Te tāmā’ara’a hōpe’a

’E, pō a’era, nā Benjamin McPherson

10–16 nō Tiunu

Mataio 26 ; Mareko  14 ; Luka 22 ; Ioane 18

« ’Ia tupu rā tō ’oe hina’aro, ’eiaha tō’u »

’A tai’o ai ’outou i te Mataio 26 ; Mareko 14 ; Luka 22 ; ’e Ioane 18, ’a ’imi i te mau parau tumu tā ’outou e mana’o ē, e ti’a i te mau tamari’i ’ia māramarama.

Pāpa’i i tō ’outou mau mana’o

tāpa’o nō te fa’a’itera’a

Ani ’ia fa’a’ite

’A fa’a’ite i te mau hōho’a o te mau ’ohipa i tupu i roto i teie mau pene, mai Gospel Art Book, nos. 54, 55, ’e 56, ’e ’a ani i te mau tamari’i ’ia parau mai, e aha te tupu ra i roto i te mau hōho’a.

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i ’āpī a’e

Mareko 14:22–25 ; Luka 22:19–20

Tē tauturu nei te ’ōro’a mo’a iā’u ’ia feruri ia Iesu.

’A tauturu i te mau tamari’i ’ia ite ē, ’ua riro te ’amura’a i te ’ōro’a ’ei rāve’a nō te feruri ia Iesu.

Te mau ’ohipara’a e ti’a ’ia rave

• ’A ha’apoto i te ’ā’amu ’o Iesu i te fa’aōra’a mai i te ’ōro’a mo’a. E nehenehe tā ’outou e fa’a’ohipa i te « Pene 49 : Te ’ōro’a mātāmua », Te mau ’ā’amu nō te faufa’a ’āpī, 124–26, ’e ’aore rā, te video tano i ni’a (LDS.org). Hi’o ato’a i te video « Te ’ōro’a moa » (LDS.org). ’A tauturu i te mau tamari’i ’ia ta’a maita’i ē, e ha’amana’o tātou ia Iesu i te taime nō te ’ōro’a mo’a.

• ’A ani i te mau tamari’i ē, ’ua ’ite ānei rātou e aha te fa’ahōho’ara’a nō te faraoa ’e te pape ’ōro’a. ’A fa’ata’a ē, e tauturu teie mau tāpa’o ia tātou ’ia ha’amana’o ē, ’ua pohe Iesu nō tātou ’e ’ua ti’afa’ahou mai te pohe mai. ’A fa’a’ite i te hō’ē tāpū faraoa ’e hō’ē hāpaina pape na’ina’i nō te tauturu i te tamari’i ’ia tāmau ’ā’au i te parau ra « ’Ei ha’amana’ora’a [Iāna] » (Luka 22:19).

• ’A ani i te mau tamari’i ’ia tāpiri i te mata ’e ’ia feruri i te hō’ē ta’ata tā rātou i here, ’e i muri iho, ’a ani ia rātou ’ia fa’a’ite mai nō ni’a i taua ta’ata ra. ’A ani i te mau tamari’i ’ia tāpiri fa’ahou i tō rātou mata, ’a feruri i te Fa’aora, ’e ’a fa’a’ite i te mau mea tā rātou i ’ite nō ni’a iāna. ’A fa’aitoito ia rātou ’ia feruri nō ni’a ia Iesu i te taime nō te ’ōro’a mo’a i te hepetoma tāta’itahi.

• ’A ani i te mau tamari’i ’ia fa’a’ite mai e aha te ti’a ia rātou ’ia rave nō te ha’amana’o ia Iesu ’e ’ia fa’atura i te taime nō te ’ōro’a mo’a.

• ’A tauturu i te mau tamari’i ’ia hāmani i te buka iti i fa’a’itehia i ni’a i te ’api fa’a’ohipara’a nō teie hepetoma. ’A parau ia rātou ’ia fa’a’ohipa i te reira nō te tauturu ia rātou ’ia feruri nō ni’a ia Iesu i te taime nō te ’ōro’a mo’a.

• ’A tauturu i te mau tamari’i ’ia ’imi i te tahi mau ve’a nā te ’Ēkālesia nō te mau hōho’a nō Iesu, ’e ’a fa’atupu i te hō’ē tāpiripirira’a ’o tā rātou e nehenehe e hi’o i roto i te purera’a ’ōro’a.

Mataio 26:36–46

’Ua mamae Iesu nō’u nō te mea ’ua here ’oia iā’u.

’A feruri nāfea e ti’a ai ia ’outou ’ia tauturu i te mau tamari’i ’ia ’ite i te here ’o Iesu ia rātou, ’a fa’ati’a ai ’outou i te ’ā’amu ’o tōna mamaera’a i Getesemane.

Te mau ’ohipara’a e ti’a ’ia rave

• ’A ani i te mau tamari’i ’ia feruri i te hō’ē taime ’a ’oto ai ’e ’aore rā ’a pēpē ai rātou. ’A ani te tahi mau tamari’i ’ia fa’a’ite mai, mai te mea e nehenehe. ’A fa’a’ite i te hōho’a i roto i te fa’anahora’a nō teie hepetoma i roto Mai, pe’e mai—Nō te ta’ata iho ’e nō te ’utuāfare. ’A fa’ata’a ē, Iesu, i roto i te tahi huru ’aita tātou i māramarama hope roa, ’ua fāri’i i te mau mamae ’e te ’oto ato’a ’o tā te mau ta’ata ato’a i fārerei. Te aura’a o te reira, e nehenehe tāna e tauturu ia tātou ’ia maita’i mai, ’ia ’oto ana’e tātou, ’ia pēpē , ’e ’aore rā ’ia ’ino’ino.

• ’A hīmene ’e te mau tamari’i « Je ressens son amour », Buka Chants pour les enfants, 42–43. ’A ani ia rātou ’ia fa’a’ite mai i te mau huru ’a fāri’i ai rātou i te here o te Iesu.

Tē pure nei Iesu i Gesetemane

Tē pure nei Iesu i Gesetemane, nā Hermann Clementz

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i pa’ari a’e

Mareko 14:22–24

E tauturu te ’ōro’a mo’a iā’u ’ia ha’amana’o ia Iesu Mesia ’e i tāna tusia nō’u.

Nāhea e ti’a ai ia ’outou ’ia tauturu i te mau tamari’i ’ia fāri’i i te hō’ē ’itera’a faufa’a rahi a’e nō ni’a i te ’ōro’a mo’a ?

Te mau ’ohipara’a e ti’a ’ia rave

• ’A ani i te mau tamari’i ’ia tai’o, te tahi i muri iho i te tahi, i te mau ’īrava i roto i te Mareko 14:22–24 (hi’o ato’a ’Īritira’a a Iosepha Semita, Mareko 14:20–24 [i roto i te fa’ahorora’a Bibilia]) ’e Te Parau Ha’api’ira’a ’e te Mau Parau Fafau 20:75–79. E aha te mau parau ’e te mau mana’o tei tuea noa i roto i nā pāpa’ira’a e piti ?

• ’A ani i te mau tamari’i e aha tā rātou e rave nō te tauturu ia rātou ’ia feruri ia Iesu i te taime nō te ’ōro’a mo’a. ’A tauturu ia rātou ’ia ’imi i te mau pāpa’ira’a mo’a ’e ’aore rā i te mau parau i roto i te mau hīmene ’ōro’a, ’o tā rātou e nehenehe e tai’o i te taime nō te ’ōro’a mo’a, ’e i muri iho, ’a pāpa’i te reira i ni’a i te hō’ē tāreta tā te mau tamari’i e nehenehe e hi’o i te taime ’a rave ai rātou i te ’ōro’a mo’a. ’A hīmene ’e te mau tamari’i i te tahi o teie mau hīmene (’a hi’o Te mau hīmene nos. 169–97).

• ’A pāpa’i i te mau pereota tumu nō roto mai i te mau pure ’ōro’a i ni’a i te tāpura ’ere’ere, ’e ’a tauturu i te mau tamari’i ’ia tāmau ’ā’au i te reira. E aha te aura’a o teie mau pereota ? Nō te aha tātou e ’oa’oa ai ’ia fa’a’āpī i tā tātou mau fafaura’a o te bāpetizora’a i te mau hepetoma ato’a ?

• ’A ani i te hō’ē melo tei mau i te ’autahu’ara’a a Aarona ’ia fa’a’ite i te mau tamari’i i tōna ’itera’a nō ni’a i te fa’aineinera’a, te ha’amaita’ira’a, ’e ’aore rā te ’ōperera’a i te ’ōro’a mo’a. E aha tei tauturu iāna ’ia fa’aineine nō te rave i te reira ? E aha te mana’o i roto iāna ’a rave ai ’oia i te reira ? Nāfea te faraoa ’e te pape i te fa’aha’amana’o iāna i te Fa’aora ?

• ’A ani i te mau tamari’i tei bāpetizohia ’ia fa’a’ite mai i te mea tā rātou e ha’amana’o ra nō ni’a i tō rātou bāpetizora’a. E aha tō rātou mana‘o ? E aha te mau fafaura’a tā rātou i rave ? (’A hi’o Mosia 18:8–10). ’A parau ia rātou ē, ’ia rave ana’e tātou i te ’ōro’a mo’a i te mau hepetoma ato’a, e au ē, te bāpetizo-fa’ahou-hia ra—e nehenehe tā tātou mau hara e fa’a’orehia, ’e e fa’a’āpī fa’ahou tātou i tā tātou mau fafaura’a.

Mataio 26:36–42

I Getesemane, ’ua rave Iesu Mesia i ni’a iāna iho i tā’u hara ’e tō’u māuiui.

’Ia ’ite ana’e tātou i te ’ohipa tā Iesu i rave nō tātou i Getesemane, e nehenehe te reira e tauturu i te mau tamari’i ’ia tātarahapa i tā rātou mau hara ’e ’ia fāriu i ni’a i te Fa’aora ’ia fārerei ana’e rātou i te mau tāmatara’a teimaha.

Te mau ’ohipara’a e ti’a ’ia rave

• ’A ani i te mau tamari’i ’ia tai’o Mataio 26:36–42, ma te ’imi i te mau parau ’e ’aore rā te mau pereota o tē fa’ata’a ra i te huru ’o Iesu i Getesemane. E aha tā Iesu i fa’aruru, i tupu ai teie huru i ni’a iāna ? ’A hōro’a i te mau tamari’i i te rāve’a nō te fa’a’ite i tō rātou mau mana’o nō ni’a ia Iesu ’e tāna tusia nō tātou.

• ’A ani i te mau tamari’i ’ia feruri i te hō’ē taime ’a ’oto ai ’e ’aore rā ’a māuiui ai rātou. ’A ani ia rātou ē, ’ua ’ite ānei rātou i te hō’ē ta’ata tei fārerei ato’a i te reira huru mana’o. ’A fa’ata’a ē, i Getesemane, ’ua fāri’i Iesu i te tā’āto’ara’a o te māuiui ’e te ’oto tā te ta’ata ato’a i fārerei. ’Ua nā reira ’oia ’ia ti’a ho’i iāna ’ia tāmāhanahana ia tātou i te taime e hina’aro ai tātou (’a hi’o Alama 7:11–12).

• ’A hōro’a i te hō’ē tamari’i i te hō’ē rā’au roa a’e i te a’ano o te ’ūputa o te piha ha’api’ira’a, ’e ’a ani iāna ’ia tāpe’a fa’atārava i te reira rā’au, ’e ’ia tāmata i te haere nā roto i te ’ūputa. ’A fa’ata’a ē, tē fa’ahōho’ahia nei te rā’au i tā tātou mau hara, o te tāpe’a nei ia tātou ’ia tomo i roto i te bāsileia ’o te Atua. ’A ’āfa’i ’ē atu i te rā’au nō te fa’a’ite ē, ’ua rave Iesu i ni’a iāna iho i tā tātou mau hara ’ia ti’a ho’i ’ia fa’a’orehia tā tātou hara mai te mea ē, e tātarahapa tātou.

Luka 22:39–44

E nehenehe tā’u e pe’e i te hōho’a ’o Iesu nā roto i te aurarora’a i te Metua i te Ao ra.

’Ua fa’a’ite Iesu i te auraro i te Metua ’a parau ai ’oia ē, « ’ia tupu rā tō ’oe hina’aro, ’eiaha tō’u » (Luka 22:42). Nāhea e ti’a ai ia ’outou ’ia tauturu i te mau tamari’i ’ia ha’api’i mai, nā roto i te hi’ora’a ’o Iesu ?

Te mau ’ohipara’a e ti’a ’ia rave

• ’A tāmau ’ā’au ’e te mau tamari’i i te pereota ra, « ’ia tupu rā tō ’oe hina’aro, ’eiaha tō’u » (Luka 22:42) ’e ’a ’āparau e aha tōna aura’a. E aha te nehenehe ia tātou e rave nō te auraro i te hina’aro ’o te Metua i te Ao ra ?

• ’A tauturu i te mau tamari’i ’ia ’ite i te tahi mau fa’auera’a tā rātou i ha’apa’o. ’A ui : E aha te mau ha’amaita’ira’a tā ’outou i fāri’i nā roto i te aurarora’a i te Metua i te Ao ra, noa atu ē, e mea ’eta’eta ? ’A ani ia rātou ’ia fa’a’ite mai i tō rātou mau ’itera’a ’e tō rātou ’itera’a pāpū.

Luka 22:41–43

E nehenehe au e fāri’i i te tauturu ’ia pure ana’e au.

’A pure ai Iesu i Getesemane, ’ua fā mai ra te hō’ē melahi nō te fa’aitoito iāna. Tē ta’a ra ānei i te mau tamari’i tā ’outou e ha’api’i ra ē, e nehenehe ato’a tā rātou e pure i te Metua i te Ao ra nō te ani i te pūai ?

Te mau ’ohipara’a e ti’a ’ia rave

• ’A fa’ati’a i te ’ā’amu ’o Luka 22:41–43 i te mau tamari’i (penei a’e nā roto i te fa’a’ohipara’a « Pene  51 : ’Ua mamae Iesu i roto i te ’ō i Getesemane », Te mau ’ā’amu nō te Faufa’a ’Āpī, 129–32, ’e ’aore rā te video tano i ni’a LDS.org). ’A fa’ata’a ē, i tō Iesu purera’a, ’ua tono mai te Metua i te Ao ra i te hō’ē melahi nō te fa’aitoito iāna. ’O vai tā te Metua i te Ao ra e tono mai nō te fa’aitoito ia tātou ?

• ’A fa’a’ite i te hōho’a ’o te melahi e tāmāhanahana ra i te Mesia i roto i te fa’anahora’a o teie hepetoma i roto Mai, pe’e mai—Nō te ta’ata iho ’e nō te ’utuāfare, ’e ’a fa’a’ite i te hō’ē ’itera’a i reira ’outou i te ’itera’a i tō te Metua i te Ao ra fa’aitoitora’a ia ’outou.

tāpa’o nō te ’apora’a mai

Fa’aitoito i te ha’api’ira’a mai i te fare

’A ani i te mau tamari’i ’ia fa’a’ite i tō rātou ’utuāfare e aha tā rātou e rave i te taime nō te ’ōro’a mo’a nō te ha’amana’o ia Iesu.

Ha’amaita’i i tā tātou ha’api’ira’a

’A fa’a’ite i te ’itera’a pāpū i tā ’outou piha ha’api’ira’a. E nehenehe hō’ē ’itera’a pāpū ’ia riro ’ei mea ’ōhie roa mai teie te huru, « ’ua ’ite au ē, ’ua here te Metua i te Ao ra ia ’outou tāta’itahi » ’e ’aore rā « e tupu te au māite i roto iā’u, ’ia ha’api’i mai ana’e au nō ni’a ia Iesu Mesia ».

’api ’ohipara’a : te ’ōro’a mo’a