iho mau parau mai te mea ra ē, tē ha’api’i ra rātou i te reira i te hō’ē hoa. Nāhea te Mesia i te tauturura’a ia tātou ’ia putapū i te here o te Atua i roto i tō tātou orara’a ?
E aha tā te Fa’aora i ha’api’i ia tātou ’a fa’aau ai ’oia i tāna ’evanelia i te pape ora ? E ’ōpua i te fa’a’ite i te hō’ē hāpaina pape i te ’utuāfare ma te ui ia rātou ’ia fa’ata’a mai i te mau maita’i o te pape. Nō te aha i tītauhia ai ia tātou ’ia inu i te pape i te mau mahana ato’a ? Nō te aha Iesu Mesia i fa’aau ai i tāna ’evanelia i te hō’ē « pape pīha’a… i te piha’ara’a ē tae noa atu i te ora mure ’ore ra » ? (Ioane 4:14).
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
E ’imi i te mau taipe. Pinepine te mau pāpa’ira’a mo’a i te fa’a’ohipa i te mau tao’a, te mau ’ohipa e tupu, te ’ohipa e ravehia ’aore rā te mau ha’api’ira’a ’ei fa’ahōho’ara’a i te mau parau mau pae vārua. E nehenehe teie mau taipe e fa’arahi i tō ’outou māramaramara’a i te ha’api’ira’a tumu e ha’api’ihia ra. ’Ei hi’ora’a, ’ua fa’ahōho’a te Fa’aora i te fa’afāriura’a i te fānau-fa’ahou-ra’a.
Living Water, nā Simon Dewey