Disyembre 31–Enero 6

Responsable Kita sa Atong Kaugalingong Pagkat-on

Samtang imong basahon ang mga kasulatan niini nga outline, irekord ang bisan unsang espiritwal nga mga impresyon nga imong madawat. Imong mamatikdan nga ang matag outline niini nga manwal adunay mga kalihokan alang sa mas gagmayng mga bata ug mas dagkong mga bata, apan mahimo nimong ipahiangay ang bisan unsa nga kalihokan alang sa imong klase.

Irekord ang Imong mga Impresyon

Awhaga ang Pagpaambit

Sa sinugdanan sa matag klase, hatagi ang mga bata og mga oportunidad sa pagpaambit sa unsay ilang nakat-unan mahitungod sa ebanghelyo. Sama pananglit, karong semanaha mahimo nimo silang dapiton sa pagpaambit sa ilang paborito nga mga istorya mahitungod ni Jesukristo.

Itudlo ang Doktrina

Mas Gagmay nga mga Bata

Gusto ni Jesukristo nga mosunod ko Niya.

Ikaw ug ang mga bata mobasa og daghang mga istorya gikan sa kinabuhi ni Jesukristo niining tuiga. Tabangi ang mga bata nga makasabut nga ang rason nga nagkat-on kita niini nga mga istorya mao nga aron mas makasunod kita sa ehemplo ni Jesukristo.

Posible nga mga Kalihokan

• Basaha ang pagdapit sa Manluluwas, “Umanhi ka ug sumunod kanako,” nga makita sa Lucas 18:22. Pagdula kamo diin ang usa ka bata mohimo og usa ka aksyon ug dayon mosulti sa ubang mga bata, “Dali, sunod kanako.” Dapita ang ubang mga bata sa pagsundog sa aksyon.

• Pagpakita og mga litrato sa mga tawo nga nagsunod sa Manluluwas sa lain-laing mga paagi, panahon sa Iyang mortal nga pangalagad ug sa atong panahon. Makakita ka og mga hulagway diha sa Libro sa mga Hulagway sa Ebanghelyo o sa mga magasin sa Simbahan. Ipasusi sa mga bata kon giunsa pagsunod sa mga tawo ang Manluluwas.

• Tabangi ang mga bata sa paghunahuna og mga butang nga ilang gibuhat sa pagsunod sa Manluluwas. Ang pagkanta sa “Sayo kong Mangita sa Ginoo,” Songbook sa mga Bata, 67, makahatag kanila og pipila ka mga ideya. Ipadrowing nila ang ilang mga kaugalingon nga nagbuhat niining mga butanga.

Ang mga kasulatan tinuod.

Ang mga bata makaangkon og pagpamatuod nga ang mga kasulatan tinuod bisan kon dili pa sila makahimo sa pagbasa niini. Samtang imong tun-an ang mga kasulatan uban sa mga bata niining tuiga, imo silang matabangan nga masayud sa ilang kaugalingon nga ang mga kasulatan tinuod.

Posible nga mga Kalihokan

• Dapita ang mga bata sa pagsulti mahitungod sa paboritong mga regalo nga ilang nadawat sa mga birthday o sa ubang mga okasyon. Pagdala og kopya sa mga kasulatan nga giputos isip regalo, paablihi kini sa usa ka bata, ug pagpamatuod nga ang mga kasulatan usa ka gasa alang kanato gikan sa Langitnong Amahan.

• Ipakita sa mga bata ang pipila ka mga basahon nga naglangkob og dili tinuod nga mga istorya [fiction], ug pangutan-a sila sa paborito nilang mga istorya. Ipakita kanila ang mga kasulatan, ug pagpamatuod nga ang mga kasulatan naglangkob sa pulong sa Dios alang kanato ug naghisgot mahitungod sa mga tawo nga tinuod nga nabuhi ug sa mga panghitabo nga tinuod nga nahitabo.

• Ipaambit ang mga mensahe nga anaa sa 2 Timoteo 3:15 ug Moroni 10:3–5, nga tabangan ang mga bata sa pagsulti og balik sa pipila ka mga pulong. Tabangi sila nga makasabut nga mahimo silang masayud sa ilang kaugalingon nga ang mga kasulatan tinuod.

• Tagoi ang usa ka hulagway sa Manluluwas, ug hatagi ang mga bata og mga timailhan [clue] aron matabangan sila nga makit-an kini. Tabangi ang mga bata nga makasabut kon sa unsang paagi ang pagsiksik sa mga kasulatan makatabang kanato nga makaila ni Jesukristo. Papuli-puliha ang mga bata sa pagtago sa hulagway ug sa paghatag og mga timailhan ngadto sa ubang mga bata.

• Kantaha og dungan ang “Sayo kong Mangita sa Ginoo” ug “Pagsiksik, Pamalandong, ug Pag-ampo,” Songbook sa mga Bata, 66–7, ug tabangi ang mga bata sa paghimo og mga aksyon nga mouban sa mga pulong. Ipaambit sa mga bata ang usa o duha sa imong paborito nga mga kasulatan, ug sultihi sila kon sa unsang paagi nimo nasayran nga ang mga kasulatan tinuod. Kon ang mga bata adunay paborito nga mga kasulatan o mga istorya sa kasulatan, dapita sila sa pagpaambit.

Ang mga bata makaangkon og ilang kaugalingong mga pagpamatuod sa mga kamatuoran sa kasulatan.

Itudlo ang Doktrina

Mas Dagko nga mga Bata

Gusto ni Jesukristo nga magkat-on ako mahitungod Kaniya ug mosunod Kaniya.

Hunahunaa kon sa unsang paagi nga nahibalo ka mahitungod ni Jesukristo. Unsay imong mabuhat aron matabangan ang mga bata nga makakat-on ug mosunod Kaniya?

Posible nga mga Kalihokan

• Dapita ang mga bata sa paghisgot kabahin sa usa ka suod nilang higala ug ihulagway kon sa unsang paagi kini nga tawo nahimong higala. Basaha ug hisguti ang Juan 5:39 ug Juan 14:15 aron makakita og mga paagi nga mobati kita nga duol kang Jesus. Hangyoa ang mga bata sa pagpaambit og mga panahon nga mibati sila nga duol Kaniya.

• Dad-a ang imong klase nga maglakaw-lakaw libut sa meetinghouse. Dapita ang mga bata sa pagpataas sa ilang mga kamot kon makakita sila og usa ka butang niana nga paglakaw nga makapahinumdom nila og usa ka paagi nga makasunod sila sa Manluluwas (sama sa baptismal font o usa ka litrato).

• Kantaha uban sa mga bata ang “Ako Nasayud nga Akong Manunubos Buhi,” Mga Himno ug mga Awit sa mga Bata, nu. 38. Dapita ang mga bata sa pagpaambit og mga panahon nga misunod sila sa ehemplo sa Manluluwas.

Makatuon ako sa mga kasulatan sa akong kaugalingon.

Samtang mobasa ka sa mga kasulatan uban sa mga bata ug mangutana kanila, imong mapalig-on ang ilang pagsalig nga makakat-on sila gikan sa mga kasulatan ug makakaplag og bililhon nga mga bahandi sa kahibalo.

Posible nga mga Kalihokan

• Basaha og kusog ang Juan 5:39 ug Mga Buhat 17:10–11, ug pangutan-a ang mga bata kon unsay ilang nakat-unan unsaon sa pagtuon sa mga kasulatan.

• Pagpili og pipila ka yano, gamhanan nga mga kasulatan gikan sa Bag-ong Tugon, isulat ang matag usa sa usa ka piraso nga papel, ug tagoi ang mga papel. Paghimo og mga timailhan nga mogiya sa mga bata sa usa ka “pagpangita og bahandi [treasure hunt]” sulod sa klasehanan o building aron makit-an kini nga mga kasulatan. Human nila makit-an ang matag kasulatan, hisguti kon unsa ang gipasabut sa kasulatan ug nganong bililhon kaayo kini.

• Pagpaambit og pipila ka mga kasulatan nga imong gipakabililhon ug ipasabut nganong makahuluganon kini kanimo. Isip tibuok klase, paghupot og lista sa gipakabililhon nga mga kasulatan nga nakita sa mga bata diha sa Bag-ong Tugon niining tuiga—sa panimalay o panahon sa Primary.

• Hisguti uban sa mga bata kon nganong usahay lisud ang pagbasa sa mga kasulatan. Hangyoa ang mga bata sa pagpaambit og tambag sa usag usa mahitungod sa pagtuon sa mga kasulatan. Hangyoa usab sila sa pagpaambit og bisan unsang positibo nga mga kasinatian nga ilang nasinati sa mga kasulatan.

• Tabangi ang mga bata sa paghimo og yano nga mga kalendaryo nga ilang magamit aron sa pagtimaan kon kapila sila mobasa sa mga kasulatan. Kini nga mga kalendaryo makapahinumdom nila sa pagbasa sa mga kasulatan kada adlaw.

Nagkinahanglan ko og akong kaugalingong pagpamatuod.

Ang mga bata nga imong gitudloan magkinahanglan sa ilang kaugalingong mga pagpamatuod aron mapabilin nilang lig-on ang ilang pagtuo kon makasinati sila og kalisdanan. Unsay imong mabuhat aron sa pagdasig kanila nga magkat-on sa kamatuoran sa ilang kaugalingon?

Posible nga mga Kalihokan

• Ipaambit ang istorya sa napulo ka mga birhen (tan-awa sa Mateo 25:1–13; tan-awa usab sa “Kapitulo 47: Ang Napulo ka mga Birhen,” Mga Istorya sa Bag-ong Tugon, 118–20). Pangutan-a ang mga bata: Sa unsang paagi ang atong mga pagpamatuod sama sa mga lampara? Nganong importante man nga adunay atong kaugalingong pagpamatuod?

• Hisguti kon unsay atong mabuhat sa paglig-on sa atong mga pagpamatuod. Alang sa mga ideya, dapita ang mga bata sa pagsiksik sa Juan 7:17 ug Moroni 10:3–5. Dapita sila sa pagpaambit og mga butang nga nahibaloan nila nga tinuod.

• Hangyoa ang mga bata nga tabangan ka sa pag-label sa mga building block og mga pulong nga naghulagway sa mga butang nga atong buhaton aron sa paglig-on sa atong mga pagpamatuod, sama sa pag-ampo. Pahimoa ang mga bata og istraktura nga nagrepresentar sa usa ka pagpamatuod gamit ang mga building block.

Awhaga ang Pagkat-on diha sa Panimalay

Unsaon nimo pag-awhag ang mga bata ug ang ilang mga ginikanan nga magkat-on gikan sa Bag-ong Tugon diha sa panimalay? Sama pananglit, mahimo nimong awhagon ang mga bata sa pagsag-ulo sa usa sa mga kasulatan nga imong gihisgutan sa klase (makatabang tingali nga bahinon ang kasulatan ngadto sa mugbo nga mga hugpong sa mga pulong) ug sa pagpaambit sa bersikulo ngadto sa ilang mga pamilya.

Pagpalambo sa Atong Pagtudlo

Ipahaum ang mga kalihokan sa edad sa mga bata nga imong gitudloan. Ang mas gagmayng mga bata nagkinahanglan og detalyado nga mga pagpasabut ug makakat-on gikan sa nagkalain-laing mga pamaagi sa pagtudlo. Samtang magkahingkod ang mga bata mas daghan na sila og matampo ug mahimong mas maayo sa pagpaambit sa ilang mga hunahuna. Hatagi sila og mga oportunidad sa pagpaambit, pagpamatuod, ug pag-apil, ug hatagi og tabang kon gikinahanglan. (Tan-awa sa Pagtudlo sumala sa Pamaagi sa Manluluwas, 25–26.)