« 3–9 nō tiunu. Ioane 13–17: ‘’Ia vai-here-hia atu ā ’outou e au’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 3–9 nō tiunu. Ioane 13–17 », Mai, pe’e mai—nō te ta’ata hō’ē ’e te ’utuāfare : 2019
In Remembrance of Me, nā Walter Rane
3–9 nō tiunu.
Ioane 13–17
« ’Ia vai-here-hia atu ā ’outou e au »
’Ia tai’o ’outou i te mau ha’api’ira’a a te Fa’aora i roto i te Ioane 13–17, e tauturu te Vārua Maita’i ia ’outou ’ia ’ite mai i te mau poro’i nō ’outou. E tāpa’opa’o i te mau mana’o tā ’oe e fāri’i.
Tāpa’opa’o i te mau mana’o e tae mai ia ’outou
I teie mahana tē parau nei tātou i te reira « Te tāmā’ara’a hope’a », ’aita rā tātou i ’ite ē, ’ua pāpū roa ānei i te mau pipi a Iesu ē, i te taime ’ua putuputu rātou nō te ’ōro’a nō te Pāsa a te ’āti Iuda, ’o te tāmā’ara’a hope’a ïa ’e tō rātou Fatu hou ’oia ’a pohe ai. ’Ua ’ite rā Iesu ē, « ’ua tae i tōna hora » (Ioane 13:1). Fātata roa ’oia i te fa’aruru i te mamae i Getesemane, ’e te ho’ora’a ’e te mata-’ē-ra’a tōna mau hoa rahi iāna, nā reira ato’a tōna pohe umunaro i ni’a i te satauro. Noa atu rā teie mau mea i mua iāna, ’aita te mana’o o Iesu i ni’a iāna, i ni’a rā i te tāvinira’a i tāna mau pipi. Ma te ha’eha’a, ’ua hōroi ’oia i tō rātou ’āvae. ’Ua ha’apii ’oia ia rātou i te here. ’E ’ua ha’apāpū ’oia ia rātou ē, mai te huru ē, e’ita roa atu ’oia e fa’aru’e ia rātou ’e ’aita i tītauhia ’ia fa’aru’e rātou iāna. Tē ’ite nei te mau pipi nō terā ra tau ’e i teienei, i te tāmāhanahanara’a i roto i teie mau parau tāna : « E’ita vau e vaiiho ’ōtare noa ia ’outou » (Ioane 14:18). « I haʼapa’o ʼoutou i tā’u ra parau, ʼe vai herehia atu ā outou e au » (Ioane 15:10).
Mau mana’o nō tā ’oe iho tuatāpapara’a pāpa’ira’a mo’a
Tē fa’a’ite nei au i tō’u here nō Iesu Mesia nā roto i te ha’apa’ora’a i tāna fa’auera’a ’ia here.
’Ua ha’apii a’ena Iesu ē, nā fa’auera’a rahi roa e piti, e fa’auera’a ïa nō te here (hi’o Mataio 22:34–40). ’E nō te tūra’i ā i teie parau, ’ua riro te here ’ei tumu parau rahi nō tāna mau arata’ira’a hope’a i tāna mau ’āpōsetolo. ’Ia tai’o ’oe i te Ioane 13–15, e nehenehe tā ’oe e tāpa’o ’aore rā e fa’a’ū i te mau taime ato’a e fa’a’ohipahia te ta’o here (’aore rā aroha).
E ’ite paha ’oe i te ta’o fa’auera’a i te fa’ahiti-pinepine-hia i pīha’i iho i te ta’o here (’aore rā aroha) i roto i teie mau pene. E aha tā ’oe e nehenehe e ha’apii mai nō ni’a i te aura’a e vai ra i rotopū i te here ’e te mau fa’auera’a i roto i te mau ha’api’ira’a a te Fa’aora ? E aha te tahi atu mau ta’o i fa’ahiti-pinepine-hia nō te ’āpee i te ta’o here (’aore rā aroha) i roto i teie mau pene ? Mai roto mai i tā ’oe i ha’apii, e ’ōpua i te pāpa’i i te tahi ha’apotora’a nō te mau ha’api’ira’a a te Fa’aora nō ni’a i te here.
Hi’o ato’a D. Todd Christofferson, « E vai-here-hia atu ā ʼoutou e au », Ensign ’aore rā Liahona, Nov. 2016, 48–51.
Tē tauturu nei te Vārua Maita’i iā’u ’ia rave i tā’u fā ’ei pipi nā Iesu Mesia.
’Ua ’ite Iesu Mesia ē, ’ua fātata ’oia i te vaiiho i tāna mau pipi, ’e ’ua ’ite ato’a ’oia ē, e tītauhia te turu pae vārua nō rātou ’ia reva atu ’oia. Nō te tauturu ia rātou ’ia māramarama nāhea i te fārii i te reira turu, ’ua ha’apii ’oia ia rātou nō ni’a i te Vārua Maita’i. E aha tā ’oe e ha’apii nei nō ni’a i te mau hōpoi’a a te Vārua Maita’i i roto i te mau parau a te Fa’aora i roto i te mau ’īrava i muri nei ?
Nō te aha i tītauhia ai i te mau pipi teie huru tauturu nō ’ō mai i te Vārua Maita’i ? Nāhea te Vārua Maita’i i te fa’atupura’a i tāna mau hōpoi’a i roto i tō ’oe orara’a ? ’A tāmau noa ai ’oe i te tuatāpapa i te Faufa’a ’Āpī, ’a ’imi i te mau rāve’a tā te Vārua Maita’i i fa’a’ohipa nō te ha’amaita’i i te mau pipi a Iesu. E aha te tauira’a e tupu i roto i tō ’oe orara’a mai te peu e tītau ’oe i te Vārua Maita’i ’ia fa’auru hōhonu atu ā ia ’oe ?
Hi’o ato’a Mosia 3:19 ; 5:1–3 ; 3 Nephi 27:20 ; Moroni 8:25–26 ; 10:5 ; Te Parau Ha’api’ira’a ’e te mau Parau Fafau 11:12–14 ; Mose 6:61 ; « Holy Ghost », Gospel Topics, topics.lds.org.
’Ia ’ati au i te Mesia, e fa’ahotu vau i te hotu maita’i.
E aha te aura’a nō te parau « [’atira’a] i te Mesia » ? (Ioane 15:4). E aha te « hotu » e fa’a’ite nei ē, ’ua ’ati tātou i te vine, te fa’ahōho’ara’a nō Iesu Mesia ?
Tē ti’a ārai nei Iesu Mesia nō tāna mau pipi.
’Ua mātauhia i te piihia te mau parau a Iesu i roto i te Ioane 17 te pure ti’a ārai. I roto i te reira, tē pure nei Iesu nō tāna mau ’āpōsetolo ’e nō « te feiā ato’a… e fa’aro’o mai [iāna] nā roto i tā rātou ra ha’api’ira’a » (Ioane 17:20). Te aura’a ra, tē pure ra ’oia nō ’oe. E aha tā Iesu i ani i tōna Metua nō ’oe ’e nō te tahi atu mau feiā fa’aro’o pā’āto’a ?
Tē ha’apii ato’a nei teie pure i te tahi mau parau mau hōhonu ’e te mure ’ore. E aha te tahi mau parau mau tā ’oe e ’ite ra ’a tai’o ai ’oe i te reira ?
Mea nāhea Iesu Mesia ’e te Metua i te Ao ra i te hō’ē ?
I roto i tāna pure i roto i te Ioane 17, ’ua tūra’i Iesu i te parau nō tōna hō’ēra’a ’e te Metua, e ’ere rā te aura’a ’o te hō’ē noa iho ta’ata rāua. I te purera’a te Fa’aora ’ia hō’ē tāna mau pipi « mai »—’aore rā mai te huru—iāna ’e tōna Metua (Ioane 17:22), ’aita ’oia e ani ra i te mau pipi ’ia riro rātou hō’ē noa iho ta’ata. Tōna hina’aro, maoti rā, ’ia poupou rātou i te hō’ē ā tāhō’ēra’a mai i&āna ’e te Metua—te tāhō’ē-maita’i-roa-ra’a i roto i te fā, te ’ā’au ’e te ferurira’a.
Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
E aha tā tō tātou ’utuāfare e ha’apii nei i roto i te hi’ora’a o te Fa’aora i roto i teie mau ’īrava ? Nāhea tātou e nehenehe ai e pee i tōna hi‘ora’a ?
’A paraparau ai ’outou nō ni’a i te mau ha’api’ira’a a te Fa’aora nō ni’a i te here, ’a feruri ato’a i teie mau parau a te peresideni Thomas S. Monson : « I tō tātou nei anotau, ’aita atu e vāhi e hina’aro-rahi-hia te reira niu papa maori rā te ’utuāfare. ’E ’aita atu e vāhi, nā te ao ato’a nei, e ti’a ’ia ’itehia mai te hi’ora’a maita’i nō taua niu ra maori rā te mau ’utuāfare o te feiā mo’a i te mau mahana hope’a nei, rātou tei fa’ariro i te here ’ei tumu nō tō rātou orara’a ’utuāfare… ’O te here te tumu mau o te ’evanelia, te huru ari’i hanahana roa a’e i roto i te vārua ta’ata » (« As I Have Loved You », Ensign ’aore rā Liahona, Fepuare 2017, 4–5).
E ’ana’anatae paha te mau melo o te ’utuāfare i te pāpa’i i te tahi mau hōho’a ’aore rā e pāpa’i i ni’a i te tahi pāpie tei fa’ahōho’ahia i te māfatu, te tahi mea tā rātou e au nei nō ni’a i te tahi ’e te tahi. E nehenehe tā rātou e tu’u i teie mau pāpie māfatu ’ati a’e te fare ’ei ha’amana’ora’a ’ia fa’a’ite i te here i te tahi ’e te tahi.
Penei a’e e mea au ’ia tai’o i teie mau ’īrava nā rāpae i te fare, i pīha’i iho i te hō’ē vine, te hō’ē tumu rā’au ’aore rā te tahi rā’au. Nāhea teie ’ohipa e tauturu i tō ’outou ’utuāfare ’ia māramarama maita’i a’e i te mau ha’api’ira’a a te Fa’aora ?
’Ua ha’apii Iesu : « ’O vau te vine, ’o ’outou te ’āma’a » (Ioane 15:5).
I tō ’outou mana’o, nō te aha Iesu Mesia i fa’aara ai i tāna mau pipi nō ni’a i te mau hāmani-’ino-ra’a ? E aha te reira mau hāmani-’ino-ra’a i ni’a i te mau pipi a te Mesia i teie mahana ? Nāhea te parau a’o a te Fa’aora i roto i teie mau ’īrava e nehenehe ai e tauturu ia tātou i mua i te hāmani-’ino-ra’a ?
Nāhea te Mesia i te upo’oti’ara’a i ni’a i te ao ? Nāhea tāna tāra’ehara i te hōpoira’a mai ia tātou nei i te hau ’e te ’oa’oa ? (hi’o ato’a PH&PF 68:6).
Nāhea tō tātou ’utuāfare e nehenehe ai e tāhō’ē rahi atu ā mai ia Iesu Mesia ’e te Metua i te Ao ra i te tāhō’ēra’a ? Nō te aha te Fatu e hina’aro ai ’ia vai tāhō’ē tātou ? (hi’o ato’a PH&PF 38:27).
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā tātou hōro’ara’a i te ha’api’ira’a
Fa’a’ohipa i te haruharura’a fa’aro’o. ’A ha’apii noa ai ’outou i tō ’outou ’utuāfare i te mau pāpa’ira’a mo’a, ’a feruri ’ia fa’aro’o i te mau pa’ira’a mo’a e ’itehia i ni’a i te LDS.org ’e ’aore rā, te Gospel Library app. E nehenehe te fa’aro’ora’a i te Ioane 13–17 e riro ’ei mea pūai ta’a ’ē nō te mea, te vai ra i roto i teie mau pene e rave rahi mau parau a te Fa’aora.
Master Servant, nā Del Parson