« 22–28 nō Tiurai. Te mau ’Ohipa 16–21 : ‘Tē parau mai ra te Fatu ia mātou e haere e parau atu i te ’evanelia’ » Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 22–28 nō Tiurai. Te mau ’Ohipa 16–21 », Mai, pe’e mai—nō te ta’ata hō’ē ’e te ’utuāfare : 2019
22–28 nō Tiurai
Te mau ’Ohipa 16–21
« Tē parau mai ra te Fatu ia mātou e haere e parau atu i te ’evanelia »
’Ia tai’o ’outou nō ni’a i te mau tauto’ora’a a Paulo nō te porora’a i te ’evanelia, e muhumuhu mai te Vārua ia ’outou i te tahi mau hi’ora’a ’aore rā te tahi mau mana’o. E pāpa’i i te reira mau fa’aurura’a ’e e fa’ata’a i te fa’anahora’a nō te rave i te reira.
Pāpa’i i tō ’oe mau mana’o
I roto i te mau parau hope’a a te Fatu i tāna mau ’āpōsetolo, ’ua fa’aue ’oia : « ’E teienei, e haere ’outou e fa’ariro i te mau fenua ato’a ’ei pipi, ’a bāpetizo atu ai ia rātou i roto i te i’oa o te Metua ’e nō te Tamaiti, ’e nō te Vārua Maita’i ; ma te ha’api’i atu ia rātou i te ha’apa’o i te mau mea ato’a tā’u i parau atu ia ’outou na » (Mataio 28:19–20). Noa atu ē ’aita te mau ’āpōsetolo i haere roa i te mau fenua ato’a, tē fa’a’ite mau nei te Te mau ’Ohipa 16–21 ē, ’ua fa’ahaere ’o Paulo ’e tōna mau hoa i te fa’ati’ara’a i te ’Ēkālesia i mua. ’Ua ha’api’i rātou, ’ua bāpetizo ’e ’ua tu’u i te hōro’a o te Vārua Maita’i. ’Ua fa’atupu rātou i te mau temeio, ’ua fa’ati’a roa mai i te hō’ē ta’ata mai te pohe mai, ’e ’ua tohu rātou nō ni’a i te taivāra’a rahi (Te mau ’Ohipa 20:7–12; 20:28–31). ’E tē tāmau noa nei te ’ohipa tā rātou i ha’amata ’e te mau ’āpōsetolo ora o teie ’anotau, nā reira ato’a te mau pipi itoito mai ia ’outou e tauturu nei i te fa’atupu i te fa’auera’a a te Fa’aora nā roto i te mau rāve’a ’aita Paulo i mana’o noa a’e. Penei a’e ’ua ’ite ’outou i te tahi ta’ata ’aita i mātau i tō rātou Metua i te Ao ra ’aore rā tāna ’evanelia. Penei a’e ’ua « aroha roa atura [tō ’outou] vārua i roto ia [’outou] » nō te fa’a’itera’a ia rātou i tā ’outou i ’ite nō ni’a iāna (Te mau ’Ohipa 17:16). Mai te mea e pe’e ’outou i te hi’ora’a nō te ha’eha’a ’e te itoito rahi o Paulo, nō te fa’a’itera’a i te ’evanelia, e ’ite mai paha ’outou i te hō’ē ta’ata tei « ha’amahorahorahia… tōna ’ā’au e te Fatu » (Te mau ’Ohipa 16:14).
Mau mana’o nō tā ’oe iho tuatāpapara’a pāpa’ira’a mo’a
E arata’i mai te Vārua iā’u i roto i tā’u mau tauto’ora’a e fa’a’ite i te ’evanelia.
Tītauhia te ’evanelia a Iesu Mesia nō te mau ta’ata ato’a, tē vai nei rā tei ineine rahi a’e i te tahi nō te fāri’i i te reira. ’O te hō’ē ïa tumu e tītauhia te Vārua Maita’i ’ia fa’a’ite atu tātou i te ’evanelia—nō te arata’i ia tātou i te ta’ata tei ineine. ’Ia tai’o ’oe i te Te mau ’Ohipa 16–21, ’a tāpa’o i te mau taime ’ua arata’i te Vārua ia Paulo ’e tōna mau hoa. E aha te mau ha’amaita’ira’a i tae mai nō tō rātou pe’era’a i te Vārua ? A hea tō ’oe ’itera’a i te fa’aurura’a a te Vārua i roto i tā ’oe mau tauto’ora’a nō te fa’a’itera’a i te ’evanelia ?
Hi’o ato’a Alama 7:17–20; Dallin H. Oaks, « Fa’a’ite i te ’evanelia tei fa’aho’i-fa’ahou-hia mai », Ensign ’aore rā Liahona, Novema 2016, 57–60; ’Ia Poro Haere i Ta’u Nei ’Evanelia, 104–5.
E nehenehe iā’u ’ia fa’a’ite i te ’evanelia noa atu te mau huru ato’a
E nehenehe e mana’o ē, ’ia hurihia ’oe i roto i te fare tāpe’ara’a nō te poro-haere-ra’a i te ’evanelia, e tumu tano ïa nō te fa’aea i te reira. Nō Paulo rā ’e ’o Sila, ’ua riro ïa ’ei rāve’a nō te fa’afāriu i te hō’ē tīa’i fare tāpe’ara’a (hi’o Te mau ’Ohipa 16:16–34). I roto i Te mau ’Ohipa 16–21, e ’imi i te tahi atu mau hi’ora’a nō te ineine o Paulo e fa’a’ite i te mea tāna i ’ite i te mau ta’ata ato’a. I tō ’oe mana’o, e aha te tumu ’oia i itoito roa ai ’e i mata’u ’ore ? E aha te ha’api’ira’a tā ’oe e ’apo nei mai nā roto mai i te hi’ora’a o Paulo ?
Tē vai fa’ahou ra te parau nō ni’a i te fa’a’itera’a i te ’evanelia i roto i te mau pene 16–21. Mai te mea e hi’o maita’i ’oe, e ’ite mai ’oe i te tahi e tano ta’a ’ē nō ’oe. E tāmata i te tai’o i te reira mau pene ma teie fā i te ferurira’a. E aha tā ’oe i ’ite mai ?
« E tamari’i tātou nā te Atua ».
I Ateno, ’ua ’ite atu Paulo i te ta’ata mana’o rau ’e te hi’ora’a rau i te pae nō te ha’apa’ora’a fa’aro’o. E ’imi noa rātou ’ia « fa’aro’o… i te parau ri’i ’āpī », e tā Paulo e hina’aro e fa’a’ite ia rātou, e parau ’āpī mau ïa nō rātou (hi’o Te mau ’Ohipa 17:19–21). ’Ua ha’amori rātou e rave rahi atua, mai te hō’ē tā rātou e pi’i nei « te Atua ’itea ’ore » (Te mau ’Ohipa 17:23), ’ua ti’aturi rā rātou ē, e mau mana ’e e mau pūai te mau atua, e ’ere i te ta’ata ora ’e te ta’a ’ē, e ’ere roa atu i tō tātou Metua. E tai’o i tā Paulo i parau atu nō te tauturu ia rātou ’ia ’ite i te Atua, ’e e tāpa’o i te parau nō ni’a i te Atua tā ’oe e ’ite mai. E aha te aura’a nō ’oe te rirora’a « ’ei tamari’i… nā te Atua » ? (Te mau ’Ohipa 17:29). I tō ’oe mana’o, e aha te ta’a-’ē-ra’a i roto i te rirora’a ’ei tamari’i nā te Atua ’e te riro-noa-ra’a hō’ē o tāna mau mea i hāmani ? Mai te peu ’o ’outou i pīha’i iho ia Paulo ’a hōro’a ai ’oia i tōna ’itera’a pāpū, e aha tā ’oe e parau i tō Heleni i tahito ra nō ni’a i tō tātou Metua i te Ao ra ? ’Ua mātau ānei ’oe i te hō’ē ta’ata e tano ’ia fa’aro’o i tō ’oe ’itera’a pāpū ?
Worth of a Soul, nā Liz Lemon Swindle
Hi’o ato’a Roma 8:16; 1 Ioane 5:2.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
’Ei tauturura’a i tō ’outou ’utuāfare e hi’o mana’o i te mea e tupu ra i roto i teie mau pene, e mea ’ārearea ’ia tai’o ’āmui ’e ’ia tāpa’o i te mau ’oire tā Paulo i rātere i ni’a i te hō’ē hōho’a fenua (hi’o i te hōho’a fenua i te hope’a o teie arata’i ha’api’ira’a).
Nāhea tātou i te riro rahi atu ā mai te mau feiā mo’a i roto i teie mau ’īrava ? Mai te aha te huru te tuatāpapara’a pāpa’ira’a mo’a tāmahana e fa’ariro ia tātou ’ei mea « fānau maita’i mau » ? (Te mau ’Ohipa 17:11). E aha tā tātou e nehenehe e rave nō te riro « pa’ari i te parau i pāpa’ihia ra » ? (Te mau ’Ohipa 18:24).
E nehenehe teie ha’api’ira’a a te peropheta Iosepha Semita e tauturu i tō ’outou ’utuāfare ’ia paraparau nō ni’a i te Te mau ’Ohipa 19:1–7 : « Te bāpetizora’a i te pape e ’āfara’a ïa nō te bāpetizora’a, ’e ’aore tōna e maita’i mai te mea ’aita te tahi ’āfa—’oia ho’i, te bāpetizora’a a te Vārua Maita’i… ‘’Ia fānau i te pape ’e te Vārua’, ’o te utuhira’a ïa i raro i te pape nō te matarara’a o te mau hara ’e ’ia fāri’i i te hōro’ara’a i te Vārua Maita’i i muri mai. E hōro’ahia te reira nā roto i te tu’ura’a i te rima o te ta’ata e mau ra i te mana tei hōro’ahia iāna e te Atua » (Te Mau Ha’api’ira’a a te Mau Peresideni o te ’Ēkālesia : Iosepha Semita, 109). E aha te mau ha’amaita’ira’a i tae mai nā roto i te fāri’ira’a i te hōro’ara’a i te Vārua Maita’i ?
E aha te mea i roto i teie mau ’īrava tei tūra’i i te ta’ata e tūtu’i i tā rātou mau buka « ’ua tai’o ihora i te moni ’ārio » ? (Te mau ’Ohipa 19:19). E mau mātēria ānei ’aore rā e mau ’ohipa ānei i tītauhia ia vaiiho nō te fāri’i i te mau ha’amaita’ira’a a te ra’i ?
A hea tō tō ’outou ’utuāfare tāmatara’a i te ha’api’ira’a a te Mesia, ’oia ho’i, « E mea maita’i te hōro’a atu i te rave mai » ? (Te mau ’Ohipa 20:35). E ta’ata ānei e hina’aro i te tahi tāvinira’a, te tahi taime, te tahi hōro’a tā tō ’outou ho’i ’utuāfare e nehenehe e hōro’a atu. E paraparau, ’outou te ’utuāfare, i te tahi mau rāve’a nō te tāvini i te ta’ata ’e ’a fa’anaho ai i te reira. E aha te mana’o e tae mai ’ia tāvini tātou i te ta’ata ? Nō te aha e mea maita’i te hōro’a atu i te rave mai ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
Tāpa’o i te mau mana’o ’Ia tae mai te mau mana’o ’e te mau hōho’a, e tāpa’o i te reira. ’Ei hi’ora’a, e nehenehe tā ’outou e pāpa’i i tō ’outou mana’o i te hiti o tā ’outou mau pāpa’ira’a mo’a, i roto i te fa’anahora’a Vaira’a buka ’evanelia ’aore rā i roto i te hō’ē buka. « ’Ia tāpa’o ana’e ’outou i te mau mana’o pae vārua, tē fa’a’ite ra ïa ’outou i te Fatu ē tē ha’afaufa’a nei ’outou i Tāna arata’ira’a, ’e e ha’amaita’i mai ’Oia ia ’outou i te tahi atu ā heheura’a pinepine » (Ha’api’ira’a mai tā te Fa’aora, 12; hi’o ato’a 30).
Te mau tere misiōnare a te ’āpōsetolo Paulo.