« 24–30 nō tiunu. Mataio 28 ; Mareko 16 ; Luka 24 ; Ioane 20–21 : ‘’Ua ti’a fa’ahou ’oia’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 24–30 nō tiunu. Mataio 28 ; Mareko 16 ; Luka 24 ; Ioane 20–21 », Mai, pe’e mai—nō te ta’ata hō’ē ’e te ’utuāfare : 2019
Feed My Sheep, nā Kamille Corry
24–30 nō tiunu
Mataio 28 ; Mareko 16 ; Luka 24 ; Ioane 20–21
« ’Ua ti’a fa’ahou ’oia »
’A tai’o nā roto i te pure i te Mataio 28 ; te Mareko 16 ; te Luka 24 ’e te Ioane 20–21, e fa’ahōho’ara’a nō te ’oa’oa e noa’a maoti te ti’a-fa’ahou-ra’a o te Mesia. ’A feruri nāhea ’outou e fa’a’ite ai i tō ’outou ’itera’a pāpū ia vetahi ’ē nō ni’a i teie ’ohipa i tupu.
Tāpa’opa’o i te mau mana’o e tae mai ia ’outou
Nō te tahi mau ta’ata e rave rahi, ’ua riro te pohe o Iesu nō Nazareta mai te hō’ē orara’a fa’ahiahia tei tae i te hō’ē fa’ahope’ara’a ’ē. E ’ere ānei nāna i fa’ati’a mai ia Lazaro mai te pohe mai ? ’Aita ānei ’oia i pāto’i haere i te mau parau ha’apohe a te mau pharisea ? E mana tōna nō te fa’aora i te matapō, te lepera ’e te hapepa. ’Ua fa’aro’o roa ato’a te mata’i ’e te moana iāna. ’E teie ’oia, i ni’a i te hō’ē satauro i te paraura’a ē : « ’Ua oti » (Ioane 19:30). E māere rahi mau paha i roto i te mau parau fa’ao’ō’o ē : « ’Ua fa’aora ’oia ia vetahi ’ē ; e’ita e ti’a ’ia fa’aora iāna iho » (Mataio 27:42). ’Ua ’ite rā tātou ē, e ’ere te pohe o Iesu i te hope’a o te ’ā’amu. ’Ua ’ite tātou ē, e tau poto noa tō te māmū o te menemā, tē ha’amata noa ra te ’ohipa fa’aorara’a a te Mesia. I teie mahana, ’aita ’oia e ’itehia nei « i te vaira’a o te pohe », i rotopū rā i tei ora (Luka 24:5). E’ita tāna mau ha’api’ira’a e ha’amāmūhia inaha e poro tāna mau pipi maita’i i te ’evanelia i roto i « te mau nūna’a ato’a », ma te tu’u i te ti’aturi i ni’a i tāna parau ē « tei pīha’i ato’a iho ïa [’oia] ia [rātou], ē tae noa atu i te hope’a o teie nei ao » (Mataio 28:19–20).
Mau mana’o nō tā ’oe iho tuatāpapara’a pāpa’ira’a mo’a
Mataio 28 ; Mareko 16 ; Luka 24 ; Ioane 20
Nō te mea ’ua ti’a fa’ahou mai Iesu, e ti’a fa’ahou ato’a vau.
I roto i teie mau ’īrava, e riro ’oe i te tai’o nō ni’a i te hō’ē o te mau ’ohipa faufa’a rahi i tupu i roto i te tua’ā’ai o te ta’ata nei : te ti’a-fa’ahou-ra’a o Iesu Mesia. ’A tai’o ai ’oe, e hi’o ia ’oe mai te huru ra ’o ’oe te ta’ata i ’ite i te mau ’ohipa nō te Ti’a-fa’ahou-ra’a. E aha ra ïa te mana’o o teie nau ’ite ? E aha te mana’o i tō ’oe ’ā’au ’a tai’o ai ’oe nō nia’ i te ti’a-fa’ahou-ra’a o te Fa’aora ? ’A feruri i te huru o te reira i ni’a ia ’oe—tā ’oe hi’ora’a i te orara’a, tō ’oe mau aura’a ’e te ta’ata, tō ’oe fa’aro’o i te Mesia ’e tō ’oe fa’aro’o i te mau parau mau o te ’evanelia.
E nehenehe tā tātou e ani i te Fa’aora « e fa’aea na tātou ».
E nehenehe te ’ohipa i tupu nō nā pipi e piti tei rātere ’e tei fārerei i te Fa’aora i ti’a fa’ahou, i tō ’oe tere nō te ti’ara’a pipi. E aha te tū’atira’a tā ’oe e ’ite ra i roto i teie fa’ati’ara’a ’e te mau ’ohipa i tupu nō ’oe ’ei ta’ata ’āpe’e i te Mesia ? Nāhea e nehenehe ai ia ’oe ’ia haere nā muri iāna i teie mahana ’e ’ia ani iāna ’ia « pārahi » maoro ri’i mai ? (Luka 24:29). Nāhea ’oe e ’ite ai ē tei ’ōnei ’oia i roto i tō ’oe orara’a ? Nāhea te Vārua Maita’i i fa’a’ite pāpū ia ’oe i te hanahana o Iesu Mesia ?
E tino ānei tō Iesu Mesia ?
Nā roto i te mau fa’ati’ara’a nō ni’a i te Fatu tei ti’a fa’ahou mai ’e tei fā ia Maria Magadala ’e tei haere i rotopū i tāna mau pipi, tē ha’api’i nei tātou ē, e ti’a-fa’ahou-ra’a mau tō Iesu i roto i te tino. I roto i tōna tino ti’a fa’ahou ’e te hanahana, ’ua haere ’oia ’e ’ua paraparau ’oia ’e ’ua ’amu ho’i ’e tāna mau feiā ’āpe’e. Te tahi ato’a mau ’īrava e fa’a’ite pāpū nei ē, e tino ’i’o ’e te ivi tō Iesu Mesia : Philipi 3:20–21 ; 3 Nephi 11:13–15 ; Te Parau Ha’api’ira’a ’e te mau Parau Fafau 110:2–3 ; 130:1, 22.
« E ao tō te feiā ’aore i ’ite iā’u e fa’aro’o mai ai ».
E nehenehe e tāfifi i te ti’aturira’a i te hō’ē mea mau ’aita te mata tāhuti i hi’o. Penei a’e i te tahi taime ’ua riro ’oe mai ia Toma tei parau ē : « I ’ore au i ’ite… e ’ore roa ïa vau e fa’aro’o » (Ioane 20:25). ’Ei pāhonora’a, ’ua parau te Fa’aora ia Toma : « E ao tō te feiā ’aore i ’ite iā’u e fa’aro’o mai ai » (Ioane 20:29). ’Ua ha’amaita’ihia a’enei ’oe nō tō ’oe ti’aturira’a i te mau mea pae vārua tā tō ’oe mata i ’ore i ’ite ? E aha te mea e tauturu nei ia ’oe ’ia fa’aro’o i te Fa’aora noa atu ā ’aita te mata e ’ite ra iāna ? E aha te tahi atu mau ’ohipa mau tā ’oe e ti’aturi ra noa atu ’aita e ’ohipa pāpū e fāfā ? E aha tā ’oe e nehenehe e rave nō te tāmau noa i te ha’apūai i tō ’oe fa’aro’o i « te mau mea ’itea-’ore-hia ra, ’o tei ti’a » (Alama 32:21 ; hi’o ato’a Etera 12:6). ’A feruri i te tāpa’o i roto i te hō’ē buka tāmahana i te mau ’ohipa i tauturu ia ’oe ’ia ti’aturi ia Iesu Mesia, ’aore rā ’a fa’a’ite i te reira i te hō’ē ta’ata tā ’oe i mātau.
Tē ani nei te Fa’aora iā’u ’ia fa’a’amu i tāna māmoe.
E māere paha ’oe ’ia fa’aau ’oe i te ’ohipa a te Fa’aora i rotopū i tāna mau ’āpōsetolo i roto i te Ioane 21 ’e i te taime mātāmua ’ua fa’aue ’oia ia rātou ’ia fa’aru’e i tā rātou mau ’ūpe’a i pāpa’ihia i roto i te Luka 5:1–11. E aha te mau tū’atira’a ’e te mau ta’a-’ē-ra’a tā ’oe e ’ite ra ? E aha te mau mea tā ’oe e ’apo nei nō ni’a i te ti’ara’a pipi ?
E feruri nāhea te mau parau a te Fa’aora ia Petero i roto i te Ioane 21:15–17 e tano i ni’a ia ’oe. Tē vai ra ānei te tahi mea e ha’afifi nei ia ’oe ’ia tāvini i te māmoe a te Fatu ? E aha tā ’oe pāhonora’a ’āhani e ui mai te Fatu ia ’oe : « ’Ua here ānei ’oe iā’u ? » ’A feruri nāhea ’oe i te fa’a’ite i tō ’oe here i te Fatu.
’A hi’o ato’a Jeffrey R. Holland, « Te ture mātāmua ’e tei hau i te rahi », Ensign ’aore rā Liahona, Nov. 2012, 83–85.
Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare
’A fa’aoti ai ’outou i te tai’o i te mau ’Evanelia ’e tō ’outou ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau ā nō te pāhono i te mau hina’aro o te ’utuāfare. Teie te tahi mau mana’o :
’Nō te aha teie mau parau, « ’Aore ’oia i’ō nei, ’ua ti’a ïa i ni’a », i riro ai ’ei mau parau faufa’a rahi roa a’e i parauhia a’enei ’o te fa’atupu i te tīa’ira’a ?
Mataio 28 ; Mareko 16 ; Luka 24 ; Ioane 20–21
’A tai’o ai tō ’outou ’utuāfare i teie mau pene, ’a hi’o maita’i i te mau ta’ata tei haere ia Iesu ra, i roto i te fa’ati’ara’a tāta’itahi. ’Ei hi’ora’a, i te hō’ē vāhi e rōtahi ’outou i ni’a i te mau ta’ata tei haere mai i te menemā o te Fa’aora. I te tahi atu vāhi, e tuatāpapa maita’i ’outou i te mau ’ohipa a te mau ’āpōsetolo ’aore rā i nā pipi i ni’a i te purōmu nō Emausa.
Road to Emmaus, nā Jon McNaughton
’Ei ’utuāfare, ’a paraparau i te ’ohipa tā te Mesia i ani i tāna mau ’āpōsetolo ’ia rave. Nāhea tā tātou e nehenehe ai e fa’atupu i tāna ’ohipa ? E ti’a ānei ia ’outou ’ia fa’a’ite i te hō’ē taime ’ua tae mai te mana’o ē, ’o « te Fatu ato’a ho’i i te rave-ato’a-ra’a i te ’ohipa » ’e ’outou nō te tauturu ia ’outou ’ia fa’atupu i tāna mau ’ōpuara’a ? (Mareko 16:20).
’A ’ōpua i te tai’o i teie mau ’īrava i te taime e tāmā’a ’āmui ai ’outou. E riro te reira i te fa’aau i te mau parau a te Fa’aora « ’A fa’a’amu i ta’u mau māmoe ». ’Ia au i tā Iesu i ha’api’i nō ni’a i te mau māmoe i roto i te Faufa’a ’Āpī (hi’o,’ei hi’ora’a, Mataio 9:35–36 ; 10:5–6 ; 25:31–46 ; Luka 15:4–7 ; Ioane 10:1–16), nō te aha e fa’ahōho’ara’a tano te fa’a’amura’a māmoe nō te fa’a’amura’a ’e te aupurura’a i te mau tamari’i a te Atua ? E aha tā teie fa’ahōho’ara’a e ha’api’i nei nō ni’a i te mana’o o te Metua i te Ao ra ’e Iesu ia tātou nei ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
Fa’a’ohipa i te pehe nō te fa’ahaere mai i te Vārua ’e nō te ’apo mai i te ha’api’ira’a tumu. E nehenehe te fa’aro’ora’a ’aore rā te hīmenemenera’a i te mau hīmene mai nā hīmene « ’Ua ti’a mai te Fatu » ’aore rā « Ti’a fa’ahou mai Iesu », Te mau hīmene, n°116, 117, e tītau i te Vārua ’e e tauturu ia ’outou ’ia ha’api’i nō ni’a i te ti’a-fa’ahou-ra’a o te Fa’aora.
Woman, Why Weepest Thou? nā Simon Dewey