« 15–21 nō Tiurai. Te mau ’Ohipa 10–15 : ‘Tupu atu ra ho’i te parau a te Atua, ’e ’ā’ano roa atu ra’ » Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 15–21 nō Tiurai. 15–21 nō Tiurai », Mai, pe’e mai—nō te ta’ata hō’ē ’e te ’utuāfare : 2019
15–21 nō Tiurai
Te mau ’Ohipa 10-15
« Tupu atu ra ho’i te parau a te Atua, ’e ’ā’ano roa atu ra »
Tai’o maita’i i te Te mau ’Ohipa 10–15, vaiiho i te tahi taime i te Vārua nō te muhumuhu ia ’outou nā roto i te mau mana’o i te ferurira’a ’e i te ’ā’au. E aha te mea tā ’outou i ha’api’i mai i roto i teie mau pene ?
Pāpa’i i tō ’oe mau mana’o
I roto i tāna tāvinira’a i te tāhuti nei, pinepine te mau ha’api’ira’a a Iesu Mesia i te ’ume’ume i te mau peu ’e te mau ti’aturira’a tahito roa o te ta’ata ; ’aita te reira i fa’aea i te revara’a ’oia i ni’a i te ra’i—inaha ho’i, ’ua tāmau ā ’oia i te arata’i i tāna ’Ēkālesia nā roto i te heheura’a. ’Ei hi’ora’a, i te tau ’a ora noa ai Iesu, ’ua poro tāna mau pipi i te ’evanelia i te mau ’āti Iuda ana’e. I te pohera’a te Fa’aora ’e te rirora’a mai Petero ’ei peropheta nō te ’Ēkālesia, ’āria Iesu Mesia i te heheura’a ia Petero ’ua tae i te taime nō te ’evanelia ’ia porohia i te feiā e ’ere i te ’āti Iuda. I teie mahana, e ’ere te fa’a’itera’a i te ’evanelia i te mau ’Ētene i te ’ohipa māere roa, e aha ïa te ha’api’ira’a i reira nō tātou ? Penei a’e hō’ē ha’api’ira’a, ’o te tauira’a ïa i roto i te mau ture ’e te mau peu—i roto i te ’Ēkālesia i muta’a ra ’e i teienei—’o tē tae mai nā roto i te heheura’a nō ’ō mai i te Fatu i tāna mau feiā fa’atere mā’iti (Amosa 3:7 ; PH&PF 1:38). E tuha’a faufa’a tumu te heheura’a tāmau i roto i te ’Ēkālesia mau ’e te ora a Iesu Mesia. Mai ia Petero te huru, e ti’a roa ’ia vai tō tātou mana’o tae nō te fāri’ira’a i te heheura’a tāmau ma te ora « i te mau mea ato’a [ra] i ha’apa’ohia e te Atua » (Luka 4:4), mai « te mau mea ato’a i heheuhia mai e [āna], te mau mea ato’a ’o tāna e heheu mai nei i teienei » ’e « te mau mea maita’i ’e te faufa’a rahi nō tōna ra bāsileia » (Hīro’a Fa’aroo 1:9).
Mau mana’o nō tā ’oe iho tuatāpapara’a pāpa’ira’a mo’a
« E ’ore te Atua e ha’apa’o i te huru o te ta’ata ».
I terā u’i ’e terā u’i ’ua ti’aturi noa te ’āti Iuda ē, « ’o Aberahama tō [rātou] metua », te aura’a nō te rirora’a ’ei hua’ai nō Aberahama, ’oia ho’i, e ta’ata fāri’ihia (mā’itihia) e te Atua (hi’o Luka 3:8). ’Ua hi’ohia te tahi atu mau ta’ata ’ei mau ’Ētene « vi’ivi’i » tei ’ore i fāri’ihia e te Atua. I roto i Te mau ’Ohipa 10, e aha tā te Fatu i ha’api’i ia Petero nō ni’a i te ta’ata « ’o te ’itehia mai ïa e āna » ? (Te mau ’Ohipa 10:35). E aha te mau fa’a’itera’a i roto i teie pene ē, e orara’a parau ti’a tā Korenelio tā te Fatu i fāri’i ? Nō te aha e mea faufa’a ’ia ’ite ē, « e ’ore te Atua e ha’apa’o i te huru o te ta’ata » (’īrava 34), ’oia ho’i e nehenehe i te mau ta’ata ato’a ’ia fāri’i i te mau ha’amaita’ira’a o te ’evanelia mai te peu e ora rātou i te ’evanelia ? (hi’o 1 Nephi 17:35).
Mai te mau ’āti Iuda tei hi’o ’ē i te ta’ata e ’ere i te hua’ai nō Aberahama, ’ua feruri a’enei ’oe i te mana’o au ’ore i ni’a i te hō’ē ta’ata e hi’ora’a ’ē ia ’oe ? Nāhea ’oe i te upo’oti’a i te reira huru ? Teie te tahi ’ohipa ’ōhie e nehenehe e rave i roto i te mau mahana i muri nei : ’Ia paraparau ’oe i te hō’ē ta’ata, e feruri i roto ia ’oe ē : « E tamari’i teie ta’ata nā te Atua ». ’Ia rave ’oe i te reira, e aha te tauira’a i roto i tō ’oe ferurira’a nō ni’a i te ta’ata ’e te huru ’a paraparau ai ’oe ia rātou ?
Hi’o ato’a D. Todd Christofferson, « E vai-here-hia atu ā ʼoutou e au », Ensign ’aore rā Liahona, Novema 2016, 48–51 ; 1 Samuela 16:7.
Te mau ’Ohipa 10 ; 11:1–18 ; 15
Tē ha’api’i nei te Metua i te Ao ra iā’u te a’o nā ni’a i te a’o, nā roto i te heheura’a.
I te ’itera’a Petero i te ’ōrama e fa’ahitihia nei i roto i Te mau ’Ohipa 10, ’ua fifi ’oia i te māramarama i te ha’amatara’a, ’e « tē māere noa ra [’oia] i roto iāna iho i te fa’aaura’a » (’īrava 17). ’Ua hōro’a rā te Fatu i te hāro’aro’a rahi a’e ’a ’imi ai Petero i te reira. ’Ia tai’o ’oe i Te mau ’Ohipa 10, 11, ’e te 15, e hi’o maita’i na i te hōhonu-noa-ra’a te hāro’aro’a o Petero i tāna ’ōrama. Nāhea ’oe i te ’imira’a ’e i te fāri’ira’a i te hāro’aro’a rahi a’e nō ’ō mai i te Atua i te taime e mau uira’a tā ’oe ?
Te fa’ati’a nei Te mau ’Ohipa 10, 11, ’e te 15 i te tahi mau hi’ora’a nō te fa’aterera’a te Fatu i tāna mau tāvini nā roto i te heheura’a. E mea au ’ia tāpa’o i tā ’oe e ’ite mai nō ni’a i te heheura’a ’ia tai’o ’oe i teie mau pene. Nāhea te Vārua e paraparau nei ia ’oe ?
Hi’o ato’a Ronald A. Rasband, « Nā te Vārua Mo’a e arata’i », Ensign ’aore rā Liahona, Mē 2017, 93–96.
E ta’ata keresetiano vau nō te mea tē ti’aturi nei au ’e tē pe’e nei ho’i ia Iesu Mesia.
E aha te ’ohipa ta’a ’ē nō te pi’ira’ahia te hō’ē ta’ata, e keresetiano ? (hi’o Te mau ’Ohipa 11:26). E aha te aura’a nō ’oe ’ia parauhia ’oe e ta’ata keresetiano ’e ’aore rā ’ua rave ’oe i ni’a ia ’oe i te i’oa o Iesu Mesia ? (hi’o PH&PF 20:77). E hi’o i te aura’a o te mau i’oa. ’Ei hi’ora’a, e aha te aura’a o tō ’oe pa’era’a nō ’oe ? Nō te aha e mea faufa’a te i’oa o te ’Ēkālesia i teie mahana ? (hi’o PH&PF 115:4).
Hi’o ato’a Mosia 5:7–15 ; Alama 46:13–15 ; 3 Nephi 27:3–8 ; M. Russell Ballard, « Te faufa’a o te hō’ē i’oa », Ensign ’aore rā Liahona, Novema 2011, 79–82.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
E mau ’ohipa ānei mai te reira tei tupu nō tātou ’e ’ua fē’a’a tātou i te mea tā tātou i mana’o ’e i ha’api’i mai ? E aha te parau tauturu tā tātou e nehenehe e parau i te tahi ’e te tahi ’o te tauturu ia tātou ’ia upo’oti’a i tō tātou fē’a’ara’a ? (Hi’o Ronald A. Rasband, « ’O te ’aramōina ia ’outou », Ensign ’aore rā Liahona, Novema 2016, 113–15.)
I te hurira’ahia Petero i roto i te fare ’āuri, ’ua ’āmui te mau melo o te ’Ēkālesia nō te pure nōna. E ta’ata ānei tā tō ’outou ’utuāfare e mana’o ra e pure nōna, te hō’ē ānei ti’a fa’atere o te ’Ēkālesia ’aore rā te tahi ta’ata ’ua here ’outou. E aha te aura’a nō te pure « ’aita e fa’aea » ? (Te mau ’Ohipa 12:5).
Peter Delivered from Prison, nā A. L. Noakes
’Ia tai’o ’āmui ’outou i teie pene, e nehenehe te hō’ē pae o te ’utuāfare e tāpa’o i te mau ha’amaita’ira’a tā te mau pipi ’e tā te ’Ēkālesia i fāri’i, ’e i te tahi pae, e tāpa’o rātou i te mau pāto’ira’a ’e te mau fifi tā te mau pipi i fa’aruru. Nō te aha te Atua e fa’ati’a ai i te mau fifi ’ia tupu i ni’a i tōna mau ta’ata parau ti’a ?
Tē fa’ata’a nei teie mau ’īrava i te titotitora’a i roto i te ’Ēkālesia nō ni’a i te mau melo fa’afāriu ’ētene (e ’ere i te ’āti Iuda), e tītauhia ānei ia rātou ’ia peritome ato’a ’ei tāpa’o nō tā rātou fafaura’a. ’Ua fa’a’āfarohia te titotitora’a i muri mai tō te mau ’āpōsetolo mātutura’a i teie tumu parau ’a fāri’i ai rātou i te hō’ē pāhonora’a fa’auru. E taime tano paha teie nō te ha’api’i i tō ’outou ’utuāfare ē, hō’ē ā fa’anahora’a i teie mahana. E rave, ’outou te ’utuāfare, i te hō’ē uira’a nō ni’a i te ’evanelia tā ’outou e hina’aro e ’ite ’āmui i te pāhonora’a. E hi’o ’āmui i te mau hi’ora’a i roto i te mau pāpa’ira’a mo’a ’e i roto i te mau ha’api’ira’a a te mau peropheta ’e te mau ’āpōsetolo nō teie ’anotau. (E ti’a i te fa’ahorora’a tumu parau i roto i te ve’a a te ’Ēkālesia e tauturu.)
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Haʼamaitaʼiraʼa i tā tātou haʼapiʼiraʼa
Pāpa’i i te hō’ē hōho’a. E nehenehe te mau hōho’a e fa’ahi’o i te mau melo o te ’utuāfare i te mau ha’api’ira’a ’e te mau ’ā’amu i roto i te mau pāpa’ira’a mo’a. E nehenehe tā ’outou e tai’o i te tahi ma’a ’īrava ’ei reira e vaiiho ai i te taime i te mau melo o te ’utuāfare ’ia pāpa’i i te hō’ē hōho’a e tū’ati i te mea i tai’ohia. ’Ei hi’ora’a, e au paha te mau melo o te ’utuāfare ’ia pāpa’i i te hōho’a nō te ’ōrama a Petero i roto i Te mau ’Ohipa 10.
Tē fa’a’ite nei te ’ōrama rahi a te keniturio Korenelio ’e tōna tere fārerei ia Petero i te mea ē « e ’ore te Atua e ha’apa’o i te huru o te ta’ata » (’Ohipa 10:34).