Paggamit sa Dali, Sunod Kanako—Alang sa Primary

Pagpangandam sa Pagtudlo diha sa Primary

Ang panimalay kinahanglang mao ang nag-unang dapit sa pagkat-on sa ebanghelyo. Tinuod kini alang kanimo ug sa mga bata nga imong gitudloan. Samtang mangandam ka sa pagtudlo, sugdi pinaagi sa pag-angkon og kaugalingon nimong mga kasinatian sa mga kasulatan. Ang labing importanting pagpangandam mahitabo samtang magtinguha ka sa inspirasyon sa Espiritu Santo.

Ang Dali, Sunod Kanako—Alang sa mga Indibidwal ug mga Pamilya usa usab ka importante nga bahin sa imong pagpangandam. Makatabang kini kanimo nga makaangkon og mas lawom nga pagsabut sa doktrinal nga mga baruganan nga makita diha sa mga kasulatan.

Panahon sa imong pagpangandam, ang mga hunahuna ug mga impresyon moabut kanimo mahitungod sa mga bata nga imong gitudloan. Makadawat ka og mga panabut kon sa unsang paagi ang mga baruganan diha sa mga kasulatan makapanalangin sa ilang mga kinabuhi. Magiyahan ka sa pagdasig kanila sa pagdiskubre niadto nga mga baruganan samtang magkat-on sila gikan sa mga kasulatan alang sa ilang mga kaugalingon ug uban sa ilang mga pamilya. Hinumdumi nga magmahunahunaon sa mga bata kansang mga kahimtang sa pamilya tingali dili mosuporta sa regular nga pagtuon sa mga kasulatan sa pamilya.

Mga Ideya sa Pagtudlo

Samtang mangandam ka sa pagtudlo, mahimong makaangkon ka og dugang nga inspirasyon pinaagi sa pagsuhid sa mga outline niini nga kapanguhaan. Ayaw hunahunaa kini nga mga ideya isip mga instruksyon sa mga lakang nga buhaton apan isip mga sugyot nga mogiya kanimo ngadto sa mga ideya. Nakaila ka niini nga mga bata, ug ang Ginoo nakaila usab kanila—lakip ang unsay ilang gikinahanglan ug unsay ilang masabtan. Modasig Siya kanimo sa labing maayo nga mga paagi sa pagtudlo ug pagpanalangin sa mga bata.

Daghan ka pa og ubang mga kapanguhaan samtang mangandam ka, lakip ang mga ideya diha sa Dali, Sunod Kanako—Alang sa mga Indibidwal ug mga Pamilya ug sa mga magasin sa Simbahan. Alang sa dugang nga impormasyon kabahin niini ug ubang kapanguhaan, tan-awa sa “Dugang nga mga Kapanguhaan alang sa Pagtudlo sa mga Bata.”

Pipila ka Butang nga Angay Hinumduman

• Ang mga ginikanan ang adunay nag-unang responsibilidad sa pagtudlo sa ilang mga bata. Isip magtutudlo, aduna kay importanting responsibilidad sa pagsuporta, pag-awhag, ug paglig-on sa pagkat-on sa ebanghelyo diha sa panimalay. Pagmahunahunaon sa mga bata kansang mga ginikanan wala motudlo sa ebanghelyo diha sa ilang panimalay. Ilakip ang tanang bata sa mga diskusyon sa ebanghelyo bisan unsa pa ang mga kahimtang sa ilang panimalay.

• Ang pagbalik-balik maayo. Ang mga bata mas epektibong makakat-on sa mga kamatuoran sa ebanghelyo kon kini nga mga kamatuoran ibalik-balik og tudlo pinaagi sa lain-laing mga kalihokan. Kon imong makita nga ang usa ka kalihokan sa pagkat-on epektibo ngadto sa mga bata, hunahunaa ang pagbalik-balik niini, ilabi na kon nagtudlo ka sa mas gagmayng mga bata. Mahimo usab nimong ribyuhon ang usa ka kalihokan gikan sa miaging leksyon.

• Ang Langitnong Amahan gusto nga magmalampuson ka isip usa ka magtutudlo. Mihatag Siya og daghan nga mga kapanguhaan sa pagtabang kanimo nga magmalampuson, lakip ang mga miting sa teacher council. Niini nga mga miting mahimo ka nga magpakitambag sa ubang mga magtutudlo mahitungod sa bisan unsang mga hagit nga mahimo nimong atubangon. Mahimo usab kamong maghisgot ug magpraktis sa mga baruganan sa Kristohanon nga pagtudlo.

• Kon nagtudlo ka sa mas gagmayng mga bata ug nagkinahanglan og dugang nga tabang, tan-awa ang “Pagtubag sa mga Panginahanglan sa Mas Gagmay nga mga Bata” dinhi niini nga kapanguhaan.

• Kini nga kapanguhaan naglakip og mga outline alang sa matag semana sa tuig gawas sa duha ka Dominggo nga ipahigayon ang kinatibuk-ang komperensya. Sa mga Dominggo nga walay ipahigayon nga Primary tungod sa komperensya sa stake o sa bisan unsang rason, ang mga pamilya mahimong magpadayon sa pagbasa sa Bag-ong Tugon diha sa panimalay sumala sa iskedyul nga gilatid. Aron mapabilin nga nakasunod sa iskedyul ang imong klase sa Primary, mahimo nimong laktawan ang usa ka leksyon o tipunon ang duha ka leksyon. Aron malikayan ang kalibug, ang mga presidente sa Primary mahimong mopahibalo daan sa mga magtutudlo kabahin niini nga mga kausaban.