“Usa ka Sundanan alang sa Pagtudlo,” Dali, Sunod Kanako—Alang sa Primary: Bag-ong Tugon 2019 (2019)
“Usa ka Sundanan alang sa Pagtudlo,” Dali, Sunod Kanako—Alang sa Primary: 2019
Usa ka Sundanan alang sa Pagtudlo
Niini nga kapanguhaan, imong makita ang mosunod nga sundanan nga gibalik-balik sa matag outline: pagdapit sa pagpaambit, pagtudlo sa doktrina, ug pag-awhag sa pagkat-on diha sa panimalay. Sa daghang mga sitwasyon, samtang magtudlo ka, ang mga elemento niini nga sundanan mahimong magsapaw o mahitabo sa lahi nga han-ay. Sama pananglit, hunahunaa nga ang pagpaambit usa ka oportunidad sa pagtudlo sa doktrina, ug ang pagtudlo sa doktrina kinahanglan maglakip sa mga pagdapit sa pagpaambit. Sa samang paagi, ang pag-awhag og pagkat-on diha sa panimalay mahimong mahitabo panahon sa usa ka diskusyon sa klase. Tuguti nga natural nga mahitabo kini nga pagsapaw, nga magsunod sa mga aghat sa Espiritu aron matubag ang mga panginahanglan sa mga bata nga imong gitudloan.
Awhaga ang Pagpaambit
Isip kabahin sa matag klase, dapita ang mga bata sa pagpaambit sa ilang mga pagbati, mga hunahuna, ug mga kasinatian kabahin sa mga baruganan diha sa outline. Ang ilang mga komentaryo mahimong maglakip sa mga kasinatian nga ilang nasinati sa pagkat-on diha sa panimalay. Mahimo usab nimong ribyuhon kon unsa ang ilang nakat-unan sa miaging semana ug pangutan-on kon sa unsang paagi kini mi-impluwensya sa ilang kinabuhi.
Itudlo ang Doktrina
Ang Dali, Sunod Kanako—Alang sa mga Indibidwal ug mga Pamilya makatabang kanimo nga makasabut sa doktrina nga imong itudlo sa mga bata. Ikonsiderar kon unsa nga mga bersikulo sa kasulatan, mga kinutlo, mga kasinatian, mga pangutana, ug uban pang mga kapanguhaan ang mahimo nimong ipaambit aron sa pagtabang sa mga bata nga makakat-on ug molihok sumala sa mga baruganan sa ebanghelyo. Pangita og mamugnaong mga paagi aron sa pagtabang nila nga maghinam-hinam sa unsay ilang kat-unan.
Awhaga ang Pagkat-on diha sa Panimalay
Tungod kay ang panimalay mao ang sentro sa pagkat-on sa ebanghelyo, usa sa imong mga tumong isip usa ka magtutudlo sa Primary mao ang pag-awhag sa pagkat-on diha sa panimalay. Unsaon nimo pagtabang ang mga bata sa pagpaambit ngadto sa ilang mga pamilya sa unsay ilang nakat-unan sa klase? Unsaon nimo pag-awhag ang mga bata ug ang ilang mga ginikanan nga magpadayon sa pagkat-on gikan sa Bag-ong Tugon diha sa panimalay?